གྲོང་མི་མང་ཚོགས་ཀྱི་འགྲིམ་འགྲུལ་བདེ་འཇགས་ཀྱི་འདུ་ཤེས་སྔར་བས་གཏིང་ཟབ་དང་ལེགས་སུ་གཏོང་ཆེད། ཉེ་ཆར་ལྷ་ས་གྲོང་ཁྱེར་སྤྱི་བདེ་ཅུད་འགྲིམ་འགྲུལ་ཉེན་རྟོག་ཉིང་ལག་རུ་ཁག་གིས་ལམ་ལུགས་གཉིས་ཀྱི་ལས་ཀའི་རྣམ་པ་བཏོད་ནས་ཁྲིམས་འགལ་ངང་རླངས་འཁོར་གང་བྱུང་འཇོག་མཁན་ལ་སྒྲིག་འགལ་གྱི་བརྡ་ཤོག་དང་ཤ་ཚའི་དྲན་སྐུལ་གཱ་ཤོག་4000ལྷག་ཙམ་གཤམ་སྤྲོད་བྱས་ཡོད་པ་རེད།
ལམ་ངོས་ཀྱི་ལས་སྒྲུབ་མི་དམངས་ཉེན་རྟོག་པས་ས་གནས་ས་ཐོག་གི་ཁྲིམས་འཛིན་བྱེད་སྒོ་སྤེལ་རིང་ཁྲིམས་འགལ་ངང་རླངས་འཁོར་གང་བྱུང་ཁ་བཀག་པའི་འགྲིམ་འགྲུལ་ཁྲིམས་འགལ་བྱེད་སྤྱོད་ལ་ཁྲིམས་ལྟར་ས་གནས་ས་ཐོག་ཏུ་སྒྲིག་འགལ་བརྡ་གཏོང་ཤོག་བྱང་སྤྲད་རྗེས་བོད་རྒྱ་ཡིག་རིགས་གཉིས་ཀྱི་ཤ་ཚའི་དྲན་སྐུལ་གཱ་ཤོག་སྤྲད་ནས་ཁྲིམས་འགལ་གྱི་དོན་དངོས་གསལ་བཤད་བྱེད་པ་མ་ཟད། སྒྲིག་འགལ་དོ་བདག་ལ་ཁ་ཏ་བསླབ་བྱ་ཡང་བྱེད་ཀྱི་ཡོད་པ་རེད། ཤ་ཚའི་དྲན་སྐུལ་བྱང་བུ་དེ་དྲོ་སྐྱིད་ལྡན་པ་དང་སྙིང་རྗེ་བའི་འགུལ་རིས་གཟུགས་བརྙན་ཐོག་ནས་མངོན་པར་བྱས་ཡོད།
གཞན་ཡང་ཤ་ཚའི་དྲན་སྐུལ་བྱང་བུའི་ཐོག་ནས་རྒྱ་ཆེའི་ཁ་ལོ་བས་གློག་དམར་སྐབས་གང་བྱུང་མི་འགྲོ་བ་དང་། མྱུར་ཚད་ལས་མི་བརྒལ་བ། རླངས་འཁོར་གཏོང་དུས་ཁ་པར་མི་ལེན་པ། རང་འགུལ་ངང་མི་བགྲོད་ལམ་བུའི་ཐོག་གུས་ཞབས་ཀྱིས་འགྲུལ་བཞུད་པ་སྔོན་གཏོང་བྱེད་པ། རང་རྟོགས་ངང་ཉེན་སྲུང་སྒྲོག་ཐག་ཡག་པོ་རྒྱག་པ་སོགས་ཀྱི་ཁ་ཏ་སློབ་སྟོན་ཡང་བྱས་ཡོད་པ་རེད།
རྔ་ཆེན་ལམ་གྲོང་ཤར་རུ་ཆེན་གྱི་ཁྲིམས་བསྟར་བྱེད་སྒོ་སྤེལ་ཡུལ་དུ། ཁྲིམས་འཛིན་ཉེན་རྟོག་པ་ལུའི་ཀྲང་ཧྭ་ཡིས་རྐང་འཁོར་འགྲོ་སའི་ལམ་ནང་དུ་བཞག་པའི་རླངས་འཁོར་ཞིག་ལ་སྒྲིག་འགལ་བརྡ་གཏོང་ཤོག་བྱང་དང་ཤ་ཚའི་དྲན་སྐུལ་གཱ་ཤོག་སྦྱར་བཞིན་ཡོད།
