ད་ལོ་ནི་བོད་ལྗོངས་ལ་ཁ་གཏད་རོགས་སྐྱོར་བྱེད་པའི་ལས་དོན་ལག་བསྟར་བྱས་ནས་ལོ30འཁོར་བ་རེད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བོད་ལྗོངས་ཀྱི་ལས་དོན་ལ་ཚད་མཐོའི་མཐོང་ཆེན་གནང་བ་དང་། བོད་ལྗོངས་ཀྱི་མི་རིགས་ཁག་གི་མི་དམངས་ལ་ཐུགས་ཁུར་གནང་བ། སྐུ་ངོ་མས་དུས་རབས་གསར་པའི་བོད་ལྗོངས་ཀྱི་ལས་དོན་ལ་བཀོད་སྒྲིག་གནང་སྟེ“རྒྱལ་ཁབ་སྐྱོང་བར་ངེས་པར་དུ་མཐའ་མཚམས་སྐྱོང་བ་དང་མཐའ་མཚམས་སྐྱོང་བར་སྔོན་ལ་བོད་ལྗོངས་བརྟན་ལྷིང་ཡོང་བ་བྱེད་དགོས”ཞེས་པའི་འཐབ་ཇུས་དགོངས་པ་བཏོན་གནང་ནས་དུས་རབས་གསར་པའི་ཏང་གི་བོད་སྐྱོང་ཐབས་ཇུས་ཁ་གསལ་བཏོན་གནང་ཡོད། ལོ30ཡི་རིང་། རྒྱུན་ཆད་མེད་པར་འབད་བརྩོན་བྱེད་པའི་ཁྲོད་དུ། དུས་རབས་གསར་པར་ཐོན་པའི“ཚོགས་སྒྲིག་རྣམ་པའི”བོད་སྐྱོར་དང་རིག་སྟོབས་ཀྱི་བོད་སྐྱོར་སོགས་བོད་སྐྱོར་བྱེད་སྟངས་གསར་པའི་འོག་བོད་ལྗོངས་འཕེལ་རྒྱས་མྱུར་པོ་དང་། འགྱུར་ལྡོག་ཆེ་ཤོས། མང་ཚོགས་ལ་ཐོབ་སྣང་ཆེ་ཤོས་བཅས་ཀྱི་ལོ་རྒྱུས་དུས་སྐབས་སུ་སླེབས་ཡོད།
ནག་ཆུ་གྲོང་ཁྱེར་ནི་ཀྲུང་གོའི་ས་བབ་མཐོ་ཤོས་ཀྱི་ས་ཁུལ་རིམ་པའི་གྲོང་ཁྱེར་ཞིག་རེད། རྒྱ་ཁྱོན་ལ་སྤྱི་ལེ་གྲུ་བཞི་མ་ཁྲི43ཡོད་པ་དང་མི་འབོར་འདུས་ཚད་སྤྱི་ལེ་གྲུ་བཞི་མ་རེར་མི་གཉིས་ཀྱང་ཟིན་གྱི་མེད། འོན་ཀྱང་ཆེས་མཐོ་སར་གནས་པའི་ནག་ཆུར་ས་གནས་དེ་གའི་མང་ཚོགས་ཁྲི50ལྷག་ཙམ་ལ་སྨན་བཅོས་ཞབས་ཞུ་མཁོ་འདོན་བྱེད་མཁན་རྒྱལ་ཡོངས་ཀྱི་ས་བབ་མཐོ་ཤོས་ཀྱི་ཀ་པ་རིམ་པ་གསུམ་པའི་སྨན་ཁང་སྟེ་ནག་ཆུ་གྲོང་ཁྱེར་མི་དམངས་སྨན་ཁང་ཞིག་ཡོད། དེ་ནི་བྱང་ཐང་གི་ཕྱོགས་བསྡུས་རང་བཞིན་གྱི་སྨན་ཁང་ཆེ་གྲས་འབའ་ཞིག་དེ་ཡིན་པ་མ་ཟད། ལེའོ་ཉིང་ཞིང་ཆེན་གྱི་སྨན་བཅོས་ཤེས་ལྡན་མི་སྣས“ཚོགས་སྒྲིག་རྣམ་པའི”བོད་སྐྱོར་ཁ་གཏད་རོགས་སྐྱོར་བྱེད་པའི་སྨན་ཁང་ཞིག་ཀྱང་རེད།
