ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་ཞི་ཅིན་ཕིང་ཚེས་17ཉིན་གྱི་སྔ་དྲོ་པེ་ཅིང་དུ་དམངས་གཉེར་ཁེ་ལས་ཀྱི་བཞུགས་མོལ་ཚོགས་འདུར་ཞུགས་པ་དང་འབྲེལ་གསུང་བཤད་གལ་ཆེན་གནང་བ་རེད། ཁོང་གིས་དམངས་གཉེར་དཔལ་འབྱོར་འཕེལ་རྒྱས་གཏོང་རྒྱུའི་སྐོར་གྱི་ཏང་དང་རྒྱལ་ཁབ་ཀྱི་གཞི་རྩའི་བྱེད་ཕྱོགས་དང་སྲིད་ཇུས་དེ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ལུགས་མ་ལག་ནང་བཅུག་ཡོད་པས། དེ་ཐོག་མཐའ་བར་གསུམ་དུ་རྒྱུན་འཁྱོངས་དང་དོན་འཁྱོལ་བྱ་རྒྱུ་ཡིན་པ་ལས། འགྱུར་བ་གཏོང་མི་རུང་ལ། འགྱུར་བ་གཏོང་ཡང་མི་སྲིད། དུས་རབས་གསར་པའི་རྒྱང་སྐྱོད་ཀྱི་ལམ་བུ་གསར་པར་དམངས་གཉེར་དཔལ་འབྱོར་འཕེལ་རྒྱས་ཀྱི་མདུན་ལམ་ཡངས་བ་དང་བྱ་བ་སྒྲུབ་རྒྱ་ཆེན་པོ་ཡོད་པས། རྒྱ་ཆེའི་དམངས་གཉེར་ཁེ་ལས་དང་དམངས་གཉེར་ཁེ་ལས་མཁས་ཅན་གྱིས་འཇོན་ནུས་ངོམ་རྒྱུ་སྐབས་སུ་བབས་ཡོད། བསམ་བློ་གཅིག་གྱུར་དང་ཡིད་ཆེས་བརྟན་པོ་བྱས་ཏེ། དམངས་གཉེར་དཔལ་འབྱོར་སྐྱོན་བྲལ་དང་སྤུས་ཚད་མཐོ་པོའི་སྒོ་ནས་འཕེལ་རྒྱས་འགྲོ་རྒྱུར་སྐུལ་འདེད་གཏོང་དགོས་པ་དང་། རྒྱ་ཆེའི་དམངས་གཉེར་ཁེ་ལས་དང་དམངས་གཉེར་ཁེ་ལས་མཁས་ཅན་རྣམས་ཀྱིས་རྒྱལ་ཁབ་ལ་དྲིན་ལན་འཇལ་བའི་ཕུགས་འདུན་འཆང་བ་དང་། བློ་གཅིག་སེམས་གཅིག་གིས་འཕེལ་རྒྱས་དོན་གཉེར་བྱེད་པ། ཁྲིམས་སྲུང་ཞིང་ཚོང་གཉེར་ལ་བྱང་ཆུབ་པ། སྔོན་ལ་ཕྱུག་པོ་ཆགས་མཁན་གྱིས་ཐུན་མོང་ཕྱུག་འགྱུར་ལ་སྐུལ་འདེད་གཏོང་བ་བཅས་བྱས་ནས། ཀྲུང་གོ་རྣམ་པའི་དེང་རབས་ཅན་ལ་སྐུལ་འདེད་གཏོང་ཆེད་ལེགས་སྐྱེས་གསར་པ་དང་དེ་བས་ཆེ་བ་འབུལ་རྒྱུའི་རེ་བ་ཡོད་ཅེས་ནན་སྟོན་གནང་ཡོད།
ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་དང་། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཏིང་ཞུའེ་ཞང་བཞུགས་མོལ་ཚོགས་འདུར་ཞུགས་པ་དང་། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་ཝང་ཧུའུ་ཉིང་གིས་བཞུགས་མོལ་ཚོགས་འདུ་གཙོ་སྐྱོང་གནང་བ་རེད།
