འཆར་ཅན་རྟ་རྒྱུག་དུས་ཆེན། རྩྭ་ཐང་གི་འདུ་ཚོགས་གཟབ་རྒྱས།
སྤེལ་དུས 2024-08-20
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ།
ཀྲུང་གོའི་བོད་ལྗོངས་དྲ་བའི་འཕྲིན། ཟླ་བརྒྱད་པའི་ནག་ཆུར། ཡངས་པའི་རྩྭ་ཐང་དང་ངོ་མཚར་གྱི་རིག་གནས་རྣམ་པ་མཉམ་དུ་འདྲེས་ཤིང་། བརྗིད་ཆགས་དང་ཚོན་མདངས་གཅིག་ལ་གཅིག་རྒྱན་དུ་སྣང་། ཟླ8པའི་ཚེས10ཉིན། བྱང་ཐང་མི་དམངས་ཀྱི་ལོ་གཅིག་དུས་གཅིག་གི་རྩྭ་ཐང་གི་འདུ་ཚོགས་གཟབ་རྒྱས་ཤིག་སྟེ། 2024ལོའི་ནག་ཆུའི་འཆར་ཅན་རྟ་རྒྱུག་དུས་ཆེན་དང“གྲོང་གསེབ་དར་རྒྱས། ནག་ཆུ་མདུན་སྐྱོད”ཀྱི་བྱེད་སྒོ་སྤེལ་བ་རེད།
2024ལོའི་ནག་ཆུའི་འཆར་ཅན་རྟ་རྒྱུག་དང“གྲོང་གསེབ་དར་རྒྱས། ནག་ཆུ་མདུན་སྐྱོད”ཀྱི་བྱེད་སྒོའི་འགོ་ཚུགས་མཛད་སྒོའི་ཡུལ་དངོས། ནག་ཆུའི་འཆར་ཅན་རྟ་རྒྱུག་ནི་བོད་ཀྱི་སྲོལ་རྒྱུན་རིག་གནས་ཁྲོད་ཀྱི་འོད་སྟོང་འཕྲོ་བའི་མུ་ཏིག་ལྟ་བུ་ཞིག་ཡིན་ལ། ལོ་རྒྱུས་ཡུན་རིང་དང་ཤུགས་རྐྱེན་ཟབ་མོ་ལྡན་ཡོད། 2024ལོའི་ནག་ཆུའི་འཆར་ཅན་རྟ་རྒྱུག་ཐོག“ཀྲུང་ཧྭའི་རིག་གནས་དར་སྤེལ་གཏོང་། བྱང་ཐང་རྟ་ཕོའི་བང་རྩལ་འགྲན”བརྗོད་དོན་གཙོ་བོར་བྱས་ནས་བྱང་ཐང་གི་སྲོལ་རྒྱུན་རྟ་རྒྱུག་དང“གྲོང་གསེབ་དར་རྒྱས། ནག་ཆུ་མདུན་སྐྱོད”ཀྱི་བྱེད་སྒོ་མཉམ་འདྲེས་གཏིང་ཟབ་བྱས་ཏེ་ཕུལ་བྱུང་གི་རིག་རྩལ་འགྲེམས་འཁྲབ་དང་། སྲོལ་རྒྱུན་གྱི་རྟ་རྩལ་འཁྲབ་སྟོན། ལུས་རྩལ་འགྲན་བསྡུར། ཚོང་འདུས། ཁྱད་ལྡན་ཐོན་རྫས་འགྲེམས་ཚོང་། ཚོང་འགུགས་མ་འདྲེན་གྱི་གྲོས་མོལ། ཡུལ་སྐོར་ཐོན་ཁུངས་ངོ་སྤྲོད་འོས་སྦྱོར། འབད་འབུངས་གྲུབ་འབྲས་ངོམ་སྟོན་སོགས་གཞི་གཅིག་ཏུ་འདུས་པའི་ཕྱོགས་བསྡུས་རང་བཞིན་གྱི་རིག་གནས་དང་ཡུལ་སྐོར་གྱི་འདུ་ཚོགས་གཟབ་རྒྱས་ཤིག་དང་། དུས་རབས་གསར་པའི་གསེར་རྙེད་ཆུས་ཀྱི་འཕེལ་རྒྱས་ཡར་ཐོན་དང་བསམ་པའི་ཉམས་འགྱུར་མངོན་པར་བྱེད་པའི་སྐར་ཁུང་གལ་ཆེན་ཞིག་ཏུ་འགྱུར་བར་བྱས་ཡོད།
