ངས་གཞིས་རྙིང་གི་གྱང་ར་བཤིག་པའི་བྱ་སྤྱོད་དེ་ཁྲིམས་མཐུན་ཡིན་ནམ།
སྤེལ་དུས 2020-07-16
ཡོང་ཁུངས། ཁྲིམས་ལུགས་ཚགས་པར།
རྩོམ་པ་པོ།
བློ་མཐུན་རྩོམ་སྒྲིག་པ་ལགས།
ངེད་ཚང་གྲོང་གསེབ་ཏུ་བསྡད་ཡོད་མོད། ཕ་ཡུལ་གྱི་གཞིས་རྙིང་གི་གྱང་རྟིང་ད་དུང་བཤིག་མེད་པས་ས་མཚམས་གསལ་པོ་ཡིན། 2017ལོར། ཁྱིམ་མཚེས་དོན་གྲུབ་ཀྱིས་ངའི་ཁྱིམ་གྱི་གྱང་རྟིང་མེད་པར་བཟོས་པ་མ་ཟད། ད་དུང་དེའི་སྟེང་ལ་གྱང་ར་བསྐོར་འདུག 2018ལོར། ངས་གྱང་ར་དེ་བཤིག་རྩིས་ཡོད་པས་ཁོ་རང་འཐད་ཀྱིན་མེད། དེར་བརྟེན་སྡེ་དམངས་ཨུ་ཡོན་ལྷན་ཁང་དང་མངག་གཏོང་ཁང་གིས་མི་མངགས་ནས་བར་འདུམ་བྱས་ཀྱང་སྔར་བཞིན་གྲོས་མཐུན་མ་བྱུང་། རྒྱུ་མཚན་ནི་གྲོང་གསེབ་ཀྱི་ཁང་ས་མང་ཆེ་བར་ས་ཁོངས་དཔང་ཡིག་མེད་པས་རེད། མི་མང་པོ་ཞིག་གིས་ས་འདི་ངའི་ཡིན་པ་ར་སྤྲོད་བྱེད་ཐུབ་མོད། འོན་ཀྱང་ངས་འདྲི་རྩད་བྱས་རྗེས་གཏུག་བཤེར་བརྒྱུད་ནས་རང་ཉིད་ཀྱི་ཁེ་དབང་སྲུང་སྐྱོང་བྱེད་མི་ཐུབ་པར་འདོད། དེ་བས་ཡང་བསྐྱར་གྱང་ར་བཤིག་ཏུ་སོང་བ་དང་། སྔ་གཞུག་ཏུ་ཐེངས4ལ་བཤིག་པ་ཡིན། དོན་གྲུབ་ཀྱིས་བཤད་པ་ལྟར་ན་ངས་ཁོའི་གྱང་རའི་སྟེང་གི་ལྕགས་མདོང10བཅག་པ་དང་། དེའི་སྤྱིའི་རིན་ཐང་སྒོར1000ཡིན་ཟེར། འདིར་ཁྱེད་བཅའ་ཁྲིམས་བློ་སྟོན་ཁང་ལ་དྲི་རྒྱུ་ཞིག་ཡོད་པ་ནི་ངས་གྱང་ར་བཤིག་པའི་བྱ་སྤྱོད་དེ་ཁྲིམས་མཐུན་ཡིན་ནམ།
ཞེས་རྡོ་རྗེ་ཡིས།
བློ་མཐུན་རྡོ་རྗེ་ལགས།
ས་ཞིང་དོ་དམ་བཅའ་ཁྲིམས་ཀྱི་གཏན་འབེབས་ལྟར་ན། ཁང་ས་བདག་འཛིན་བྱེད་དབང་དང་བཀོལ་སྤྱོད་བྱེད་དབང་གི་ངོས་ཐད་ནས་རྩོད་པ་བྱུང་བའི་རིགས་རྣམས་དོ་བདག་ཕན་ཚུན་བར་གྲོས་བྱས་ཏེ་ཐག་གཅོད་བྱ་རྒྱུ་དང་། གྲོས་ཁ་མ་མཐུན་ཚེ་མི་དམངས་སྲིད་གཞུང་གིས་ཐག་གཅོད་བྱ་རྒྱུ། སྡེ་ཁག་བར་གྱི་རྩོད་གཞི་ནི་རྫོང་རིམ་པ་ཡན་གྱི་མི་དམངས་སྲིད་གཞུང་གིས་ཐག་གཅོད་བྱ་དགོས་ལ། སྐྱེ་བོ་སོ་སོའི་བར་དང་། མི་སྒེར་དང་སྡེ་ཁག་བར་གྱི་རྩོད་གཞི་ནི་ཤང་རིམ་པའི་མི་དམངས་སྲིད་གཞུང་ངམ་རྫོང་རིམ་པ་ཡན་གྱི་མི་དམངས་སྲིད་གཞུང་གིས་ཐག་གཅོད་བྱ་དགོས། དོ་བདག་གིས་འབྲེལ་ཡོད་མི་དམངས་སྲིད་གཞུང་གིས་ཐག་གཅོད་བྱས་པའི་ཆོད་དོན་བློར་མ་བབས་ཚེ། ཐག་གཅོད་བྱས་འབྲས་ཀྱི་བརྡ་སྦྱོར་འབྱོར་ཉིན་ནས་བཟུང་ཉིན30ནང་ཚུན་དུ་མི་དམངས་ཁྲིམས་ཁང་ལ་ཞུ་གཏུག་བྱས་ཆོག་ཅེས་བཀོད་ཡོད།
དེའི་ཐོག་ནས་ཁང་སའི་བདག་དབང་སྐོར་གྱི་རྩོད་གཞི་དེ་ཐད་ཀར་གཏུག་བཤེར་བྱས་ནས་ཐག་གཅོད་བྱེད་མི་ཐུབ་པ་ཤེས་ཐུབ་ལ། གལ་ཏེ་ཁྱིམ་མཚེས་ཚང་གིས་གྱང་ར་བསྐོར་བའི་བྱ་སྤྱོད་དེས་ཁྱོད་ཀྱི་ཁང་སའི་ཁེ་དབང་ལ་གནོད་འཚེ་བཏང་སོང་སྙམ་ན། སྔོན་ལ་ས་གནས་དེ་གའི་སྲིད་གཞུང་ལ་རེ་འདུན་ཞུས་ཆོག་པ་དང་། སྲིད་གཞུང་གིས་ཐག་གཅོད་བྱས་པའི་ཆོད་དོན་བློར་མ་བབས་ན་གཞི་ནས་མི་དམངས་ཁྲིམས་ཁང་ལ་ཞུ་གཏུག་བྱས་ཆོག གལ་ཏེ་ཁེ་དབང་སྲུང་སྐྱོང་བྱེད་པའི་ཁྲོད་དུ་ཁྱོད་ལ་བདག་དབང་གཏན་འཁེལ་གྱི་ཐོ་འགོད་ཐོབ་ན། དོན་གྲུབ་ལ་གྱང་ར་བཤིག་དགོས་པའི་རེ་བ་འདོན་དབང་ཡོད།
ཅེས་འདི་གའི་བཅའ་ཁྲིམས་བློ་སྟོན་ཁང་གིས།
ངལ་རྩོལ་ནུས་པ་ཤོར་བའི་ངོས་འཛིན་ཚད་གཞི་ནི་ག་འདྲ་ཡིན།
《ལས་རྨས་ཉེན་སྲུང་སྲོལ་ཡིག》གི་དོན་ཚན21པའི་གཏན་འཁེལ་ལྟར་ན། ལས་བཟོ་བར་ལས་རྨས་བྱུང་བ་དང་སྨན་བཅོས་བྱས་ནས་རྨས་སྐྱོན་ཕོག་ཚུལ་ལྟོས་བཅས་ཀྱིས་བརྟན་པོ་བྱུང་རྗེས། དབང་བོར་སྐྱོན་ཡོད་པའམ་ངལ་རྩོལ་བྱེད་ནུས་ལ་ཤུགས་རྐྱེན་ཐེབས་ཡོད་ན། ངལ་རྩོལ་ནུས་པ་ཡོད་མེད་གསལ་འབྱེད་བྱ་དགོས།
ངལ་རྩོལ་བྱེད་ནུས་གསལ་འབྱེད་ཅེས་པ་ནི་ངལ་རྩོལ་བྱེད་ནུས་ཀྱི་འགོག་རྐྱེན་ཚད་གཞི་དང་འཚོ་བའི་ཐག་གཅོད་འགོག་རྐྱེན་གྱི་ཚད་རིམ་དབྱེ་བའི་གསལ་འབྱེད་ལ་ཟེར། ངལ་རྩོལ་བྱེད་ནུས་ལ་འགོག་རྐྱེན་བཟོ་ཚད་དེ་རྨས་སྐྱོན་རིམ་པ་བཅུ་ལ་དབྱེ་ཡོད་དེ། ཚབས་ཆེ་ཤོས་ནི་རིམ་པ་དང་པོ་དང་ཡང་ཤོས་ནི་རིམ་པ་བཅུ་བ་ཡིན། འཚོ་བའི་རང་སྐྱོང་འགོག་རྐྱེན་ལ་རིམ་པ་གསུམ་དུ་དབྱེ་ཡོད་དེ། འཚོ་བའི་ཕྱོགས་ཡོངས་ནས་རང་མགོ་མི་ཐོན་པ་དང་འཚོ་བའི་མང་ཆེ་བ་རང་མགོ་མི་ཐོན་པ། འཚོ་བའི་ཆ་ཤས་ཙམ་རང་མགོ་མི་ཐོན་པ་བཅས་ཡིན།