བཞུགས་མོལ་ཚོགས་འདུའི་ཐོག ཧྭ་ཝུའེ་ལག་རྩལ་ཚད་ཡོད་ཀུང་སིའི་དབུ་བཞུགས་ལག་བསྟར་དཔོན་རེན་ཀྲེང་ཧྥེ་དང་། པི་ཡ་ཏི་མ་རྐང་ཚད་ཡོད་ཀུང་སིའི་ལས་འཛིན་དཔོན་ཝང་ཁྲོན་ཧྥུ། ཤིན་ཞི་ཝང་མ་རྐང་ཚོད་འཛིན་ཚོགས་པ་ཚད་ཡོད་ཀུང་སིའི་ལས་འཛིན་དཔོན་ལིའུ་ཡུང་ཧའོ། ཧྲང་ཧའེ་ཝེའར་གློག་འདྲེན་ཕྱེད་གཟུགས་མ་རྐང་ཚད་ཡོད་ཀུང་སིའི་ལས་འཛིན་དཔོན་ཡུས་རེན་རོང་། ཧང་ཀྲོའུ་ཡུས་ཧྲུའུ་ཚན་རྩལ་ཚད་ཡོད་ཀུང་སིའི་དབུ་བཞུགས་ལག་བསྟར་དཔོན་ཝང་ཤིན་ཞིན། ཞའོ་སྨི་ཚན་རྩལ་ཚད་ཡོད་འགན་འཁྲི་ཀུང་སིའི་ལས་འཛིན་དཔོན་ལེ་ཅུན་སོགས་དམངས་གཉེར་ཁེ་ལས་ཀྱི་འགན་འཁུར་མཁན་འཐུས་མི་དྲུག་གིས་སྔ་རྗེས་སུ་གཏམ་བཤད་སྤེལ་ནས་། དུས་བབ་གསར་པའི་འོག་དམངས་གཉེར་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་རྒྱུའི་ཐད་བསམ་འཆར་དང་གྲོས་འགོ་བཏོན་པ་རེད།
ཚང་མའི་གཏམ་བཤད་གསན་གྲུབ་རྗེས། ཞི་ཅིན་ཕིང་གིས་གསུང་བཤད་གལ་ཆེན་གནང་བ་རེད། ཁོང་གིས་དམངས་གཉེར་ཁེ་ལས་ནི་བསྒྱུར་བཅོས་སྒོ་འབྱེད་ཀྱི་རླབས་ཆེན་བརྒྱུད་རིམ་དང་བསྟུན་ནས་དབྱར་མཚོ་རྒྱས་པ་ལྟར་འཕེལ་རྒྱས་བྱུང་བ་ཞིག་རེད། ལོ་བཅུ་ཕྲག་ཁ་ཤས་རིང་། དམངས་གཉེར་དཔལ་འབྱོར་གྱིས་བསྒྱུར་བཅོས་སྒོ་འབྱེད་དང་སྤྱི་ཚོགས་རིང་ལུགས་དེང་རབས་ཅན་འཛུགས་སྐྲུན་བྱ་གཞག་ཁྲོད་བཟུང་བའི་གནས་བབ་དང་གང་དེས་ཐོན་པའི་ནུས་པར་ངོས་འཛིན་དང་། དམངས་གཉེར་དཔལ་འབྱོར་འཕེལ་རྒྱས་གཏོང་རྒྱུའི་ཐད་ཀྱི་ཏང་དང་རྒྱལ་ཁབ་ཀྱི་བྱེད་ཕྱོགས་དང་སྲིད་ཇུས་སྐོར་ལ་ང་ཚོའི་ཏང་གི་རིགས་པའི་གཞུང་ལུགས་དང་ལག་ལེན་ནི་གཅིག་རྒྱུན་གཅིག་འཛིན་དང་དུས་བསྟུན་ཡར་རྒྱས་ཕྱིན་པ་ཞིག་ཡིན། ཏང་དང་རྒྱལ་ཁབ་ཀྱིས་སྤྱི་ཚོགས་རིང་ལུགས་ཀྱི་གཞི་རྩའི་དཔལ་འབྱོར་ལམ་ལུགས་མཐའ་འཁྱོངས་དང་འཐུས་ཚང་དུ་གཏོང་བ་དང་། གཡོ་འགུལ་སྤུ་ཙམ་ཡང་མེད་པའི་སྒོ་ནས་སྤྱི་ལ་དབང་བའི་ལམ་ལུགས་ཀྱི་དཔལ་འབྱོར་སྲ་བརྟན་དང་འཕེལ་རྒྱས་གཏོང་བ། སྤྱི་ལ་དབང་བ་མིན་པའི་ལམ་ལུགས་ཀྱི་དཔལ་འབྱོར་འཕེལ་རྒྱས་གཏོང་བར་སྐུལ་ལྕག་དང་། རྒྱབ་སྐྱོར། ཁྲིད་སྟོན་བཅས་བྱེད་པ། ཏང་དང་རྒྱལ་ཁབ་ཀྱིས་དབང་བའི་ལམ་ལུགས་སྣ་ཚོགས་ཀྱི་དཔལ་འབྱོར་གྱིས་ཁྲིམས་ལྟར་ཐོན་སྐྱེད་རྒྱུ་ཆ་འདྲ་མཉམ་བེད་སྤྱོད་དང་། འདྲ་མཉམ་ངང་ཁྲོམ་རའི་འགྲན་རྩོད་ནང་ཞུགས་པ། བཅའ་ཁྲིམས་ཀྱི་སྲུང་སྐྱོང་འདྲ་མཉམ་ཐོབ་པ་བཅས་འགན་ལེན་བྱས་ཏེ། དབང་བའི་ལམ་ལུགས་སྣ་ཚོགས་ཀྱི་དཔལ་འབྱོར་གྱི་ལེགས་ཆ་ཕན་ཚུན་གསབ་རེས་དང་ཐུན་མོང་འཕེལ་རྒྱས་ཡོང་བར་སྐུལ་འདེད་གཏོང་བ་དང་། སྤྱི་ལ་དབང་བའི་མིན་པའི་ལམ་ལུགས་ཀྱི་དཔལ་འབྱོར་སྐྱོན་བྲལ་ངང་འཕེལ་རྒྱས་འགྲོ་བ་དང་སྤྱི་ལ་དབང་བ་མིན་པའི་ལམ་ལུགས་ཀྱི་དཔལ་འབྱོར་མི་སྣ་སྐྱོན་བྲལ་ངང་འཚར་ལོངས་ཡོང་བར་སྐུལ་འདེད་བཏང་ཡོད་ཅེས་བསྟན་གནང་ཡོད།
ཞི་ཅིན་ཕིང་གིས། ད་ལྟ་རང་རྒྱལ་གྱི་དམངས་གཉེར་དཔལ་འབྱོར་དེ་གཞི་ཁྱོན་ངེས་ཅན་ལྡན་པ་དང་བསྡུར་ཚད་མང་པོ་བཟུང་བའི་སྟོབས་ཤུགས་ཤིག་ཏུ་གྱུར་ཟིན་པས། དམངས་གཉེར་དཔལ་འབྱོར་སྤུས་མཐོའི་གོང་འཕེལ་འགྲོ་བར་སྐུལ་འདེད་གཏོང་བའི་ཐད་རྨང་གཞི་བརྟན་པོ་ཞིག་འདིང་ཐུབ་ཡོད། དུས་རབས་གསར་པའི་རྒྱང་སྐྱོད་ཀྱི་ལམ་བུ་གསར་པར། རང་རྒྱལ་གྱི་སྤྱི་ཚོགས་ཐོན་སྐྱེད་ནུས་ཤུགས་རྒྱུན་ཆད་མེད་པར་ཆེ་རུ་འགྲོ་རྒྱུ་དང་། མི་དམངས་མང་ཚོགས་ཀྱི་འཚོ་བའི་ཆུ་ཚད་ཀྱང་བརྟན་པོའི་ངང་མཐོ་རུ་འགྲོ་རྒྱུ་ཡིན་པ། བསྒྱུར་བཅོས་སྒོ་དབྱེ་སྔར་ལས་ལྷག་པའི་སྒོ་ནས་ཕྱོགས་ཡོངས་ནས་གཏིང་ཟབ་ཏུ་འགྲོ་རྒྱུ་ཡིན་པ། ལྷག་པར་དུ་སློབ་གསོ་ཚན་རྩལ་བྱ་གཞག་གོང་འཕེལ་མྱུར་པོ་བྱུང་བ་