ཉིང་ཁྲིའི་འགོ་ཁྲིད་འདི་གནས་དབྱུང་བཏང་འདུག
སྤེལ་དུས 2021-10-26
ཡོང་ཁུངས། སེམས་ཀྱི་ཞིང་ཁམས།
རྩོམ་པ་པོ།
ཉེ་ཆར། བོད་རང་སྐྱོང་ལྗོངས་སྒྲིག་ཨུད་ལྟ་ཨུད་ཀྱིས་ཉིང་ཁྲི་གྲོང་ཨུད་ཀྱི་དེ་སྔའི་རྒྱུན་ཨུད་དང་། སྲིད་ཁྲིམས་ཨུ་ལྷན་གྱི་ཧྲུའུ་ཅི། གྲོང་ཁྱེར་སྤྱི་བདེ་ཅུད་ཏང་ཨུའི་ཧྲུའུ་ཅི་ཀྲུའུ་ཅང་གི་སྒྲིག་འགལ་ཁྲིམས་འགལ་གྱི་གནད་དོན་ལ་གྱོད་ཐོ་བཀོད་ནས་ཞིབ་བཤེར་བརྟག་དཔྱད་བྱས་པ་རེད།
ཞིབ་བཤེར་བྱས་པ་བརྒྱུད། ཀྲུའུ་ཅང་གི་ཕུགས་བསམ་དད་སེམས་ཉམས་པ་དང་ཐོག་མའི་བསམ་འདུན་ལས་འགན་དང་རྒྱབ་འགལ་བྱས་ཤིང་། སྒྲིག་ཁྲིམས་ཀྱི་འདུ་ཤེས་ཞན་ལ། འཛེམ་དོགས་ཅི་ཡང་མེད་པར་དོ་དམ་ཞབས་ཞུ་བྱ་ཡུལ་ནས་དངུལ་སོགས་ལགས་རྟགས་བླངས་པ། ཐེངས་མང་པོར་གསོལ་སྟོན་དང་རོལ་རྩེད་བྱེད་སྒོར་གདན་ཞུ་དང་ལེན་བྱས་པ། རྒྱུན་རིང་པོར་རིན་པ་མ་སྤྲད་པར་མགྲོན་ཁང་སོགས་སྒེར་བཟུང་བྱས་པ། ཁྲིམས་འགལ་ཐོག་ལས་ཁུངས་ཀྱི་སྡོད་ཁང་སྒེར་འཛིན་བྱས་པ། སྒེར་གྱི་འབྲེལ་ཡོད་དོན་དག་ཇི་བཞིན་སྙན་སེང་མི་ཞུ་པ། རང་ཉིད་ཀྱི་འགྲོ་སོང་གཏང་དགོས་སར་གཞན་ལ་འགྲོ་སོང་གཏོང་དུ་བཅུག་པ། ཁྲིམས་འགལ་ཐོག་ཁྲིམས་ལུགས་ལག་བསྟར་ལས་དོན་ལ་བར་ཆད་བཏང་བ། རྒྱུན་རིང་ལ་རྒྱན་འཇོག་གི་ངོ་བོར་གྲུབ་པའི་རོལ་རྩེད་བྱེད་སྒོའི་ནང་མགོ་འཁོར་ནས་བསྡད་པ། ཁྲིམས་འགལ་ཐོག་ཐེམ་ཐོ་དང་ཐོབ་ཐང་ལག་འཁྱེར་ཀྱི་ཨང་གྲངས་བཟོས་པ། སྒྲིག་འགལ་ཐོག་རླངས་འཁོར་གྱི་ཨང་རྟགས་བེད་སྤྱོད་བྱས་པ། ལས་གནས་ཐོག་གི་སྟབས་བདེ་སྤྱད་དེ་གཞན་ལ་ཁེ་ཕན་བསྐྲུན་པ་དང་། ཁྲིམས་འགལ་ཐོག་གཞན་གྱི་ལག་ནས་རྒྱུ་ནོར་བླངས་པ་བཅས་བྱས་ཡོད་པ་རེད།