དེ་སྔའི་ཐར་ཐོར་འདེམས་མངགས་ཀྱི་རོགས་སྐྱོར་བྱེད་སྟངས་དང་མི་འདྲ་བར2015ལོ་ནས་བཟུང་སྨན་བཅོས་ཤེས་ལྡན་མི་སྣའི“ཚོགས་སྒྲིག་རྣམ་པའི”བོད་སྐྱོར་བྱེད་འགོ་ཚུགས། དེ་ནི་རོགས་སྐྱོར་བྱེད་མཁན་ཞིང་ཆེན་གྱི་སྤུས་ལེགས་སྨན་བཅོས་ཤེས་ལྡན་མི་སྣའི་དཔུང་ཁག་དང་ས་གནས་དེ་གའི་དོན་དངོས་ཀྱི་སྨན་བཅོས་དགོས་མཁོ་ཟུང་འབྲེལ་བྱས་ནས་ཚོགས་སྒྲིག་བྱས་ཏེ་འདེམས་མངགས་རོགས་སྐྱོར་བྱེད་པ་ཞིག་རེད། དམིགས་ཡུལ་ནི་ས་གནས་དེ་གར་ཆུ་ཚད་མཐོ་བའི་སྨན་བཅོས་དཔུང་ཁག་ཅིག་བཏོད་ནས་རོགས་སྐྱོར་བྱ་ཡུལ་སྨན་ཁང་གི་ཕྱོགས་བསྡུས་སྟོབས་ཤུགས་དང་ཆེད་ལས་ཚན་ཁག་གི་ལག་རྩལ་སྟོབས་ཤུགས་མགྱོགས་མྱུར་དང་ཁྱོན་ཡོངས་ནས་མཐོ་རུ་གཏོང་རྒྱུ་དེ་རེད། དཔེར་ན། ནག་ཆུ་གྲོང་ཁྱེར་མི་དམངས་སྨན་ཁང་གི་བུ་བཙའི་ཚན་ཁག་ནི་དེ་ལྟར་རེད།
ལོ་རབས90པར་སྐྱེས་པའི་སྨན་པ་ལིའུ་ཧའོ་ནི་ལེའོ་ཉིང་ཞིང་ཆེན་གྱི་ཁག་བདུན་པའི་“ཚོགས་སྒྲིག་རྣམ་པའི”སྨན་བཅོས་བོད་སྐྱོར་ལས་དོན་རུ་ཁག་གི་བུ་བཙའི་ཚན་ཁག་གི་ཆེད་མཁས་པ་ཞིག་ཡིན་པ་དང་། བོད་ལྗོངས་སུ་བསྐྱོད་ནས་ཟླ་བ་ལྔ་ལྷག་ཙམ་སོང་རིང་ཁོང་གིས་ཉེན་ཁ་ཆེ་བའི་སྦྲུམ་མ་བཅུ་ལྷག་ཙམ་བདེ་བླག་ངང་སྐྱོབ་བཅོས་བྱས་ཡོད།
ནག་ཆུ་ནི་མཚོ་བོད་ས་མཐོའི་ལྟེ་བའི་ས་ཁོངས་སུ་གནས་ཡོད། འདིར་ས་རྒྱ་ཆེ་ཞིང་མི་འབོར་ཉུང་བ་དང་། གྲང་ངར་ཆེ་བ། གསོ་རླུང་དཀོན་པ་བཅས་ཡོད། ཆ་སྙོམས་གསོ་རླུང་འདུས་ཚད་ནང་སའི་ཕྱེད་ཀ་ཙམ་ཡིན་པ་དང་། ལོ་རེའི་ཆ་སྙོམས་དྲོད་ཚད་ཀླད་ཀོར་འོག་གི་ཧྲེ་ཧྲི་ཏུའུ1ཡིན། དེ་སྔ་དེ་ནི་བོད་ལྗོངས་ཧྲིལ་པོའི་སྨན་བཅོས་ཐོན་ཁུངས་དཀོན་པའི་ས་ཁུལ་གྱི་གྲས་ཤིག་ཡིན་པ་དང་། དེ་ལྟར་ཡིན་པའི་དབང་གིས་ཕྲུ་གུ་སྐྱེས་རྒྱུ་ནི་ནག་ཆུའི་བུད་མེད་ཚོར་མཚོན་ན་རྟག་ཏུ་ཚོད་བགམ་དྲག་པོ་ཞིག་རེད།