དང་། ཤེས་ལྡན་མི་སྣའི་དཔུང་ཁག་དང་ངལ་རྩོལ་ཐོན་ཁུངས་ཀྱི་གྲངས་འབོར་མང་དུ་དང་བྱང་ཚད་མཐོ་རུ་ཕྱིན་པ། ཐོན་ལས་མ་ལག་དང་རྨང་གཞིའི་སྒྲིག་བཀོད་མ་ལག་ཆ་སྦྱོར་འཐུས་ཚང་དུ་ཕྱིན་པ། མི་འབོར་དུང་ཕྱུར་14ལྷག་གི་གཞི་ཁྱོན་ཧ་ཅང་ཆེ་བའི་ཁྲོམ་རའི་མི་མངོན་པའི་སྟོབས་ཤུགས་ཧ་ཅང་ཆེན་པོ་ཡོད་པ་བཅས་ཀྱིས་དམངས་གཉེར་དཔལ་འབྱོར་འཕེལ་རྒྱས་འགྲོ་རྒྱུར་གོ་སྐབས་གསར་པ་དེ་བས་མང་བ་དང་། གོང་འཕེལ་གྱི་བར་ཁམས་ དེ་བས་ཆེ་བ་མཁོ་འདོན་བྱས་ཡོད། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ལམ་ལུགས་ལ་ཕྱོགས་མང་པོའི་ཐད་ཀྱི་བཟང་ཆ་མངོན་གསལ་དོད་པོ་ལྡན་ཡོད་ཅིང་། སྤྱི་ཚོགས་རིང་ལུགས་ཁྲོམ་རའི་དཔལ་འབྱོར་སྒྲིག་གཞི་དང་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཁྲིམས་སྐྱོང་སྒྲིག་གཞི་ཟམ་མི་ཆད་པར་འཐུས་སྒོ་ཚང་དུ་ཕྱིན་ནས། དམངས་གཉེར་དཔལ་འབྱོར་གོང་འཕེལ་ཆེད་དེ་བས་སྲ་ཞིང་བརྟན་པའི་འགན་སྲུང་མཁོ་འདོན་བྱ་རྒྱུ་རེད་ཅེས་བསྟན་གནང་ཡོད།
ཞི་ཅིན་ཕིང་གིས། མིག་སྔར་དམངས་གཉེར་དཔལ་འབྱོར་གོང་འཕེལ་ལ་འཕྲད་པའི་དཀའ་ངལ་དང་འགྲན་རྩོད་དེ་དག་ནི་སྤྱི་ཡོངས་ནས་བཤད་ན་བསྒྱུར་བཅོས་གོང་འཕེལ་དང་། ཐོན་ལས་བརྗེ་སྒྱུར་རིམ་སྤོར་བྱེད་པའི་བརྒྱུད་རིམ་ནང་འཕྲད་པ་ཞིག་ཡིན་པ་དང་། དེ་ནི་ཆ་ཤས་ཙམ་ཞིག་ལས་སྤྱི་ཡོངས་ཤིག་མ་ཡིན་ལ། གནས་སྐབས་ཙམ་ཞིག་ལས་དུས་ཡུན་རིང་པོར་གནས་པ་ཞིག་ཀྱང་མ་ཡིན་པས། དེ་ནི་ཁྱད་གསོད་ཐུབ་པ་ཞིག་ཡིན་པ་ལས་ཐག་གཅོད་མི་ཐུབ་པའི་གནད་དོན་ཞིག་མ་ཡིན། བསམ་བློ་དང་བྱ་སྤྱོད་གཉིས་ཏང་ཀྲུང་དབྱང་གིས་རྒྱལ་ཁབ་ཕྱི་ནང་ནི་དུས་བབ་ལ་བརྡར་ཤ་བཅད་གནང་བའི་ཐོག་གཅིག་གྱུར་བྱེད་པ་དང་། ཏང་ཀྲུང་དབྱང་གིས་དཔལ་འབྱོར་ལས་དོན་གྲོས་ཚོགས་ཐོག་གནང་བའི་བཀོད་ཇུས་བཀོད་སྒྲིག་ཐོག་གཅིག་གྱུར་བྱེད་པ། དཀའ་ངལ་དང་འགྲན་རྩོད་ཀྱི་ཁྲོད་ནས་མདུན་ལམ་དང་། འོད་སྣང་། འབྱུང་འགྱུར་བཅས་མཐོང་ཐུབ་པར་བྱེད་པ། གོང་འཕེལ་གྱི་ངེས་ཤུགས་རྒྱུན་འཁྱོངས་བྱེད་པ་དང་གོང་འཕེལ་གྱི་སེམས་ཤུགས་ཆེ་རུ་གཏོང་བ། འབད་འབུངས་བྱས་ཚེ་གཞི་ནས་རྒྱལ་ཁ་ལེན་ཐུབ་པའི་བསམ་པའི་ཉམས་འགྱུར་རྒྱུན་འཁྱོངས་བྱེད་དགོས་ཞེས་ནན་སྟོན་གནང་ཡོད།
ཞི་ཅིན་ཕིང་གིས། དམངས་གཉེར་དཔལ་འབྱོར་གོང་འཕེལ་ལ་སྐུལ་འདེད་གཏོང་བའི་སྲིད་ཇུས་བྱ་ཐབས་ཁག་ཏན་ཏན་ཏིག་ཏིག་གིས་དོན་འཁྱོལ་བྱ་རྒྱུ་ནི་མིག་སྔར་དམངས་གཉེར་དཔལ་འབྱོར་གོང་འཕེལ་གཏོང་བའི་ལས་ཀའི་གཙོ་གནད་དེ་ཡིན། ཏང་ཀྲུང་དབྱང་གིས་གཏན་འཁེལ་བྱས་པ་དག་མཐའ་གཅིག་ཏུ་ལག་བསྟར་བྱེད་དགོས་པ་ལས། དེའི་ཐད་སླ་བཅོས་འཐེན་འཁྲི་བྱེད་མི་རུང་བ་དང་། ཁྲིམས་ལྟར་འདྲ་མཉམ་ཐོག་ནས་ཐོན་སྐྱེད་ཀྱི་དགོས་ངེས་མཐུན་རྐྱེན་བེད་སྤྱོད་དང་། འདྲ་མཉམ་ཐོག་ནས་ཁྲོམ་རའི་འགྲན་རྩོད་ནང་ཞུགས་པའི་བཀག་རྒྱ་སྣ་ཚོགས་མཐའ་གཅིག་ཏུ་མེད་པ་བཟོ་དགོས་པ་དང་། རྨང་གཞིའི་སྒྲིག་ཆས་ཀྱི་འགྲན་རྩོད་རང་བཞིན་གྱི་ཁྱབ་ཁོངས་དག་སྣེ་རིགས་ཁག་གི་ཁེ་གཉེར་བྱེད་པོར་འདྲ་མཉམ་ཐོག་ནས་སྒོ་མོ་འབྱེད་རྒྱུར་རྒྱུན་མཐུད་ངང་སྐུལ་འདེད་གཏོང་བ། དམངས་གཉེར་ཁེ་ལས་ཀྱིས་མ་དངུལ་བསྡུ་རུབ་དཀའ་བ་དང་མ་དངུལ་བསྡུ་རུབ་ཀྱི་མ་གནས་མཐོ་བའི་གནད་དོན་མུ་མཐུད་ཤུགས་ཆེན་པོས་ཐག་གཅོད་བྱ་དགོས། དམངས་གཉེར་ཁེ་ལས་ཀྱི་དངུལ་ཆད་འགྱངས་ཀྱི་གནད་དོན་ཐག་གཅོད་ཤུགས་ཆེན་བྱ་དགོས་པ། ཁྲིམས་འཛིན་ལྟ་སྐུལ་ཤུགས་ཆེར་བཏང་ནས། གང་བྱུང་དུ་གྲོན་དངུལ་བསྡུ་བ་དང་། གང་བྱུང་དུ་དངུལ་ཆད་གཅོད་པ། གང་བྱུང་དུ་ཞིབ་བཤེར་བྱེད་པ། གང་བྱུང་དུ་སྒོ་ཐེལ་རྒྱག་པ་བཅས་ལ་གཅིག་སྡུད་ཐོག་བཅོས་སྒྲིག་བྱས་ནས། དམངས་གཉེར་ཁེ་ལས་དང་དམངས་གཉེར་ཁེ་ལས་པའི་ཁྲིམས་མཐུན་ཁེ་དབང་ལ་ཁྲིམས་ལྟར་སྲུང་སྐྱོབ་ཏན་ཏིག་བྱ་དགོས། ཆབས་ཅིག