ན་སོ་དར་ལ་མ་བབས་པའི་མིར་ཐ་མག་དང་ཨ་རག་བཙོངས་ན་ཁྲིམས་ལས་འགལ་བ་རེད་དམ།
སྤེལ་དུས 2020-12-21
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ།
རྩོམ་པ་པོ།
ན་སོ་དར་ལ་མ་བབས་པའི་མིའི་ལུས་སེམས་བདེ་ཐང་ལ་སྲུང་སྐྱོང་བྱ་ཆེད། ཉེ་དུས། ལྷ་ས་གྲོང་ཁྱེར་ཁྲེང་ཀོན་ཆུས་ཞིབ་དཔྱོད་ཁང་གི་ཞིབ་དཔྱོད་པུའུ་བཞི་པས“ན་སོ་དར་ལ་མ་བབས་པའི་མིར་ཐ་མག་དང་ཨ་རག་བཙོངས་ན་ཁྲིམས་འགལ་ཡིན་མིན”བརྗོད་དོན་གཙོ་བོར་བྱས་ཏེ། སྟོབས་ཤུགས་གཅིག་སྡུད་ཀྱིས་ཁྲེང་ཀོན་ཆུས་ཀྱི་སློབ་གྲྭ་འབྲིང་ཆུང་གི་ཉེ་འགྲམ་གྱི་སྒེར་གྱི་ཚོང་དུད་དང་། གྲོང་ཁུལ་གྱི་སྒོ་རྩིས་ཚོང་ཁང་ཆེ་གྲས། ཐ་མག་དང་ཨ་རག་སིལ་འཚོང་ཁང་བཅས་སུ་ཁྲིམས་ལས་འགལ་ནས་ཐ་མག་དང་ཨ་རག་འཚོང་མིན་ལ་འཐེན་བཤེར་བྱས་པ་རེད།
བརྟག་དཔྱད་བྱས་ནས་ཤེས་རྟོགས་བྱུང་བར། སྒོ་རྩིས་ཚོང་ཁང་དང་ཐ་མག་དང་ཨ་རག་སིལ་འཚོང་ཁང་32ཀྱིས་མངོན་གསལ་དོད་སར“ན་སོ་དར་ལ་མ་བབས་པའི་མིར་ཐ་མག་དང་ཨ་རག་འཚོང་མི་ཆོག”པའི་མཚོན་རྟགས་བསྒར་མེད་པ་དང་། སློབ་གྲྭའི་ཉེ་འཁོར་གྱི་ཚོང་དུད་5ཡིས་ན་སོ་དར་ལ་མ་བབས་པའི་མིར་ཁྲིམས་ལས་འགལ་ནས་ཐ་མག་དང་ཨ་རག་བཙོངས་པ། སྒེར་གྱི་ཚོང་དུད་2ཀྱིས་ལག་ཁྱེར་མེད་པར་ཐ་མག་དང་ཨ་རག་འཚོང་བ་བཅས་ཀྱི་གནས་ཚུལ་ཡོད་པ་རེད། གནད་དོན་དེ་དག《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ན་སོ་དར་ལ་མ་བབས་པའི་མིའི་སྲུང་སྐྱོང་བཅའ་ཁྲིམས》དང《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་རྡོ་ཐ་ཆེད་འཚོང་གི་བཅའ་ཁྲིམས》ཀྱི་འབྲེལ་ཡོད་གཏན་འབེབས་ལས་འགལ་ཡོད་པ་རེད།
ན་སོ་དར་ལ་མ་བབས་པའི་མིར་ཐ་མག་འཐེན་དུ་མི་བཅུག་པ་དང་ཨ་རག་འཐུང་དུ་མི་བཅུག་པ་ནི་མིག་སྔའི་རང་ལྗོངས་ཀྱི་ན་སོ་དར་ལ་མ་བབས་པའི་མིའི་སྲུང་སྐྱོང་ལས་དོན་གཙོ་བོ་ཞིག་ཡིན་ལ་ཐ་མག་དང་ཨ་རག་གིས་ན་སོ་དར་ལ་མ་བབས་པའི་མིར་བཟོས་པའི་གནོད་འཚེ་ནི་སྣང་ཆུང་བྱེད་མི་ཉན་པ་ཞིག་ཀྱང་རེད།
གཞོན་ནུ་ལོ་ཆུང་ནི་མེས་རྒྱལ་གྱི་མ་འོངས་དང་མི་རིགས་ཀྱི་རེ་བ་ཡིན་པས་གཞོན་ནུ་ལོ་ཆུང་བདེ་ཐང་ངང་འཚར་ལོངས་ཡོང་བར་ཐུགས་ཁུར་དང་དོ་ཁུར་བྱེད་རྒྱུ་ནི་ཞིབ་དཔྱོད་ལས་ཁུངས་དང་ཐ་ན་སྤྱི་ཚོགས་ཡོངས་ཀྱི་ཐུན་མོང་གི་འགན་འཁྲི་ཡང་རེད། ད་ཐེངས་ཀྱི་ཞིབ་བཤེར་ཁྲོད་ཤེས་རྟོགས་བྱུང་བའི་ཁྲིམས་འགལ་གནད་དོན་ལ་དམིགས་ཏེ། ལྷ་ས་གྲོང་ཁྱེར་ཁྲེང་ཀོན་ཆུས་ཞིབ་དཔྱོད་ཁང་གི་ཞིབ་དཔྱོད་པུའུ་བཞི་པས་ན་སོ་དར་ལ་མ་བབས་པའི་མིའི་གྱོད་གཞིའི་ཁུངས་སྣེ་གཞིར་བཟུང་། ཚོད་ལྟའི་ལས་དོན་གྱི་འབྲེལ་ཡོད་བླང་བྱ་བཟོས་ཏེ་འཕྲལ་མར་སྲིད་འཛིན་སྤྱི་ཕན་གཏུག་བཤེར་གྱོད་གཞིའི་ཐོག་ནས་གྱོད་ཐོ་བཀོད་པ་དང་། ད་དུང་འབྲེལ་ཡོད་སྲིད་འཛིན་ཁྲིམས་འཛིན་སྡེ་ཚན་དང་འབྲེལ་བ་བྱས་ཐོག ཞུ་གཏུག་གོང་གི་ཞིབ་དཔྱོད་གྲོས་འགོ་བཏོན་ནས་རང་ལྗོངས་ཀྱི་ཐ་མག་དང་ཨ་རག་འཚོང་བའི་ཁོར་ཡུག་སྔར་བས་གཙང་སེལ་དང་ལེགས་སུ་བཏང་སྟེ་བྱ་སྤྱོད་ངོ་མའི་ཐོག་ནས་ན་སོ་དར་ལ་མ་བབས་པའི་མིར་དེ་བས་བདེ་ཐང་གི་འཚར་ལོངས་ཁོར་ཡུག་བསྐྲུན་པ་རེད།
རྩོམ་སྒྲིག་པ། བདེ་སྒྲོལ།