ལྷ་ས་ནས་དུག་རྫས་དབོར་འདྲེན་གྱི་གྱོད་གཞི་ཚབས་ཆེན་ཞིག་རྩད་ཆོད་འདུག

  ཉེ་དུས། ལྷ་ས་གྲོང་ཁྱེར་སྤྱི་བདེ་ཅུས་དུག་འགོག་ཉིང་ལག་རུ་ཁག་གིས་དུག་རྫས་དབོར་འདྲེན་གྱི་གྱོད་གཞི་ཚབས་ཆེན་ཞིག་རྩད་ཆོད་ནས། དུག་རྫས་ཧེ་རུན་ཁེ་353.89གཞུང་བཞེས་བཏང་བ་མ་ཟད། ཉེས་གསོག་དོགས་ཅན་2བཟུང་བ་རེད།

 

    ད་ལོའི་ཟླ་7པའི་ཟླ་དཀྱིལ་དུ། དུག་འགོག་ཉིང་ལག་རུ་ཁག་གིས་ཆུས་དང་གྲོང་ཁྱེར་ཕན་ཚུན་ཉེན་བརྡ་གཏོང་རེས་བྱས་པ་བརྒྱུད། ཉེས་གསོག་དོགས་ཅན་གཉིས་ཀྱིས་དུག་རྫས་ཁག་གཅིག་རང་གྲོང་ཁྱེར་དུ་དབོར་ནས་འཚོང་རྩིས་བྱེད་པའི་ཁུངས་སྣེ་ཞིག་ཤེས་རྟོགས་བྱུང་བ་དང་། ཁུངས་སྣེ་ཤེས་རྟོགས་བྱུང་རྗེས། ཉིང་ལག་རུ་ཁག་གིས་ཆེད་མངགས་ཉེན་རྟོག་པ་སྒྲིག་འཛུགས་བྱས་ནས་མྱུལ་ཞིབ་ཞིབ་ཚགས་བྱས་པས། དོགས་ཡོད་ཉེས་ཅན་གྱི་གཟུགས་པོའི་རིང་ཚད་དང་བྱེད་སྤྱོད་སྤེལ་སྟངས་འཕྲལ་མར་ཁོང་དུ་ཆུད་ནས་ཟླ་8ཚེས་8ཉིན། ལྷ་ས་གྲོང་ཁྱེར་གྱི་ལྷ་ཉིང་མྱུར་བགྲོད་གཞུང་ལམ་གྱི་ཞིབ་བཤེར་ས་ཚིགས་ནས་ཉེས་གསོག་དོགས་ཅན་གཉིས་བཟུང་བ་མ་ཟད། རླངས་འཁོར་ནས་དུག་རྫས་ཧེ་རུན་ཤོག་ཆག་གཅིག་རྩད་ཆོད་པར་ལྗིད་ཚད་ཁེ་353.89ཡོད།

    བརྟག་དཔྱད་དང་འདྲི་རྩད་བྱས་པ་བརྒྱུད། ཉེས་གསོག་དོགས་ཅན་མོའུ་ཆེ་གེ་མོ་དང་ལུའོ་ཆེ་གེ་མོས་དུག་རྫས་དབོར་འདྲེན་གྱི་ཉེས་གསོག་དོན་དངོས་སྦ་གསང་མེད་པར་ངོས་ལེན་ཞུས་ཤིང་། མིག་སྔར། ཉེས་གསོག་དོགས་ཅན་མོའུ་ཆེ་གེ་མོ་དང་ལུའོ་ཆེ་གེ་མོ་ཁྲིམས་ལྟར་ཉེས་དོན་བཀག་ཉར་བྱས་པ་དང་། གྱོད་གཞི་དེ་སྔར་བས་ཞིབ་གཅོད་བྱེད་བཞིན་ཡོད་པ་རེད།