ཀྲུང་གོའི་བོད་ལྗོངས་དྲ་བའི་འཕྲིན། ཧི་མ་ལ་ཡའི་རི་རྒྱུད་དང་ཁ་ལ་ཁུ་ནུ་རི་རྒྱུད་དུ་ས་བབ་མཐོ་ཚད་རྒྱ་མཚོའི་ངོས་ལས་སྨི8000ལས་བརྒལ་བའི་གངས་རི14འགྱིང་ངེར་གནས་ཤིང་། གངས་རི14དེ་དག་གི་རི་རྩེར་འཛེག་རྒྱུ་ནི་རི་འཛེག་པ་ཚང་མའི་ཕུགས་འདུན་ཡིན། ཟླ10པའི་ཚེས3ཉིན། 2024ལོའི་སྐབས་ཉེར་གཅིག་པའི་ཀྲུང་གོའི་བོད་ལྗོངས་རི་འཛེག་ཚོགས་ཆེན་གྱི་རི་འཛེག་ཕྱི་རོལ་ལུས་རྩལ་རིག་གནས་སྤེལ་རེས་ཚོགས་འདུའི་ཐོག “རི་འཛེག་དཔའ་བོ”ཁ་ཤས་ཀྱིས་ལྷོ་སྟོད་རི་བོར་འཛེག་གྲབས་ཡོད་པའི་ལུས་རྩལ་པར་ཁོང་ཚོའི་རི་འཛེག་གི་གཏམ་རྒྱུད་མཉམ་སྤྱོད་བྱས་པ་རེད།
རི་འཛེག་ཕྱི་རོལ་ལུས་རྩལ་རིག་གནས་སྤེལ་རེས་ཚོགས་འདུའི་ཡུལ་དངོས།
ས་བབ་མཐོ་ཚད་རྒྱ་མཚོའི་ངོས་ལས་སྨི6010ཡོད་པའི་ལྷོ་སྟོད་རི་བོའི་སྨི5600ཡན་གྱི་སར་གངས་གསོག་འཁྱགས་ལྡེབས་ཡོད་པ་དང་། རི་འཛེག་ལམ་རྒྱུད་དུ་གཡང་གཟར་བའི་བྲག་རི་དང་གངས་ལྡེབས་མེད་པས། རི་འཛེག་དགའ་མོས་པ་ཚོའི་ངོས་ནས་བརྗོད་ན“འཇུག་སྒོ་དང་པོ”ཙམ་ཞིག་རེད། འོན་ཀྱང་ལྷོ་སྟོད་རི་བོར་འཛེག་གྲབས་ཡོད་པའི་ལུས་རྩལ་པ་དེ་དག་ཆེད་ལས་རི་འཛེག་པ་མིན་པར་ལས་རིགས་མི་འདྲ་བ་དང་ལོ་ན་ཡང་མི་འདྲ་ཞིང་། རྒན་ཤོས་ལོ57དང་ཆུང་ཤོས་ལོ12ལས་ཟིན་མེད། ཁོང་ཚོའི་ཁྲོད་མང་ཆེ་བས་རང་གིས་རང་ལ་འགྲན་སློང་གིས་གངས་རིར་འཛེག་ཐེངས་ཐོག་མ་ཡིན།
ཚེ་རིང་རྡོ་རྗེ་ནི་འཛམ་གླིང་གི་རི་བོ་མཐོ་ཤོས་ལ་འཛེག་ཐེངས་ཆེས་མང་ཤོས་དང་རི་རྩེར་བདེ་བླག་ངང་འཛེགས་ཐུབ་ཚད་མང་ཤོས་ཀྱི་རྒྱལ་སྤྱིའི་རིམ་པའི་ལུས་རྩལ་པ་ཞིག་ཡིན་ཞིང་། ཁོང་ལ་བག་ཆགས་ཟབ་ཤོས་ནི1988ལོར་ཀྲུང་གོ་དང་། འཇར་པན། ནེ་པ་ལ་བཅས་རྒྱལ་ཁབ་གསུམ་