སྨན་བཅོས་ཤེས་ལྡན་མི་སྣའི“ཚོགས་སྒྲིག་རྣམ་པའི”བོད་སྐྱོར་གྱི་རོགས་རམ་འོག 2021ལོའི་ལོ་མཇུག་ཏུ་ནག་ཆུ་གྲོང་ཁྱེར་མི་དམངས་སྨན་ཁང་གྲོང་ཁྱེར་རིམ་པའི་ཉེན་ཁ་ཆེ་བའི་སྦྲུམ་མ་སྐྱོབ་བཅོས་ལྟེ་གནས་ཀྱི་སྒོ་བྱང་དངོས་སུ་བཀལ་པ་རེད། 2023ལོར་ནག་ཆུའི་སྦྲུམ་མ་དང་ཕྲུ་གུ་དམར་འབྱར་ཤི་ཚད2015ལོ་ལས80%ཙམ་ཉུང་དུ་ཕྱིན་ཡོད།
ནག་ཆུ་གྲོང་ཁྱེར་མི་དམངས་སྨན་ཁང་ཕྱི་བཅོས་ཚན་ཁག་གཉིས་པས་ཀླད་པའི་ཁྲག་སྐྲན་མེད་པར་བཟོ་བའི་གཤགས་བཅོས་ཤིག་ལམ་སེང་བྱེད་ཉེར་ཡོད། ནད་པ་དེ་ནི་ལོ36ལ་སླེབས་པའི་བོད་རིགས་གཞོན་ནུ་ཞིག་རེད། གཤགས་བཅོས་བྱེད་ཐེངས་རེའི་སྔོན་ལ་སྨན་པས་ནད་པར་གཙོ་བཅོས་སྨན་པ་ནི་བོད་སྐྱོར་སྨན་པ་རེད་ཅེས་བཤད་ན་ནད་པ་བློ་བདེ་པོ་གྱུར་སྲིད།
ཉིན་དེའི་གཙོ་བཅོས་སྨན་པ་ནི་ལེའོ་ཉིང་ཞིང་ཆེན་གྱི་ཚོགས་སྒྲིག་རྣམ་པའི་བོད་སྐྱོར་སྨན་བཅོས་ལས་དོན་རུ་ཁག་བདུན་པའི་ཅིན་ཀྲོའུ་གསོ་རིག་སློབ་ཆེན་ཁོངས་གཏོགས་སྨན་ཁང་དང་པོའི་དབང་རྩའི་ཕྱི་ནད་ཚན་ཁག་གི་ཆེད་མཁས་པ་སྨན་པ་པའོ་ལུང་ཡིན།
འདི་ལྟ་བུའི་དབང་རྩའི་ཕྱི་ནད་ཚན་ཁག་གི་གཤགས་བཅོས་ནི་ད་ཆའི་ནག་ཆུས་རྒྱུན་དུ་བྱེད་ཐུབ་པ་ཞིག་ཏུ་གྱུར་ཡོད། ས་གནས་དེ་གའི་སྨན་བཅོས་ཐོན་ཁུངས་ཀྱི་ཉམས་ཞན་ལྷུ་ཚིགས་ལ་དམིགས་ནས“ཚོགས་སྒྲིག་རྣམ་པའི”སྨན་བཅོས་བོད་སྐྱོར་ཐད་གནད་ལ་འཁེལ་བའི་སྒོ་ནས་བདམས་པའི་ཆེད་མཁས་པ་ཁག་གཅིག་གིས་སྔོན་ཐོན་གྱི་ཕྱི་ནད་ཚན་ཁག་གི་ལག་རྩལ་ནག་ཆུར་འཁྱེར་ནས་ས་མཐོའི་ནད་པ་ཚོར་ཡང་བདེ་ཐང་ཡོང་བར་བྱས་ཡོད།
