ཀྲུང་གོའི་བོད་ལྗོངས་དྲ་བའི་འཕྲིན། མཚོ་སྔོན་ཞིང་ཆེན་དང་མཚོ་ལྷོ་ཁུལ་རིམ་པའི་ཁྲིམས་འཛིན་སྲིད་འཛིན་བྱ་བའི་འཆར་འགོད་ཀྱི་རེ་འདུན་དང་ཐུན་ཏེ་རྫོང་གི་ཁྲིམས་འཛིན་སྲིད་འཛིན་བྱ་བའི་འཆར་གཞི་ལྟར་ཏུ། རྫོང་ཡོངས་ཀྱི་མི་དམངས་འདུམ་སྒྲིག་བྱ་བར་སྐུལ་འདེད་དང་འཕེལ་རྒྱས་སུ་གཏོང་ཆེད་དང་། མི་དམངས་འདུམ་སྒྲིག་པའི་ནུས་པ་མཐོར་འདེགས་བཏང་ནས། སྤྱི་ཚོགས་འགལ་བ་སྣ་ཚོགས་མྱུར་ཏུ་ཆུང་ས་ནས་སེལ་ཏེ། མི་དམངས་འདུམ་སྒྲིག་གིས་སྤྱི་ཚོགས་ཀྱི་བརྟན་བརླིང་སྲུང་སྐྱོབ་དང་སྤྱི་ཚོགས་འཆམ་མཐུན་ལ་སྐུལ་འདེད་བྱས་ནས་བདེ་འཇགས་ཀྱི་འགོག་ར་དང་པོའི་ནུས་པ་མངོན་དུ་བྱ་ཆེད། ཟླ6པའི་ཚེས10ཉིན།རྫོང་ཡོངས་ཀྱི་མི་དམངས་འདུམ་སྒྲིག་པའི་ཀྲུའུ་རིན་དང་རྐང་འཛིན་མི་སྣའི་གསོ་སྦྱོང་འཛིན་གྲྭ་བསྡུས་ལ། རྫོང་ཡོངས་ཀྱི་མི་དམངས་འདུམ་སྒྲིག་ཨུ་ཡོན་ལྷན་ཁང་གི་ཀྲུའུ་རིན་དང་རྐང་འཛིན་པ། ཁྲིམས་ལུགས་བློ་སྟོན་པ། ཁྲིམས་འཛིན་སའོ་ཀྲང་སོགས་མི160ལྷག་གསོ་སྦྱོང་དུ་ཞུགས།
གསོ་སྦྱོང་འཛིན་གྲྭའི་ཡུལ་དངོས།
རྒྱུས་ལོན་བྱུང་བ་ལྟར་ན། ཐེངས་འདིའི་གསོ་སྦྱོང་སྟེང་མཚོ་སྔོན་མི་རིགས་དགེ་ཐོན་སློབ་གྲྭའི་ཁྲིམས་ལུགས་དང་སྤྱི་ཚོགས་རིག་པའི་སློབ་གླིང་གི་ཁྲིམས་ཀྱི་དགེ་རྒན་ཆེན་མོ་དང་། ནུབ་བྱང་མི་རིགས་སློབ་གྲྭ་ཆེན་མོའི་ཁྲིམས་ལུགས་སློབ་གླིང་གི་ཁྲིམས་ལུགས་ཞིབ་འཇུག་སློབ་མའི་མཛུབ་སྟོན་དགེ་རྒན་སྙིང་བོ་རྒྱལ་ལགས་གདན་དྲངས་ནས་སློབ་ཁྲིད་བྱས་པ་རེད།
རྫོང་ཁྲིམས་འཛིན་ཅུའུ་ཡི་གཞུང་ཞབས་ཁྲིམས་རྩོད་པ་རྡོ་རྗེ་ཚེ་རིང་གིས་མདོ་འཛིན་བྱས་པ་དང་། དགེན་སྙིང་བོ་རྒྱལ་ལགས་ཀྱིས་གྱོད་དཔེ་གཞིར་བཟུང་ནས་འབྲེལ་ཡོད་ཀྱི་ཁྲིམས་སྲོལ་རྒྱས་འབྲེལ་བྱས་ཤིང་། ཀུན་གྱིས་ཉན་ན་སྤྲོ་ཞིང་མཐོང་ན་འཛུམ་པའི་དངོས་ཡོད་ཀྱི་གསོན་དཔེ་དག་བེད་སྤྱད་ནས། མི་དམངས་འདུམ་སྒྲིག་བྱ་བའི་གཞུང་ལུགས་དང་ལག་ལེན་གཉིས་ཀྱི་ཐད་དུ་ཁ་གཏད