ཁོང་གིས་ནན་ཏན་ངང་སྒྲིག་འགལ་གྱི་བརྡ་གཏོང་ཤོག་བྱང་དང་ཤ་ཚའི་དྲན་སྐུལ་གཱ་ཤོག་སྤྲོད་པའི་ཁྲིམས་འཛིན་བྱེད་སྟངས་དེ་བརྒྱུད་ཁོང་གིས་ཉེན་རྟོག་པས་སྤྱི་དོན་ལ་དམིགས་པ་དང་དམངས་ཆེད་ཁྲིམས་འཛིན་བྱེད་པའི་དམིགས་ཡུལ་འདུ་ཤེས་བློ་ལ་བརྟན་པོར་ངེས་ནས་རང་ཉིད་ཀྱི་ལས་འཛོལ་ཉུང་དུ་གཏོང་བ་དང་། བདེ་འཇགས་འགན་ལེན་བྱེད་པ། ཤར་གཏོང་ལ་སྐུལ་འདེད་གཏོང་བ་བཅས་ཀྱི་ལས་འགན་སྒྲུབ་སེམས་སྔར་བས་ཆེ་རུ་ཕྱིན་སོང་། ཁྲིམས་འགལ་དོ་བདག་གིས་འགྲིམ་འགྲུལ་ཁྲིམས་འགལ་བྱ་སྤྱོད་སྤེལ་གྱི་ཡོད། འོན་ཀྱང་ཁྲིམས་འཛིན་བྱེད་པོའི་དྲོ་སྐྱིད་དང་བརྩེ་སེམས་མྱོང་ཚོར་ཐུབ་པ་བྱེད་རྒྱུ་དེ་ཡང་གལ་འགངས་ཆེན་པོ་རེད་ཅེས་གསུངས་ཡོད་པ་རེད།

སྒྲིག་འགལ་རླངས་འཁོར་གྱི་བདག་པོ་མང་པོས་ཀྱང་ཁྲིམས་འཛིན་ཉེན་རྟོག་པས་སྐྱེལ་སྤྲོད་བྱས་པའི་སྒྲིག་འགལ་བརྡ་ཤོག་དང་ཤ་ཚའི་དྲན་སྐུལ་གྱི་གཱ་ཤོག་འབྱོར་རྗེས་འགྲིམ་འགྲུལ་ཉེན་རྟོག་པས་ཆད་པ་བཅད་རྗེས་སྐྱོན་བརྗོད་དྲག་པོ་བྱེད་སྲིད་སྙམ་བྱུང་། འོན་ཀྱང་ང་ལ་དྲོ་སྐྱིད་ལྡན་པའི་ཤ་ཚའི་དྲན་སྐུལ་དེ་འདྲ་ཞིག་ཐོབ་བསམ་པ་མ་བྱུང་། གྲོགས་པོ་ལྟ་བུའི་དྲོ་སྐྱིད་ལྡན་པའི་ཁྲིམས་འཛིན་བྱེད་སྟངས་དེས་ངས་རང་ཉིད་ཀྱི་བྱ་སྤྱོད་ལ་འགྱོད་པ་ཆེན་པོ་སྐྱེ་བ་མ་ཟད། འགྲིམ་འགྲུལ་ཉེན་རྟོག་བློ་མཐུན་ཚོའི་དྲོ་སྐྱིད་ལྡན་ལ་བྱམས་བརྩེའི་བྱ་སྤྱོད་དེར་སེམས་འགུལ་ཚད་མེད་ཐེབས་བྱུང་ཞེས་བཤད་ཡོད་པ་རེད།
ལྷ་ས་འགྲིམ་འགྲུལ་ཉེན་རྟོག་པས་འདི་ལོའི་སྤྱི་ཟླ་11པའི་ཟླ་འགོར་ལས་དོན་དེ་སྤེལ་འགོ་ཚུགས་ནས་ཤ་ཚའི་དྲན་སྐུལ་གཱ་ཤོག་ཁྲི་6བཟོས་ཡོད་པ་དང་། མིག་སྔའི་བར་སླེབས་དུས་ལྷ་ས་འགྲིམ་འགྲུལ་ཉེན་རྟོག་པའི་ཕྱི་དོན་རུ་ཆེན་ཁག་གིས་ཤ་ཚའི་དྲན་སྐུལ་གཱ་ཤོག་4000ལྷག་ཙམ་གཤམ་སྤྲོད་ཡོད་པ་རེད།
རྩོམ་སྒྲིག་པ། བདེ་སྒྲོན།