བོད་ལྗོངས་སུ་ལས་ཀ་འདི་བྱེད་མཁན10ལ་ཁྲིམས་ཆད་ཕོག་འདུག
སྤེལ་དུས 2024-08-26
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
རྩོམ་པ་པོ།
ཉེ་ཆར། མེ་ཏོག་རྫོང་མི་དམངས་ཞིབ་དཔྱོད་ཁང་གིས་གཞུང་གཏུག་བྱས་པའི་རྒྱལ་ཁབ་ཀྱི་གཙོ་གནད་སྲུང་སྐྱོབ་རྩི་ཤིང་ལ་གནོད་འཚེ་བཏང་བའི་དོགས་ཡོད་གྱོད་གཞི་ཞིག་ལ་ཡོངས་བསྒྲགས་ངང་ཁྲིམས་ར་འཚོགས་ནས་ཞིབ་གཅོད་བྱས་པ་མ་ཟད། འདྲི་གཅོད་ལས་ཁུངས་ཀྱིས་ཞིབ་དཔྱོད་ལས་ཁུངས་ཀྱི་ཉེས་ཆད་ཚད་འབེབས་གྲོས་འགོ་དང་ལེན་བྱས་ཏེ། རྒྱལ་ཁབ་ཀྱི་གཙོ་གནད་སྲུང་སྐྱོབ་རྩི་ཤིང་ལ་གནོད་འཚེ་བཏང་བའི་ཉེས་པའི་ཐོག་ནས། ཞུ་སྦྱོར་ཕྱི་མ10ལ་ཁག་སོ་སོར་དུས་བཀག་བཙོན་འཇུག་ལོ་གསུམ་གྱི་ཁྲིམས་ཐག་བཅད་པ་དང་། ཁྲིམས་ལྟར་ཉེས་ཆད་ཕྱིར་འགྱངས་ལོ་གསུམ་དང་ཟླ་དྲུག་ནས་ལོ་གསུམ་དང་ཟླ་གཅིག་བར་བྱས་པ་མ་ཟད། སྒོར་ཉིས་སྟོང་གི་དངུལ་ཆད་བཅད་འདུག
2022ལོའི་ཟླ8པར། ཞུ་སྦྱོར་ཕྱི་མ་རྡོ་ཆེ་གེ་མོ་སོགས་ཞུ་སྦྱོར་ཕྱི་མ10ཡིས་ཁྱིམ་ཚང་གི་ཡོང་འབབ་མང་དུ་གཏོང་ཆེད། རྐང་ཐང་དུ་མེ་ཏོག་རྫོང་གི52Kསྤྱི་བདེ་ཞིབ་བཤེར་ས་ཚིགས་ནས་གཡོལ་ཏེ་མེ་ཏོག་རྫོང་སྟག་མོ་ཤང་ཁོངས་ཀྱི་རི་ཁུལ་དུ་འཇོར་དང་གོ་གྲི་སྤྱད་དེ་ཁྲིམས་འགལ་ངང་མེ་ཏོག་ཏུའུ་སོན་ལན་སྡོང་རྐང1440ནས6715བར་བཀོག་ཡོད། ཧྲན་ཞི་ཀྲེང་རེན་ཁྲིམས་འཛིན་གསལ་འབྱེད་སུའོ་ཡིས་གྱོད་གཞི་དང་འབྲེལ་བ་ཡོད་པའི་རྩི་ཤིང་གི་རིགས་དང་སྲུང་སྐྱོབ་རིམ་པར་གསལ་འབྱེད་བྱས་པ་བརྒྱུད། གྱོད་གཞི་དང་འབྲེལ་བའི་རི་སྐྱེས་རྩི་ཤིང་ནི་མེ་ཏོག་ཏུའུ་སོན་ལན་ཡིན་པ་དང་། དེ་ནི་རྒྱལ་ཁབ་ཀྱི་རིམ་པ་གཉིས་པའི་གཙོ་གནད་སྲུང་སྐྱོབ་རི་སྐྱེས་རྩི་ཤིང་གི་ཁོངས་སུ་གཏོགས་ཀྱི་ཡོད།
ཞིབ་བཤེར་ཁྲིམས་སྦྱོར་དུས་མཚམས་སུ། མེ་ཏོག་རྫོང་མི་དམངས་ཞིབ་དཔྱོད་ཁང་གིས་གྱོད་གཞི་བྱུང་བའི་རྒྱབ་ལྗོངས་ཆེན་པོར་བསམ་གཞིགས་གང་ལེགས་བྱས་ཏེ། རྡོ་ཆེ་གེ་མོ་སོགས་ཞུ་སྦྱོར་ཕྱི་མ10ནི་ཁྲིམས་ལས་འགལ་ཐེངས་དང་པོ་ཡིན་པ་དང་། ཁྱིམ་ཚང་གི་དཔལ་འབྱོར་ལ་དཀའ་ངལ་ཡོད་པ། རང་མོས་ངང་ཉེས་པ་ཁས་ལེན་དང་ཉེས་ཆད་དང་ལེན་བྱས་པ་བཅས་ལ་གཞིགས་ནས། ཁོ་ཚོའི་ཉེས་གསོག་ཀུན་སློང་ནི་འཚོ་བ་ལེགས་སུ་གཏོང་རྒྱུ་ཡིན་པ་མ་ཟད། གྱོད་གཞི་དང་འབྲེལ་བ་ཡོད་པའི་མེ་ཏོག་ཏུའུ་སོན་ལན་དག་ཆེད་ལས་ཀྱི་སྤོ་འཛུགས་བྱས་རྗེས་མང་ཆེ་བ་གསོན་ཐུབ་ཡོད་ཅིང་གཏོར་སྐྱོན་ཕོག་པའི་འབྱུང་ཁམས་ལ་ཚད་གཞི་མཐོ་ཤོས་ཀྱི་ཐོག་ནས་ཉམས་གསོ་ཐུབ་ཡོད་པས། གུ་ཡངས་དང་ནན་པོ་ཟུང་འབྲེལ་གྱི་ཉེས་དོན་སྲིད་ཇུས་ལག་ལེན་མཐར་ཕྱིན་བསྟར་ཆེད། མེ་ཏོག་རྫོང་གི་འབྱུང་ཁམས་ཁོར་ཡུག་ཐོན་ཁུངས་ལ་ཆུ་ཚད་མཐོ་བའི་སྲུང་སྐྱོབ་ཐུབ་རྒྱུར་འདེགས་སྐྱོར་བྱེད་པ་དང་དུས་མཚུངས་སུ། ཁྲིམས་འཛིན་གྱི་ཤུགས་ཚད་དང་དྲོད་ཚད་བརྒྱུད་སྤེལ་བྱས་ནས། ཞུ་སྦྱོར་ཕྱི་མ་10ལ་དུས་བཀག་བཙོན་འཇུག་ལོ་གསུམ་གྱི་ཉེས་ཆད་གཅོད་རྒྱུ་དང་ཁྲིམས་ལྟར་ཉེས་ཆད་ཕྱིར་འགྱངས་བྱ་རྒྱུ། དངུལ་ཆད་ཉུང་ཙམ་གཅོད་རྒྱུ་བཅས་ཀྱི་གྲོས་འགོ་བཏོན་ཡོད།
མེ་ཏོག་རྫོང་ནི་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་ཡིན་ལ། སྐད་གྲགས་ཆེ་བའི“སྲོག་ཆགས་དང་རྩི་ཤིང་གི་གཞི་རྒྱུའི་མཛོད”ཅིག་ཀྱང་ཡིན། མེ་ཏོག་ཏུའུ་སོན་ལན་ནི་རྒྱལ་ཁབ་ཀྱི་རིམ་པ་གཉིས་པའི་གཙོ་གནད་སྲུང་སྐྱོབ་རི་སྐྱེས་རྩི་ཤིང་ཡིན་པའི་ངོས་ནས། དེར་སྤྱན་གཟིགས་ཀྱི་རིན་ཐང་དང་། འབྱུང་ཁམས་ཀྱི་རིན་ཐང་། དཔལ་འབྱོར་གྱི་རིན་ཐང་བཅས་ཆེན་པོ་ལྡན་ཡོད།
《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཉེས་ཁྲིམས》དོན་ཚན་སུམ་བརྒྱ་ཞེ་བཞི་པ 【རྒྱལ་ཁབ་ཀྱིས་གཙོ་གནད་ཐོག་སྲུང་སྐྱོབ་བྱེད་པའི་རྩི་ཤིང་ལ་གནོད་འཚེ་གཏོང་བའི་བྱས་ཉེས】 ནང་། རྒྱལ་ཁབ་ཀྱི་གཏན་འབེབས་ལས་འགལ་ཏེ་རྩ་ཆེའི་ཤིང་སྡོང་ངམ་རྒྱལ་ཁབ་ཀྱིས་གཙོ་གནད་དུ་སྲུང་སྐྱོབ་བྱེད་པའི་རྩི་ཤིང་གཞན་དག་ཁྲིམས་འགལ་ངང་གཅོད་པ་དང་གཏོར་བརླག་གཏོང་བའམ། ཡང་ན་རྩ་ཆེའི་ཤིང་སྡོང་ངམ་རྒྱལ་ཁབ་ཀྱིས་གཙོ་གནད་དུ་སྲུང་སྐྱོབ་བྱེད་པའི་རྩི་ཤིང་གཞན་དག་དང་དེའི་ཐོན་རྫས་ཁྲིམས་འགལ་ངང་ཉོ་སྒྲུབ་དང་སྐྱེལ་འདྲེན། ལས་སྣོན། ཕྱིར་འཚོང་བཅས་བྱས་རིགས་ལ་དུས་བཀག་བཙོན་འཇུག་ལོ་གསུམ་མན་ནམ་བཙན་ཉར་ལས་བསྐུལ། ཡང་ན་བཙན་སྡོམ་གྱི་ཉེས་ཆད་གཅོད་རྒྱུ་དང་། དངུལ་ཆད་ཆབས་སྦྲགས་སུ་གཅོད་རྒྱུ། ཉེས་ཚབས་ཆེ་རིགས་ལ་དུས་བཀག་བཙོན་འཇུག་ལོ་གསུམ་ཡན་ནས་ལོ་བདུན་མན་བར་གྱི་ཉེས་ཆད་གཅོད་རྒྱུ་དང་དངུལ་ཆད་ཆབས་སྦྲགས་སུ་གཅོད་རྒྱུ་ཡིན་ཞེས་འཁོད་ཡོད།
