ཉེ་ཆར་ལྷ་ས་གྲོང་ཁྱེར་སྤྱི་བདེ་ཅུས་ཁྲེང་ཀོན་སྤྱི་བདེ་ཡན་ལག་ཅུས་ཉེན་དོན་ལྟ་ཞིབ་རུ་ཆེན་གྱིས་མི་དམངས་ཉེན་རྟོག་པའི་ཁྲིམས་འཛིན་ལ་འགོག་རྐྱེན་བཟོས་པའི་གྱོད་གཞི་གསུམ་ལ་ཁྲིམས་ལྟར་ཞིབ་བཤེར་ཐག་གཅོད་བྱས་ནས། མི་དམངས་ཉེན་རྟོག་པའི་ཁྲིམས་འཛིན་དབང་གྲགས་ལ་སྲུང་སྐྱོང་ནུས་ལྡན་བྱས་ཡོད།
གྱོད་དཔེ་དང་པོ།
མི་དམངས་ཉེན་རྟོག་པར་ཤེལ་དམ་བཞུས་པས་བཀག་ཉར་བྱས་པ།
ཟླ་11ཚེས་7ཉིན་གྱི་ཐོ་རེངས་ཆུ་ཚོད་4དང་སྐར་མ་59ཙམ་ལ་ཁྲེང་ཀོན་སྤྱི་བདེ་ཡན་ལག་ཅུས་ཀརྨ་དགོན་གསར་མངགས་གཏོང་ཁང་ཀརྨ་དགོན་གསར་ཉེན་དོན་ས་ཚིགས་ཀྱི་མི་དམངས་ཉེན་རྟོག་པས་ཁོངས་གཏོགས་ཁུལ་གྱི་ཨར་ཁང་ཞིག་ཏུ་རྩོད་གཞི་ཐག་གཅོད་བྱེད་སྐབས། ཁོང་ཁྲོ་ཆེན་པོ་ལངས་པའི་དོ་བདག་ཚེ་ཆེ་གོ་མོས་མི་དམངས་ཉེན་རྟོག་པའི་ཁྲིམས་འཛིན་ལ་གཞོགས་འདེགས་རྩ་བ་ནས་མ་བྱས་སྟབས། མི་དམངས་ཉེན་རྟོག་པས་ཚེ་ཆེ་གེ་མོའི་ཁྲིམས་འགལ་གྱི་བྱེད་སྤྱོད་ལ་ས་གནས་ས་ཐོག་ནས་ཐ་ཚིག་བསྒྲགས་པ་མ་ཟད། རེ་བ་འདྲ་ཡོད་ན་ཁྲིམས་ལྟར་བརྗོད་དགོས་པའི་བསླབ་བྱ་བྱས་རུང་། ཚེ་ཆེ་གེ་མོས་ཉན་རྒྱུ་ལྟ་ཅི། ཁོ་པ་དེ་བས་ཧམ་པ་ཆེ་རུ་ཕྱིན་ནས། མི་དམངས་ཉེན་རྟོག་པར་དམའ་འབེབས་བཏང་བ་དང་ཆབས་ཅིག ཤེལ་དམ་བསྒྲུགས་ནས་མི་དམངས་ཉེན་རྟོག་པའི་དཔུང་པ་གཡས་པར་བཞུས་ཏེ་མི་དམངས་ཉེན་རྟོག་པས་ཁྲིམས་ལྟར་ལས་འགན་སྒྲུབ་པར་འགོག་རྐྱེན་བཟོས་ཡོད།
གནས་ཚུལ་ཐོན་རྗེས་ཁྲེང་ཀོན་སྤྱི་བདེ་ཡན་ལག་ཅུས་ཉེན་དོན་ལྟ་ཞིབ་རུ་ཆེན་དང་རྔ་ཆེན་མངགས་གཏོང་ཁང་གྱོད་སྒྲུབ་རུ་ཁག་གིས་མཉམ་འབྲེལ་ཐོག་བརྟག་དཔྱད་དཔང་ལེན་བྱས་པ་བརྒྱུད། ཚེ་ཆེ་གེ་མོས་མི་དམངས་ཉེན་རྟོག་པས་ཁྲིམས་ལྟར་ལས་འགན་སྒྲུབ་པར་འགོག་རྐྱེན་བཟོས་པའི་ཁྲིམས་འགལ་གྱི་དོན་དངོས་ཁས