ལོ35ལ་སླེབས་པའི་སྨན་པ་པའོ་ལུང་ནི་དེ་གར་ཕེབས་པའི་དབང་རྩའི་ཕྱི་ནད་ཚན་ཁག་གི་ཆེད་མཁས་པ་ཨང་བདུན་པ་ཡིན་ལ་སྨན་པ་རྡོ་རྗེ་དང་མཉམ་དུ་ལས་ཀ་བྱེད་པའི་བོད་སྐྱོར་ཆེད་མཁས་པ་ཨང་བཞི་པའང་རེད།
གཤགས་བཅོས་ཁང་ནང་དུ་མཁྲེགས་ཆས་སྒྲིག་ཆས་དང་ནང་སའི་སྨན་ཁང་བསྡུར་ན་ཁྱད་པར་ཆེན་པོ་མེད། སྨན་པ་པའོ་ལུང་དང་སྨན་པ་རྡོ་རྗེས་དུས་རྒྱུན་མཉམ་དུ་ལས་ཀ་མང་པོ་བྱེད་དགོས་པས་བོད་སྐྱོར་ལས་བྱུང་བའི་ཕན་པ་མྱོང་ཚོར་ཟབ་མོ་ཡོང་གི་ཡོད།
ནག་ཆུ་གྲོང་ཁྱེར་མི་དམངས་སྨན་ཁང་དུ་ས་གནས་དེ་གའི་བོད་རིགས་སྨན་པ་ཚོས་ཁོང་ཚོར་རོགས་རམ་བྱེད་མྱོང་བའི་བོད་སྐྱོར་སྨན་པའི་སྐོར་གླེང་སྐབས་སྤྲོ་སྣང་གིས་ཁེངས་ཡོད། བྱིས་ནད་ཚན་ཁག་གི་ཀྲུའུ་རེན་འཇིགས་མེད་ཀྱིས་ཁོང་དང་དཔུང་པ་མཉམ་གཤིབ་ཀྱིས་དམག་འཐབ་བྱེད་མཁན་སྨན་པ་ཚང་མའི་མིང་གསལ་པོར་ངེས་ཀྱི་ཡོད།
2023ལོའི་ཟླ6པར། ནག་ཆུ་གྲོང་ཁྱེར་མི་དམངས་སྨན་ཁང་བྱིས་ནད་ཚན་ཁག་དེ་གྲོང་ཁྱེར་རིམ་པའི་ཉེན་ཚབས་ཆེ་བའི་ཕྲུ་གུ་དམར་འབྱར་སྐྱོབ་བཅོས་ལྟེ་གནས་སུ་གྱུར།
ཀྲུའུ་རེན་འཇིགས་མེད་ཀྱི་སྙན་ཞུར་ལན་འབྱོར་ཞིང་། ད་ལོ་ཁོང་དང་མཉམ་དུ་ལས་ཀ་བྱེད་བཞིན་པའི་བོད་སྐྱོར་སྨན་པ་ཐེན་ཚུང་ལིའང་དེ་གར་སླེབས་པའི་ཕྲུ་གུ་གསར་སྐྱེས་བྱིས་ནད་ཚན་ཁག་གི་ཆེད་མཁས་པ་དང་པོ་ཡིན། NICUནང་གི་ཕྲུ་གུ་དམར་འབྱར་ཆུང་ཆུང་དེ་གཉིས་ནི་སྨན་པ་ཐེན་དང་སྨན་པ་འཇིགས་མེད་གཉིས་ཀྱིས་ཡུན་རིང་མ་སོང་གོང་སྨན་བཅོས་བྱས་པའི་ལུས་པོའི་ལྗིད་ཚད་ཆུང་ཤོས་ཀྱི་མཚེ་མ་གཉིས་ཡིན་པ་དང་། གཅེན་གཅུང་གཉིས་སྐྱེས་སྐབས་བསྡོམས་ན་ལྗིད་ཚད་ལ་ཁེ2000ཡང་ཟིན་གྱི་མེད། ད་ཆ་ཁོང་གཉིས་ཀྱི་ལུས་པོའི་ལྗིད་ཚད་མི་ཉུང་བ་ཞིག་འཕར་ཡོད།
ད་ཆ་སྔ་སྐྱེས་ཕྲུ་གུ་ཆུང་ཆུང་དེ་འདྲ་སྐྱོབ་བཅོས་བྱེད་པའི་ནུས་པ་ལྡན་ཡོད། དེའི་ཐད་བྱིས་ནད་ཚན་ཁག་ཏུ་ལས་ཀ་བྱས་ནས་ལོ20སོང་བའི་སྨན་པ་འཇིགས་མེད་དང་ནག་ཆུར་སླེབས་ནས་ཡུན་རིང་མ་སོང་བའི་སྨན་པ་ཐེན་གཉིས་ཀར་མྱོང་བ་ཟབ་མོ་ཡོད། སྔོན་ཆད་སེམས་ལ་བསམས་ཀྱང་ནུས་པས་མི་འདང་བ་དང་། ཆེད་ལས་ཀྱི་NICUནད་ཁང་མེད་ལ། ཆེད་ལས་ཀྱི་ཡོ་བྱད་དང་རམ་འདེགས་སྒམ་ཡང་མེད། ད་ཆ་ལྗིད་ཚད་ལ་ཁེ1000ཡས་མས་ཀྱི་ཕྲུ་གུ་དམར་འབྱར་ལ་སྨན་བཅོས་བྱེད་པའི་ནུས་པ་ཡོད་པས་སེམས་ལྷོད་པོ་ཡོད།
ཁ་གཏད་བོད་སྐྱོར་བྱས་པའི་ལོ30ནི་བོད་ལྗོངས་ཀྱི་དམངས་འཚོ་ལེགས་སུ་ཕྱིན་པའི་ལོ30ཡིན། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་སློབ་གསོ་དང་། སྨན་བཅོས། རྒན་གསོ་སོགས་ཁྱབ་ཁོངས་ཚུད་པའི་འགན་ལེན་མ་ལག་བོད་ལྗོངས་སུ་ཁྱོན་ཡོངས་ནས་བཙུགས་ཡོད། འཕེལ་རྒྱས་ཁྲོད་དམངས་འཚོ་ལེགས་སུ་གཏོང་བ་དང་དམངས་འཚོ་ལེགས་སུ་གཏོང་བའི་ཁྲོད་སྟོབས་ཤུགས་གཅིག་ཏུ་སྒྲིལ་དགོས། བོད་སྐྱོར་ལས་དོན་ཁྲོད་ཐོན་ལས་ལ་བརྟེན་ནས་བོད་སྐྱོར་བྱ་རྒྱུ་དེའང་གྲུབ་ཆ་གལ་ཆེན་ཞིག་ཡིན།
གཞིས་རྩེ་གྲོང་ཁྱེར་དུ་ལོ30ཡི་རིང་འཕེལ་རྒྱས་བཏང་བའི་ཐོན་ལས་ཤིག་ས་གནས་དེ་གའི་མི་རྣམས་ཀྱི་འཚོ་བ་དང་ཁ་འབྲལ་ཐབས་མེད་པ་ཞིག་རེད།
ཐོ་རེངས་ཆུ་ཚོད་ལྔ་པར་གྲོང་མི་དངོས་གྲུབ་ཀྱིས་རང་ཁྱིམ་གྱི་དྲོད་ཁང་ནང་ཉིན་གཅིག་གོང་བཏོག་མ་ཐག་པའི་སྔོ་ཚལ་འཁྱེར་ནས་ལམ་ལ་ཆས་པ་རེད། ད་ཆ་པ་སྣམ་རྫོང་གི་སྔོ་ཚལ་གཞིས་རྩེར་སྐད་གྲགས་ཧ་ཅང་ཆེན་པོ་ཡོད་པ་དང་། ཉིན་ལྟར་ནམ་མ་ལངས་གོང་གྲོང་མི་ཚོས་རང་ཁྱིམ་ནས་ཐོན་པའི་སྔོ་ཚལ་གསར་པ་འཁྱེར་ནས་སྤྱི་ལེ50ཡི་སར་ཡོད་པའི་གཞིས་རྩེ་གྲོང་ཁྱེར་དུ་ཚོང་བར་འགྲོ་གི་ཡོད།
