ཀན་ལྷོར་རྒྱལ་ཐོན་གནམ་གྲུ་ཆེ་གྲས་C919ཐེངས་དང་པོར་འཕུར་བ།
སྤེལ་དུས 2024-12-10
ཡོང་ཁུངས།
རྩོམ་པ་པོ།
ཟླ་12པའི་ཚེས་5ཉིན། ཀྲུང་གོའི་ཚོང་ལས་ཐད་སྤྱོད་པའི་C919གནམ་གྲུ་ཞིག་ཨེའར་ཏུའོ་སི་དབྱི་ཅིན་ཧོ་ལུའོ་ནས་ཆུ་ཚོད་1དང་སྐར་མ་50རིང་འཕུར་རྗེས་ཀན་སུའུ་ཞིང་ཆེན་གྱི་ཀན་ལྷོ་བསང་ཆུ་གནམ་ཐང་དུ་བརྟན་པོའི་ངང་བབས་ཡོད། འདི་ནི་རྒྱལ་ཐོན་གནམ་གྲུ་ཆེ་གྲས་C919ཀན་ལྷོར་འཕུར་ཐེངས་དང་པོ་དེ་ཡིན་པ་དང་། བསང་ཆུ་གནམ་ཐང་དུ་དུས་ཡུན་ཉིན་4རིང་ཚོད་ལྟའི་འཕུར་སྐྱོད་ལས་འགན་བསྒྲུབ་རྒྱུ་ཡིན་ཞིང་། རྗེས་མཐུད་ཀྱི་ས་མཐོའི་མཁའ་ལམ་གྱི་འཁོར་སྐྱོད་དགོས་མཁོ་སྐོང་བ་དང་ས་མཐོའི་རྣམ་པའི་གནམ་གྲུ་ཞིབ་འཇུག་གསར་སྤེལ་བྱ་ཆེད་རྨང་གཞི་བརྟན་པོ་འདིང་རྒྱུ་རེད།
C919གནམ་གྲུ་ནི་རྒྱལ་སྤྱིའི་རྒྱུན་སྤྱོད་འཕུར་སྐྱོད་དང་འཚམ་པའི་ཚད་གཞི་གཞིར་བཟུང་། ཀྲུང་གོ་རང་གིས་ཞིབ་བཟོ་བྱས་པ་དང་རང་བདག་གི་ཤེས་བྱའི་ཐོན་དབང་ལྡན་པའི་རླུང་འབུད་རྣམ་པའི་འབྲིང་རིམ་འགྲུལ་སྐྱེལ་གནམ་གྲུ་ཐོག་མ་དེ་ཡིན་ཞིང་། གང་དེར་བདེ་འཇགས་ཆེ་བ་དང་། རིན་གོང་དམའ་བ། སྡོད་ས་སྐྱིད་པ། ཁོར་སྲུང་བཅས་ཀྱི་ཁྱད་ཆོས་ལྡན་པས་མཁའ་འགྲུལ་ཀུང་སིའི་མཁའ་ལམ་མི་འདྲ་བའི་གཉེར་སྐྱོང་དགོས་མཁོ་སྐོང་ཐུབ་ཀྱི་ཡོད། ད་ཐེངས་རང་རྒྱལ་གྱིས་བཟོས་པའི་གནམ་གྲུ་ཆེན་པོ་དེ་ཀན་ལྷོར་འཕུར་སྐབས་ཀན་ལྷོ་ཁུལ་གྱི་ལས་བྱེད་པ་དང་མང་ཚོགས་ཚོའི་དགའ་བསུ་ཆེན་པོ་ཐོབ་ཤིང་གནམ་ཐང་དུ་རྒྱལ་དར་ལྷབ་ལྷུབ་ཏུ་གཡོ་བ་དང་དགའ་སྤྲོའི་རྣམ་པས་ཁེངས་པ་དང་། ཐུན་མིན་ཁྱད་ཆོས་མངའ་བའི་བོད་རིགས་ཀྱི་གླུ་གར་དང་དཀར་གཙང་མཇལ་དར་གྱིས་ཀན་ལྷོའི་མི་དམངས་ཀྱིས་རླབས་ཆེན་མེས་རྒྱལ་ལ་བཅངས་པའི་དགའ་ཞེན་མཚོན་ལ་བརྩེ་སེམས་ཟབ་མོ་དང་སྤོབས་སེམས་ཟབ་མོ་ཡང་མཚོན་པར་བྱས་ཡོད།
