ལས་ཞུགས་ལ་སྐུལ་འདེད་གཏོང་རྒྱུའི་ཐད་ཀྱི་བསམ་འཆར་འདི་པར་འགྲེམས་བྱས།
སྤེལ་དུས 2024-09-27
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
རྩོམ་པ་པོ།
ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་ཉེ་ཆར《ལས་ཞུགས་སྔོན་འཇོག་གི་འཐབ་ཇུས་ལག་བསྟར་བྱས་ནས། སྤུས་ཚད་མཐོ་བའི་ལས་ཞུགས་གང་ལེགས་ཐུབ་རྒྱུར་སྐུལ་འདེད་གཏོང་རྒྱུའི་སྐོར་གྱི་བསམ་འཆར》པར་འགྲེམས་བྱས་ཡོད།
《བསམ་འཆར》ནང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་དང་། མི་དམངས་ལྟེ་བར་འཛིན་པའི་འཕེལ་རྒྱས་ཀྱི་དགོངས་པ་མཐའ་འཁྱོངས་བྱས་ཐོག ངལ་རྩོལ་པའི་རང་བདག་ལས་ཞུགས་དང་ཁྲོམ་རས་ལས་ཞུགས་སྙོམས་སྒྲིག སྲིད་གཞུང་གིས་ལས་ཞུགས་ལ་སྐུལ་འདེད་དང་ལས་གཏོད་ལ་སྐུལ་ལྕག་བཅས་བྱེད་པའི་བྱེད་ཕྱོགས་ཕྱོགས་ཡོངས་ནས་ལག་བསྟར་བྱས་ཏེ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རྒྱུས་རྨང་གཞི་བྱེད་པ་དང་། ལས་ཞུགས་སྔོན་འཇོག་འཐབ་ཇུས་ལག་བསྟར་བྱ་རྒྱུ་སྣེ་ཁྲིད་དུ་བྱེད་པ། ལས་ཞུགས་སྔོན་འཇོག་སྲིད་ཇུས་ཤུགས་ཆེར་གཏོང་རྒྱུ་དམ་འཛིན་བྱ་གཞིར་བྱེད་པ། གྲུབ་གཞིའི་རང་བཞིན་གྱི་ལས་ཞུགས་འགལ་ཟླ་སེལ་རྒྱུ་ཤུགས་རྒྱག་སར་བྱེད་པ། ལས་ཞུགས་ཀྱི་སྒྲིག་གཞི་ལམ་སྲོལ་བསྒྱུར་བཅོས་གཏིང་ཟབ་བྱ་རྒྱུ་སྒུལ་ཤུགས་སུ་བྱེད་པ། གཞི་ཁྱོན་ཅན་གྱི་ལས་ཤོར་ཉེན་ཁ་མི་ཐོན་པ་བྱ་རྒྱུ་མ་མཐའི་མཚམས་ཐིག་ཏུ་བྱེད་པ་བཅས་ཀྱི་ཐོག་ནས། ལས་ཞུགས་ཀྱི་སྤུས་ཚད་མཐོ་རུ་ནུས་ལྡན་གཏོང་རྒྱུ་དང་ལས་ཞུགས་ཐུབ་ཚད་ལུགས་མཐུན་ངང་འཕར་རྒྱུར་མུ་མཐུད་སྐུལ་འདེད་གཏོང་བ་དང་། ངལ་རྩོལ་པར་ལས་གནས་བརྟན་པོ་དང་ཡོང་འབབ་ལུགས་མཐུན། འགན་ལེན་བློས་འགེལ་ཆོག་པ། ལས་རིགས་བདེ་འཇགས་སོགས་ཡོང་རྒྱུར་སྐུལ་འདེད་གཏོང་བ། རྒྱ་ཆེའི་ངལ་རྩོལ་པའི་ཐོབ་ཚོར་དང་སྐྱིད་ཚོར། བདེ་ཚོར་བཅས་ཟམ་མི་ཆད་པར་ཆེ་རུ་གཏོང་བ་བཅས་བྱས་ནས། ཀྲུང་གོའི་རྣམ་པའི་དེང་རབས་ཅན་ལ་བརྟེན་ནས་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་རླབས་ཆེན་བྱ་གཞག་ལ་ཕྱོགས་ཡོངས་ནས་སྐུལ་འདེད་གཏོང་ཆེད་འདེགས་སྐྱོར་ནུས་ལྡན་བྱེད་དགོས་པའི་བླང་བྱ་བཏོན་ཡོད།
