ཀྲུང་གོའི་བོད་ལྗོངས་དྲ་བའི་འཕྲིན། ཟླ9པའི་ཚེས22ཉིན། 2024ལོའི་བོད་ལྗོངས་ཀྱི“ཀྲུང་གོའི་ཞིང་པའི་ལོ་ལེགས་དུས་ཆེན”རྟེན་འབྲེལ་ཞུ་བའི་བྱེད་སྒོ་ལྷོ་ཁ་གྲོང་ཁྱེར་འཕྱོངས་རྒྱས་རྫོང་ལྷ་ཡུལ་ཞང་ཆང་ཁྱིམ་གྲོང་ཚོར་སྤེལ་ཞིང་། བྱེད་སྒོས“‘འདུ་འགོད་ཁྲི་སྟོང’སྦྱོང་སྤྱོད་ཀྱིས་ལོ་ལེགས་ཀྲུང་གོར་བསྟོད་པ་ཕུལ”ཞེས་པའི་བརྗོད་དོན་གཙོ་བོར་བྱས་ནས་ཞིང་འབྲོག་པའི་དཀའ་སྤྱད་ངལ་རྩོལ་གྱི་གཡུར་ཟའི་གྲུབ་འབྲས་ལ་བསྟོད་གླུ་ཕུལ་བ་དང་ལོ་ལེགས་ཀྱི་དུས་བཟང་ལ་རྟེན་འབྲེལ་ཞུས་པ་རེད།
ས་ཁུལ（གྲོང་ཁྱེར）ཁག་གི་དམངས་ཁྲོད་འཁྲབ་སྟོན་རུ་ཁག་གིས་གཅིག་རྗེས་གཉིས་མཐུད་ངང་སྟེགས་བུའི་ཐོག་ས་ཁོངས་ཀྱི་ཁྱད་ཆོས་ལྡན་པའི་འཁྲབ་སྟོན་ལ་བརྟེན་ནས་ཞིང་འབྲོག་པས་རྨོ་འདེབས་བྱེད་པ་དང་ལོ་ལེགས་ཀྱི་རྣམ་པ་དག་གསོན་ཉམས་དོད་པོས་མངོན་ཡོད་ལ། ཏང་དང་མེས་རྒྱལ། གངས་ལྗོངས་ས་མཐོ་བཅས་ལ་བཅངས་པའི་བརྩེ་དུང་ཟབ་མོ་ཡང་མངོན་ཡོད།
རྟེན་འབྲེལ་བྱེད་སྒོའི་འཁྲབ་སྟོན་གྱི་ཡུལ་དངོས།
རྟེན་འབྲེལ་བྱེད་སྒོའི་ཐོག་བོད་རང་སྐྱོང་ལྗོངས་ཀྱི2024ལོའི་ལོ་འཁོར་གྱི་ཞིང་འབྲོག་པའི“ཕྱུག་འགྱུར་སྣེ་ཁྲིད་པ”བཅུ་ལ་གཟེངས་བསྟོད་བྱས་ནས། རྒྱ་ཆེའི་མང་ཚོགས་ཀྱིས་སྔོན་ཐོན་འཐུས་མིར་སློབ་སྦྱོང་གིས་གྲོང་ཚོའི་མཉམ་སྡེབ་དཔལ་འབྱོར་འཛུགས་སྐྱོང་བྱེད་པ་དང་། ཐོན་ལས་འཕེལ་རྒྱས་ལ་སྐུལ་འདེད་གཏོང་བ། རྨང་གཞིའི་སྒྲིག་བཀོད་འཐུས་སྒོ་ཚང་དུ་གཏོང་བ་བཅས་བྱས་ཏེ། ས་གནས་དེ་གའི་འབབ་འཕར་ཕྱུག་འགྱུར་གྱི་དཔེ་མཚོན་བྱས་རྗེས་ལ་སྐུལ་ཁྲིད་བྱེད་དགོས་པའི་འབོད་སྐུལ་བྱས་པ་རེད། ཕྱུག་འགྱུར་སྣེ་ཁྲིད་པས་གཏམ་བཤད་སྤེལ་སྐབས་རང་ཉིད་ཀྱི་ལས་གཏོད་ཉམས་མྱོང་མཉམ་སྤྱོད་བྱས་ཤིང་། སྲོལ་རྒྱུན་གྱི་ཞིང་འབྲོག་ཐོན་སྐྱེད་ནས་གཞི་ཁྱོན་ཅན་དང་ཚད་ལྡན་ཅན་གྱི་ངལ་ནུས་ཕྱིར་གཏོང་བར་དང་། དེ་ནས་ཐོན་ལས་རྣམ་གྲངས་འགན་གཙང་བླངས་བྱས་ཏེ་ཡུལ་མི་སྤུན་ཟླ་ཚོ་ཐུན་མོང་ཕྱུག་འགྱུར་ཡོང་བར་སྐུལ་ཁྲིད་བྱེད་པའི་བར་བརྒྱུད་རིམ་ཧྲིལ་པོར་དཀའ་སྤྱད་འབད་བརྩོན་ཚད་མེད་བྱས་ཡོད། ཁོང་གིས་རང་ཉིད་ཀྱི་བྱ་སྤྱོད་དངོས་ལ་བརྟེན་ནས“སྒུག་རྟེན་བྱེད་མི་དགོས་པར་རང་སྟོབས་རང་སྤེལ”གྱི་འབད་འཐབ་སྙིང་སྟོབས་གསལ་འགྲེལ་བྱས་ཡོད་ལ། ཞིང་འབྲོག་པ་དེ་བས་མང་བས་དཔའ་ངར་ཆེན་པོས་བདེ་སྐྱིད་འཚོ་བ་དོན་གཉེར་བྱ་རྒྱུར་ལྕག་སྐུལ་ཡང་བྱེད་བཞིན་ཡོད།
རྟེན་འབྲེལ་བྱེད་སྒོའི་གཟེངས་བསྟོད་ཀྱི་ཡུལ་དངོས།
ཆང་ཁྱིམ་གྲོང་ཚོའི་བསྟན་འཛིན་དབང་མོས། ཆང་ཁྱིམ་གྲོང་ཚོའི་སྐྱེ་ཁམས་ཡུལ་སྐོར་ལས་རིགས་འཕེལ་རྒྱས་དང་དེ་བཞིན་ས་གནས་སྲིད་གཞུང་གི་ཁ་གསབ་སྲིད་ཇུས་ལ་བརྟེན་ནས། 2023ལོ་ནས་ད་བར་རང་ཁྱིམ་གྱི་ཁྱིམ་ཚང་མགྲོན་ཁང་གིས་མི1000ལྷག་ཙམ་ལ་སྣེ་ལེན་ཞུས་ནས་འབབ་འཕར་བྱུང་བ་དང་ཆབས་ཅིག གྲོང་ཚོའི་འགོ་ཁྲིད་དང་གྲོང་མི། ཡུལ་སྐོར་བ་བཅས་ཀྱི་ཁས་ལེན་དང་དགའ་ཚོར་བྱུང་ལ། ཁྱིམ་ཚང་མགྲོན་ཁང་དེ་བས་ལེགས་སུ་འགྲོ་རྒྱུའི་རེ་བའང་ཡོད་ཅེས་བཤད།
གཞན་ཡང་ས་གནས་ས་ཐོག་ཏུ་ད་དུང་བྱེད་སྒོ་སྣ་ཚོགས་སྤེལ་ནས་བོད་རང་སྐྱོང་ལྗོངས་ཀྱི་གྲོང་གསེབ་དར་རྒྱས་འཐབ་ཇུས་ལ་ཐོབ་པའི་གྲུབ་འབྲས་མངོན་གསལ་ཕྱོགས་ཡོངས་ནས་མངོན་ཡོད། སྔོན་ཐོན་ཞིང་འཕྲུལ་སྒྲིག་ཆས་འགྲེམས་སྟོན་འགྲེམས་ཚོང་ཁུལ་དུ་ཚན་རྩལ་མཐོ་བའི་ཞིང་འཕྲུལ་སྣ་ཚོགས་ཀྱིས་མི་རྣམས་ཀྱི་ཡིད་དབང་བཀུག་ཅིང་། སྒྲིག་ཆས་དེ་དག་གིས་ཞིང་ལས་ཐོན་སྐྱེད་ཀྱི་ལས་ཕྱོད་ཆེ་རུ་ཕྱིན་ཡོད་ལ། བོད་ལྗོངས་ཀྱི་གནམ་གཤིས་དང་ལོ་ཏོག ལག་རྩལ་བཅས་ལ་དེ་བས་དམིགས་ནས་འཚམ་མཐུན་རང་བཞིན་གྱི་གསར་གཏོད་དང་ཞིབ་སྤེལ་རྒྱུན་མཐུད་བྱས་ཏེ་ཞིང་ལས་ཚན་རྩལ་གྱི་འདེགས་སྐྱོར་བྱེད་ཤུགས་ཆེ་རུ་གཏོང་བ་དང་། བོད་ལྗོངས་ཡོངས་ཀྱི་གྲོང་གསེབ་དར་རྒྱས་ཀྱི་གྲུབ་འབྲས་འགྲེམས་ཁུལ་དང་འཕྱོངས་རྒྱས་རྫོང་གི་ཁྱད་ལྡན་ཞིང་ལས་ཐོན་རྫས་འགྲེམས་ཚོང་ཁུལ་དུ་ཞིང་འབྲོག་དང་ལག་ཤེས་སོགས་ཁྱད་ལྡན་ཐོན་རྫས་ལས་གྲོང་ཁྱེར་ནས་རྫོང་དང་ས་ཁུལ་ཁག་གི་གྲོང་གསེབ་ཐོན་ལས་ལ་ཞིང་ལས་ཐོན་རྫས་ལས་སྣོན་ཞིབ་ཚགས་ཀྱིས་ཐོན་ལས་དང་རིན་ཐང་གི་འབྲེལ་ཐག་རིང་དུ་བཏང་སྟེ་སྤུས་འབྲས་ལེགས་གཉེར་གྱི་གྲུབ་འབྲས་ཐོབ་པ་མངོན་ཡོད། བྱེད་སྒོའི་ཐོག་གྲོང་གསེབ་དར་རྒྱས་ཀྱི་འཐབ་ཇུས་སྤྱི་འདོམས་སུ་བྱས་ནས“ཞིང་གསུམ”ལས་དོན་ལེགས་འཕེལ་ཡོང་བར་སྐུལ་འདེད་གཏོང་བའི་གྲོང་གསེབ་ཀྱི་མཛེས་སྡུག་ལྡན་པའི་རྣམ་པ་དང་། དེ་བཞིན་དུས་རབས་གསར་པའི་ཞིང་འབྲོག་ཁུལ་གྱི་ཐོན་སྐྱེད་དང་འཚོ་བ། ཞིང་འབྲོག་པའི་རྣམ་པ་གསར་པ། ཞིང་འབྲོག་ལས་ཀྱི་མཛེས་སྡུག་ལྡན་པའི་མདུན་ལམ་བཅས་མངོན་ཏེ་མང་ཚོགས་ཀྱིས་མཛེས་སྡུག་ལྡན་པའི་འཚོ་བ་གཏོད་པའི་ཧུར་སེམས་འཕེལ་བར་བྱས་ཡོད།
ལྷོ་ཁ་གྲོང་ཁྱེར་སྣེ་གདོང་ཆུས་སྣེ་གདོང་ཁྲོམ་གཞུང་གིས་ད་དུང2024ལོའི་བོད་ལྗོངས་ཀྱི“ཀྲུང་གོའི་ཞིང་པའི་ལོ་ལེགས་དུས་ཆེན”གྱི་ཁྱད་ལྡན་ཞིང་ལས་ཐོན་རྫས་འགྲེམས་ཚོགས་སྒྲིག་འཛུགས་བྱས་ནས། བོད་རང་སྐྱོང་ལྗོངས་ནང་ཁུལ་གྱི་ཞིང་ལས་ཁྱད་ལྡན་ཐོན་རྫས་ཀྱི་དཔེ་སྟོན་ཁེ་ལས་དང་ཞིང་འབྲོག་པའི་མཉམ་ལས་ཁང་སོགས་གཉེར་སྐྱོང་བྱེད་པོ113གདན་དྲངས་ཏེ་སྟོན་དུས་འཛད་སྤྱོད་ཀྱི་དུས་ཆེན་རྣམ་པ་བཏོད་པ་དང་། ས་གནས་ཁག་གི་གྲགས་ཁྱད་ལེགས་གསུམ་གྱི་ཁྱད་ལྡན་ཞིང་འབྲོག་ཐོན་རྫས་དྲིལ་བསྒྲགས་འོས་སྦྱོར་བྱས་པ། ཕྱིར་ཚོང་ལ་བརྟེན་ནས་ཐོན་སྐྱེད་ལ་སྐུལ་འདེད་བཏང་སྟེ་གྲོང་གསེབ་ཀྱི་ཐོན་ལས་དར་རྒྱས་ལ་སྐུལ་འདེད་བཏང་ནས། ལོ་ལེགས་ཀྱི་དུས་ཚིགས་སུ་ཞིང་འབྲོག་མང་ཚོགས་ཚོར་ཐོབ་སྣང་དང་སྐྱིད་སྣང་དེ་བས་མང་བ་སྦྱིན་ཡོད།
ལོ་ལེགས་དུས་ཚིགས་ཀྱི་རྟེན་འབྲེལ་བྱེད་སྒོ་རིམ་བཞིན་མཇུག་འགྲིལ་ཡང་ལོ་ལེགས་ཀྱི་སྤྲོ་སྣང་ཞིང་འབྲོག་མང་ཚོགས་ཚོའི་སེམས་སུ་ནམ་ཡང་དྲན་བཞིན་མཆིས། རྒྱ་ཆེའི་ཞིང་འབྲོག་མང་ཚོགས་ཚོས་མུ་མཐུད་དུ་དཀའ་སྤྱད་འབད་འཐབ་དང་གསར་གཏོད་ཕོད་པར་བྱས་ནས་ལས་ལ་བརྩོན་པའི་ལག་གཉིས་ལ་བརྟེན་ཏེ་གྲོང་གསེབ་དར་རྒྱས་ཀྱི་ལེའུ་གསར་པ་རྩོམ་རྒྱུ་རེད་ལ། གནའ་ཉམས་དང་གསོན་ཤུགས་ཀྱིས་ཕྱུག་པའི་ས་གཞི་འདིའི་ཐོག་ལོ་ལེགས་ཀྱི་གཏམ་རྒྱུད་དག་ནམ་ཡང་རྒྱུན་མཐུད་ཀྱང་བྱ་རྒྱུ་རེད།
རྩོམ་སྒྲིག་པ། དཔལ་གཡང་།