ད་ཐེངས་ཀྱི་རྟ་རྒྱུག་དུས་ཆེན་ལ་མཚོ་སྔོན་དང་། སི་ཁྲོན། བོད་རང་སྐྱོང་ལྗོངས་ནང་ཁུལ་གྱི་ས་གནས（གྲོང་ཁྱེར）བཅས་ནས་ཡོང་བའི་རྟ་ཕོ་སྐད་གྲགས་ཅན་འབྲེལ་ཡོད་ཀྱི་འགྲན་བསྡུར་ལ་ཞུགས་ཡོད་པ་དང་། ནག་ཆུ་གྲོང་ཁྱེར་གྱི་རྫོང་དང་ཆུས་བཅུ་གཅིག་གི་འབྲོག་པ་མང་ཚོགས་ཀྱིས་སྣ་མང་ཕུན་སུམ་ཚོགས་པའི་རྒྱན་གོས་འཁྲབ་སྟོན་བྱས་ནས་མངོན་མིན་རིག་གནས་ཤུལ་བཞག་ལུས་ཐོག་ཏུ་གྱོན་ཏེ་བྱང་ཐང་གི་རྣམ་པར་བཀྲ་བའི་རྒྱན་གོས་ཀྱི་ཚོན་མདངས་དང་དེ་བཞིན་རིག་གནས་ཀྱི་ནང་དོན་ཟབ་མོ་ངོམས་པ་རེད། འགོ་ཚུགས་མཛད་སྒོའི་ཐོག་གེ་སར་གྱི་སྒྲུང་གྱེར་བ་དང་། ལོ་ཆུང་གཞོན་ནུས་རྟ་ཕོ་ལྕག་གིས་སྐུལ་བ། ངོ་མཚར་ཆེ་བའི་རྟ་རྩལ་འཁྲབ་སྟོན་ལས་དཔའ་ཉམས་མངོན་པ་དང་། ནག་ཆུ་མི་དམངས་ཀྱི་དཔའ་ངར་ཆེན་པོས་འབད་འཐབ་བྱེད་པའི་བསམ་པའི་ཉམས་འགྱུར་མངོན་པ་མ་ཟད། སྤྱི་ཚོགས་རིང་ལུགས་དེང་རབས་ཅན་གྱི་ནག་ཆུ་གསར་པའི་བརྗིད་ཉམས་ལྡན་པའི་འཆར་གཞིའང་བཀོད་ཡོད།
སྐབས་འདིའི་རྟ་རྒྱུག་དུས་ཆེན་ཐོག་སྲོན་རྒྱུན་གྱི་རྒྱན་གོས་ངོམ་སྟོན།
ད་ཐེངས་ཀྱི་རྟ་རྒྱུག་དུས་ཆེན་ལ་སྲོལ་རྒྱུན་གྱི་རྟ་རྒྱུག་ཆེན་པོ་དང་། སྨི10000གི་སྲོལ་རྒྱུན་རྟ་འགྲོས། སྲོལ་རྒྱུན་གྱི་ར་བའི་ནང་གི་སྨི10000ཡི་མྱུར་ཚད་འགྲན་པ་བཅས་ཡོད་པའི་རྨང་གཞིའི་ཐོག་ད་དུང་སྨི12000གི་རྟ་འགྲོས་དང་། རྟ་ར་ཆེ་ཆུང་ནང་གི་སྨི10000གི་མྱུར་ཚད་འགྲན་བསྡུར། རྟ་ར་ཆུང་བའི་ནང་གི་སྨི6000གི་མྱུར་ཚད་འགྲན་བསྡུར། སྨི5000གི་རྟེའུ(ལོ་བཞི་ནང་ཚུན)མྱུར་ཚད་འགྲན་བསྡུར་དང་སྨི5000གི་རྟ་འགྲོས། དེ་བཞིན་མཐའ་འཁོར་གྱི་ཞིང་ཆེན་དང་གྲོང་ཁྱེར་དང་ལྗོངས་ནང་ཁུལ་གྱི་གྲོང་ཁྱེར་ཁག་གི་ས་རྟ་ཕོ་སྐད་གྲགས་ཅན་གྱི་ཨང་དང་པོ་རྩོད་པའི་འགྲན་བསྡུར་སོགས་ཀྱི་རྣམ་གྲངས་མང་དུ་བཏང་ཡོད་པ་རེད། གཞན་ཡང་རྟ་རྒྱུག་འགྲན་བསྡུར་དུས་ཆེན་རིང་ད་དུང་ཞིང་འབྲོག་པའི་སྤྲོ་སྣང་ལུས་རྩལ་འགྲན་ཚོགས་སྐབས་དང་པོ་གཉེར་བ་དང་། ཤོ་རྒྱག་པ་དང་། ལུག་ཞགས་རྒྱག་པ། ལག་ཤུགས་འགྲན་པ་སོགས་འགྲན་བསྡུར་རྣམ་གྲངས་ཁག12བཀོད་སྒྲིག་བྱས་ཡོད།
རྩོམ་སྒྲིག་པ། དཔལ་གཡང་།