་ངོས་འཛིན་ཐུབ་པ་བྱ་དགོས་པར། རང་རྒྱལ་ནི་སྤྱི་ཚོགས་རིང་ལུགས་ཀྱི་ཁྲིམས་སྐྱོང་རྒྱལ་ཁབ་ཡིན་པས། སྣེ་རིགས་ཁག་གི་དབང་བའི་ལམ་ལུགས་ཀྱི་ཁེ་ལས་ཀྱིས་ཁྲིམས་འགལ་བྱ་སྤྱོད་སྤེལ་ཚེ། ཞིབ་བཤེར་ཐག་གཅོད་བྱེད་རྐྱང་བྱེད་དགོས། དཀའ་སེལ་སྲིད་ཇུས་ཁག་དོན་འཁྱོལ་ནན་ཏན་བྱེད་དགོས་པ་དང་། སྲིད་ཇུས་གནད་ལ་འཕིགས་པོ་ཡོང་བ་བྱེད་པ་དང་། ཕྱོགས་བསྡུས་ཇུས་བསྟར་ལ་དོ་སྣང་བྱ་དགོས་པ། ཁེ་ལས་ལ་ལྟ་སྟངས་གཅིག་པ་འཛིན་དགོས། ཉེ་ཞིང་གཙང་བའི་སྲིད་ཚོང་འབྲེལ་བ་སྔར་ལས་ལྷག་པའི་སྒོ་ནས་འཛུགས་དགོས། རིམ་ཁག་ཏང་ཨུད་དང་སྲིད་གཞུང་གིས་དོན་དངོས་ལ་གཞིགས་ནས། དམངས་གཉེར་དཔལ་འབྱོར་ལ་སྐུལ་འདེད་གཏོང་བའི་སྲིད་ཇུས་བྱ་ཐབས་ཁག་གི་དོན་འཁྱོལ་ལ་གཅིག་གྱུར་ཐོག་དམ་འཛིན་བྱ་དགོས་ཞེས་བསྟན་འདུག
ཞི་ཅིན་ཕིང་གིས། ཁེ་ལས་ནི་གཉེར་སྐྱོང་བྱེད་པོ་ཡིན་པ་དང་། ཁེ་ལས་འཕེལ་རྒྱས་ཀྱི་ནང་སྐྱེས་སྒུལ་ཤུགས་ནི་ཨང་དང་པོ་ཡིན། རྒྱ་ཆེའི་དམངས་གཉེར་ཁེ་ལས་དང་དམངས་གཉེར་ཁེ་ལས་པས་ལས་གཏོད་དང་རྒྱལ་ཁབ་ལ་དྲིན་ལན་འཇལ་བའི་སྤྲོ་སེམས་ཀྱིས་ཁེངས་པ་དང་། ཕུགས་བསམ་དང་འདུན་པ་རྒྱུན་ཆད་མེད་པར་མཐོར་འདེགས་གཏོང་བ། ཁྱིམ་ཚང་དང་རྒྱལ་ཁབ་ལ་འཆང་བའི་བརྩེ་སེམས་ཟབ་ཏུ་གཏོང་བ། ཕྱུག་པོ་ཆགས་རྗེས་རྩ་བ་མ་བརྗེད་པ་དང་ཕྱུག་པོ་ཆགས་རྗེས་མུ་མཐུད་འབད་བརྩོན་བྱེད་པ། ཁེ་ལས་མཁས་པའི་སྙིང་སྟོབས་དར་སྤེལ་གཏོང་བ། བློ་རྩེ་གཅིག་སྒྲིམ་གྱིས་ཁེ་ལས་སྟོབས་ཆེར་གཏོང་བ། བློ་བརྟན་འགྱུར་མེད་ངང་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་འཛུགས་སྐྲུན་བྱེད་མཁན་དང་ཀྲུང་གོའི་རྣམ་པའི་དེང་རབས་ཅན་ལ་སྐུལ་འདེད་གཏོང་མཁན་བྱེད་དགོས། བློ་བརྟན་འགྱུར་མེད་ངང་སྤུས་ཚད་མཐོ་བའི་འཕེལ་རྒྱས་ཀྱི་ལམ་བུའི་ཐོག་སྐྱོད་པ་དང་། ལས་སྒོ་གཙོ་བོ་བརྟན་སྲུང་དང་། དངོས་གཉེར་ཁེ་ལས་