སྤྱང་པོའི་འཁུར་བླངས། ལྐུགས་པའི་རྟགས་བསྟན།
སྤེལ་དུས 2020-11-19
ཡོང་ཁུངས། བོད་ལྗོངས་ཉིན་ཚགས།
རྩོམ་པ་པོ།
★ལས་འཛོལ་བརྒྱུད་རིམ།★
2020ལོའི་ཟླ10ཚེས7ཉིན་གྱི་ཆུ་ཚོད21དང་སྐར་མ45ཙམ་དུ། གཞིས་རྩེ་གྲོང་ཁྱེར་རྒྱལ་རྩེ་རྫོང་སྤྱི་བདེ་ཅུས་འགྲིམ་འགྲུལ་ཉེན་རྟོག་རུ་ཆེན་ལ“རྒྱལ་རྩེ་རྫོང་རྒྱལ་སྲུང་ལམ་དུ་རླངས་འཁོར་བརྡར་བའི་ལས་འཛོལ་ཐོན་འདུག་པས། ལམ་སེང་གནས་ཚུལ་ཐོན་སར་འགྲོ་དགོས”ཞེས110བཀོད་འདོམས་ལྟེ་གནས་ཀྱི་བཀའ་རྒྱ་འབྱོར། དེ་རྗེས་རྒྱལ་རྩེ་རྫོང་སྤྱི་བདེ་ཅུས་འགྲིམ་འགྲུལ་ཉེན་རྟོག་རུ་ཆེན་གྱིས་འཕྲལ་མར་ཉེན་རྟོག་པ་སྒྲིག་འཛུགས་བྱས་ནས་ལས་འཛོལ་ཐོན་ཡུལ་དུ་བརྟག་དཔྱད་བྱེད་པར་བསྐྱོད།
ཉེན་རྟོག་པས་ལས་འཛོལ་རླངས་འཁོར(བོད་DON×××)གྱི་ཁ་ལོ་བ་ཉི་ཆེ་གེ་མོར་སྐད་ཆ་འདྲི་སྐབས། ཁོ་པས་རྐྱང་ཙམ་སྐུམ་ཙམ་དང་ཉེན་རྟོག་པར་གཞོགས་འདེགས་ཡག་པོ་བྱེད་འདོད་མེད་པར། རླངས་འཁོར་བསྐྱོད་སའི་ལམ་ཐིག་དང་ལས་འཛོལ་ཐོན་པའི་བརྒྱུད་རིམ་སོགས་གསལ་པོ་མི་བཤད་སྟབས། ཉེན་རྟོག་པར་དོགས་པ་ཆེན་པོ་སྐྱེས།
ཉེན་རྟོག་པས་ཐ་ཚིག་བསྒྲགས་པ་བརྒྱུད། ཉི་ཆེ་གེ་མོས་འགྲིམ་འགྲུལ་ལས་འཛོལ་ཐོན་སྐབས། རང་ཉིད་ཀྱིས་རླངས་འཁོར་བཏང་མེད། རླངས་འཁོར་གཏོང་མཁན་རང་ཉིད་ཀྱི་སྤུན་མཆེད་རྒྱལ་ཆེ་གེ་མོ་རེད། ལས་འཛོལ་ཐོན་རྗེས། རྒྱལ་ཆེ་གེ་མོས་ང་ལ་ཁ་པར་བརྒྱབ་ནས། ཁ་ལོ་བའི་ལག་ཁྱེར་མེད་ལ་ཆང་བཏུངས་པས་རོགས་པ་བྱེད་རོགས་ཟེར་གྱི་འདུག་ཅེས་བཤད། གྱོད་སྒྲུབ་མི་དམངས་ཉེན་རྟོག་པས་ཉི་ཆེ་གེ་མོས་བརྗོད་པ་ལྟར། ལས་འཛོལ་ཐོན་ཡུལ་གྱི་ཟུར་ཞིག་ནས་གནས་ཚུལ་ལ་ལྟ་ཞིབ་བྱེད་བཞིན་པའི་རྒྱལ་ཆེ་གེ་མོ་འཛིན་བཟུང་བྱས། སྐབས་དེར་རྒྱལ་ཆེ་གེ་མོའི་ལུས་ཐོག་ནས་ཆང་དྲིས་བྲོ་བས། ཉེན་རྟོག་པས་ཁོ་པ་གྱོད་སྒྲུབ་ཁུལ་དུ་ཁྲིད་ནས། ཁྲག་ནང་ཨ་རག་ཉིང་ཁུ་འདྲེས་ཚད་བརྟག་དཔྱད་བྱས། གཞིས་རྩེ་གྲོང་ཁྱེར་སྤྱི་བདེ་ཁྲིམས་འཛིན་དཔྱད་འདོམས་ལྟེ་གནས་ནས་དཔྱད་འདོམས་བྱས་པ་བརྒྱུད། རྒྱལ་ཆེ་གེ་མོའི་ཁྲག་ནང་ཨ་རག་ཉིང་ཁུ་འདུས་ཚད་303.23mg/100mLཟིན་པས་ར་བཟི་འཁོར་གཏོང་ཡིན་པ་གཏན་འཁེལ་བྱས། རྒྱལ་ཆེ་གེ་མོས་རང་ཉིད་ཀྱིས་ར་བཟི་འཁོར་གཏོང་དང་ལག་ཁྱེར་མེད་པར་རླངས་འཁོར་བཏང་བའི་རྐྱེན་གྱིས་འགྲིམ་འགྲུལ་ལས་འཛོལ་ཐོན་པའི་ཁྲིམས་འགལ་གྱི་ཉེན་གསོག་བྱེད་སྤྱོད་ངོས་ལེན་ཞུས་པ་རེད།
ཐག་གཅོད་བྱས་འབྲས།
རྒྱལ་ཆེ་གེ་མོར་རླངས་འཁོར་གཏོང་ཆོག་པའི་ལག་ཁྱེར་མེད་པར་རླངས་འཁོར་བཏང་བའི་ཁྲིམས་འགལ་བྱེད་སྤྱོད་ལ། རྒྱལ་རྩེ་རྫོང་སྤྱི་བདེ་ཅུས་འགྲིམ་འགྲུལ་ཉེན་རྟོག་རུ་ཆེན་གྱིས་ཆད་པ་བཅད་པ་དང་གྱོད་གཞི་དེ་ཟླ་11ཚེས་12ཉིན་རྒྱལ་རྩེ་རྫོང་མི་དམངས་ཞིབ་དཔྱོད་ཁང་ལ་ཞིབ་བཤེར་ཐག་གཅོད་བྱ་རྒྱུར་རྩིས་སྤྲད། ཉི་ཆེ་གེ་མོས་གྱོད་སྒྲུབ་མི་དམངས་ཉེན་རྟོག་པར་དཔང་པོ་རྫུན་མ་བྱས་ཀྱང་ཤུགས་རྐྱེན་ངན་པ་བཟོས་མེད་པར་བརྟེན། འགྲིམ་འགྲུལ་ཉེན་རྟོག་རུ་ཆེན་གྱིས་བཀག་ཉར་ཉིན་6བྱས་པ་དང་དངུལ་ཆད་སྒོར་300བཅད་པ་རེད།
བྱམས་བརྩེའི་དྲན་སྐུལ།
ཆང་རག་བཏུངས་ཚེ་རླངས་འཁོར་མི་གཏོང་། རླངས་འཁོར་བཏང་ཚེ་ཆང་རག་མི་འཐུང་། ར་བཟི་འཁོར་གཏོང་དང་ལག་ཁྱེར་མེད་པར་རླངས་འཁོར་བཏང་ནས་འགྲིམ་འགྲུལ་ལས་འཛོལ་ཐོན་ཚེ་བཅའ་ཁྲིམས་ཀྱི་བཀག་སྡོམ་ལས་ཐར་ཐབས་བྲལ།
རྩོམ་སྒྲིག་པ། བདེ་སྒྲོལ།