རྩ་ཁྲིམས་ཀྱི་སྙིང་སྟོབས་དར་སྤེལ་ཤུགས་ཆེན་བཏང་སྟེ་ཁྲིམས་ལྟར་བོད་སྐྱོང་ལ་ཕྱོགས་ཡོངས་ནས་སྐུལ་འདེད་གཏོང་དགོས།
སྤེལ་དུས 2021-12-06
ཡོང་ཁུངས། བོད་ལྗོངས་ཉིན་རེའི་ཚགས་པར།
རྩོམ་པ་པོ།
རྩ་ཁྲིམས་ནི་རྒྱལ་ཁབ་ཀྱི་རྩ་བའི་བཅའ་ཁྲིམས་དང་རྒྱལ་སྐྱོང་བདེ་འཁོད་ཀྱི་སྤྱིའི་སྒྲིག་ཡིག་ཡིན་པས། བཅའ་ཁྲིམས་ཀྱི་ནུས་པ་ཆེ་ཤོས་དང་བཅའ་ཁྲིམས་ཀྱི་དབང་གྲགས་ཆེ་ཤོས་ལྡན་ཡོད།
ལྗོངས་ཡོངས་ཀྱི་གོང་འོག་ཚང་མས་ཏང་གི་སྐབས་བཅུ་དགུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དྲུག་པའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་དང་བོད་རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པའི་དགོངས་དོན་བརྒྱུད་བསྒྲགས་དང་སློབ་སྦྱོང་ནན་ཏན་བྱེད་པའི་མཚམས་སུ། ང་ཚོས་རྒྱལ་ཁབ་ཀྱི་རྩ་ཁྲིམས་ཉིན་མོ་ཐེངས་བརྒྱད་པ་དང“རྩ་ཁྲིམས་དྲིལ་བསྒྲགས་གཟའ་འཁོར”ཐེངས་བཞི་པ་བསུས་ཡོད། རྩ་ཁྲིམས་ལ་གོང་བཀུར་དང་། རྩ་ཁྲིམས་སློབ་སྦྱོང་། རྩ་ཁྲིམས་བརྩི་སྲུང་། རྩ་ཁྲིམས་སྲུང་སྐྱོང་། རྩ་ཁྲིམས་སྤྱོད་པ་བཅས་ཀྱི་དྲིལ་བསྒྲགས་སློབ་གསོའི་བྱེད་སྒོ་གཏིང་ཟབ་སྤེལ་བ་དེས་རྩ་ཁྲིམས་ཀྱི་སྙིང་སྟོབས་དར་སྤེལ་དང་རྩ་ཁྲིམས་ཀྱི་དབང་གྲགས་འཛུགས་པ་དང་། ལྗོངས་ཡོངས་སུ་ཁྲིམས་བཀུར་དང་། ཁྲིམས་སྦྱོང་། ཁྲིམས་སྲུང་། ཁྲིམས་སྤྱོད་བཅས་ཀྱི་རྣམ་པ་བཟང་པོ་ཞིག་ཆགས་པ། དམངས་ཡོངས་སྤྱི་ཚོགས་རིང་ལུགས་ཁྲིམས་སྐྱོང་གི་བློ་དཀར་སེམས་དཀར་གྱི་བརྩི་མཐོང་བྱེད་མཁན་དང་། རང་རྟོགས་ངང་བརྩི་སྲུང་ཞུ་མཁན། བློ་བརྟན་འགྱུར་མེད་ངང་སྲུང་སྐྱོང་བྱེད་མཁན་བཅས་སུ་འགྱུར་བར་སྐུལ་འདེད་གཏོང་བ་དང་། བོད་ཀྱི་ཁྲིམས་སྐྱོང་འཛུགས་སྐྱོང་གི་ཆུ་ཚད་ཟམ་མི་ཆད་པར་མཐོ་རུ་བཏང་སྟེ་དུས་རབས་གསར་པའི་བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཆེད་ཁྲིམས་སྐྱོང་གི་འགན་ལེན་མཁོ་འདོན་བྱེད་པར་དོན་སྙིང་གལ་ཆེན་དང་ཡུན་རིང་ལྡན་ཡོད།
རྩ་ཁྲིམས་ཀྱིས་ཏང་དང་མི་དམངས་ཀྱི་གཅིག་གྱུར་གྱི་འདུན་པ་དང་ཐུན་མོང་གི་རེ་འདུན་གཅིག་སྡུད་མཚོན་པ་དང་། དེ་ནི་རྒྱལ་ཁབ་ཀྱི་འདུན་པ་མཚོན་པའི་རྣམ་པ་མཐོ་ཤོས་ཤིག་རེད། རྩ་ཁྲིམས་ཀྱི་སྙིང་སྟོབས་དར་སྤེལ་ཤུགས་ཆེན་བཏང་སྟེ་ཁྲིམས་ལྟར་བོད་སྐྱོང་ལ་ཕྱོགས་ཡོངས་ནས་སྐུལ་འདེད་གཏོང་བར་ངེས་པར་དུ་རྩ་ཁྲིམས་ཀྱི་དབང་གྲགས་ལ་མཐའ་གཅིག་ཏུ་སྲུང་སྐྱོང་བྱེད་དགོས། རྩ་ཁྲིམས་ཀྱི་དབང་གྲགས་ལ་སྲུང་སྐྱོང་བྱེད་པ་ནི་ཏང་དང་མི་དམངས་ཀྱི་ཐུན་མོང་གི་འདུན་པའི་དབང་གྲགས་སྲུང་སྐྱོང་བྱེད་པ་ཞིག་ཡིན་ཞིང་། རྩ་ཁྲིམས་ཀྱི་ལ་རྒྱ་སྲུང་སྐྱོང་བྱེད་པ་ནི་ཏང་དང་མི་དམངས་ཀྱི་ཐུན་མོང་གི་འདུན་པའི་ལ་རྒྱ་སྲུང་སྐྱོང་བྱེད་པ་ཞིག་རེད། རྩ་ཁྲིམས་ཀྱི་དབང་གྲགས་ལ་མཐའ་གཅིག་ཏུ་སྲུང་སྐྱོང་བྱས་ཏེ་རྩ་ཁྲིམས་ཀྱིས་གཏན་འཁེལ་བྱས་པའི་རྒྱལ་ཁབ་ཀྱི་མཛུབ་ཁྲིད་དགོངས་པ་རྒྱལ་ཁབ་ཀྱི་ཆབ་སྲིད་དང་སྤྱི་ཚོགས་འཚོ་བར་དོན་འཁྱོལ་བྱས་ནས། བློ་བརྟན་འགྱུར་མེད་ངང་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཁྲིམས་སྐྱོང་ལམ་བུར་སྐྱོད་དགོས། ཏང་གིས་ཕྱོགས་ཡོངས་ནས་ཁྲིམས་ལྟར་རྒྱལ་སྐྱོང་ལ་འགོ་ཁྲིད་བྱེད་པར་ཤུགས་སྣོན་བརྒྱབ་སྟེ། རྩ་ཁྲིམས་ལྟར་རྒྱལ་སྐྱོང་དང་རྩ་ཁྲིམས་ལྟར་སྲིད་སྐྱོང་མཐའ་འཁྱོངས་དང་། ཁྲིམས་ལྟར་རྒྱལ་སྐྱོང་དང་། ཁྲིམས་ལྟར་སྲིད་སྐྱོང་། ཁྲིམས་ལྟར་སྲིད་འཛིན་བཅས་ལ་མཉམ་དུ་སྐུལ་འདེད་མཐའ་འཁྱོངས། ཁྲིམས་སྐྱོང་རྒྱལ་ཁབ་དང་། ཁྲིམས་སྐྱོང་སྲིད་གཞུང་། ཁྲིམས་སྐྱོང་སྤྱི་ཚོགས་བཅས་གཞི་གཅིག་ཅན་འཛུགས་སྐྲུན་བཅས་བྱས་ནས། ཏང་གི་འགོ་ཁྲིད་མཐའ་འཁྱོངས་དང་། མི་དམངས་རང་ཁྱིམ་རང་བདག ཁྲིམས་ལྟར་རྒྱལ་སྐྱོང་བཅས་གཅིག་གྱུར་དམ་ཟབ་དེ་བས་ལེགས་པའི་ངང་མཚོན་པར་བྱེད་དགོས། འགོ་ཁྲིད་ལས་བྱེད་པའི“འགག་རྩ་ཉུང་ཤས”ལ་དམ་འཛིན་དང་། ལྗོངས་ཡོངས་ཀྱི་རིམ་ཁག་ཏང་ཡོན་ལས་བྱེད་པས་ཐོག་མཐའ་བར་གསུམ་དུ་རྩ་ཁྲིམས་དང་བཅའ་ཁྲིམས་ལ་གུས་སྐྲག་གི་བསམ་པ་མཐའ་འཁྱོངས་ཀྱིས་རྩ་ཁྲིམས་ཀྱི་དབང་གྲགས་ལ་སྲུང་སྐྱོང་བྱེད་པར་སྣེ་ཁྲིད་དང་བཅའ་ཁྲིམས་དང་ཁྲིམས་སྲོལ་ལྟར་ལས་དོན་སྒྲུབ་པར་སྣེ་ཁྲིད་བྱས་ནས། ཁྲིམས་སྐྱོང་བསམ་བློ་དང་ཁྲིམས་སྐྱོང་བྱ་ཐབས་སྤྱད་དེ“དོན་ཆེན་བཞིར”སྐུལ་འདེད་གཏོང་བ་དང“འགན་ལེན་བཞིའི”ནུས་པ་མངོན་འགྱུར་ཡོང་བར་བྱེད་དགོས།
