“ལྷ་སའི་ནམ་མཁའ་སྔོ་ཞིང་དྭངས་ལ།
ལྷ་སའི་མི་དམངས་ནི་བྱམས་དང་སྙིང་རྗེ་ལྡན།
ལྷ་སའི་མི་དམངས་ཉེན་རྟོག་པ་རྣམས་ཡང་དངོས་གནས་ཡག་པོ་རེད།
གལ་ཏེ་མི་དམངས་ཉེན་རྟོག་པའི་ཐུགས་ཁུར་དང་རོགས་རམ་མེད་ཚེ།
ང་རང་ཚེ་གང་བོར་ཁྱིམ་མི་དང་ལྷན་འཛོམས་བྱུང་མི་སྲིད།
ངས་རྗེས་ཕྱོགས་ཀྱི་འཚོ་བའི་ནང་ཨ་མར་བསྙེན་བཀུར་ཡག་པོ་ཞུས་ནས།
འཚོ་བ་ཡག་པོ་སྐྱེལ་ངེས།
ང་རང་ལྷ་སར་ཡོང་བའི་སྐལ་བ་ལྡན་ཚེ།
ངས་ང་ལ་རོགས་རམ་བྱས་མྱོང་བའི་མི་དམངས་ཉེན་རྟོག་པར་ཐུགས་རྗེ་ཆེ་ཞུ་རྒྱུ་ཡིན།”ཞེས་བཤད།
ཉེ་ཆར། ལྷ་ས་གྲོང་ཁྱེར་བཅིངས་འགྲོལ་མངགས་གཏོང་ཁང་ལ་དམིགས་བསལ་གྱི་བཀའ་དྲིན་ཞུ་བའི་ཁ་པར་འདི་འདྲ་ཞིག་འབྱོར་བ་ཡང་སྙིང་གང་འདྲ་ཞིག་ཡིན་ནམ། གཤམ་གྱི་མི་སེམས་སྤྲོ་བའི་གཏམ་རྒྱུད་འདི་ལ་གཟིགས་རོགས།
གཏམ་རྒྱུད་ཀྱི་ཞིབ་ཕྲའི་གནས་ཚུལ།
མཚམས་སྦྱོར་བྱས་པར་གཞིགས་ན། ཟླ11པའི་ཚེས17ཉིན་བཅིངས་འགྲོལ་མངགས་གཏོང་ཁང་གི་མི་དམངས་ཉེན་རྟོག་པས་སྐོར་གཡེང་བྱེད་སྐབས་བརྒྱད་གཅིག་ལམ་གྱི་ཁང་རྙིང་ཞིག་ཏུ་རྒད་པོ་ཞིག་བསྡད་ཡོད་པ་དང་། ཁང་པ་གོག་ཧྲུལ་དུ་གྱུར་ནས་ཤེལ་སྒོ་མེད་པའི་སྒེའུ་ཁུང་ནང་གྲང་རླུང་ལྡང་བ་དང་རྒད་པོ་དེའི་གྱོན་ཆས་རྙིང་ཧྲུལ་དུ་གྱུར་ཏེ་འཁྱགས་ནས་འདར་སིག་སིག་བྱེད་ཀྱིན་ཡོད་པ་མཐོང་། འདྲི་རྩད་བྱས་པ་བརྒྱུད་མི་དམངས་ཉེན་རྟོག་པས་རྒད་པོ་དེ་ནི“གད་སྙིགས་སྒྲུག་མཁན”ཞིག་ཡིན་པ་དང་། དུས་རྒྱུན་གད་སྙིགས་སྒྲུག་ནས་འཚོ་བ་སྐྱེལ་གྱིན་ཡོད་པས་གཏན་འཇགས་ཀྱི་སྡོད་གནས་མེད་པས། མི་དམངས་ཉེན་རྟོག་པས་རྒད་པོ་དེ་རླངས་འཁོར་ནང་འཁྲིད་པ་རེད།
མི་དམངས་ཉེན་རྟོག་པས་སྐོར་གཡེང་བྱེད་སྐབས་ཁང་རྙིང་དུ་མཐོང་བའི་རྒད་པོ།
