བཞི།《དམངས་དོན་ཁྲིམས་གཞུང》གི་དྲང་སྙོམས་ཀྱི་རྩ་དོན་ཞེས་པ་གང་ལ་གོ་དགོས།
● དོན་ཚན་དྲུག་པ། དམངས་དོན་བྱེད་པོས་དམངས་དོན་བྱེད་སྒོ་སྤེལ་བར་དྲང་སྙོམས་ཀྱི་རྩ་དོན་ལ་བརྩི་སྲུང་ཞུ་དགོས་པ་དང་། ཕྱོགས་སོ་སོའི་ཁེ་དབང་དང་འོས་འགན་གཏན་འཁེལ་ལུགས་མཐུན་བྱེད་དགོས།
● དོན་ཚན་བརྒྱ་དང་བཅུ་བདུན་པ། སྤྱི་པའི་ཁེ་ཕན་གྱི་དགོས་མཁོའི་ཆེད་དུ། བཅའ་ཁྲིམས་ཀྱིས་གཏན་འབེབས་བྱས་པའི་དབང་མཚམས་དང་ལས་རིམ་ལྟར་བརྟན་ནོར་རམ་འགུལ་ནོར་གཞུང་བསྡུ་དང་གཞུང་སྤྱོད་བྱེད་ཚེ། དྲང་སྙོམས་དང་ལུགས་མཐུན་གྱི་གུན་གསབ་སྤྲོད་དགོས།
● དོན་ཚན་བརྒྱ་དང་ང་གཅིག་པ། ཕྱོགས་གཅིག་གིས་ཕ་རོལ་པོ་དཀའ་ཉེན་གྱི་གནས་སུ་གྱར་བ་དང་བརྡར་ཤ་གཅོད་ནུས་མེད་པ་སོགས་ཀྱི་གནས་ཚུལ་བེད་སྤྱོད་བྱས་ནས། དམངས་དོན་བཅའ་ཁྲིམས་བྱ་སྤྱོད་འགྲུབ་དུས་དྲང་གཞག་ཤོར་དུ་བཅུག་པ་ཡིན་ན། གནོད་རྐྱེན་ཕོག་ཡུལ་ཕྱོགས་ལ་མི་དམངས་ཁྲིམས་ཁང་ངམ་འདུམ་གཅོད་ལས་ཁུངས་ལ་ཕྱིར་འཐེན་བྱེད་དགོས་པའི་རེ་འདུན་ཞུ་དབང་ཡོད།
དོན་ཚན་འགྲེལ་བཤད།
དྲང་སྙོམས་ཀྱི་རྩ་དོན་ཞེས་པ་ནི། དམངས་དོན་བྱེད་པོས་དམངས་དོན་བྱེད་སྒོ་སྤེལ་བར་དྲང་སྙོམས་ཀྱི་འདུ་ཤེས་སེམས་ལ་བཅངས་ནས་དྲང་གཞག་དང་ཆ་སྙོམས་ལུགས་མཐུན་ངང་ཕྱོགས་གཉིས་ཀའི་ཁེ་དབང་དང་འོས་འགན་གཏན་འཁེལ་བྱེད་ཅིང་ཁྲིམས་ལྟར་འབྲེལ་ཡོད་ཀྱི་དམངས་དོན་འགན་འཁྲི་འཁུར་བར་ཟེར། དྲང་སྙོམས་ཀྱི་རྩ་དོན་གྱི་གཞི་རྩའི་བླང་བྱ་ནི་གཤམ་གསལ་ཏེ།
གཅིག དམངས་དོན་བྱེད་པོར་འདྲ་མཉམ་གྱིས་དམངས་དོན་བྱེད་སྒོའི་ནང་ཞུགས་ནས་རང་ཉིད་ཀྱི་ཁེ་ཕན་མངོན་འགྱུར་བྱེད་པའི་གོ་སྐབས་ལྡན་ཡོད།
གཉིས། དམངས་དོན་བྱེད་པོའི་ཁེ་དབང་དང་འོས་འགན་ནི་གཅིག་མཚུངས་ཡིན་པས་ཁེ་དབང་ལོངས་སུ་སྤྱོད་པ་ལས་འོས་འགན་མི་སྒྲུབ་པ་བྱེད་མི་རུང་ལ་འོས་འགན་སྒྲུབ་པ་ལས་ཁེ་དབང་མི་སྤྱོད་པའང་བྱེད་མི་རུང་།
གསུམ། གལ་སྲིད་འགོག་ཐབས་མེད་པའི་ཤུགས་རྐྱེན་དང་འཕྲལ་མར་ཉེན་གཡོལ། དྲང་གཞག་ཤོར་བའམ་ཞིབ་ཕྲའི་བཅའ་ཁྲིམས་ཀྱི་སྒྲིག་སྲོལ་གྱིས་དཔྱད་འཇོག་བྱེད་མི་ཐུབ་པའི་གནས་ཚུལ་བྱུང་བ་ཡིན་ན། སྤྱི་ཚོགས་ཀྱིས་ཁས་ལེན་བྱས་པའི་དྲང་སྙོམས་འདུ་ཤེས་ཀྱིས་ཕྱོགས་གཉིས་ཀའི་ཁེ་དབང་དང་འོས་འགན་ལུགས་མཐུན་གྱིས་གཏན་འཁེལ་བྱེད་དགོས།
རྩོམ་སྒྲིག་པ། མང་ག་མཚོ།
