ཀྲུང་གོའི་བོད་ལྗོངས་དྲ་བ། > ཁྲིམས་ལུགས། > གསར་ཤོས།

ལས་བྱེད་པ་ཞིག་ཏང་གི་སྐྱིད་སྡུག་དང་གཞུང་གི་ལས་ཀ་ནས་ཕུད་འདུག

སྤེལ་དུས 2021-06-24 ཡོང་ཁུངས། བོད་ལྗོངས་ཉིན་ཚགས། རྩོམ་པ་པོ།

ཉིན་ཤས་གོང་། ནག་ཆུ་གྲོང་ཁྱེར་སྒྲིག་ཨུད་ལྟ་ཞིབ་ཨུ་ལྷན་གྱིས་སྦྲ་ཆེན་རྫོང་མི་དམངས་སྲིད་གཞུང་གི་དེ་སྔའི་རྫོང་དཔོན་གཞོན་པ་རིམ་པ་གསུམ་པའི་ལྟ་ཞིབ་པ་ཕན་ཧྲུན་ཅང་གི་སྒྲིག་འགལ་ཁྲིམས་འགལ་ཚབས་ཆེན་གྱི་གནད་དོན་ལ་གྱོད་ཐོ་བཀོད་དེ་བརྟག་དཔྱད་དང་ཞིབ་བཤེར་བྱས་པ་རེད།

བརྟག་དཔྱད་བྱས་པ་བརྒྱུད། ཕན་ཧྲུན་ཅང་གི་ཕུགས་བསམ་དང་དད་སེམས་ཉམས་པ་དང་། ཐོག་མའི་བསམ་འདུན་དང་འགན་འཁྲིར་རྒྱབ་འགལ་བྱས་པ། ཏང་གི་སྒྲིག་ཁྲིམས་དང་རྒྱལ་ཁབ་ཀྱི་བཅའ་ཁྲིམས་སྣང་མེད་དུ་བཏང་བ། གཞན་དང་ངན་པ་ལག་འབྲེལ་བྱས་པ། རྩ་འཛུགས་ཀྱི་ཞིབ་བཤེར་དང་བརྟག་དཔྱད་ལ་འགོག་རྒོལ་བྱས་པ། ལས་གནས་ཀྱི་སྟབས་བདེ་སྤྱད་དེ་མི་གཞན་ལ་རྣམ་གྲངས་འགན་གཙང་ལེན་རོགས་བྱས་ནས་ཁྲིམས་འགལ་ངང་གཞན་གྱི་རྒྱུ་དངོས་བླངས་པ་རེད།

ཕན་ཧྲུན་ཅང་ཏང་ཡོན་འགོ་ཁྲིད་ལས་བྱེད་པ་ཞིག་ཡིན་པའི་ངོས་ནས། ཏང་གི་ཆབ་སྲིད་སྒྲིག་ཁྲིམས་དང་རྒྱལ་ཁབ་ཀྱི་བཅའ་ཁྲིམས་ཁྲིམས་སྲོལ་ལས་ཚབས་ཆེན་འགལ་བས། ལས་ཐོག་ཁྲིམས་འགལ་གྱི་ནག་ཉེས་བསགས་པ་དང་ལྐོག་ངན་བླངས་པའི་ཉེས་གསོག་གི་དོགས་གཞི་ཡོད་པ་མ་ཟད། ཏང་གི་ཚོགས་ཆེན་བཅོ་བརྒྱད་པའི་རྗེས་སུའང་མཚམས་དང་ཚོད་མ་བྱས་པ་དང་། ངོ་བོ་ངན་ལ་ཉེས་ཚབས་ཆེ་བས་ཐག་གཅོད་ནན་པོ་བྱེད་དགོས་ངེས་རེད། 《ཀྲུང་གོ་གུང་ཁྲན་ཏང་གི་སྒྲིག་ཁྲིམས་ཆད་གཅོད་སྲོལ་ཡིག》དང《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ལྟ་ཞིབ་བཅའ་ཁྲིམས》སོགས་ཀྱི་འབྲེལ་ཡོད་གཏན་འབེབས་གཞིར་བཟུང་། ནག་ཆུ་གྲོང་ཁྱེར་སྒྲིག་ཨུད་རྒྱུན་ལས་ཨུ་ལྷན་གྱི་ཚོགས་འདུའི་ཐོག་ཞིབ་འཇུག་བྱས་པ་དང་སྦྲགས་གྲོང་ཨུད་ལ་གོང་ཞུ་བྱས་ནས་ཆོག་མཆན་ཐོབ་པ་བརྒྱུད། ནག་ཆུ་གྲོང་ཁྱེར་སྒྲིག་ཨུད་ཀྱིས་ཕན་ཧྲུན་ཅང་ཏང་གི་སྐྱིད་སྡུག་ནས་ཕྱིར་འབུད་བྱ་རྒྱུའི་ཆད་པ་བཅད་པ་དང་། ནག་ཆུ་གྲོང་ཁྱེར་ལྟ་ཞིབ་ཨུ་ལྷན་གྱིས་ཁོ་པ་གཞུང་གི་ལས་གནས་ནས་ཕྱིར་འབུད་བྱ་རྒྱུའི་ཆད་པ་བཅད་པ། ཉེས་གསོག་དོགས་ཡོད་ཀྱི་གནད་དོན་ཞིབ་དཔྱོད་ལས་ཁུངས་ལ་ཁྲིམས་བཞིན་ཞིབ་བཤེར་ཞུ་གཏུག་བྱེད་པར་རྩིས་སྤྲད་པ་མ་ཟད། གྱོད་འབྲེལ་རྒྱུ་དངོས་རྣམས་གྱོད་གཞི་དང་མཉམ་དུ་རྩིས་སྤྲོད་རྒྱུའི་ཐག་བཅད་པ་རེད།

རྩོམ་སྒྲིག་པ། བདེ་སྒྲོལ།