འབྲེལ་འདྲིས་ཀྱི་སྐབས་སུ་མི་དམངས་ཉེན་རྟོག་པས་རྒྱུས་ལོན་བྱུང་བ་ལྟར་ན། རྒད་པོ་དེ2003ལོར་ལྷ་སར་ཡོང་བ་དང་། དེའི་རྗེས་སུ་ནང་མི་དང་འབྲེལ་བ་ཆད་ཅིང་ཐོབ་ཐང་ལག་ཁྱེར་སྔ་ས་ནས་བོར་བརླག་ཏུ་སོང་། ད་ཆ་ལོ་ན་རྒས་ཤིང་གཟུགས་གཞི་ཞན་པས་ལུས་པོའི་ངལ་རྩོལ་བྱེད་ཐབས་བྲལ་ནས་ཉིན་ལྟར་གང་སར་འཁྱམས་བཞིན་ཡོད་ལ། ཉེ་དུས་ཁང་རྙིང་བེད་མེད་དུ་བསྐྱུར་པ་དེ་མཐོང་སྐབས་ཁོང་གཅིག་པུ་དེ་གར་སྡོད་ཀྱིན་ཡོད། ལོ་ཟླ་ཡུན་རིང་སོང་བའི་རྐྱེན་གྱིས་བགྲེས་སོང་གིས་རང་ཉིད་ཀྱི་མིང་ལ་ཝང་ལིན(འགྱུར་མིང)ཟེར་བ་མ་གཏོགས་དྲན་གྱིན་མེད་པ་དང་སི་ཁྲོན་ཞིང་ཆེན་ལུའུ་ཀྲོའུ་གྲོང་ཁྱེར་ཧོ་ཅང་རྫོང་ནས་ཡིན་པ་རེད།
མི་དམངས་ཉེན་རྟོག་པས་རྒད་པོ་དེ་ལ་སྡོད་གནས་བཀོད་སྒྲིག་བྱས་པ་དང་འབྲེལ་ཁོང་གི་གནས་ཚུལ་རྒྱུས་ལོན་ཞིབ་ཕྲ་བྱས།
གནས་ཚུལ་འདི་ཤེས་རྗེས། མི་དམངས་ཉེན་རྟོག་པས་མཐའ་འཁོར་དུ་བཅར་འདྲི་དང་རྒྱུས་ལོན་ཐེངས་མང་བྱས་ཀྱང་སྔར་བཞིན་རྒད་པོ་དེའི་ཐོབ་ཐང་གི་ཞིབ་ཕྲའི་ཆ་འཕྲིན་རྩད་གཅོད་ཡང་ཡང་བྱས་མཐར། རྒད་པོ་འདིའི་སྐྱེ་ཡུལ་གྱི་སྤྱི་བདེ་ལས་ཁུངས་ནི་སི་ཁྲོན་ཞིང་ཆེན་ལུའུ་ཀྲོའུ་གྲོང་ཁྱེར་ཧོ་ཅང་རྫོང་སྤྱི་བདེ་ཅུས་ཡིན་པ་དང་། དེ་གའི་སྤྱི་བདེ་ལས་ཁུངས་ལ་རྒད་པོ་འདིའི་ཐོབ་ཐང་ཆ་འཕྲིན་འཚོལ་རོགས་བྱ་རྒྱུའི་རེ་བ་ཞུས་པ་རེད། འདྲི་རྩད་བྱས་འབྲས་སྒུག་པའི་དུས་ཡུན་རིང་མི་དམངས་ཉེན་རྟོག་པས་རྒད་པོ་དེ་མངགས་གཏོང་ཁང་དུ་བསུས་ནས་བཀོད་སྒྲིག་ཡག་པོ་བྱས་པ་དང་། མི་དམངས་ཉེན་རྟོག་པ་ཚོས་ལྟ་རྟོག་ཞིབ་ཚགས་བྱས་པའི་འོག་རྒད་པོའི་གདོང་ལ་འཛུམ་གྱིས་ཁེངས་ཞིང་གཟུགས་པོའི་གནས་ཚུལ་ཡང་རིམ་བཞིན་ཇེ་ལེགས་སུ་ཕྱིན་ཡོད།
མི་དམངས་ཉེན་རྟོག་པས་རྒད་པོ་དེ་ལ་གྱོན་ཆས་ཉོས་པ་དང་འབྲེལ་ཁོང་དང་ལྷན་དུ་ཟ་ཁང་དུ་ཟ་མ་བཟའ་བཞིན་པ།
ཟླ11པའི་ཚེས24ཉིན་སི་ཁྲོན་ཞིང་ཆེན་ཧོ་ཅང་རྫོང་སྤྱི་བདེ་ཅུས་ཀྱི་བདེ་འཇགས་རུ་ཆེན་གྱིས་བཅིངས་འགྲོལ་མངགས་གཏོང་ཁང་གི་མི་དམངས་ཉེན་རྟོག་པར་རྒན་རྒོན་གྱི་ཆ་འཕྲིན་སྤྲད་པ་སྟེ། ཁོང་ཁྱིམ་དང་ཁ་བྲལ་ནས་ལོ་ངོ18ལྷག་ཙམ་སོང་ཞིང་། གར་སོང་ཆ་མེད་དུ་གྱུར་ནས་ལོ་མང་སོང་བར་བརྟེན་ས་