འབད་བརྩོན་བྱས་པ་བརྒྱུད། ལས་ཞུགས་གོ་སྐབས་འདང་ངེས་དང་ལས་ཞུགས་ཁོར་ཡུག་འདྲ་མཉམ། ལས་ཞུགས་གྲུབ་གཞི་ལེགས་འགྱུར། མི་དང་ལས་གནས་བཀོད་སྒྲིག་ཡག་པོ། ངལ་རྩོལ་འབྲེལ་བ་ཞི་མཐུན་བཅས་ཀྱི་རྣམ་པ་རིམ་བཞིན་ཆགས་པ་དང་། མ་ལག་འདུས་གྲུབ་དང་མཐུན་སྦྱོར་མཉམ་འགུལ། གྲངས་འཛིན་ནུས་སྤྲོད། དོ་དམ་ཚན་རིག་དང་མཐུན་པ། ཁྲིམས་སྐྱོང་འགན་ལེན་བཅས་ཀྱི་ལས་ཞུགས་ལས་དོན་གྱི་མ་ལག་སྔར་བས་འཐུས་སྒོ་ཚང་དུ་ཕྱིན་ཡོད། གྲོང་ཁྱེར་དང་གྲོང་རྡལ་གྱི་ལས་ཞུགས་བརྟན་པོའི་ངང་འཕར་བ་དང་། ལས་ཤོར་ཆུ་ཚད་ཚོད་འཛིན་ནུས་ལྡན་ཐུབ་པ། ངལ་རྩོལ་ནང་ཞུགས་ཚད་གཞི་རྩའི་ཆ་ནས་བརྟན་པོ་ཡོད་པ། དེང་རབས་ཅན་གྱི་མི་ཤུགས་ཐོན་ཁུངས་གང་མགྱོགས་སྐྲུན་པ། ལས་ཞུགས་ཀྱི་སྤྱི་པའི་ཞབས་ཞུའི་མ་ལག་སྔར་བས་འཐུས་སྒོ་ཚང་དུ་ཕྱིན་པ། ཡོང་འབབ་འབྲིང་རིམ་མི་ཚོགས་ཀྱི་གཞི་ཁྱོན་བརྟན་པོའི་ངང་ཆེ་རུ་ཕྱིན་པ། སྤྱི་ཚོགས་འགན་བཅོལ་གྱི་ཁྱབ་རྒྱ་རྒྱུན་ཆད་མེད་པར་ཆེ་རུ་ཕྱིན་པ། ངལ་རྩོལ་པའི་ལས་ཞུགས་ཁེ་དབང་སྲུང་སྐྱོང་ནུས་ལྡན་ཐུབ་པ་བཅས་བྱུང་སྟེ། མི་ཚང་མར་དཀའ་སྤྱད་འབད་བརྩོན་བྱས་པ་བརྒྱུད་རང་ཉིད་འཕེལ་རྒྱས་གཏོང་བའི་གོ་སྐབས་ཐོབ་པར་བྱས་ཡོད།
《བསམ་འཆར》ནང་དཔལ་འབྱོར་སྤྱི་ཚོགས་འཕེལ་རྒྱས་དང་ལས་ཞུགས་ལ་སྐུལ་འདེད་གཏོང་བ་གཉིས་མཐུན་སྦྱོར་མཉམ་འགུལ་ཡོང་རྒྱུར་སྐུལ་འདེད་དང་། གྲུབ་གཞིའི་རང་བཞིན་གྱི་ལས་ཞུགས་འགལ་བ་ནུས་ཤུགས་ཡོད་རྒུས་ཐག་གཅོད་བྱེད་པ། གཙོ་གནད་ཚོགས་སྤྱིའི་ལས་ཞུགས་རྒྱབ་སྐྱོར་མ་ལག་འཐུས་ཚང་དུ་གཏོང་བ། གནད་སྨིན་ནུས་ཆེའི་ལས་ཞུགས་ཀྱི་སྤྱི་པའི་ཞབས་ཞུའི་མ་ལག་འཐུས་ཚང་དུ་གཏོང་བ། ངལ་རྩོལ་པའི་ལས་ཞུགས་ཁེ་དབང་འགན་ལེན་ཆུ་ཚད་མཐོ་རུ་གཏོང་བ། སྤུས་ཚད་མཐོ་བའི་ལས་ཞུགས་གང་ལེགས་ཐུབ་རྒྱུར་སྐུལ་འདེད་གཏོང་བའི་ལས་ཀའི་མཉམ་ཤུགས་གཅིག་སྡུད་བྱེད་པ་སོགས་ཀྱི་ཐད་བཀོད་སྒྲིག་ཁག་ཉེར་བཞི་བྱས་ཡོད་པ་རེད།
