མི་སྒེར་གྱི་ཆ་འཕྲིན་གང་བྱུང་དུ་སྤྱད་ན་ཁྲིམས་འགལ་རེད་འདུག
སྤེལ་དུས 2020-06-24
ཡོང་ཁུངས། ཁྲིམ་གསལ་མེ་ལོང་།
རྩོམ་པ་པོ།
1.སྒེར་གྱི་ཆ་འཕྲིན་སྲུང་བའི་སྐོར།
གཏན་འབེབས།
མི་སྒེ་གྱི་ཆ་འཕྲིན་སྤྱོད་སྐབས། ངེས་པར་དུ་ཁྲིམས་མཐུན་དང་། དྲང་གཞག དགོས་ངེས་བཅས་ཀྱི་རྩ་དོན་ལ་སྲུང་བརྩི་ཞུ་དགོས་པ་ལས། ཚད་ལས་བརྒལ་བའི་ཐག་གཅོད་བྱ་མི་རུང་བ་དང་འབྲེལ། གཤམ་གསལ་གྱི་ཆ་རྐྱེན་དག་ཀྱང་འཛོམས་དགོས་པ་སྟེ།
(གཅིག)ཁྲིམས་ལུགས་དང་སྲིད་འཛིན་ཁྲིམས་སྲོལ་ནང་དམིགས་བསལ་གྱི་གཏན་འབེབས་འཁོད་པ་ཕུད། མི་སྒེར་རམ་ཡང་ན་ལྟ་སྐྱོང་བ་གང་དེའི་མོས་མཐུན་ཐོབ་དགོས།
(གཉིས)ཆ་འཕྲིན་ཡོངས་བསྒྲགས་བྱེད་སྐབས་ཀྱི་སྒྲིག་སྲོལ་དང་མཐུན་དགོས།
(གསུམ)ཆ་འཕྲིན་སྤྱོད་པའི་དམིགས་ཡུལ་དང་། བྱེད་ཐབས། ཁྱབ་ཁོངས་བཅས་ཁ་གསལ་བཏོན་དགོས།
(བཞི)ཁྲིམས་ལུགས་དང་སྲིད་འཛིན་ཁྲིམས་སྲོལ་གྱི་གཏན་འབེབས། དེ་བཞིན་ཕྱོགས་གཉིས་པོའི་ཁ་ཆད་བཅས་ལས་འགལ་མི་རུང་།
གསལ་འགྲེལ།
གྲངས་གཞི་ཅན་གྱི་དུས་རབས་སུ་མི་སྒེར་གྱི་ཆ་འཕྲིན་ཇི་ལྟར་སྲུང་དགོས་སམ་ཞེ་ན། ཕན་མེད་ཀྱི་འཕྲིན་ཐུང་དང་གློག་འཕྲིན་ཁ་བསླུས་སོགས་ཀྱི་འགྲན་སློང་འཕྲད་པར་དམིགས་ནས། དམངས་དོན་ཁྲིམས་གཞུང་ནང་། མི་སྒེར་གྱི་ཆ་འཕྲིན་དང་འབྲེལ་བའི་མི་གཤིས་དབང་ཆ་ཁས་ལེན་དང་འགན་སྲུང་བྱས་པ་མ་ཟད། སྒེར་གྱི་ཆ་འཕྲིན་སྤྱོད་པའི་གཞི་རྩའི་གཏན་འབེབས་ཀྱང་གཏན་འཁེལ་བྱས་ནས་མི་སྒེར་གྱི་ཆ་འཕྲིན་སྤྱོད་རྒྱུར་ཁྲིམས་ཀྱི་གཞི་འཛིན་ས་ཡོད་པ་བྱས་སྟབས། མི་སྒེར་གྱི་ཆ་འཕྲིན་ཚད་ལས་བརྒལ་ནས་འཚོལ་བསྡུ་བྱེད་པའི་ཟང་ཟིང་གི་རྣམ་པར་བཀག་འགོག་ནུས་ལྡན་ཐུབ་རྒྱུ་རེད།