སྟོབས་ཆེར་གཏོང་བ། རང་བརྟེན་གསར་གཏོད་ལ་ཤུགས་སྣོན་རྒྱག་པ། འཕེལ་རྒྱས་གཏོང་སྟངས་བརྗེ་སྒྱུར། ཁེ་ལས་ཀྱི་སྤུས་ཚད་དང་། ཕན་འབྲས། ལྟེ་བའི་འགྲན་རྩོད་ནུས་པ་རྒྱུན་ཆད་མེད་པར་ཆེ་རུ་གཏོང་བ་བཅས་བྱས་ཏེ། ཚན་རྩལ་གསར་གཏོད་ལ་སྐུལ་འདེད་གཏོང་བ་དང་། སྤུས་གསར་ཐོན་སྐྱེད་ནུས་ཤུགས་གསོ་སྤེལ་བྱེད་པ། དེང་རབས་ཅན་གྱི་ཐོན་ལས་མ་ལག་འཛུགས་སྐྲུན། ཤང་གྲོང་ དར་རྒྱས་ལ་ཁྱོན་ཡོངས་ནས་སྐུལ་འདེད་གཏོང་བ། ས་ཁོངས་མཐུན་སྦྱོར་གོང་འཕེལ་འགྲོ་རྒྱུར་སྐུལ་འདེད་གཏོང་བ། དམངས་འཚོ་འགན་སྲུང་དང་ལེགས་སུ་གཏོང་བ་སོགས་ལ་ལེགས་སྐྱེས་མང་ཙམ་འབུལ་དགོས། ཀྲུང་གོའི་ཁྱད་ཆོས་ལྡན་པའི་དེང་རབས་ཁེ་ལས་ལམ་ལུགས་ཀྱི་བླང་བྱ་གཞིར་བཟུང་སྟེ་ཁེ་ལས་བཅོས་སྐྱོང་གི་གྲུབ་ཆ་འཐུས་ཚང་དུ་གཏོང་བ་དང་། མ་རྐང་འཇོག་མཁན་གྱི་བྱ་སྤྱོད་ཚད་ལྡན་དུ་གཏོང་བ། ནང་ཁུལ་དུ་ལྟ་སྐུལ་བྱ་ཤུགས་ཆེ་རུ་གཏོང་བ། ཉེན་ཁ་སྔོན་འགོག་ལམ་སྲོལ་འཐུས་ཚང་དུ་གཏོང་བ་བཅས་བྱས་ཏེ། ངལ་རྩོལ་དང་། ཤེས་ལྡན་མི་སྣ། ཤེས་བྱ། ལག་རྩལ། མ་དངུལ། གྲངས་གཞི་སོགས་ཐོན་སྐྱེད་རྒྱུ་རྐྱེན་བེད་སྤྱོད་དང་། དོ་དམ། སྲུང་སྐྱོང་བཅས་བྱེད་པའི་ལམ་སྲོལ་རྒྱུན་ཆད་མེད་པར་འཐུས་ཚང་དུ་གཏོང་བ་དང་། ཁེ་ལས་ཀྱི་རྒྱུན་འཛིན་པ་གསོ་སྐྱོང་བྱ་རྒྱུར་མཐོང་ཆེན་བྱེད་དགོས། ཁ་དན་ཚིག་གནས་དང་ཁྲིམས་སྲུང་གཉེར་སྐྱོང་མཐའ་འཁྱོངས་དང་། ཡང་དག་པའི་རིན་ཐང་ལྟ་བ་དང་ཀུན་སྤྱོད་ཀྱི་ལྟ་བ་བཙུགས་ཏེ། བྱ་སྤྱོད་དངོས་ལ་བརྟེན་ནས་དམངས་གཉེར་དཔལ་འབྱོར་སྐྱོན་བྲལ་ངང་གོང་འཕེལ་འགྲོ་རྒྱུར་སྐུལ་འདེད་གཏོང་དགོས། སྤྱི་ཚོགས་ཀྱི་འགན་འཁྲི་ཧུར་ཐག་བསྒྲུབ་དགོས་པ་དང་། ཞི་མཐུན་གྱི་ངལ་རྩོལ་འབྲེལ་བ་ཧུར་ཐག་འཛུགས་པ། འབྱུང་ཁམས་ཁོར་ཡུག་ལ་སྲུང་སྐྱོང་བྱ་རྒྱུར་དམ་འཛིན་བྱེད་པ། ནུས་ཤུགས་ཡོད་རྒུས་སྤྱི་ཕན་དགེ་སྒྲུབ་བྱ་གཞག་ནང་ཞུགས་ནས། སྤྱི་ཚོགས་ལ་གཅེས་སེམས་མང་ཙམ་འབུལ་དགོས་པའི་ནན་སྟོན་གནང་ཡོད།