་རང་བཞིན་དང་ལག་ལེན་རང་བཞིན་ལྡན་པར་སློབ་ཁྲིད་བྱས་ལ། མི་དམངས་འདུམ་སྒྲིག་གི་དཔུང་སྡེ་འཛུགས་བསྐྲུན་དང་གྱོད་ཡིག་ཚད་ལྡན་བཟོ་བ། འདུམ་སྒྲིག་གི་དམིགས་ཡུལ་ངོས་འཛིན་དང་། ཐབས་ཇུས་གདམ་གསེས། བྱེད་ཐབས་བེད་སྤྱོད། རྩ་དོན་དམ་འཛིན་སོགས་ཀྱི་ཐད་ནས་ཚན་རིག་དང་མཐུན་ལ་དངོས་ཡོད་ལ་མཚམས་པའི་སློབ་སྟོན་གནང་སྟེ། མི་དམངས་འདུམ་སྒྲིག་པས་གྱོད་གཞི་འདུམ་སྒྲིག་གི་ཁྲོད་དུ་ཐབས་ལམ་གསར་བ་དང་རིག་ལམ་གསར་བ་བཙལ་ནས། ཁྲིམས་ལུགས་ལ་གཞི་བཅོལ་ཞིང་དམངས་སྲོལ་ལ་ཟུར་ལྟ་བྱས་ཏེ་དོ་བདག་ཕྱོགས་གཉིས་ཀྱི་ཁེ་ཕན་སྲུང་སྐྱོབ་བྱས་ནས་འགལ་བ་འདུམ་དགོས་པའི་བསླབ་བྱ་གནང་།
དེ་རྗེས་རྫོང་འགལ་རྩོད་ཕྱོགས་བསྡུས་མཉམ་སྒྲུབ་ཞབས་ཞུ་ལྟེ་གནས་ཀྱི་ཀྲུའུ་རིན། རྒྱལ་ཁབ་རིམ་པའི་དཔེ་བཟང་གཟུ་བ་ཡུལ་ལྷ་ཚེ་རིང་ལགས་ཀྱིས་རང་གི་ལོ་མང་རིང་གི་འདུམ་སྒྲིག་མཉམ་མྱོང་ལ་གཞི་བཅོལ་ནས་མི་དམངས་འདུམ་སྒྲིག་བྱ་བའི་མཉམ་འཇོག་བྱེད་ས་དང་། བྱེ་བྲག་གི་འདུམ་སྒྲིག་ཐབས་ལམ། འདུམ་སྒྲིག་པའི་རྩ་དོན་དང་ཀུན་སློང་སོགས་ཀྱི་ཐད་ནས་གདམས་ངག་ལྷུག་པར་བསྩལ་བས། རྒྱ་ཆེའི་མི་དམངས་འདུམ་སྒྲིག་པ་རྣམས་ཀྱིས་དགའ་བསུ་ཆེན་པོ་ཐོབ་ཅིང་། འདུམ་སྒྲིག་གི་བྱ་བའི་ཐད་ལ་ཡང་ངོས་ཟིན་གསར་བ་རྙེད།
ཚོགས་འདུའི་ཡུལ་དངོས།
རྡོ་རྗེ་ཚེ་རིང་གིས། ཐེངས་འདིའི་གསོ་སྦྱོང་བརྒྱུད་ནས་རྫོང་ཡོངས་ཀྱི་མི་དམངས་འདུམ་སྒྲིག་ཨུ་ཡོན་ལྷན་ཁང་གི་ཀྲུའུ་རིན་དང་རྐང་འཛིན་པའི་ལས་ཀའི་ནུས་པ་མཐོར་འདེགས་སུ་སོང་བ་དང་། ཁོ་ཚོར་འདུམ་སྒྲིག་གི་གཞུང་ལུགས་དང་ལག་ལེན་གང་གི་ཐད་ནས་ཀྱང་ཤེས་བྱ་ཕུན་སུམ་ཚོགས་པ་མཁོ་སྤྲོད་བྱས་པས། ཚོགས་ཞུགས་པ་རྣམས་རབ་ཏུ་མགུ་ཞིང་འདི་ལྟ་བུའི་གསོ་སྦྱོང་ཐེངས་མང་སྤེལ་བའི་རེ་བ་ཡང་ཡང་བཏོན་པ་དང་། རྗེས་ཕྱོགས་མི་དམངས་འདུམ་སྒྲིག་གི་བྱ་བ་གཏིང་ཟབ་ཏུ་སྤེལ་བར་རྨང་གཞི་བརྟན་པོ་བཞག་ཡོད་ཅེས་གསུངས།
རྩོམ་སྒྲིག་པ། རིག་གྲོལ།
