རྟེན་འབྲེལ་འཕྲིན་ཡིག
ཧྲེན་ཀྲེན་ནས་ཀྲུང་ཧྲན་བར་གྱི་གཙང་པོ་སྒྲོལ་བའི་བགྲོད་ལམ་བསྐྲུན་ནས་ཤར་གཏོང་ཐུབ་པའི་མཚམས་སུ། ངས་ཁྱེད་ཚོར་སྤྲོ་སེམས་འཁོལ་བའི་རྟེན་འབྲེལ་ཞུ་རྒྱུ་ཡིན་ལ། འཆར་འགོད་འཛུགས་སྐྲུན་ལ་ཞུགས་མཁན་བློ་མཐུན་ཡོངས་ལ་ལྷག་བསམ་ཟོལ་མེད་ཀྱི་འཚམས་འདྲི་ཞུ་རྒྱུ་ཡིན།
ཧྲེན་ཀྲུང་བགྲོད་ལམ་ནི་ཀང་ཀྲུའུ་ཨའོ་ཟམ་ཆེན་བསྐྲུན་ཟིན་རྗེས་གཡོད་ཀང་ཨའོ་ཁུག་ཆེན་ཁུལ་དུ་བསྐྲུན་པའི་ཆེས་ཆེའི་འགྲིམ་འགྲུལ་ལས་གྲྭ་གཞན་ཞིག་ཡིན་ཞིང་། འཛམ་གླིང་རིམ་པའི་ལག་རྩལ་གྱི་དཀའ་གནད་མང་པོ་བསལ་བ་དང་འཛམ་གླིང་གི་ཟིན་ཐོ་མང་པོ་བཏོད་ཡོད། དེའི་ནང་ཞུགས་མཁན་ཡོངས་ཀྱིས་དཀའ་སྤྱད་ནུས་འདོན་དང་སྡུག་རུས་འཁྱོག་པོས་ལས་གྲྭའི་ལས་འགན་སྤུས་ཚད་མཐོ་པོས་ལེགས་སྒྲུབ་བྱས་ཡོད། དེ་ཐོག་ནས་ཀྲུང་གོའི་ལུགས་ཀྱི་དེང་རབས་ཅན་ནི་འབད་འཐབ་བྱས་ནས་བྱུང་བ་ཞིག་དང་། བྱ་གཞག་རླབས་པོ་ཆེ་ཚང་མ་ནི་འབད་འཐབ་ལ་བརྟེན་ནས་བྱུང་བ་ཞིག་ཡིན་པ་གསལ་བཤད་གང་ལེགས་ཐུབ་ཡོད།
གོམ་སྟབས་རྗེས་མར། ཧྲེན་ཀྲུང་བགྲོད་ལམ་དོ་དམ་དང་བེད་སྤྱོད་ཡག་པོ་བྱས་ཏེ་བདེ་འཇགས་ལྡན་པ་དང་། ཐོགས་པ་མེད་པ། སྐྱིད་སྣང་དོད་པ། རིག་ལྡན་བཅས་ཀྱི་འཁོར་སྐྱོད་ཐུབ་པའི་འགན་ལེན་བྱེད་པ་དང་། འགྲིམ་འགྲུལ་ལམ་འབྱེད་གདོང་ལེན་གྱི་ནུས་པ་གང་ལེགས་འདོན་པ། ཀྲུའུ་ཅང་གཙང་མདོའི་ཤར་ནུབ་ངོགས་གཉིས་མཉམ་འདྲེས་འཕེལ་རྒྱས་ལ་སྐུལ་འདེད་གཏོང་བ། གཡོད་ཀང་ཨའོ་ཁུག་ཆེན་ཁུལ་གྱི་རྨང་གཞིའི་སྒྲིག་བཀོད“མཁྲེགས་མཐུད”དང་སྒྲིག་སྲོལ་ལམ་སྲོལ“མཉེན་མཐུད”གྱི་ཆུ་ཚད་མཐོ་རུ་གཏོང་བ། གཡོད་ཀང་ཨའོ་ཁུག་ཆེན་ཁུལ་གྱི་ཁྲོམ་ར་གཞི་གཅིག་ཅན་ལ་སྐུལ་འདེད་གཏོང་བ་བཅས་བྱས་ཏེ་གཡོད་ཀང་ཨའོ་ཁུག་ཆེན་ཁུལ་འདི་ཉིད་འཕེལ་རྒྱས་ཀྱི་རྣམ་པ་གསར་པའི་འཐབ་ཇུས་ཀྱི་རྟེན་ས་དང་། སྤུས་ཚད་མཐོ་བའི་འཕེལ་རྒྱས་ཀྱི་དཔེ་སྟོན་ཁུལ། ཀྲུང་གོའི་ལུགས་ཀྱི་དེང་རབས་ཅན་གྱི་སྣེ་ཁྲིད་ཁུལ་བཅས་སུ་བསྐྲུན་པར་ཞབས་ཞུའི་འགན་ལེན་དེ་བས་ལེགས་པ་བྱེད་དགོས།
ཞི་ཅིན་ཕིང་།
2024ལོའི་ཟླ་6ཚེས་30ཉིན།
(ཤིན་ཧྭ་གསར་འགྱུར་ཁང་པེ་ཅིང་ནས་ཟླ་6ཚེས་30ཉིན་འབྱོར་བའི་གློག་འཕྲིན)
ཤིན་ཧྭ་གསར་འགྱུར་ཁང་ཧྲེན་ཀྲེན་ནས་ཟླ་6ཚེས་30ཉིན་གློག་འཕྲིན་འབྱོར་གསལ། ཟླ་6ཚེས་30ཉིན། ཧྲེན་ཀྲེན་ནས་ཀྲུང་ཧྲན་བར་གྱི་གཙང་པོ་སྒྲོལ་བའི་བགྲོད་ལམ་བསྐྲུན་ནས་ཤར་གཏོང་ཐུབ་པ་རེད། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞི་ཅིན་ཕིང་གིས་རྟེན་འབྲེལ་འཕྲིན་ཡིག་སྤྲིངས་ནས་སྤྲོ་སེམས་འཁོལ་བའི་རྟེན་འབྲེལ་ཞུས་པ་དང་ཆབས་ཅིག འཆར་འགོད་འཛུགས་སྐྲུན་ལ་ཞུགས་མཁན་བློ་མཐུན་ཡོངས་ལ་ལྷག་བསམ་ཟོལ་མེད་ཀྱི་འཚམས་འདྲི་ཡང་གནང་བ་རེད།
ཞི་ཅིན་ཕིང་གིས་གསུངས་དོན། ཧྲེན་ཀྲུང་བགྲོད་ལམ་ནི་ཀང་ཀྲུའུ་ཨའོ་ཟམ་ཆེན་བསྐྲུན་ཟིན་རྗེས་གཡོད་ཀང་ཨའོ་ཁུག་ཆེན་ཁུལ་དུ་བསྐྲུན་པའི་ཆེས་ཆེའི་འགྲིམ་འགྲུལ་ལས་གྲྭ་གཞན་ཞིག་ཡིན་ཞིང་། འཛམ་གླིང་རིམ་པའི་ལག་རྩལ་གྱི་དཀའ་གནད་མང་པོ་བསལ་བ་དང་འཛམ་གླིང་གི་ཟིན་ཐོ་མང་པོ་བཏོད་ཡོད། དེའི་ནང་ཞུགས་མཁན་ཡོངས་ཀྱིས་དཀའ་སྤྱད་ནུས་འདོན་དང་སྡུག་རུས་འཁྱོག་པོས་ལས་གྲྭའི་ལས་འགན་སྤུས་ཚད་མཐོ་པོས་ལེགས་སྒྲུབ་བྱས་ཡོད། དེ་ཐོག་ནས་ཀྲུང་གོའི་ལུགས་ཀྱི་དེང་རབས་ཅན་ནི་འབད་འཐབ་བྱས་ནས་བྱུང་བ་ཞིག་དང་། བྱ་གཞག་རླབས་པོ་ཆེ་ཚང་མ་ནི་འབད་འཐབ་ལ་བརྟེན་ནས་བྱུང་བ་ཞིག་ཡིན་པ་གསལ་བཤད་གང་ལེགས་ཐུབ་ཡོད།
ཞི་ཅིན་ཕིང་གིས་ནན་བཤད་གནང་དོན། གོམ་སྟབས་རྗེས་མར། ཧྲེན་ཀྲུང་བགྲོད་ལམ་དོ་དམ་དང་བེད་སྤྱོད་ཡག་པོ་བྱས་ཏེ་བདེ་འཇགས་ལྡན་པ་དང་། ཐོགས་པ་མེད་པ། སྐྱིད་སྣང་དོད་པ། རིག་ལྡན་བཅས་ཀྱི་འཁོར་སྐྱོད་ཐུབ་པའི་འགན་ལེན་བྱེད་པ་དང་། འགྲིམ་འགྲུལ་ལམ་འབྱེད་གདོང་ལེན་གྱི་ནུས་པ་གང་ལེགས་འདོན་པ། ཀྲུའུ་ཅང་གཙང་མདོའི་ཤར་ནུབ་ངོགས་གཉིས་མཉམ་འདྲེས་འཕེལ་རྒྱས་ལ་སྐུལ་འདེད་གཏོང་བ། གཡོད་ཀང་ཨའོ་ཁུག་ཆེན་ཁུལ་གྱི་རྨང་གཞིའི་སྒྲིག་བཀོད“མཁྲེགས་མཐུད”དང་སྒྲིག་སྲོལ་ལམ་སྲོལ“མཉེན་མཐུད”གྱི་ཆུ་ཚད་མཐོ་རུ་གཏོང་བ། གཡོད་ཀང་ཨའོ་ཁུག་ཆེན་ཁུལ་གྱི་ཁྲོམ་ར་གཞི་གཅིག་ཅན་ལ་སྐུལ་འདེད་གཏོང་བ་བཅས་བྱས་ཏེ་གཡོད་ཀང་ཨའོ་ཁུག་ཆེན་ཁུལ་འདི་ཉིད་འཕེལ་རྒྱས་ཀྱི་རྣམ་པ་གསར་པའི་འཐབ་ཇུས་ཀྱི་རྟེན་ས་དང་། སྤུས་ཚད་མཐོ་བའི་འཕེལ་རྒྱས་ཀྱི་དཔེ་སྟོན་ཁུལ། ཀྲུང་གོའི་ལུགས་ཀྱི་དེང་རབས་ཅན་གྱི་སྣེ་ཁྲིད་ཁུལ་བཅས་སུ་བསྐྲུན་པར་ཞབས་ཞུའི་འགན་ལེན་དེ་བས་ལེགས་པ་བྱེད་དགོས།
ཚེས་30ཉིན་གྱི་སྔ་དྲོར། ཧྲེན་ཀྲུང་བགྲོད་ལམ་ཤར་གཏོང་ཐུབ་པའི་བྱེད་སྒོ་མིས་བཟོས་གླིང་ཕྲན་ནུབ་མར་སྤེལ་བ་རེད། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་ཀོང་ཏུང་ཞིང་ཨུད་ཀྱི་ཧྲུའུ་ཅི་ཧོང་ཁུན་མིང་གིས་ས་ཡུལ་དངོས་སུ་ཞི་ཅིན་ཕིང་གི་རྟེན་འབྲེལ་འཕྲིན་ཡིག་སྒྲོག་སྦྱངས་གནང་བ་དང་འབྲེལ། ཧྲེན་ཀྲུང་བགྲོད་ལམ་ཤར་གཏོང་ཐུབ་པའི་ཁྱབ་བསྒྲགས་ཀྱང་གནང་བ་རེད།
ཧྲེན་ཀྲུང་བགྲོད་ལམ་ནི་ཧྲེན་ཀྲེན་ནས་ཚེན་ཤིས་བར་གྱི་རྒྱལ་ཁབ་མྱུར་བགྲོད་གཞུང་ལམ་གྱི་ཀྲུའུ་ཅང་གཙང་པོ་སྒྲོལ་བའི་འགག་རྩའི་ཚོད་འཛིན་རང་བཞིན་གྱི་ལས་གྲྭ་ཞིག་ཡིན་པ་དང་། ལམ་ཐག་ཧྲིལ་པོའི་རིང་ཚད་སྤྱི་ལེ་24ཙམ་ཡོད། རྣམ་གྲངས་དེ་2017ལོའི་ཟླ་2པར་སྐྲུན་འགོ་ཚུགས་ཤིང་། དུས་ཡུན་ལོ་7བརྒྱུད་བསྐྲུན་ནས་ཤར་གཏོང་ཐུབ་པ་དང་། དེ་ནི་གོ་ལ་ཧྲིལ་པོའི“ཟམ་པ་དང་། གླིང་ཕྲན། ཕུག་ལམ། ཆུ་འོག་འབྲེལ་མཐུད་བཅས”གཅིག་འདུས་ཡིན་པའི་རྒྱ་མཚོ་སྒྲོལ་བའི་ཚོ་འདུས་ལས་གྲྭ་ཐོག་མ་དེ་རེད། རྣམ་གྲངས་དེར་རླངས་འཁོར་ཤར་གཏོང་ཐུབ་རྗེས་ཧྲེན་ཀྲེན་ནས་ཀྲུང་ཧྲན་བར་གྱི་རླངས་འཁོར་བགྲོད་པའི་ལམ་ཐག་མིག་སྔའི་ཆུ་ཚོད་2ཙམ་ནས་སྐར་མ་30བར་ཐུང་དུ་འགྲོ་རྒྱུ་རེད།