གནས་དེ་གའི་མངགས་གཏོང་ཁང་གིས་ཁོང་གི་ཐེམ་ཐོ་བསྡམས་པ་དང་། ཧོ་ཅང་སྤྱི་བདེ་ཅུས་ཀྱིས་ཕྱོགས་མང་པོ་ནས་བཅར་འདྲི་བྱས་པ་བརྒྱུད་རྒད་པོ་དེའི་ཨ་མ་རྒན་མོ་མིག་སྔར་ད་དུང་བདེ་ཐང་ཡིན་པ་ཤེས་རྟོགས་བྱུང་བ་རེད། གཏམ་བཟང་དེ་ཐོས་རྗེས་མི་དམངས་ཉེན་རྟོག་པས་འཕྲལ་དུ་རྒད་པོ་དེ་ཕ་ཡུལ་དུ་ལོག་རྒྱུའི་ལས་དོན་བཀོད་སྒྲིག་བྱས་པ་དང་འབྲེལ་ཧོ་ཅང་རྫོང་སྤྱི་བདེ་ཅུས་བདེ་འཇགས་རུ་ཆེན་ལ་ཐེམ་ཐོ་སླར་གསོ་བྱ་རྒྱུར་བརྩོན་ལེན་བྱས་པ་རེད།
བཅིངས་འགྲོལ་མངགས་གཏོང་ཁང་གིས་ཞལ་འདེབས་འབུལ་བའི་བྱེད་སྒོ་སྤེལ་ཏེ་རྒད་པོ་འདི་ཕ་ཡུལ་དུ་ལོག་པའི་ལམ་དངུལ་གྲབས་གསོག་བྱས་པ།
མི་དམངས་ཉེན་རྟོག་པས་རྒད་པོ་འདི་ལ་གྱོན་ཆས་དྲོན་པོ་གཙང་མ་ཞིག་ཉོས་པ་དང་། ཁོང་ཁྲིད་དེ་སྐྲ་བཞར་ནས་པར་བླངས་པ་མ་ཟད། འཚོལ་བསྡུ་བྱས་པའི་པར་དང་འབྲེལ་ཡོད་དཔང་ཡིག་དུས་ཐོག་ཏུ་ཧོ་ཅང་རྫོང་སྤྱི་བདེ་ཅུས་ལ་སྤྲད། ས་གནས་གཉིས་ཀྱི་ཉེན་རྟོག་ཕྱོགས་ཀྱིས་མཉམ་དུ་འབད་བརྩོན་བྱས་པ་བརྒྱུད་རྒད་པོ་འདིའི་ཐེམ་ཐོ་ཟླ11པའི་ཚེས28ཉིན་སླར་གསོ་བྱུང་། རྒད་པོ་འདིས་ནམ་རྒྱུན་གད་སྙིགས་སྒྲུག་པར་བརྟེན་ནས་འཚོ་བ་སྐྱེལ་གྱིན་ཡོད་པས་རྒྱུན་གཏན་གྱི་ལྟོ་གོས་ཀྱང་རྒྱུན་འཁྱོངས་བྱེད་དཀའ་བས་ཕ་ཡུལ་དུ་ལོག་པའི་འགྲོ་གྲོན་དེ་བས་འཁུར་ཁག་པོ་འདུག རྒད་པོའི་དངོས་ཡོད་དཀའ་ངལ་ཤེས་རྗེས་བཅིངས་འགྲོལ་མངགས་གཏོང་ཁང་གི་མི་དམངས་ཉེན་རྟོག་པ་ཡོངས་ཀྱིས་ཁོང་ལ་ཞལ་འདེབས་ཕུལ་ནས་ཕ་ཡུལ་དུ་ལོག་པའི་འགྲོ་གྲོན་གྲབས་གསོག་བྱས་པ་མ་ཟད། ཁོངས་གཏོགས་ཁུལ་གྱི་སྤོ་འགུལ་འཕྲིན་གཏོང་སྡེ་ཚན་དང་འབྲེལ་བ་བྱས་ནས་ཁོང་ལ་ཁ་པར་གཱ་བཟོས་པ་དང་། ལག་ཁྱེར་ཁ་པར་ཉོས་པ། ཉིང་སྐྱུར་བཤེར་འཇལ་སོགས་ཕ་ཡུལ་དུ་ལོག་པར་མཁོ་བའི་འགྲོ་ལུགས་ཆ་ཚང་བསྒྲུབས་པ་རེད།
རྒད་པོ་དེ་ཐེམ་ཐོ་མངགས་གཏོང་བྱ་ཡུལ་དུ་བསྐྱོད་དེ་ཐོབ་ཐང་ལག་ཁྱེར་བཟོ་བཞིན་པ།