བསང་ཆུ་གནམ་ཐང་དེ་ཀན་སུའུ་ཞིང་ཆེན་ཀན་ལྷོ་ཁུལ་བསང་ཆུ་རྫོང་ཨ་མཆོག་ཤང་ཁུག་བསིལ་ཐང་དུ་ཡོད་པ་དང་ས་བབ་མཐོ་ཚད་སྨི་3189ཟིན་གྱི་ཡོད། གནམ་ཐང་དེ་ཀན་སུའུ་ཞིང་ཆེན་གྱི་ས་མཐོའི་གནམ་ཐང་ཉག་ཅིག་དེ་ཡིན་ཞིང་། སྤྱི་ལོ་2013ལོར་དངོས་སུ་གནམ་གྲུ་ཤར་གཏོང་ཐུབ་ནས་ལས་གཉེར་བྱེད་འགོ་ཚུགས་པ་དང་། ལོ་རེར་ཡུལ་སྐོར་བ་མི་ཐེངས་ཆིག་འབུམ་བཞི་ཁྲི་སྐྱེལ་འདྲེན་དང་དངོས་ཟོག་ཏུན་560འདོན་འཇུག་བྱེད་པའི་དགོས་མཁོ་སྐོང་ཐུབ་ཀྱི་ཡོད། ཉེ་བའི་ལོ་ཤས་རིང་ཀན་ལྷོ་ཁུལ་གྱིས་འགྲིམ་འགྲུལ་གྱི་ཚད་བརྒལ་བྱ་སྤྱོད་ཅེས་པ་ལག་ལེན་གཏིང་ཟབ་བསྟར་ནས་ལངས་གཟུགས་རྣམ་པའི་འགྲིམ་འགྲུལ་ལམ་དྲའི་མ་ལག་ཧུར་ཐག་བསྐྲུན་པ་དང་། གནམ་ཐང་གི་དོ་དམ་གཉེར་སྐྱོང་ལམ་སྲོལ་བསྒྱུར་བཅོས་ལ་སྐུལ་འདེད་མགྱོགས་པོ་བཏང་བ། སྤུས་ལེགས་ཀྱི་ཡུལ་སྐོར་ལམ་ཐིག་བཏོད་པ། གནམ་ཐང་གིས་ས་ཁོངས་དཔལ་འབྱོར་འཕེལ་རྒྱས་ལ་སྐུལ་ཁྲིད་བྱེད་པའི་སྒུལ་ཤུགས་རྒྱུན་མཐུད་ངང་བཏོན་པ་བཅས་བྱས་ཡོད། འདི་ལོའི་སྤྱི་ཟླ་11པའི་བར་སླེབས་དུས་བསང་ཆུ་གནམ་ཐང་གིས་རིམ་རྩིས་བྱས་ན་འཕུར་སྐྱོད་ཐེངས་552འགན་ལེན་བྱས་པ་དང་ཡུལ་སྐོར་བ་མི་ཐེངས་ཁྲི་5.58སྐྱེལ་འདྲེན་བྱས་ཡོད།
རྒྱལ་ཐོན་གནམ་གྲུ་ཆེ་གྲས་C919བསང་ཆུ་གནམ་ཐང་དུ་ཚོད་འཕུར་བྱས་པ་དེས་རང་རྒྱལ་གྱིས་བཟོས་པའི་ས་མཐོའི་གནམ་གྲུའི་བཟོ་དབྱིབས་ཀྱི་སྟོང་ཆ་སྐོང་རྒྱུ་དང་། ཀན་ལྷོའི་དམངས་སྤྱོད་མཁའ་འགྲུལ་བྱ་གཞག་མགྱོགས་མྱུར་འཕེལ་རྒྱས་འགྲོ་རྒྱུར་སྐུལ་འདེད་གཏོང་རྒྱུ། མི་རིགས་ཁག་དབར་འགྲོ་འོང་དང་སྤེལ་རེས་མཉམ་འདྲེས་བཅས་བྱེད་མགྱོགས་སུ་གཏོང་རྒྱུ། མི་རིགས་ཁག་གི་མང་ཚོགས་ཀྱི་སྤོབས་སེམས་དང་སེམས་ཤུགས་གོང་བུ་འགྲིལ་ཤུགས་ཆེ་རུ་གཏོང་རྒྱུ་བཅས་ལ་དོན་དངོས་ཀྱི་དོན་སྙིང་གལ་ཆེན་ལྡན་ཡོད། ཀན་ལྷོ་ཁུལ་གྱིས་གོ་སྐབས་དེ་དམ་འཛིན་བྱས་ཏེ་དམངས་སྤྱོད་མཁའ་འགྲུལ་བྱ་གཞག་སྤུས་ཚད་མཐོ་པོས་འཕེལ་རྒྱས་འགྲོ་རྒྱུར་མགྱོགས་མྱུར་སྐུལ་འདེད་གཏོང་བ་དང་སྟབས་བདེ་དང་ནུས་ཆེ་སྤུས་ལེགས་བཅས་ཀྱི་མཁའ་འགྲུལ་བར་ཁྱམས་ནུས་ཤུགས་ཡོད་རྒུས་བཏོད་དེ། རྒྱལ་ཁབ་ཕྱི་ནང་གི་ཡུལ་སྐོར་བ་དེ་བས་མང་བས་གནས་མཆོག་ཀན་ལྷོའི་མཛེས་ལྗོངས་ཉམས་སུ་མྱོང་རྒྱུར་གོ་སྐབས་གལ་ཆེན་བསྐྲུན་རྒྱུ་རེད།