པོས་ཇོ་མོ་གླང་མ་འཛེགས་པའི་ལོ་རྒྱུས་དེ་རེད། སྐབས་དེར་ཁོང་ནི་ཇོ་མོ་གླང་མའི་རྩེ་མོར་འཛེགས་མཁན་ཐོག་མ་དེ་ཡིན་པ་དང་། སྐར་ལྔའི་དར་དམར་ཇོ་མོ་གླང་མའི་རྩེ་མོར་བཙུགས་པ་མ་ཟད། དེའི་རྩེ་མོར་སྐར་མ99བསྡད་དེ་ངོ་མཚར་ཡང་བཏོད་ཡོད། ཚེ་རིང་རྡོ་རྗེས་སྐབས་དེའི་གནས་ཚུལ་ཕྱིར་དྲན་བྱེད་བཞིན་སྤོབས་སེམས་ཆེན་པོས“རི་འཛེག་བརྒྱུད་རིམ་དག་ཐད་གཏོང་བྱས་ནས་ཀྲུང་གོ་ནི་རི་རྩེར་འཛེག་ཐུབ་མཁན་ཐོག་མ་དེ་ཡིན་པ་མཚོན་པར་བྱས་པས་དོན་སྙིང་ཧ་ཅང་ཆེན་པོ་ལྡན་ཡོད”ཅེས་བཤད།
རི་འཛེག་གི་བརྒྱུད་རིམ་ཁྲོད་དགའ་སྤྲོ་ཡོད་ལ་སྡུག་བསྔལ་ཡང་ཡོད་ཅིང་། སྤེན་པ་བཀྲ་ཤིས་ལགས་དང་རི་འཛེག་བརྒྱུད་རིམ་ཁྲོད་སྟབས་མ་ལེགས་པར་རྐྱེན་ལམ་དུ་ཤོར་བའི་རུ་གྲོགས་ཚོའི་སྐོར་གླེང་སྐབས་ཚེ་རིང་རྡོ་རྗེ་སེམས་སྡུག་ནས་མིག་ཆུ་དབང་མེད་དུ་ཤོར།
རྐྱེན་ལམ་དུ་ཤོར་བའི་རུ་གྲོགས་ཚོའི་སྐོར་གླེང་སྐབས་ཚེ་རིང་རྡོ་རྗེ་སེམས་སྡུག་ནས་མིག་ཆུ་གཏོང་བཞིན་པ།
ནོར་རྩེ་ཡིས། རིར་འཛེག་ཚད་ཚང་མ་བདེ་བླག་ཅིག་ཡོང་མི་སྲིད། དང་ཐོག་རི་འཛེག་རུ་ཁག་གིས་སྔོན་དཔག་བྱས་ན་ལོ9ནས11བར་རི་མཐོ14འཛེགས་པའི་རླབས་ཆེའི་བྱ་སྤྱོད་ལེགས་གྲུབ་བྱ་རྩིས་ཡོད་ཀྱང་མཐར་ལོ14འགོར་ཡོད། རི་འཛེག་རུ་ཁག་གིས་ཆའོ་ཀི་ལེ་རི་བོ་དང་མཱ་ཁ་ལུའུ་རི་བོ་སོགས་ཀྱི་རི་རྩེར་འཛེག་སྐབས་ཕམ་མྱོང་ཡོད། དུས་རབས་གོང་མའི་ལོ་རབས་བརྒྱད་ཅུ་དང་དགུ་བཅུ་པར་རི་འཛེག་གི་ཆ་རྐྱེན་སྔར་བཞིན་ཞན་ཙམ་ཡོད་པ་དང་། ལུས་རྩལ་པ་ཚོར་རི་འཛེག་སྒྲིག་ཆས་ཡག་པོ་མེད་ལ། ནུས་པ་ལེགས་པའི་རི་འཛེག་མིག་ཤེལ་དེ་བས་ཀྱང་མེད། ཐ་ན་ཇོ་མོ་གླང་མར་འཛེག་སྐབས་ཀྱང་མི་རེས་གསོ་རླུང་ཤེལ་དམ་གཉིས་ལས་འཁྱེར་ཆོག་གི་མེད། གལ་ཏེ་སྔོན་ལ་རྔུབ་ཟིན་ཚེ་ལས་འགན་ལེགས་གྲུབ་མ་ཐུབ་པ་མཚོན་གྱི་ཡོད། དེ་ལྟ་བུའི་གནས་ཚུལ་འོག་ལུས་རྩལ་པ་ཚོས་ཕྱི་སྣུར་མ་བྱས་པར། ཞུམ་མེད་ཀྱི་སྙིང་སྟོབས་ལ་བརྟེན་ནས་རི་མཐོ་མང་པོར་གཅིག་རྗེས་གཉིས་མཐུད་ངང་འཛེགས་ཡོད་ཅེས་བཤད།
ཡ་གླིང་གི་ཇོ་མོ་གླང་མར་ཐོག་མར་འཛེག་མཁན་ལོང་བ་ཀྲང་ཧུང་ཡང་སྤེལ་རེས་ཚོགས་འདུའི་ཡུལ་དངོས་སུ་སླེབས་ཡོད་ཅིང་། 2016ལོའི་རི་འཛེག་ཚོགས་ཆེན་ཐོག་ཁོང་གིས“ང་ཇོ་མོ་གླང་མར་འཛེག་ཆོག་གམ”ཞེས་པའི་ཀུ་རེའི་གཏམ་བཤད་ཅིང་། 2021ལོར་ཁོང་གི་ཕུགས་འདུན་མངོན་འགྱུར་བྱུང་ཡོད། ཁོང་གིས་ཚིག་གསུམ་མཉམ་སྤྱོད་བྱས་པ་སྟེ། གུས་སྐྲག་དང་། བདེ་ཐང་། ཡིད་ཆེས་བཅས་རེད། རང་བྱུང་ཁམས་ཀྱི་སྟོབས་ཤུགས་ནི་གུས་སྐྲག་བྱེད་འོས་པ་ཞིག་རེད་ལ། རི་འཛེག་པའི་སྟོབས་ཤུགས་ནི་དེ་བས་ཀྱང་དེ་ལྟར་རེད།
ལུས་རྩལ་པ་ཚོས་རི་རྩེར་བདེ་བླག་ངང་འཛེགས་རྗེས་ལག་ཁྱེར་བསྟན་ནས་དྲན་རྟེན་པར་རྒྱག་བཞིན་པ།
ཟླ10པའི་ཚེས5ཉིན། རི་འཛེག་མྱུལ་དཔྱད་བྱེད་སྒོའི་རི་རྩེར་འཛེག་མཁན་རུ་མི་ཁྱོན120ལྷོ་སྟོད་རི་བོར་འཛེགས་ཡོད་ཅིང་། རི་འཛེག་རུ་ཁག་ཁྲོད་ལོང་བའི་བརྩོན་སྐྱེད་གཏམ་བཤད་པ་ཉི་མ་དབང་འདུས་ཡོད་ཅིང་། ཁོང་གིས་རི་རྩེར་འཛེག་རྒྱུ་ནི་ངའི་ངོས་ནས་བརྗོད་ན་ལག་རྟགས་ཡག་ཤོས་ཤིག་ཡིན་པས་འབད་བརྩོན་བྱས་ཚེ་གྲུབ་འབྲས་ཐོབ་ངེས་རེད་ཅེས་བཤད། དེ་ཡང་བོད་ལྗོངས་རི་འཛེག་རུ་ཁག་གི་དངོས་མཚོན་གློག་བརྙན《སྤྲིན་རུམ་དུ་ཕུགས་འདུན་དོན་གཉེར་བྱེད》ཅེས་པའི་ནང“འདི་ནི་རི་བོའི་སྟོབས་ཤུགས་ཤིག་ཡིན་ལ། རི་འཛེག་པ་ཚོའི་སྟོབས་ཤུགས་ཤིག་དེ་བས་ཀྱང་ཡིན”ཞེས་འཁོད་པ་ལྟར་རེད།