རྩ་ཁྲིམས་ཀྱི་ཚེ་སྲོག་ནི་ལག་བསྟར་ལ་རག་ལུས་པ་དང་རྩ་ཁྲིམས་ཀྱི་དབང་གྲགས་ཀྱང་ལག་བསྟར་ལ་རག་ལུས་ཡོད། རྩ་ཁྲིམས་ཀྱི་སྙིང་སྟོབས་དར་སྤེལ་ཤུགས་ཆེན་བཏང་ནས་ཁྲིམས་ལྟར་བོད་སྐྱོང་ལ་ཕྱོགས་ཡོངས་ནས་སྐུལ་འདེད་གཏོང་བར། ངེས་པར་དུ་ཕྱོགས་ཡོངས་ནས་རྩ་ཁྲིམས་ལག་བསྟར་བྱེད་དགོས། ཁྲིམས་ལྟར་རྒྱལ་སྐྱོང་མཐའ་འཁྱོངས་བྱེད་པར་དང་ཐོག་རྩ་ཁྲིམས་ལྟར་རྒྱལ་སྐྱོང་མཐའ་འཁྱོངས་བྱེད་དགོས་པ་དང་། ཁྲིམས་ལྟར་སྲིད་སྐྱོང་མཐའ་འཁྱོངས་བྱེད་པར་དང་ཐོག་རྩ་ཁྲིམས་ལྟར་སྲིད་སྐྱོང་མཐའ་འཁྱོངས་བྱེད་དགོས། ཞི་ཅིན་ཕིང་གི་ཁྲིམས་སྐྱོང་དགོངས་པ་མཛུབ་ཁྲིད་དུ་མཐའ་འཁྱོངས་བྱས་ནས་རྩ་ཁྲིམས་དང་བཅའ་ཁྲིམས་ཀྱི་ལག་བསྟར་ཕྱོགས་ཡོངས་ནས་ཁྲིམས་ལྟར་བོད་སྐྱོང་གི་གནས་བབ་ཨང་དང་པོར་འཇོག་རྒྱུ་འགན་ལེན་དང་། ཁྲིམས་ལྟར་བཅོས་སྐྱོང་དང་། འབྱུང་རྩ་ནས་བཅོས་སྐྱོང་། རང་འགུལ་ངང་བཅོས་སྐྱོང་། བརྒྱུད་རིམ་ལྡན་པའི་ངང་བཅོས་སྐྱོང་། ཕྱོགས་བསྡུས་བཅོས་སྐྱོང་བཅས་ཟུང་འབྲེལ་མཐའ་འཁྱོངས་བྱས་ནས་རྒྱལ་ཁབ་ཀྱི་བཅོས་སྐྱོང་ནུས་པ་དང་བཅོས་སྐྱོང་མ་ལག་དེང་རབས་ཅན་ལ་སྐུལ་འདེད་གཏོང་དགོས། རྩ་ཁྲིམས་དང་བཅའ་ཁྲིམས་གོང་དུ་མཐའ་འཁྱོངས་བཀུར་ནས་མི་རིགས་ཁག་གི་མི་དམངས་ཀྱི་རང་ཁྱིམ་རང་བདག་གི་དབང་ཆར་ཁྲིམས་ལྟར་འགན་ལེན་དང་། སྲིད་འཛིན་སྒྲིག་སྲོལ་སྒྱུར་བཅོས་ལ་ཤུགས་སྣོན། ཁྲིམས་འཛིན་སྒྲིག་སྲོལ་སྒྱུར་བཅོས་ལ་ཤུགས་སྣོན་རྒྱག་པ་བཅས་བྱས་ནས། མི་དམངས་མང་ཚོགས་ཀྱིས་བཅའ་ཁྲིམས་ཀྱི་ལམ་ལུགས་རེ་རེ་དང་། ཁྲིམས་སྐྱོང་གཏན་འབེབས་རེ་རེ། ཁྲིམས་འཛིན་གྱོད་གཞི་རེ་རེ་བཅས་ནས་དྲང་གཞག་དྲང་བདེན་ཚོར་ཐུབ་པར་བྱེད་དགོས།
