སློབ་མ་ཞིག་ལ་ནད་མེད་པར་གཤགས་བཅོས་བྱས་པའི་གནད་དོན་ལ་་་
སྤེལ་དུས 2021-10-08
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ།
ཟླ10པའི་ཚེས6ཉིན་གྱི་ཕྱི་དྲོར། དྲ་གྲོགས་ཤིག་གིས་དྲ་རྒྱའི་ཐོག་ནས“ནད་མེད་པའི་སློབ་མ་བུ་མོ་ཞིག་གཤགས་བཅོས་སྟེགས་བུའི་ཐོག་ཁྲིད་པ་དང་གཤགས་བཅོས་བྱེད་རིང་ཁ་པར་བརྒྱབ་ནས་དངུལ་གཡར་རུ་བཅུག”ཅེས་བཤད། ཉིན་དེའི་དགོང་མོར་ཧྲའན་ཞི་ཞིང་ཆེན་ཨན་ཁང་གྲོང་ཁྱེར་ཧན་པིན་ཁུལ་དུ་བརྟག་དཔྱད་ཐག་གཅོད་ལས་དོན་ཚོ་ཆུང་བཙུགས་ནས་བརྟག་དཔྱད་བྱས།
ཟླ10པའི་ཚེས7ཉིན་གྱི་ཉིན་གུང་། ཨན་ཁང་གྲོང་ཁྱེར་ཧན་པིན་ཁུལ་གྱིས་བརྡ་ཁྱབ་བཏང་དོན། ཞིབ་བཤེར་བྱས་པ་བརྒྱུད་ཟླ10པའི་ཚེས4ཉིན་གྱི་ཉིན་གུང་ལ“ལུའུ་ཆེ་གེ་མོ”(ལོ17)ཟེར་བར་སློབ་གྲོགས་ཤིག་གིས་འགྲོ་རོགས་བྱས་ཏེ་ཨན་ཁང་ཞིན་ཨན་སྨན་ཁང་དུ་སྨན་བཅོས་བྱེད་པར་བསྐྱོད་པ་དང་། སྨན་པ་ཚའོ་ཆེ་གེ་མོས་སྨན་བཅོས་དང་བརྟག་དཔྱད་བྱས་ནས་མངལ་སྒོའི་ཆ་ཤས་སུ་ཤ་ལྷག་ཅིག་སྐྱེས་འདུག་པར་བཤད། “ལུའུ་ཆེ་གེ་མོས”གཤགས་བཅོས་གནས་ཚུལ་ཤེས་རྟོགས་མོས་མཐུན་ཡི་གེའི་ཐོག་མིང་རྟགས་བཀོད་རྗེས་ཚའོ་ཆེ་གེ་མོས་ཁོ་མོར་གཤགས་བཅོས་བྱས་ཤིང་། གཤགས་བཅོས་ཁྲོད་མིང་རྟགས་འགོད་པ་དང་གཤགས་བཅོས་རྫུན་མ(སྨན་ཁང་གཞན་དུ་བརྟག་དཔྱད་བྱས་པའི་ལུས་པོའི་མཚམས་ཁུལ་དང་ཨན་ཁང་ཞིན་ཨན་སྨན་ཁང་གི་གཤགས་བཅོས་བྱེད་པའི་ལུས་པོའི་མཚམས་ཁུལ་གཉིས་གཅིག་པ་མིན་པ)ཡི་གནད་དོན་མེད་པ་རེད། འོན་ཀྱང་སྨན་བཅོས་བརྒྱུད་རིམ་ཁྲོད་ཨན་ཁང་ཞིན་ཨན་སྨན་ཁང་གིས་ལྟ་སྐྱོང་མཁན་གྱི་འགྲོ་རོགས་དང་མིང་རྟགས་འགོད་མཁན་མེད་པའི་གནས་ཚུལ་འོག ལོ་ན་མ་སོན་པའི་མིར་བརྟག་དཔྱད་དང་གཤགས་བཅོས་བྱས་པས། དོ་དམ་གྱི་ཆ་ནས་ཚད་ལྡན་མིན་པ་དང་བརྡ་བཏང་བ་གནད་ལ་མི་འཁེལ་བ། སྨན་པའི་ཀུན་སྤྱོད་ཚུལ་ལྡན་མིན་པ་སོགས་ཀྱི་གནད་དོན་ཡོད།
བརྡ་ཁྱབ་ནང་། མིག་སྔར་ཨན་ཁང་ཞིན་ཨན་སྨན་ཁང་ལས་མཚམས་བཞག་ནས་བཅོས་སྒྲིག་བྱས་ཏེ་གཙོ་བཅོས་སྨན་པ་ཚའོ་ཆེ་གེ་མོའི་ལས་གཉེར་བྱེད་མཚམས་འཇོག་རྒྱུ་དང་། སྨན་ཁང་གི་ཡོན་ཀྲང་དགོངས་ཞུ་བྱ་རྒྱུར་ཁ་ཆད་གྲོས་མོལ་བྱས་པ་དང་འབྲེལ་སྨན་ཁང་གི་ཡོན་ཀྲང་གཞོན་པ་དང་ཚན་ཁག་གི་ཀྲུའུ་རེན། སྨན་པ་ཚའོ་ཆེ་གེ་མོ་བཅས་ལ་ཐག་གཅོད་ནན་པོ་བྱེད་དགོས་པའི་བཀའ་བཏང་བ་རེད། ནད་པ་དང་ནང་མིས་སྨན་ཁང་དང་གྲོས་བྱས་ཏེ་རྩོད་གཞིའི་ཐག་གཅོད་བྱ་ཐབས་ལ་གྲོས་འཆམ་བྱུང་ཡོད། དེའི་ཐད་ནས་ཧན་པིན་ཁུལ་གྱིས་གཅིག་ཤེས་ཀུན་གྲོལ་གྱིས་འཕྲལ་མར་ཁུལ་ཡོངས་ནས་སྨན་བཅོས་སྒྲིག་གཞིའི་ཆེད་དོན་གཙང་བཤེར་བཅོས་སྒྲིག་ལས་དོན་གཅིག་སྡུད་ཐོག་སྤེལ་རྒྱུ་དང་། འགན་ནུས་སྡེ་ཚན་གྱིས་སོ་སོའི་འོས་འགན་ཇི་ལྟར་སྒྲུབ་པའི་ཚུལ་ལ་བརྟག་དཔྱད་བྱེད་བཞིན་ཡོད་ཅེས་འཁོད་འདུག
རྩོམ་སྒྲིག་པ། བདེ་སྒྲོལ།
