ཞི་ཅིན་ཕིང་གིས་ཁེ་ལས་འདིའི་བཟོ་པའི་འཐུས་མིར་འཕྲིན་ལན་སྤྲིངས་པ།
སྤེལ་དུས 2024-09-30
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
རྩོམ་པ་པོ།
ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་ཞི་ཅིན་ཕིང་གིས་ཉེ་དུས་ཀྲུང་གོ་ལྕི་བའི་འཕྲུལ་ཆས་ཚོགས་པ་ཚད་ཡོད་ཀུང་སི་དང་པོའི་ཐོན་ལས་བཟོ་པའི་འཐུས་མིར་འཕྲིན་ལན་སྤྲིངས་ཏེ། ཁོང་ཚོར་བྱམས་བརྩེའི་སྐུལ་ལྕག་གནང་བ་དང་སྦྲགས་ཐུགས་རེ་ཟབ་མོ་བཅོལ་གནང་ཡོད།
ཞི་ཅིན་ཕིང་གིས། ང་རང་ཀྲུང་གོ་ལྕི་བའི་འཕྲུལ་ཆས་ཚོགས་པ་ཚད་ཡོད་ཀུང་སི་དང་པོར་ཐེངས་གཉིས་སླེབས་མྱོང་ཡོད། ཚང་མས་ཚན་རྩལ་གསར་གཏོད་དང་ཐོན་རྫས་ཀྱི་སྤུས་ཚད་ལ་རེ་སྙེག་མཐའ་གཅིག་ཏུ་བྱེད་པ་དེས་ང་རང་ལ་བག་ཆགས་ཟབ་མོ་བཞག་བྱུང་། ལོ་འདི་དག་རིང་། ཁྱེད་ཚོས་སྒྲིག་ཆས་ཆེན་པོ་བཟོ་སྐྲུན་གྱི་འགག་རྩའི་ལྟེ་བའི་ལག་རྩལ་གྱི་དཀའ་གནད་འགག་གཏོར་བྱ་རྒྱུར་རྩེ་གཅིག་ཏུ་གཞོལ་བས། འགག་སྒྲོལ་གསར་པ་མི་ཉུང་བ་ཞིག་བྱུང་སྟེ། དུས་རབས་གསར་པའི་ཀྲུང་གོའི་ཐོན་ལས་བཟོ་པའི་རྒྱལ་གཅེས་བསམ་པ་དང་གསར་གཏོད་ནུས་པ་མངོན་ཡོད་ཅེས་བསྟན་གནང་ཡོད།
ཞི་ཅིན་ཕིང་གིས། བཟོ་སྐྲུན་ལས་རིགས་ནི་རྒྱལ་ཁབ་འཛུགས་སྐྲུན་གྱི་རྩ་བ་དང་རྒྱལ་ཁབ་སྟོབས་ཆེར་གཏོང་བའི་རྨང་གཞི་ཡིན། དུས་རབས་གསར་པའི་རྒྱང་སྐྱོད་ཀྱི་ལམ་བུ་གསར་པའི་ཐོག ཁྱེད་ཚོས་རྩལ་ནུས་ལ་བརྟེན་ནས་རྒྱལ་ཁབ་ལ་དྲིན་ལན་འཇལ་བའི་ཐོག་མའི་བསམ་འདུན་བརྟན་སྲུང་བྱེད་པ་དང་། ངལ་རྩོལ་དཔེ་བཟང་གི་སྙིང་སྟོབས་དང་ངལ་རྩོལ་གྱི་སྙིང་སྟོབས། བཟོ་བོའི་སྙིང་སྟོབས་བཅས་དར་སྤེལ་བཏང་ཐོག