དབྱར་ཁ་པ་སྣམ་རྫོང་གི་སྔོ་ཚལ་འཐུས་ནས་ཚོང་རར་འདོན་པའི་དུས་ཚིགས་ཡིན་ལ། ནང་སའི་སྔོ་ཚལ་འབོར་ཆེན་བོད་ལྗོངས་ཀྱི་ཁྲོམ་རར་འདོན་པའི་དུས་ཚིགས་ཤིག་ཀྱང་རེད། ཇི་ལྟར་བྱས་ནས་པ་སྣམ་རྫོང་གི་སྔོ་ཚལ་གྱི་འཚོང་ལམ་ལ་སེམས་ཁྲལ་བྱེད་མི་དགོས་པར་མ་ཟད། ད་དུང་འགྲན་རྩོད་ཀྱི་ནུས་པ་ལྡན་པའི་རིན་གོང་བཙོང་ཐུབ་པར་བྱེད་དགོས། ཉིན་དེ་དག་ནང་ཧྲན་ཏུང་ནས་ཡོང་བའི་བོད་སྐྱོར་ལས་བྱེད་པ་དང་པ་སྣམ་རྫོང་གི་རྫོང་དཔོན་གཞོན་པ་ལི་ཏུང་དང་ཁོང་གི་སྔོ་ཚལ་ཆེད་ལས་ལས་མིར་བྲེལ་བས་ཁེངས།
ལི་ཏུང་ནི་ཧྲན་ཏུང་ཞིང་ཆེན་ཅི་ནན་གྲོང་ཁྱེར་གྱི་ཁག་བཅུ་པའི་བོད་སྐྱོར་ལས་བྱེད་པ་ཡིན་པ་དང་། པ་སྣམ་རྫོང་གི་སྔོ་ཚལ་འཕེལ་རྒྱས་ཕྱིན་ནས་ཏག་ཏག་ལོ30སོང་ཡོད།
སྔོ་ཚལ་ཆེད་དོན་འཛིན་གྲྭ་ནི་ལི་ཏུང་པ་སྣམ་རྫོང་དུ་སླེབས་རྗེས་ས་གནས་དེ་གའི་སྔོ་ཚལ་ཐོན་ལས་སྔར་བས་འཕེལ་རྒྱས་འགྲོ་རྒྱུར་དམིགས་ནས་ཆེད་མངགས་བཙུགས་པའི་ཚོགས་པ་ཞིག་ཡིན་པ་དང་། དེར་དམིགས་ཡུལ་གཉིས་ཡོད་པ་སྟེ། ལག་རྩལ་དེ་བས་ལེགས་པའི་ཐོག་ནས་ཐོན་རྫས་དེ་བས་ལེགས་པ་འདེབས་པ་དང་། ད་དུང་སྔོ་ཚལ་འདེབས་མཁན་རྣམས་ལ་སྔར་ལས་ཆེ་བའི་ཚོང་ར་སྒོ་འབྱེད་པར་རོགས་རམ་བྱེད་དགོས་པ་དེ་ཡིན།
སྔ་དྲོའི་ཆུ་ཚོད་བཅུ་ལྷག་ཙམ་ལ། གྲོང་ཁུལ་གྱི་ཚལ་ཁྲོམ་ར་གློ་བུར་དུ་འཁྲུག་ཆ་དོད་དུ་ཕྱིན་པ་དང་དངོས་གྲུབ་ཀྱི་ཚོང་ཁང་ཡང་བདེ་བླག་ངང་སྒོ་ཕྱེ་བ་རེད། དེ་ནི་མི་སེར་གྱི་ལོ་མང་རིང་རང་འགུལ་ངང་ཆགས་པའི་སིལ་ཚོང་ཁྲོམ་ར་ཞིག་ཡིན་པ་ཕུད། སྔོ་ཚལ་ཆེད་ལས་འཛིན་གྲྭས་ཀྱང་པ་སྣམ་རྫོང་གི་སྔོ་ཚལ་སྡེབ་ཚོང་དང་ཕྱིར་ཚོང་ལ་གྲོང་ཁུལ་དང་དེ་བཞིན་མཐའ་འཁོར་ཚང་མར་ཆེད་མངགས་ཚོང་ལམ་བཏོད་པ་ཞིག་རེད།