ཟླ12པའི་ཚེས3ཉིན་གྱི་ཆུ་ཚོད11ཙམ་ལ་རྒད་པོ་དེ་མི་དམངས་ཉེན་རྟོག་པའི་འགྲོ་རོགས་འོག གྱོན་གོས་གསར་པ་གྱོན་ནས་ཕ་ཡུལ་དུ་ལོག་པའི་དུས་གཏན་གནམ་གྲུར་བསྡད་ཅིང་། ཁ་བྲལ་སྐབས་རྒད་པོ་མིག་ཆུ་དབང་མེད་དུ་ཤོར་བཞིན་མི་དམངས་ཉེན་རྟོག་པའི་ལག་པར་དམ་པོར་འཇུས་ཏེ་བརྩེ་བ་ཟབ་མོའི་སྒོ་ནས“གུང་ཁྲན་ཏང་ལ་ཐུགས་རྗེ་ཆེ་ཞུ་རྒྱུ་དང་མི་དམངས་ཉེན་རྟོག་པར་ཐུགས་རྗེ་ཆེ་ཞུ་རྒྱུ་ཡིན། མ་གཞིར་རང་ཉིད་ཀྱི་མི་ཚེ་འདི་ལྟར་ཚར་སོང་སྙམ་པ་ཡིན་ཀྱང་། བློ་ཡུལ་འདས་པ་ཞིག་ལ་བློ་མཐུན་ཉེན་རྟོག་པས་ང་ལ་གྱོན་ཆས་གསར་པ་ཉོས་པ་མ་ཟད། ང་ལ་ཐུགས་ཁུར་དང་ལྟ་རྟོག་བྱས་ཏེ་རང་ཉིད་ཁྱིམ་དུ་ལོག་ནས་ཨ་མར་བསྙེན་བཀུར་ཞུ་བའི་ཕུགས་འདུན་ཡང་མངོན་འགྱུར་བྱུང་བས། ང་རང་ཕྱིར་ཕ་ཡུལ་ལ་ལོག་སྟེ་ངེས་པར་དུ་འཚོ་བ་ཡག་པོ་བསྐྱལ་ནས་ཨ་མར་བསྙེན་བཀུར་ཞུ་རྒྱུ་ཡིན། དངོས་གནས་ཁྱེད་ཚོར་ཐུགས་རྗེ་ཆེ་ཞུས་པ་ཡིན།”ཞེས་བཤད།
རྒད་པོ་དེ་རང་ཁྱིམ་དུ་ལོག་ནས་ལོ18རིང་ཁ་བྲལ་བའི་ཨ་མ་རྒན་མོ་དང་ངོ་འཕྲད་པ།
ལོ་ངོ18ལྷག་ཙམ་སོང་རྗེས། རྒད་པོ་འདི་གཞི་ནས་ཕ་ཡུལ་དུ་ལོག་པ་དང་། བཅིངས་འགྲོལ་མངགས་གཏོང་ཁང་དང་ཧོ་ཅང་རྫོང་སྤྱི་བདེ་ཅུས་ཀྱི་མི་དམངས་ཉེན་རྟོག་པའི་མཉམ་དུ་འབད་བརྩོན་བྱས་པ་ལ་བརྟེན་ནས། རྒད་པོ་འདིའི་ཐོབ་ཐང་ལག་ཁྱེར་སླར་གསོ་བྱས་པ་མ་ཟད། ད་དུང་ཕ་ཡུལ་དུ་ལོག་ནས་ནང་མི་དང་ལྷན་འཛོམས་བྱུང་བ་རེད། རྒད་པོ་དེ་རང་ཁྱིམ་དུ་སླེབས་པའི་སྐབས་དེར་དགུང་ལོ་བརྒྱད་ཅུར་སོན་པའི་ཨ་མས་ལོ་དྲུག་ཅུ་ཙམ་ལ་སོན་པའི་བུ་མཐོང་སྐབས། བདེ་སྐྱིད་ཀྱི་འཛུམ་མདངས་དང་མིག་ཆུ་རྒད་པོ་དང་ཁོང་གི་ཨ་མ་རྒན་མོའི་གདོང་ནས་འཕྱུར་བ་དང་། ཨ་མ་རྒན་མོས“ཐུགས་རྗེ་ཆེ་ཞུ”ཞེས་ཡང་ཡང་བཤད། ཕྱིས་སུ་རྒད་པོ་དེས་རང་གི་ཨ་མ་དང་མཉམ་དུ་མངགས་གཏོང་ཁང་གི་མི་དམངས་ཉེན་རྟོག་པར་ཁ་པར་བཏང་ནས་མི་དམངས་ཉེན་རྟོག་པས་རོགས་རམ་བྱས་པར་སྙིང་དབུས་ནས་ཐུགས་རྗེ་ཆེ་ཞུས་པ་རེད།
རྩོམ་སྒྲིག་པ། བདེ་སྒྲོན།
