བོད་ལྗོངས་སུ་ཟོམ་བླུགས་ཆུ་རྫུན་བཟོ་བྱེད་མཁན་ལས་གྲྭ་ཞིག་རྩད་ཆོད།
སྤེལ་དུས 2024-09-26
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ།
ཉེ་ཆར། མངའ་རིས་ས་ཁུལ་སྒེར་རྩེ་རྫོང་སྤྱི་བདེ་ཅུས་ཀྱིས་སྒེར་རྩེ་རྫོང་ཁྲོམ་ར་ལྟ་འདོམས་ཅུས་དང་མཉམ་དུ་ཟོམ་བླུགས་ཆུ་རྫུན་མ་བཟོ་མཁན་གྱི་ལས་གྲྭ་ཞིག་བདེ་བླག་ངང་མེད་པ་བཟོས་ཡོད།
བཟའ་བཅའི་བདེ་འཇགས་ལས་དོན་ལ་སྔར་བས་ཤུགས་སྣོན་བརྒྱབ་ནས་མི་དམངས་མང་ཚོགས་ཀྱི་ཚེ་སྲོག་བདེ་ཐང་ལ་འགན་ལེན་ཏན་ཏིག་བྱ་ཆེད། ཉེ་ཆར། སྒེར་རྩེ་རྫོང་སྤྱི་བདེ་ཅུས་ཀྱིས་སྒེར་རྩེ་རྫོང་ཁྲོམ་ར་ལྟ་འདོམས་ཅུས་དང་མཉམ་འབྲེལ་ཐོག“ཁུ་ནུ2024”ཡི་ཆེད་དོན་བྱ་སྤྱོད་དང་དབྱར་དུས་བདེ་འཇགས་རྡུང་རྡེག་བཅོས་སྒྲིག་བྱ་སྤྱོད་ཀྱི་བླང་བྱ་དང་ཟུང་འབྲེལ་གྱིས་ཉིན་ཤས་རིང་མྱུལ་ཞིབ་ཞིབ་ཚགས་བྱས་པ་བརྒྱུད། སྒེར་རྩེ་རྫོང་དུ་གནས་པའི་ཟོམ་བླུགས་ཆུ་རྫུན་མ་བཟོ་མཁན་གྱི་ལས་གྲྭ་ཞིག་མེད་པ་བཟོས་ཡོད།
བྱ་སྤྱོད་སྤེལ་རིང་། ཉེན་རྟོག་ཕྱོགས་ཀྱིས་རྫུན་ལྷད་ཞན་གསུམ་གྱི་ཟོམ་བླུགས་ཆུའི་ཐོན་སྐྱེད་སྒྲིག་ཆས་དང་། འགྱིག་དམ་བླུགས་ཆས། སྤུས་རྟགས་ཀྱི་ཤོག་བྱང་རྫུན་མ་བཅས་དང་། དེ་བཞིན་འགྱིག་དམ་ནང་བླུགས་ཟིན་པའི་ཟོམ་བླུགས་ཆུ་འབོར་ཆེན་རྩད་ཆོད་ཅིང་། ཞིབ་བཤེར་རགས་ཙམ་བྱས་པར་གཞིགས་ན། བཟོ་ཁང་དེས་ཐོན་སྐྱེད་བྱས་པའི་ཟོམ་བླུགས་ཆུའི་སྤུས་ཀ་ཞན་ལ། འཕྲོད་བསྟེན་གྱི་གནད་དོན་ཚབས་ཆེན་ལྡན་པ་མ་ཟད། ཐ་ན་ཆུ་ཁུངས་ཁ་ཤས་གཙང་སེལ་བྱས་མེད་པའི་ས་འོག་གི་ཆུ་ཡིན་པ་རེད། ཟོམ་བླུགས་ཆུ་དེ་དག་སྟབས་བདེའི་ངང་འཚག་ནས་ཐབས་ལམ་སྣ་ཚོགས་བརྒྱུད་ཁྲོམ་རར་བཏོན་གྱི་ཡོད་པས་འཛད་སྤྱོད་པའི་བདེ་ཐང་ལ་གནོད་འཚེ་ཚབས་ཆེན་བཟོ་བཞིན་ཡོད།
ད་ཐེངས་ཀྱི་བྱ་སྤྱོད་སྤེལ་རིང་ཁྱོན་ཉེས་གསོག་དོགས་ཅན་གཉིས་བཟུང་བ་དང་། ཚོང་རྟགས་རྫུན་མ27དང་། ཟོམ་བླུགས་ཆུ་རྫུན་མའི་ཁ་ལེབ1538དང་། ཆུ་རྫུན་མ་བླུགས་སའི་འགྱིག་དམ47དང་། ཤིང་ཚི་སླར་ལོག་རྫས་འགྱིག་ཤོག1དང་། ཐུམ་རྒྱག་འགྱིག་ཤོག760དང་། ཨང་བརྐོས་ཡོ་བྱད1དང་། ཁ་སྦྱར་འགྱིག་རྟགས6བཅས་ཞིབ་བཤེར་རྩད་ཆོད་ཐུབ་ཡོད་ལ། མིག་སྔར་གྱོད་གཞི་དེ་སྔར་བས་མྱུལ་ཞིབ་བྱེད་བཞིན་ཡོད།
རྩོམ་སྒྲིག་པ། དཔལ་གཡང་།