ནུས་རྩལ་དཀའ་སྦྱོང་དང་འཇོན་ནུས་ཆེ་རུ་བཏང་སྟེ། བཟོ་སྐྲུན་རྒྱལ་ཁབ་སྟོབས་ཆེན་འཛུགས་སྐྲུན་དང་བྱང་ཤར་ཁྱོན་ཡོངས་དར་རྒྱས་ལ་སྐུལ་འདེད་གཏོང་ཆེད་མུ་མཐུད་བློ་གྲོས་དང་སྟོབས་ཤུགས་སྐྱེས་སུ་འབུལ་རྒྱུའི་རེ་བ་ཡོད། ཀྲུང་དབྱང་ཁེ་ལས་ཀྱིས་བསྒྱུར་བཅོས་གསར་གཏོད་གཏིང་ཟབ་ཏུ་གཏོང་བ་དང་། ལྟེ་བའི་བྱེད་ནུས་ཆེ་རུ་གཏོང་བ། ལྟེ་བའི་འགྲན་རྩོད་ནུས་པ་ཆེ་རུ་གཏོང་བ་བཅས་ཀྱི་ཐོག་ནས། སྟོབས་ཆེ་དང་སྤུས་ལེགས། གཞི་ཁྱོན་ཆེ་བ་བཅས་སུ་འཛུགས་སྐྱོང་ཧུར་ཐག་བྱས་ཏེ། ཀྲུང་གོའི་རྣམ་པའི་དེང་རབས་ཅན་ལ་བརྟེན་ནས་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་རླབས་ཆེའི་བྱ་གཞག་ལ་ཕྱོགས་ཡོངས་ནས་སྐུལ་འདེད་གཏོང་ཆེད་ལེགས་སྐྱེས་དེ་བས་ཆེ་བ་འབུལ་དགོས་ཞེས་ནན་སྟོན་གནང་ཡོད།
ཀྲུང་གོ་ལྕི་བའི་འཕྲུལ་ཆས་ཚོགས་པ་ཚད་ཡོད་ཀུང་སི་དང་པོ་ནི་རང་རྒྱལ་གྱི་སྒྲིག་ཆས་བཟོ་སྐྲུན་ལས་རིགས་ཁྱབ་ཁོངས་ཀྱི་རྐང་འཛིན་ཁེ་ལས་གལ་ཆེན་ཞིག་ཡིན་པ་དང་། དེའི་སྤྱི་ཁྱབ་པུའུ་དེ་ཧེ་ལུང་ཅང་ཞིང་ཆེན་ཆི་ཆི་ཧའར་གྲོང་ཁྱེར་དུ་གནས་ཡོད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་ཀྲུང་གོ་ལྕི་བའི་འཕྲུལ་ཆས་ཚོགས་པ་ཚད་ཡོད་ཀུང་སི་དང་པོའི་འབྲེལ་ཡོད་བཟོ་སྐྲུན་རྟེན་གཞིར་གཟིགས་ཞིབ་གནང་བར་ཕེབས་ཏེ། ཁེ་ལས་ཀྱི་བསྒྱུར་བཅོས་གསར་གཏོད་དང་ལས་གཉེར་དོ་དམ་སོགས་ཀྱི་ཐད་བླང་བྱ་བཏོན་གནང་ཡོད། ཉེ་དུས། སྔོན་ཐོན་དཔེ་བཟང་གི་མཚན་སྙན་ཐོབ་པའི་ཀྲུང་གོ་ལྕི་བའི་འཕྲུལ་ཆས་ཚོགས་པ་ཚད་ཡོད་ཀུང་སི་དང་པོའི་ཐོན་ལས་བཟོ་པའི་འཐུས་མིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་ལ་འཕྲིན་ཡིག་ཕུལ་ཏེ། སྤྱི་ཁྱབ་ཧྲུའུ་ཅིའི་བཀའ་མངགས་ཡིད་ལ་བརྟན་པོར་ངེས་ནས་ལག་རྩལ་འགག་གཏོར་ལ་ཤུགས་སྣོན་རྒྱག་ཚུལ་སོགས་སྙན་སེང་ཞུས་པ་དང་། བྱང་ཤར་ཁྱོན་ཡོངས་དར་རྒྱས་དང་རྒྱལ་ཁབ་སྟོབས་ཆེན་འཛུགས་སྐྲུན་ཆེད་སྟོབས་ཤུགས་སྐྱེས་སུ་འབུལ་རྒྱུའི་ཆོད་སེམས་མཚོན་པར་བྱས་ཡོད།
