གོ་ལ་ཧྲིལ་པོའི་རྒྱུན་སྤྱོད་རྫས་འགྱུར་ཐོན་རྫས་ཀྱི་བཟོ་ལས་ཆེ་ཤོས་ཏེ།ཨ་རིའི་པའོ་ཅེ་ཀུང་སིས་སྤྱི་བསྒྲགས་སྤེལ་ནས། ཨ་རི་ནས་ཐོན་སྐྱེད་བྱས་པའི་ཕན་ཐིང་སོགས་ཚོང་རྟགས་བཞི་ཡི་རླངས་གཏོར་རྣམ་པའི་འཁྲུད་བྱེད་རྫས་སོགས་སུ་སྐྲན་ནད་སློང་སྲིད་པའི་རྫས་གྱུར་དངོས་པོ་པན་འདུས་པ་བརྟག་དཔྱད་ཐུབ་པས་ཕྱིར་བསྡུ་བྱེད་བཞིན་ཡོད་ཅེས་བརྗོད་འདུག
ཕྱིར་བསྡུ་བྱེད་བཞིན་པའི་ཐོན་རྫས་ལ་ཕན་ཐིང་དང་། ཨོ་སི་ཁུག་བྱི།Waterlessཡི་སྐྲ་སྐམ་བྱེད་ཀྱི་ཐོན་རྫས་སོགས་ཁག་གཅིག་ཚུད་ཡོད།
པའོ་ཅེ་ཀུང་སིའི་སྤྱི་བསྒྲགས་ནང་པན་ནི་རླངས་གཏོར་རྣམ་པའི་ཐོན་རྫས་དག་གི་གྲུབ་ཆ་མིན་མོད།འོན་ཀྱང་ཉེ་ཆར་ཐོན་རྫས་ཐུམ་སྒྲིལ་ཤེལ་དམ་ནས་གཏོར་རྗེས་པན་གྱི་འདུས་ཚད་བསམ་ཡུལ་ལས་འདས་པའི་མཐོ་པོ་ཡོད་པ་བརྟག་དཔྱད་བྱུང་ཞེས་འཁོད་ཡོད།
པའོ་ཅེ་ཀུང་སིས་མིག་སྔའི་བར་ཐེངས་འདིའི་ཕྱིར་བསྡུ་དང་འབྲེལ་ཡོད་ཀྱི་དོན་རྐྱེན་ངན་པའི་སྙན་ཞུ་གང་ཡང་འབྱོར་མ་བྱུང་།ཉིན་རྒྱུན་བཀོལ་བཞིན་པའི་ཐོན་རྫས་ནང་འདུས་པའི་པན་གྱི་འདུས་ཚད་ཀྱིས་བདེ་ཐང་ལ་ཤུགས་རྐྱེན་ཐེབས་མི་སྲིད།འོན་ཀྱང་གཟབ་གཟབ་བྱས་ན་བཟང་སྙམ་ནས་ཕྱིར་བསྡུ་བྱེད་བཞིན་ཡོད་ཅེས་བརྗོད་ཡོད།
པན་ནི་སྐྱེ་ལྡན་འདྲེས་འགྱུར་རྫས་ཤིག་ཡིན་ལ། མི་དང་སྲོག་ཆགས་ཀྱིས་འབྱིན་རྔུབ་དང་འཐུང་བ།སྐྱི་ལྤགས་ཐུག་རེག་བཅས་བརྒྱུད་ནས་པན་བསྡུ་ལེན་བྱེད་སྲིད་པས་དེས་སྐྲན་ནད་སློང་སྲིད།འཛམ་གླིང་འཕྲོད་བསྟེན་རྩ་འཛུགས་རྒྱལ་སྤྱིའི་སྐྲན་ནད་ཞིབ་འཇུག་སྡེ་ཁག་གིས་པན་ནི་སྐྲན་ནད་སློང་བའི་དངོས་རྫས་ཀྱི་གྲས་སུ་བཞག་ཡོད།
གཞན་ཡང་ལུའུ་ཐུའོ་གསར་འགྱུར་ཁང་གིས་གནས་ཚུལ་སྤེལ་ལྟར་ན། ཨ་རི་ནས་ཕྱིར་བསྡུ་བྱེད་བཞིན་པའི་ཐོན་རྫས་དེ་དག་ཁ་ན་ཏ་ནས་ཀྱང་ཕྱིར་བསྡུ་བྱེད་བཞིན་པ་རེད།ཟླ་གོང་མའི་ཚེས་23ཉིན། ཐོན་རྫས་ཁྲོད་དུ་པན་འདུས་ཡོད་པ་བརྟག་དཔྱད་བྱུང་ཞིང་།པའོ་ཅེ་ཀུང་སིས་ཨ་རི་ནས་བཙོངས་པའི་རྔུལ་འགོག་ཐོན་རྫས་ཁག་གཅིག་ཕྱིར་བསྡུ་བྱེད་རྒྱུའི་ཁྱབ་བསྒྲགས་བྱས་འདུག
ཀྲུང་གོ་རུ་ཡོད་པའི་པའོ་ཅེ་ཀུང་སིས་དེའི་སྐོར་ལ་ལན་ཆ་བྱས་པ་སྟེ། ཕྱིར་བསྡུ་བྱེད་བཞིན་པའི་ཐོན་རྫས་དག་ཀྲུང་གོའི་ཁྲོམ་རར་ཁྱབ་མེད་ཅེས་བརྗོད་པ་དང་། ཚེས་18ཉིན་གྱི་ཕྱི་དྲོ་གསར་འགོད་པས་ཀྲུང་གོར་ཡོད་པའི་པའོ་ཅེ་ཀུང་སི་དང་འབྲེལ་བ་བྱས་ཤིང་།འབྲེལ་ཡོད་འགན་འཁུར་བས་ཐེངས་འདིར་ཕྱིར་བསྡུ་བྱེད་བཞིན་པ་ནི་ཨ་མེ་རི་ཁ་བྱང་མའི་ས་ཁུལ་དུ་བྲིན་ཚོང་བྱས་པའི་སྐྲ་སྐམ་བྱེད་ཀྱི་ཐོན་རྫས་ཁག་གཅིག་ལས་ཀྲུང་གོའི་ཁྲོམ་ར་དང་འབྲེལ་བ་མེད།ཀྲུང་གོའི་ཁྲོམ་ར་ནས་བྲིན་ཚོང་བྱེད་བཞིན་པའི་ཐོན་རྫས་ཚང་མ་རྒྱལ་ཁབ་ཀྱི་འབྲེལ་ཡོད་ཚད་གཞི་དང་མཐུན་ཡོད་ཅེས་བརྗོད་པ་རེད།
རྩོམ་སྒྲིག་པ། བདེ་སྒྲོན།