ལོ30ཡི་གོང་ཧྲན་ཏུང་གི་བོད་སྐྱོར་ལས་བྱེད་པ་ཚོས་དྲོད་ཁང་ཆེན་པོའི་སྔོ་ཚལ་འདེབས་འཛུགས་ཀྱི་ལག་རྩལ་ནང་འདྲེན་བྱས་ནས་པ་སྣམ་རྫོང་ལ་ཐོན་ལས་ཀྱི་ཁ་ཕྱོགས་གཏན་འཁེལ་བྱས་ཡོད། ད་ཆ་རྫོང་ཡོངས་ཀྱི་སྒྲིག་བཀོད་དྲོད་ཁང2200ལྷག་ཙམ་མྱང་ཆུ་གཙང་པོའི་འབབ་རྒྱུད་ཀྱི་ཞང་དང་གྲོང་རྡལ་ཚང་མར་ཁྱབ་ཡོད་པ་དང་། དྲོད་ཁང་རེ་རེ་ལས་ལོ་གཅིག་ལ་ས་གནས་དེ་གའི་མི་སེར་གྱི་ཡོང་འབབ་སྒོར་བརྒྱད་སྟོང་ནས་ཁྲི་གཉིས་བར་འཕར་གྱི་ཡོད།
སྲོལ་རྒྱུན་གྱི་རྨང་གཞིའི་སྔོ་ཚལ་ཕུད། ལི་ཏུང་གིས་འགན་འཁུར་བའི་སྔོ་ཚལ་ཆེད་དོན་འཛིན་གྲྭས་ཀྱང་པ་སྣམ་རྫོང་ལ་ཧྲང་ཧའེ་ཆིན་དང་། ཀྲོ་མ་ཀྲུ་ཆུང་ཆུང་། སུར་པན། ཤིང་ཏོག་ཧོང་ཀྭ པ་སྣམ་ཞི་ཀྭ་སོགས་སྣ་ཁ་གསར་པ40ལྷག་ཙམ་གྲུབ་འབྲས་ཐོབ་པའི་ངང་ཚོད་འདེབས་བྱས་པ་དང་འབྲེལ་ནང་འདྲེན་བྱས་པ་རེད།
བོད་རིགས་ཕོ་གསར་ཟླ་བ་ནོར་བུ་ནི་ཧེ་ལུང་ཅང་ནས་སློབ་གྲྭ་ཐོན་ཏེ་ཕ་ཡུལ་དུ་ལོག་པའི་སློབ་ཆེན་སློབ་མ་ཡིན་པ་དང་། དགེ་རྒན་ལའོ་མོང་ནི་སྔོ་ཚལ་ཆེད་ལས་འཛིན་གྲྭས་གདན་ཞུ་བྱས་པའི་ལག་རྩལ་སྤྱི་ཁྱབ་མཛུབ་ཁྲིད་པ་རེད། ཟླ་བ་ནོར་བུ་ནི་ལའོ་མོང་གི་སློབ་མ་ཡིན་ཞིང་། ད་ལྟ་རྫོང་གི་ཞིང་ལས་ལག་རྩལ་ཆེད་ལས་པ་ཡིན། ཆེད་ལས་ཀྱི་ལག་རྩལ་མཛུབ་སྟོན་ཡོད་པས་ཞི་ཀྭ་ལ་ལོ་ལེགས་ཡོང་བའི་རེ་བ་ཆེན་པོ་ཡོད།
ཞིང་ལས་ཆེད་ལས་སློབ་སྦྱོང་བྱས་ནས་ལོ་གསུམ་སོང་རྗེས་ལོ27ལ་སླེབས་པའི་ནོར་བུས་སྔོ་ཚལ་དང་ཤིང་ཏོག་མང་པོ་འདེབས་འཛུགས་བྱེད་པའི་ལག་རྩལ་ཁོང་དུ་ཆུད་ཡོད། ནོར་བུ་ལྟ་བུའི་གཞོན་ནུ་དེ་བས་མང་བ་གསོ་སྐྱོང་བྱ་རྒྱུ་དེའང་ལི་ཏུང་དང་ཁོང་གི་སྔོ་ཚལ་ཆེད་ལས་འཛིན་གྲྭས་ཐོག་མཐའ་བར་གསུམ་དུ་སྒྲུབ་བཞིན་པའི་བྱ་བ་ཞིག་རེད།
ས་སྲོས་མཚམས་སུ་དངོས་གྲུབ་ཁྱིམ་དུ་སླེབས་སྐབས་ཁོང་གིས་འཁྱེར་ཡོང་བའི་སྔོ་ཚལ་ཚང་མ་བཙོང་ཚར་འདུག ཁྱིམ་གྱི་དྲོད་ཁང་ཆེན་པོ་ལྔ་ནི་སྔ་ས་ནས་ཁོང་ཚོའི་ཡོང་འབབ་ཀྱི་ཡོང་ཁུངས་གལ་ཆེན་གྱི་གྲས་ཤིག་རེད།
