ཉིང་ཁྲིའི་དེ་སྔའི་དཔོན་པོ་འདི་ཏང་གི་སྐྱིད་སྡུག་དང་ལས་ཀ་ནས་ཕུད་པ།
སྤེལ་དུས 2021-10-28
ཡོང་ཁུངས། བོད་ལྗོངས་ཉིན་ཚགས།
རྩོམ་པ་པོ།
ཉིན་ཤས་གོང་། བོད་རང་སྐྱོང་ལྗོངས་སྒྲིག་ཨུད་ལྟ་ཞིབ་ཨུ་ལྷན་གྱིས་ཉིང་ཁྲི་གྲོང་ཨུད་ཀྱི་དེ་སྔའི་རྒྱུན་ཨུ་དང་། སྲིད་ཁྲིམས་ཨུ་ལྷན་གྱི་ཧྲུའུ་ཅི། གྲོང་ཁྱེར་སྤྱི་བདེ་ཅུས་ཏང་ཨུད་ཀྱི་ཧྲུའུ་ཅི་བཅས་ཡིན་པའི་ཀྲུའུ་ཅང་གི་སྒྲིག་འགལ་ཁྲིམས་འགལ་གྱི་གནད་དོན་ཚབས་ཆེན་ལ་གྱོད་ཐོ་བཀོད་ནས་ཞིབ་བཤེར་བརྟག་དཔྱད་བྱས་པ་རེད།
བརྟག་དཔྱད་བྱས་པ་བརྒྱུད། ཀྲུའུ་ཅང་གིས་ཕུགས་བསམ་དང་། དད་སེམས། དེ་བཞིན་ཏང་གཤིས་ཀྱི་རྩ་དོན་བཅས་དོར་བ་དང་། ཐོག་མའི་བསམ་འདུན་དང་འགན་འཁྲི་རྒྱབ་ཏུ་བསྐྱུར་བ། སྒྲིག་ཁྲིམས་དང་བཅའ་ཁྲིམས་ཀྱི་འདུ་ཤེས་ཞན་པ་བཅས་ལས་དོ་དམ་བྱ་ཡུལ་ནས་ཧམ་སེམས་ཆེན་པོས་ལག་རྟགས་དང་འབུལ་རྟེན་བླངས་པ་དང་། གསོལ་སྟོན་དང་རོལ་རྩེད་བྱེད་སྒོར་ཐེངས་མང་ཞུགས་པ། མགྲོན་ཁང་གི་ཁང་པ་རིན་མེད་ངང་ཡུན་རིང་བཟུང་བ། སྒྲིག་འགལ་ངང་ལས་ཁུངས་ཀྱི་སྤྱི་ཤག་བཟུང་བ། མི་སྒེར་གྱི་འབྲེལ་ཡོད་དོན་ཚན་སྦ་གསང་བྱས་པ། སྒེར་གྱིས་སྤྲོད་དགོས་པའི་འགྲོ་གྲོན་གཞན་ལ་གཏོང་དུ་བཅུག་པ། སྒྲིག་འགལ་ངང་ཁྲིམས་འཛིན་ལས་དོན་ལ་ཐེ་ཇུས་བྱས་པ། རྒྱན་འགྱེད་དང་རོལ་རྩེད་བྱེད་སྒོར་ཡུན་རིང་དབྱིངས་ཞུགས་པ། ཁྲིམས་འགལ་ངང་ཐེམ་ཐོ་དང་ཐོབ་ཐང་ལག་ཁྱེར་གྱི་ཨང་གྲངས་བཟོས་པ། རླངས་འཁོར་གྱི་འཁོར་རྟགས་སྒྲིག་འགལ་ངང་བེད་སྤྱོད་བྱས་པ། གོ་གནས་ཀྱི་སྟབས་བདེ་སྤྱད་དེ་མི་གཞན་ལ་ཁེ་ཕན་གཉེར་ཐབས་བྱས་པ། ཁྲིམས་འགལ་ངང་གཞན་གྱི་རྒྱུ་ནོར་བླངས་པ་བཅས་རེད།