ཝང་ཧུའུ་ཉིང་གིས་ཚོགས་འདུ་གཙོ་སྐྱོང་གནང་སྐབས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་ནང་དམངས་གཉེར་དཔལ་འབྱོར་གྱི་འཕེལ་རྒྱས་ལ་ཐོབ་པའི་གྲུབ་འབྲས་གལ་ཆེན་དང་རྒྱལ་ཁབ་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ལེགས་སྐྱེས་གལ་ཆེན་ཕུལ་བར་ཁས་ལེན་གང་ལེགས་གནང་བ་དང་། དམངས་གཉེར་དཔལ་འབྱོར་འཕེལ་རྒྱས་ལ་འཕྲད་པའི་གོ་སྐབས་དང་འགྲན་སློང་ལ་ངོས་འཛིན་ཡང་དག་པ་བྱེད་དགོས་པའི་ནན་སྟོན་གནང་ཞིང་། མིག་སྔར་དང་སླད་ཕྱིན་དུས་མཚམས་ཤིག་རིང་དམངས་གཉེར་དཔལ་འབྱོར་སྐྱོན་བྲལ་ངང་འཕེལ་རྒྱས་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རྒྱུའི་ཐད་ཁྱོན་ཡོངས་ནས་བཀོད་སྒྲིག་གནང་ཡོད། གསུང་བཤད་ཀྱི་བརྗོད་དོན་རྒྱ་ཆེ་བ་དང་དགོངས་པ་གཏིང་ཟབ་པ། རྒྱས་བཤད་གནད་ལ་འཕིགས་པ། ནང་དོན་ཕུན་སུམ་ཚོགས་པོ་བཅས་ཡོད་པས། ང་ཚོས་སློབ་སྦྱོང་དང་གོ་བ་ནན་ཏན་ལེན་པ་དང་ལག་བསྟར་མཐའ་གཅིག་ཏུ་བྱ་དགོས། འཕེལ་རྒྱས་གཏོང་བའི་སེམས་ཤུགས་བརྟན་དུ་གཏོང་བ་དང་། གནས་བབ་ཧྲིལ་པོའི་འདུ་ཤེས་དང་། མ་ལག་གི་འདུ་ཤེས། ཁྲིམས་སྐྱོང་གི་དགོངས་པ་བཅས་ཤུགས་ཆེར་བཏང་ནས། སྲིད་ཇུས་ཁག་དོན་འཁྱོལ་བྱེད་པ་དང་འབད་བརྩོན་ཆེན་པོས་དམངས་གཉེར་དཔལ་འབྱོར་འཕེལ་རྒྱས་གཏོང་བའི་རྣམ་པ་གསར་པ་གཏོད་དགོས་ཞེས་བསྟན་ཡོད།
ཧྲི་ཐའེ་ཧྥེང་དང་། ལི་ཧྲུའུ་ལེ། ཧོ་ལི་ཧྥེང་། ཝུའུ་ཀྲེང་ལུང་། མུའུ་ཧུང་བཅས་བཞུགས་མོལ་ཚོགས་འདུར་ཞུགས་ཡོད།
ཀྲུང་དབྱང་དང་རྒྱལ་ཁབ་ལས་ཁུངས་ཀྱི་འབྲེལ་ཡོད་སྡེ་ཚན་དང་། རྒྱལ་ཡོངས་བཟོ་ཚོང་མཉམ་འབྲེལ་ལྷན་ཚོགས་ཀྱི་འགན་འཁུར་བློ་མཐུན། དམངས་གཉེར་ཁེ་ལས་ཀྱི་འགན་འཁུར་བའི་འཐུས་མི་སོགས་བཞུགས་མོལ་ཚོགས་འདུར་ཞུགས་ཡོད་པ་རེད།
