གྲོང་ཁྱེར་འདིས་ནར་མ་སོན་པའི་མིར་ཆང་རག་བཙོང་མི་ཆོག་པ་བཟོས་འདུག
སྤེལ་དུས 2021-01-06
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས།
རྩོམ་པ་པོ།
《ཧྲེན་ཀྲེན་དཔལ་འབྱོར་དམིགས་བསལ་ས་ཁུལ་གྱི་བདེ་ཐང་སྒྲིག་སྲོལ་》ནི་ད་ལོའི་སྤྱི་ཟླ་1པོའི་ཚེས་1ཉིན་ནས་དངོས་སུ་ལག་བསྟར་བྱས་ཤིང་། དེའི་ཁྲོད་ཀྱི་སྒྲིག་སྲོལ་ལས་ནར་མ་སོན་པའི་མིར་ཨ་རག་ཉིང་ཁུ་འདུས་པའི་བཏུང་བྱའི་རིགས་ཕྱིར་ཚོང་བྱེད་མི་རུང་བ་གསལ་པོར་གཏན་འབེབས་བྱས་ཡོད་པ་མ་ཟད། ཨ་རག་ཉིང་ཁུ་འདུས་པའི་བཏུང་བྱའི་རིགས་དང་དབུགས་ལྡན་སྐོམ་ཆུའི་རིགས་ཕྱིར་འཚོང་བྱེད་མཁན་གྱིས་ཚོང་སྒྲོམ་སྟེང་དུ་ཚད་གཞི་དང་མཐུན་པའི་བདེ་ཐང་སྣེ་སྟོན་མཚོན་རྟགས་བྲི་དགོས་པ་གཏན་འབེབས་བྱས་ཡོད།
ཧྲེན་ཀྲེན་གྱི་སྒོ་རྩིས་ཚོང་ར་ཆེན་མོ་ཞིག་གི་ཐ་མག་དང་ཆང་རག་ཚོང་སྒྲོམ་སྟེང་དུ་ནར་མ་སོན་པའི་མིར་ཆང་རག་ཕྱིར་འཚོང་བྱ་མི་རུང་བའི་དྲན་སྐུལ་མཚོན་རྟགས་བྲིས་ཡོད་ལ། སྤྱི་ཟླ་1པོའི་ཚེས་1ཉིན་ནས་དངོས་སུ་ལག་བསྟར་བྱས་པའི་《ཧྲེན་ཀྲེན་དཔལ་འབྱོར་དམིགས་བསལ་ས་ཁུལ་གྱི་བདེ་ཐང་སྒྲིག་སྲོལ་》ལྟར་ན་ནར་མ་སོན་པའི་མིར་ཆང་རག་ཕྱིར་འཚོང་བྱས་ཚེ་སྒོར་ལྔ་སྟོང་ཡན་དང་ཁྲི་གསུམ་མན་གྱི་ཆད་པ་གཅོད་རྒྱུ་ཡིན་པ་རེད།
ཧྲེན་ཀྲེན་གྱི་སྒོ་རྩིས་ཚོང་ར་ཆེན་མོ་ཞིག་གི་འགན་ཁུར་བ་ཧུའུ་པོ་ཡིས། ལོ་18ལ་མ་སོན་པའི་མིར་ང་ཚོས་ཁ་བརྡ་སློབ་གསོ་གཏོང་རྒྱུ་ཡིན་ལ། གལ་ཏེ་ལོ་ན་ཚོད་དཔག་བྱེད་ཐབས་བྲལ་ཚེ་ང་ཚོར་ཐོབ་ཐང་ལག་འཁྱེར་མཁོ་འདོན་བྱ་དགོས་ཟེར།
ཧྲེན་ཀྲེན་གྲོང་ཁྱེར་གྱི་གྲོང་མི་ཞིག་གིས་འདི་ནི་གཏམ་བཟང་ཞིག་རེད། ང་ཚོ་ཚང་མས་འདིའི་ཐད་རྒྱབ་སྐྱོར་དང་ལྟ་སྐུལ་བྱས་ན་འགྲིག་ཟེར།
ཨ་རག་ཉིང་ཁུ་འདུས་འདུས་པའི་བཏུང་ཆུའི་བདེ་ཐང་གི་སྣེ་སྟོན་མཚོན་རྟགས་ལ་བྱིས་པ་དང་གཞོན་ནུ་ལོ་ཆུང་གིས་མངར་ཆའི་རིགས་ཀྱི་སྐོམ་ཆུ་མི་འཐུང་པ་དང་ཉུང་འཐུང་བྱེད་པའི་མཚོན་རྟགས་དང་ཉིན་རེར་འཐུང་བའི་མངར་མོའི་རིགས་ལ་ཚོད་འཛིན་བྱེད་པའི་མཚོན་རྟགས། རྒྱུན་དུ་མངར་མོའི་རིགས་ཚད་བརྒལ་ངང་འཐུང་བའི་བདེ་ཐང་སྣེ་སྟོན་མཚོན་རྟགས་བཅས་རིགས་གསུམ་དུ་དབྱེ་ཡོད་ལ། གལ་ཏེ་ཚོང་པས་འབྲེལ་ཡོད་སྣེ་སྟོན་མཚོན་རྟགས་བྲིས་མེད་ཚེ་ཁྲོམ་རའི་ལྟ་སྐུལ་དོ་དམ་སྡེ་ཁག་གིས་དྲན་སྐུལ་ཐ་ཚིག་སྒྲོག་དགོས་པ་མ་ཟད། དུས་ཡུན་ངེས་ཅན་ནང་སྒྱུར་བཅོས་བྱ་དགོས་པའི་བཀའ་ཕབ་དགོས་པ་དང་། གཏན་འཁེལ་དུས་ཡུན་ནང་སྔར་བཞིན་སྒྱུར་བཅོས་མི་བྱེད་མཁན་ལ་སྒོར་ཆིག་སྟོང་གི་ཆད་པ་གཅོད་ཆོག
ཧྲེན་ཀྲེན་གྱི་གྲོང་མི་ཞིག་གིས། རང་གཅུན་ནུས་པ་ཅུང་ཞན་པའི་ན་གཞོན་ཚོར་མཚོན་ན་མཚོན་རྟགས་དེ་དག་གིས་ཁོ་ཚོའི་བདེ་ཐང་ལ་སྔར་བས་ལྟ་རྟོག་བྱ་ཐུབ་ཟེར།
རྩོམ་སྒྲིག་པ། བདེ་སྒྲོལ།