ཀྲུའུ་ཅང་གིས་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་དང་། ཏང་གི་རྩ་འཛུགས་ཀྱི་སྒྲིག་ཁྲིམས། སྤྱོད་གཙང་གི་སྒྲིག་ཁྲིམས། ལས་ཀའི་སྒྲིག་ཁྲིམས། འཚོ་བའི་སྒྲིག་ལམ་བཅས་ལས་ཚབས་ཆེན་འགལ་བ་དང་རྒྱལ་ཁབ་ཀྱི་བཅའ་ཁྲིམས་ཁྲིམས་སྲོལ་ལས་འགལ་ནས་གོ་གནས་ཁྲིམས་འགལ་དང་རྒྱུ་ནོར་ལྐོག་ཟ་བྱས་པའི་ཉེས་གསོག་གི་དོགས་གཞི་ཡོད་པ་མ་ཟད། ཏང་གི་ཚོགས་ཆེན་བཅོ་བརྒྱད་པའི་རྗེས་སུ་མཚམས་དང་ཚོད་མ་བྱས་པ་དང་། ཚོགས་ཆེན་བཅུ་དགུ་པ་འཚོགས་རྗེས་སུའང་ངོ་ཚ་ཞེ་ཁྲེལ་དང་སྐྲག་སྣང་མ་བྱས་པར་ངོ་བོ་ངན་ཞིང་ཉེས་ཚབས་ཆེ་བས། ཐག་གཅོད་ནན་པོ་བྱེད་དགོས་ངེས་རེད།《ཀྲུང་གོ་གུང་ཁྲན་ཏང་གི་སྒྲིག་ཁྲིམས་ཆད་གཅོད་སྲོལ་ཡིག》དང《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ལྟ་ཞིབ་བཅའ་ཁྲིམས》 སོགས་ཀྱི་འབྲེལ་ཡོད་གཏན་འབེབས་གཞིར་བཟུང་། བོད་རང་སྐྱོང་ལྗོངས་སྒྲིག་ཨུད་རྒྱུན་ལས་ཨུ་ལྷན་གྱི་ཚོགས་འདུའི་ཐོག་ཞིབ་འཇུག་བྱས་པ་དང་འབྲེལ་རང་སྐྱོང་ལྗོངས་ཏང་ཨུད་ཀྱི་ཆོག་མཆན་ཐོབ་པར་སྙན་སེང་ཞུས་པ་བརྒྱུད། རང་སྐྱོང་ལྗོངས་སྒྲིག་ཨུད་ཀྱིས་ཀྲུའུ་ཅང་ཏང་གི་སྐྱིད་སྡུག་ནས་འབུད་རྒྱུ་དང་། རང་སྐྱོང་ལྗོངས་ལྟ་ཞིབ་ཨུ་ལྷན་གྱིས་ཁོ་པ་གཞུང་གི་ལས་ཀ་ནས་འབུད་རྒྱུའི་ཆད་པ་བཅད་པ། ཁོ་པའི་སྒྲིག་འགལ་ཁྲིམས་འགལ་གྱི་རྒྱུ་དངོས་ཚང་མ་གཞུང་བཞེས་གཏོང་རྒྱུ་དང་། ཁྲིམས་འགལ་ཉེས་གསོག་གི་གནད་དོན་ཞིབ་དཔྱོད་ལས་ཁུངས་ལ་རྩིས་སྤྲོད་བྱས་ནས་ཁྲིམས་ལྟར་ཞིབ་བཤེར་ཞུ་གཏུག་རྒྱག་རྒྱུ་མ་ཟད། འབྲེལ་ཡོད་ཀྱི་རྒྱུ་དངོས་གྱོད་གཞི་དང་མཉམ་དུ་རྩིས་སྤྲོད་རྒྱུའི་གཏན་འབེབས་བྱས་པ་རེད།
རྩོམ་སྒྲིག་པ། བདེ་སྒྲོན།