་བླངས་པ་རེད། མིག་སྔར། ཁྲེང་ཀོན་སྤྱི་བདེ་ཡན་ལག་ཅུས་ཀྱིས《བདེ་འཇགས་དོ་དམ་ཆད་གཅོད་བཅའ་ཁྲིམས》ཀྱི་འབྲེལ་ཡོད་གཏན་འབེབས་ལ་གཞིགས་ནས་ཚེ་ཆེ་གེ་མོ་སྲིད་འཛིན་བཀག་ཉར་ཉིན་བདུན་བྱས་པ་མ་ཟད་དངུལ་ཆད་སྒོར་ཉིས་བརྒྱ་བཏང་ཡོད།
གྱོད་དཔེ་གཉིས་པ།
མི་དམངས་ཉེན་རྟོག་པར་འཐེན་ཤར་བརྒྱབ་པས་བཀག་ཉར་བྱས་པ།
ཟླ་10ཚེས་30ཉིན་གྱི་ཆུ་ཚོད་22ཙམ་ལ་ཁྲེང་ཀོན་སྤྱི་བདེ་ཡན་ལག་ཅུས་བཅིངས་འགྲོལ་མངགས་གཏོང་ཁང་གི་གྱོད་སྒྲུབ་རུ་ཁག་གི་མི་དམངས་ཉེན་རྟོག་པར་བརྒྱད་གཅིག་སྡེ་ཁུལ་གྱི་བརྒྱ་ཟོག་ཚོང་ཁང་ཞིག་ཏུ་རྩོད་གཞི་ཐོན་པའི་ཉེན་དོན་སྙན་སེང་འབྱོར་བ་རེད། སྙན་སེང་འབྱོར་རྗེས་མངགས་གཏོང་ཁང་གི་ལས་རེས་མི་དམངས་ཉེན་རྟོག་པས་འཕྲལ་མར་ས་གནས་ས་ཐོག་ཏུ་བསྐྱོད་ཅིང་། ར་བཟི་བའི་ཀྲང་ཆེ་གེ་མོ་ཁྲིམས་ལྟར་མངགས་གཏོང་ཁང་དུ་འཁྲིད་པས། ཀྲང་ཆེ་གེ་མོས་འདྲི་རྩད་རྩ་བ་ནས་དང་ལེན་མི་བྱེད་པར་མངགས་གཏོང་ཁང་གི་མི་དམངས་ཉེན་རྟོག་པར་གང་བྱུང་དུ་དམའ་འབེབས་བཏང་བ་དང་འཐེན་ཤར་བརྒྱབ་ཡོད་པ་རེད།
ཁྲེང་ཀོན་སྤྱི་བདེ་ཡན་ལག་ཅུས་ཀྱི་ཉེན་དོན་ལྟ་ཞིབ་རུ་ཆེན་དང་ཀུན་བདེ་གླིང་མངགས་གཏོང་ཁང་གི་གྱོད་སྒྲུབ་རུ་ཁག་གིས་མཉམ་འབྲེལ་ཐོག་བརྟག་དཔྱད་དང་སྒྲུབ་སྐུལ་བྱས་པ་བརྒྱུད། ཟླ་11ཚེས་14ཉིན་ཁྲེང་ཀོན་སྤྱི་བདེ་ཡན་ལག་ཅུས་ཀྱིས《བདེ་འཇགས་དོ་དམ་ཆད་གཅོད་བཅའ་ཁྲིམས》ཀྱི་འབྲེལ་ཡོད་དོན་ཚན་ལ་གཞིགས་ཏེ་ཀྲང་ཆེ་གེ་མོར་ཆད་པ་བཅད་པ་དང་སྦྲགས། སྲིད་འཛིན་བཀག་ཉར་ཉིན་ཉི་ཤུ་བྱ་རྒྱུའི་ཆད་པ་བཅད་པ་རེད།
གྱོད་དཔེ་གསུམ་པ།
མི་དམངས་ཉེན་རྟོག་པར་དམའ་འབེབས་བཏང་བ་དང་འབུད་རྒྱག་བརྒྱབ་པས་བཀག་ཉར་བྱས་པ།