ཀྲུའུ་ཅང་གི་བྱ་སྤྱོད་དེ་ཀྲུང་དབྱང་གི་དོན་ཚན་ཁག་བརྒྱད་ཀྱི་དགོངས་དོན་དང་འགལ་ཞིང་། ཏང་གི་རྩ་འཛུགས་སྒྲིག་ལམ་དང་སྤྱོད་གཙང་སྒྲིག་ལམ། འཚོ་བའི་སྒྲིག་ལམ་བཅས་དང་འགལ་ཡོད་པ་དང་། རྒྱལ་ཁབ་གྱི་བཅའ་ཁྲིམས་དང་ཁྲིམས་ལུགས་གཏན་འབེབས་དང་འགལ་ཏེ། ལས་གནས་བཅའ་ཁྲིམས་དང་འགལ་ཡོད་པར་མ་ཟད་ལྐོག་རྔན་བླངས་པའི་ཉེས་བསགས་དོགས་གཞི་ཡོད་དེ། ཏང་གི་ཚོགས་ཆེན་བཅོ་བརྒྱད་པ་འཚོགས་རྗེས་ད་དུང་མཚམས་དང་ཚོད་མི་འཛིན་པ། ཏང་གི་ཚོགས་ཆེན་བཅུ་དགུ་པ་འཚོགས་རྗེས་ད་དུང་ངོ་ཚ་ཁྲེལ་མེད་དང་། ངོ་བོ་ངན་པ། གནས་ཚུལ་ཚབས་ཆེ་བ་བཅས་ལ་ཐག་གཅོད་ནན་མོ་བྱ་དགོས། ཀྲུང་གོ་གུང་ཁྲན་ཏང་གི་སྒྲིག་ཁྲིམས་ཆད་གཅོད་སྲོལ་ཡིག་དང་། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ལྟ་ཞིབ་བཅའ་ཁྲིམས་སོགས་ཀྱི་འབྲེལ་ཡོད་གཏན་འབེབས་གཞིར་བཟུང་། བོད་རང་སྐྱོང་ལྗོངས་སྒྲིག་ཨུད་རྒྱུན་ཨུད་ཀྱི་ཚོགས་འདུའི་ཐོག་ཞིབ་འཇུག་བྱས་ནས་རང་སྐྱོང་ལྗོངས་ཏང་ཨུད་ཀྱི་ཆོག་མཆན་ཐོབ་རྗེས། རང་སྐྱོང་ལྗོངས་སྒྲིག་ཨུད་ཀྱིས་ཀྲུའུ་ཅང་ཏང་གི་སྐྱིད་སྡུག་ལས་ཕྱིར་འབུད་རྒྱུ་ཐག་བཅད་པ་དང་། རང་སྐྱོང་ལྗོངས་ལྟ་ཨུད་ཀྱིས་གཞུང་གི་ལས་གནས་ནས་ཕྱིར་འབུད་པའི་ཆད་པ་གཅད་རྒྱུར་གཏན་འབེབས་བྱས་པར་མ་ཟད། ཁྲིམས་འགལ་ལུགས་དཀྲུག་གི་ཐོབ་ཆ་རྩིས་ལེན་བྱ་རྒྱུ་དང་། ཉེས་བསགས་དོགས་གཞི་ཡོད་པའི་གནད་དོན་ཞིབ་དཔྱོད་ལས་ཁུངས་ལ་ཁྲིམས་ལྟར་ཞིབ་བཤེར་ཁྲིམས་སྦྱོར་བྱ་རྒྱུ་དང་། འབྲེལ་ཡོད་རྒྱུ་ནོར་གྱོད་གཞི་དང་མཉམ་དུ་བསྐྱལ་རྒྱུ་རེད།
རྩོམ་སྒྲིག་པ། བདེ་སྒྲོན།