རྩ་ཁྲིམས་སློབ་སྦྱོང་དང་དྲིལ་བསྒྲགས་སློབ་གསོའི་བྱེད་སྒོ་སྤེལ་ནས། རྩ་ཁྲིམས་ཀྱི་སྙིང་སྟོབས་མི་སེམས་ལ་གཏིང་ཟབ་ཟུག་པར་བྱེད་པར་ལྗོངས་ཡོངས་ཀྱི་མི་རིགས་ཁག་གི་མི་དམངས་ཀྱི་བཅའ་ཁྲིམས་ཀྱི་འདུ་ཤེས་ཟབ་ཏུ་གཏོང་བ་དང་། ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་བརྟན་དུ་གཏོང་བ། “མོས་སེམས་ལྔ”ཟབ་ཏུ་གཏོང་བ་བཅས་ལ་དོན་སྙིང་གལ་ཆེན་ལྡན་ཡོད། རྩ་ཁྲིམས་ཀྱི་སྙིང་སྟོབས་དར་སྤེལ་ཤུགས་ཆེན་བཏང་སྟེ་ཁྲིམས་ལྟར་བོད་སྐྱོང་ལ་ཕྱོགས་ཡོངས་ནས་སྐུལ་འདེད་གཏོང་བར། ངེས་པར་དུ་བཅའ་ཁྲིམས་ཁྱབ་གདལ་གྱི་དྲིལ་བསྒྲགས་ལས་དོན་ཡག་པོ་སྒྲུབ་དགོས། “བཟང་པོ་ཁོ་ནས་སྲིད་མི་འཁྱོངས། ཁྲིམས་རྒྱ་གཅིག་པུས་གོ་མི་འཕེར” དགོས་མཁོའི་སྟོན་ཕྱོགས་མཐའ་འཁྱོངས་ཀྱིས“ཐིགས་ཆུ་གནད་སྨིན་གཏོང་བ”ལག་བསྟར་དང་། རྩ་ཁྲིམས་ཁེ་ལས་དང་། གྲོང་གསེབ། ལས་ཁུངས། སློབ་གྲྭ སྡེ་ཁུལ། ཆོས་ལུགས་བྱེད་སྒོ་སྤེལ་ཡུལ། དྲ་སྦྲེལ་སོགས་སུ་ཁྱབ་གདལ་གཏོང་བའི་བརྗོད་དོན་གཙོ་བོའི་དྲིལ་བསྒྲགས་བྱེད་སྒོ་སྤེལ་ཏེ། རྩ་ཁྲིམས་ཁྱིམ་ཚང་ཀུན་གྱིས་ཤེས་པ་དང་མི་སེམས་ལ་གཏིང་ཟབ་ཟུག་པར་བྱེད་དགོས། བཅའ་ཁྲིམས་ཁྱབ་གདལ་གྱི་དྲིལ་བསྒྲགས་བྱེད་པར། “མང་ཚོགས་དང་འབྲེལ་འདྲིས”བྱས་ཏེ་ཁྲིམས་སྐྱོང་དྲིལ་བསྒྲགས་སློབ་གསོའི་རྟེན་གཞི་དང་། ཁྲིམས་སྐྱོང་ཐང་ཆེན། ཁྲིམས་སྐྱོང་སྤྱི་གླིང་། ཁྲིམས་སྐྱོང་ཁྱམས་རིང་སོགས་བཅའ་ཁྲིམས་ཁྱབ་གདལ་གྱི་གཡུལ་ས་གང་ལེགས་སྤྱད་དེ་མང་ཚོགས་ཀྱིས་གོ་བདེ་བའི་སྐད་ཆ་དང་ལྟ་འདོད་ལ་ཉན་སྤྲོ་བའི་རྣམ་པར་བརྟེན་ནས་རྩ་ཁྲིམས་ཀྱི་དགོངས་དོན་དྲིལ་བསྒྲགས་དང་། མང་ཚོགས་དེ་བས་མང་བས་སློབ་སྦྱོང་བྱེད་འདོད་པ་དང་། སློབ་སྦྱོང་ཧུར་ཐག རང་འགུལ་ངང་སློབ་སྦྱོང་བཅས་ལ་སྣེ་ཁྲིད་བྱས་ནས་ལས་དོན་སྒྲུབ་དུས་ཁྲིམས་གཞིར་འཛིན་པ་དང་། གནས་ཚུལ་འཕྲད་དུས་ཁྲིམས་ཁུངས་འཚོལ་བ། དོན་ཐག་གཅོད་དུས་ཁྲིམས་ལ་བསྟུན་པ། འགལ་ཟླ་ཐུག་དུས་ཁྲིམས་བཞིན་སེལ་བ་བཅས་ཀྱི་ཁོར་ཡུག་བཟང་པོ་ཞིག་ཆགས་པར་བྱས་ནས། ཁྲིམས་སྐྱོང་སྤྱི་ཚོགས་ཡོངས་ཀྱི་ཐུན་མོང་གི་དད་སེམས་ཤིག་ཏུ་འགྱུར་བར་བྱེད་དགོས།
རྩོམ་སྒྲིག་པ། བདེ་སྒྲོན།