ཟླ་11ཚེས་1ཉིན་ཁྲེང་ཀོན་སྤྱི་བདེ་ཡན་ལག་ཅུས་ལ་ཁྲེང་ཀོན་ཆུས་རྔ་ཆེན་ལམ་གྱི་ཟ་ཁང་ཞིག་ཏུ་མི་མང་པོ་རྒྱག་རེས་རྒྱག་གི་འདུག་ཅེས་པའི་ཉེན་དོན་སྙན་སེང་འབྱོར་བ་རེད། ཉེན་དོན་སྙན་སེང་འབྱོར་རྗེས། ཁྲེང་ཀོན་སྤྱི་བདེ་ཡན་ལག་ཅུས་ཀྱིས་མགྱོགས་མྱུར་ཉེན་རྟོག་པ་ས་གནས་ས་ཐོག་ཏུ་ཐག་གཅོད་བྱེད་པར་བཏང་ཡོད། དེའི་རིང་ནོར་ཆེ་གེ་མོ་དང་། དབང་ཆེ་གེ་མོ། ནོར་ཆེ་གེ་མོ། ཀུན་ཆེ་གེ་མོ། སངས་ཆེ་གེ་མོ། སྲི་ཆེ་གེ་མོ། དངོས་ཆེ་གེ་མོ་སོགས་ཀྱིས་དེར་ཡོད་པའི་མི་དམངས་ཉེན་རྟོག་པའི་ལས་དོན་ལ་གཞོགས་འདེགས་རྩ་བ་ནས་མི་བྱེད་པར། མི་དམངས་ཉེན་རྟོག་པར་དམའ་འབེབས་བཏང་བ་དང་འབུད་རྒྱག་བརྒྱབ་པ་མ་ཟད་མི་དམངས་ཉེན་རྟོག་པའི་ཕྱོགས་སུ་ཅ་དངོས་འཕེན་ཡོད(རྨས་སྐྱོན་ཕོག་མེད་པ)པ་རེད།
གྱོད་གཞི་ཐོན་རྗེས་ཁྲེང་ཀོན་སྤྱི་བདེ་ཡན་ལག་ཅུས་ཉེན་དོན་ལྟ་ཞིབ་རུ་ཆེན་གྱིས་ཁེ་དབང་སྲུང་སྐྱོང་གི་ལམ་སྲོལ་འཕྲལ་མར་ལག་ལེན་བསྟར་ནས། རྔ་ཆེན་མངགས་གཏོང་ཁང་གྱོད་སྒྲུབ་རུ་ཁག་དང་མཉམ་དུ་བརྟག་དཔྱད་དང་སྒྲུབ་སྐུལ་བྱས་ཏེ། ས་གནས་ས་ཐོག་གི་ཐག་གཅོད་བརྒྱུད་རིམ་ཤེས་རྟོགས་དང་གྱོད་གཞིའི་སྐོར་ལ་གྲོས་མོལ་སྒྲིག་འཛུགས་དང་དོན་དངོས་རྩད་གསལ་པོ་བཅད་ནས། བཅའ་ཁྲིམས་དང་ཁྲིམས་སྲོལ་གང་སྤྱོད་དགོས་མིན་ཐད་ལ་སྟངས་འཛིན་ཡང་དག་བྱས་ཡོད།
ཟླ་11ཚེས་13ཉིན་ཁྲེང་ཀོན་སྤྱི་བདེ་ཡན་ལག་ཅུས་ཀྱིས《བདེ་འཇགས་དོ་དམ་ཆད་གཅོད་བཅའ་ཁྲིམས》ཀྱི་འབྲེལ་ཡོད་གཏན་འབེབས་ལ་གཞིགས་ནས་ཁྲིམས་ལྟར་ནོར་ཆེ་གེ་མོ་དང་། དབང་ཆེ་གེ་མོ། ནོར་ཆེ་གེ་མོ་བཅས་སྲིད་འཛིན་བཀག་ཉར་ཉིན་བདུན་བྱས་པ་མ་ཟད་དངུལ་ཆད་སྒོར་ཉིས་བརྒྱ་བཏང་བ་དང་། དཀོན་ཆེ་གེ་མོ་དང་། སངས་ཆེ་གེ་མོ། སྲི་ཆེ་གེ་མོ། དངོས་ཆེ་གེ་མོ་བཅས་ལ་དངུལ་ཆད་སྒོར་ཉིས་བརྒྱ་བཏང་ཡོད་པ་རེད།
རྩོམ་སྒྲིག་པ། བདེ་སྒྲོན།