དྲོད་ཁང་ཆེན་པོའི་སྔོ་ཚལ་འདེབས་འགོ་ཚུགས་པའི་བན་ཚང་གྲོང་ཚོར་ཀྲི་པུའུ་ཧྲུའུ་ཅི་རྒན་གྲས་སྤེན་པ་དོན་གྲུབ་ཀྱིས་སྐབས་དེ་དུས་པ་སྣང་རྫོང་གི་སྣེ་ཁྲིད་དེ། ཕྱུག་འགྱུར་ལམ་བུའི་ཐོག་བསྐྱོད་པའི་བོད་སྐྱོར་ལས་བྱེད་པའི་ཁྲོད་རྫོང་དཔོན་གཞོན་པ་ལི་ཏུང་གི་ཕ་ཧྲན་ཏུང་གི་བོད་སྐྱོར་ལས་བྱེད་པ་ཁག་དང་པོའི་ལི་ཅི་ཀན་ཡོད། ད་ཆ་ཁོང་གི་བུ་སླར་ཡང་བོད་ལྗོངས་སུ་ཕེབས་པས་ཕྱགས་ལས་གནང་གི་ཡོད། བརྩེ་བ་དེ་ངས་ནམ་ཡང་བརྗེད་མི་སྲིད་ཅེས་བརྗོད་པ་རེད།
2024ལོའི་ཟླ6པའི་ཟླ་མཇུག་ཏུ། ལྷ་གཞིས་མྱུར་བགྲོད་གཞུང་ལམ་ཐོག་ཕྱོགས་ཡོངས་ནས་རླངས་འཁོར་ཤར་གཏོང་ཐུབ་པ་རེད། པ་སྣམ་རྫོང་གི“སྔོ་ཚལ་ཆེད་ལས་འཛིན་གྲྭའི”འབད་བརྩོན་འོག་པ་སྣམ་གྱི་སྔོ་ཚལ་ལྷ་སའི་ཁྲོམ་རར་བདེ་བླག་ངང་བཏོན་པ་རེད།
ནག་ཆུ་དང་གཞིས་རྩེ་ཡི་གཏམ་རྒྱུད་ནི་ཁ་གཏད་བོད་སྐྱོར་བྱས་ནས་ལོ30ཡི་བསྡུས་རིས་ཙམ་རེད། ལོ30ཡི་རིང་བོད་སྐྱོར་ལས་བྱེད་པ་ཁག10དང་ཤེས་ལྡན་མི་སྣ་ཁྲི1.2ཙམ་རི་ཀླུང་མང་པོ་བརྒལ་ནས་གངས་ལྗོངས་ས་མཐོར་ཡོང་ནས་བོད་སྐྱོར་ལས་དོན་སྤེལ་ཡོད། 2024ལོའི་ལོ་སྟོད་དུ་བོད་ལྗོངས་ཀྱི་དཔལ་འབྱོར་འཁོར་སྐྱོད་རྒྱུན་མཐུད་ངང་ལེགས་སུ་ཕྱིན་ཏེ། བོད་ལྗོངས་ཀྱི་དཔལ་འབྱོར་ལོ་རེའི་ཆ་སྙོམས་འཕར་ཚད་རྒྱལ་ཡོངས་ཀྱི་མདུན་གྲལ་དུ་སླེབས་ཤིང་། གྲོང་གསེབ་ཀྱི་གྲོང་མིའི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་འཕར་ཚད་ལོ་མང་བསྟུད་མར་རྒྱལ་ཡོངས་ཀྱི་ཨང་དང་པོར་སླེབས་ཡོད། འབྱུང་འགྱུར་ལ་ཁ་ཕྱོགས་ནས་དུས་རབས་གསར་པའི་ཏང་གི་བོད་སྐྱོང་ཐབས་ཇུས་ཁྱོན་ཡོངས་ནས་ལག་ལེན་མཐར་ཕྱིན་བསྟར་ཚེ་བོད་ལྗོངས་ཀྱི་འབྱུང་འགྱུར་དེ་བས་མཛེས་སྡུག་ལྡན་པ་ཞིག་ཡོང་ངེས་རེད།
རྩོམ་སྒྲིག་པ། དཔལ་གཡང་།
