མཚོ་སྔོན་ཞིང་ཆེན་གྱིས་སྤྱི་པའི་བཅའ་ཁྲིམས་ཞབས་ཞུའི་དྲིལ་བསྒྲགས་གཟའ་འཁོར་གྱི་བྱེད་སྒོ་སྤེལ་འགོ་བརྩམས་པ།
སྤེལ་དུས 2020-08-25
ཡོང་ཁུངས། ཀྲུང་གོ་བོད་ཀྱི་དྲ་བ།
རྩོམ་པ་པོ།
ཟླ8པའི་ཚེས24ཉིན། མཚོ་སྔོན་ཞིང་ཆེན་གྱི“བཅའ་ཁྲིམས་རོགས་སྐྱོར་གྱིས་དམངས་འཚོར་རྒྱབ་སྐྱོར་དང་དབུལ་སྐྱོར་བྱས་ཏེ་འབྱོར་འབྲིང་སྤྱི་ཚོགས་ཀྱི་ཕྱོགས་སུ་སྐྱོད་པའི”སྤྱི་པའི་བཅའ་ཁྲིམས་ཞབས་ཞུའི་དྲིལ་བསྒྲགས་གཟའ་འཁོར་གྱི་བྱེད་སྒོའི་འགོ་རྩོམ་མཛད་སྒོ་ཟི་ལིང་དུ་ཚོགས་པ་རེད།
བྱེད་སྒོ་དེ་ནི་ཞིང་ཆེན་ཁྲིམས་འཛིན་ཐིན་གྱིས་གཙོ་གཉེར་བྱས་པ་དང་། ཟི་ལིང་གྲོང་ཁྱེར་ཁྲིམས་འཛིན་ཅུའུ་དང་མཚོ་སྔོན་མི་རིགས་སློབ་ཆེན་ཁྲིམས་རིག་སློབ་གླིང་གིས་རོགས་གཉེར་བྱས་པ་རེད། ཁྲིམས་རྩོད་པའི་ལས་དོན་ཁང10ཡི་དང་བླངས་ཁྲིམས་རྩོད་པ་དང་། མཚོ་སྔོན་མི་རིགས་སློབ་ཆེན་ཁྲིམས་རིག་སློབ་གླིང་གི་སློབ་ཆེན་སློབ་མའི་དང་བླངས་པ20ཡིས་ཟི་ལིང་གྲོང་ཁྱེར་གྱི་མི་འབོར་འཁོར་རྒྱུག་ཆེ་བའི་དྲིལ་བསྒྲགས་ས་ཚུགས10ནས། དུས་ཡུན་གཟའ་འཁོར་གཅིག་གི་རིང་དྲིལ་བསྒྲགས་བྱ་རྒྱུ་རེད།
རྒྱུས་ལོན་བྱུང་བ་ལྟར་ན། ཐེངས་འདིའི་བྱེད་སྒོས་རྒྱ་ཆེའི་མང་ཚོགས་ལ《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དམངས་དོན་བཅའ་ཁྲིམས》དྲིལ་བསྒྲགས་དང“བཅའ་ཁྲིམས་རོགས་སྐྱོར་གྱིས་དམངས་འཚོར་རྒྱབ་སྐྱོར་དང་དབུལ་སྐྱོར་བྱས་ཏེ་འབྱོར་འབྲིང་སྤྱི་ཚོགས་ཀྱི་ཕྱོགས་སུ་སྐྱོད་པའི”བཅའ་ཁྲིམས་རོགས་སྐྱོར་གྱི་སྤུས་རྟགས་བྱེད་སྒོའི་དྲིལ་བསྒྲགས་དང་། ཡུལ་དངོས་བཅའ་ཁྲིམས་བློ་འདྲིའི་ཞབས་ཞུའི་བྱེད་སྒོ་སྤེལ་རྒྱུ་རེད། དྲིལ་བསྒྲགས་ལ་བརྟེན་ནས་མི་དམངས་ལ་ཕྱོགས་གང་ཅིའི་ཐད་ཀྱི་སྤྱི་པའི་བཅའ་ཁྲིམས་ཞབས་ཞུ་ལོངས་སྤྱོད་ཐུབ་པ་དང་སྤྱི་པའི་བཅའ་ཁྲིམས་ཞབས་ཞུ་ཐོབ་པའི་ཐབས་ལམ་ཤེས་སུ་འཇུག་པ་དང་། ཞིང་ཆེན་ཡོངས་ཀྱི་སྤྱི་པའི་བཅའ་ཁྲིམས་མ་ལག་འཛུགས་སྐྱོང་དང་དུས་སྐབས་གསར་པའི་བཅའ་ཁྲིམས་རོགས་སྐྱོར་ལས་དོན་ལ་སྐུལ་འདེད་གཏོང་རྒྱུ་རེད།
ཞིང་ཆེན་ཁྲིམས་འཛིན་ཐིན་གྱི་འབྲེལ་ཡོད་འགན་འཁུར་བས་ངོ་སྤྲོད་བྱས་པ་ལྟར་ན། ཉེ་བའི་ལོ་ཤས་རིང་། མཚོ་སྔོན་ཞིང་ཆེན་གྱིས་སྤྱི་པའི་བཅའ་ཁྲིམས་ཞབས་ཞུའི་མ་ལག་འཛུགས་སྐྲུན་ལ་སྤྱི་ཡོངས་ནས་སྐུལ་འདེད་བཏང་ཞིང་། ཞིང་ཆེན་ཡོངས་ལ་སྤྱི་པའི་བཅའ་ཁྲིམས་ཞབས་ཞུའི་ལྟེ་གནས་(ས་ཚུགས་དང་ལས་དོན་ཁང་)5088བཙུགས། 2018ལོ་ནས་བཟུང་སྒེའུ་ཁུང་བློ་འདྲིར་ཞབས་ཞུ་བྱས་པའི་མི་གྲངས་ཁྲི15ཙམ་ཟིན་པ་དང་། ལས་སྒོའི་རིགས་ཁག་གི་གྱོད་གཞི་ཁྲི2ལྷག་ཙམ་བདག་སྤྲོད་བྱས་ཡོད། མཚོ་སྔོན་གྱི་སྤྱི་པའི་བཅའ་ཁྲིམས་ཞབས་ཞུའི་དྲ་བར་ཁྱོན་བསྡོམས་མི་ཁྲི66ལྷག་གིས་འདྲི་རྟོགས་བྱས། བཅའ་ཁྲིམས་དྲ་བའི་བློ་འདྲི་རིམ་རྩིས་བྱས་ན་མི་གྲངས་ཁྲི3.46ལ་སླེབས་ལ་སྐད་འཕྲིན་བཞག་པའི་བློ་འདྲི1237དང་། རིག་ནུས་བློ་འདྲི་ཁྲི2.42། བརྙན་ལམ་བློ་འདྲི7373། དུས་ཐོག་བློ་འདྲི1780བཅས་ལ་སླེབས་ཤིང་། བློ་ཡིད་ཚིམ་ཚད94%ཡན་ལ་སླེབས། 12348སྤྱི་པའི་བཅའ་ཁྲིམས་ཞབས་ཞུ་བཙུགས་པ་ནས་བཟུང་ཁ་པར་སྣེ་ལེན་བྱས་པ་ཁྲི5.5ལྷག་ཙམ་ལ་སླེབས། ལོ་རེར་བཅའ་ཁྲིམས་རོགས་སྐྱོར་གྱི་གྱོད་གཞི9000ཡན་ཞིབ་གཅོད་བྱས་ཤིང་། ཞིང་ཆེན་ཡོངས་ཀྱི་བཅའ་ཁྲིམས་རོགས་སྐྱོར་ཞབས་ཞུའི་ཕན་ནུས་དཔྱད་བསྡུར་ལ་མང་ཚོགས་ཀྱི་གདེང་འཇོག་བཟང་པོ་ཐོབ་ཡོད། །
