མཚོ་སྔོན་གྱི་འགོ་ཁྲིད་ཅིག་གཉིས་དབྱུང་བཏང་འདུག
སྤེལ་དུས 2022-03-28
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
རྩོམ་པ་པོ།
མཚོ་སྔོན་ཚྭ་མཚོ་བཟོ་ལས་མ་རྐང་ཚད་ཡོད་ཀུང་སིའི་ཏང་ཨུའི་ཧྲུའུ་ཅི་གཞོན་པ་ཟུར་པ། མཚོ་སྔོན་ཧུའེ་ཤིན་རྒྱུ་ནོར་དོ་དམ་ཚད་ཡོད་འགན་འཁྲི་ཀུང་སིའི་ཏང་ཨུའི་ཧྲུའུ་ཅི་དང་ལས་འཛིན་མགོ་གཙོ་ཟུར་པ་ཤེ་ཁང་མིན་ཏང་དང་གཞུང་ལས་ནས་ཕྱིར་འབུད་བྱས་ཡོད།
ཉིན་ཤས་གོང་ཀྲུང་གུང་མཚོ་སྔོན་ཞིང་ཆེན་ཏང་ཨུད་ཀྱི་ཆོག་མཆན་ཐོབ་པ་བརྒྱུད། མཚོ་སྔོན་ཚྭ་མཚོ་བཟོ་ལས་མ་རྐང་ཚད་ཡོད་ཀུང་སིའི་ཏང་ཨུའི་ཧྲུའུ་ཅི་གཞོན་པ་ཟུར་པ་དང་། མཚོ་སྔོན་ཧུའེ་ཤིན་རྒྱུ་ནོར་དོ་དམ་ཚད་ཡོད་འགན་འཁྲི་ཀུང་སིའི་ཏང་ཨུའི་ཧྲུའུ་ཅི་དང་ལས་འཛིན་མགོ་གཙོ་ཟུར་པ་ཤེ་ཁང་མིན་གྱིས་སྒྲིག་འགལ་ཁྲིམས་འགལ་ཚབས་ཆེན་བཟོས་པའི་གྱོད་དོན་ཐོ་འགོད་བྱས་ནས་ཞིབ་བཤེར་བྱས།
ཞིབ་བཤེར་བྱས་པ་ལྟར་ན། ཤེ་ཁང་མིན་གྱི་བསམ་བློའི་ཕུགས་འདུན་ཉམས་ཤིང་ཐོག་མའི་སེམས་འདུན་དང་འོས་འགན་ལ་རྒྱབ་འགལ་བྱས་པ། ཏང་ལ་བློ་དཀར་སེམས་དཀར་དང་གཞུང་དྲང་མིན་པ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་དང་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་བྱེད་རྒྱུར་བློ་ཐག་རྦད་ཆོད་མིན་པ་དང་འཐེན་སྐུམ་བྱེད་པ། གཡོ་སྒྱུའི་ལས་སུ་ཞུགས་པ། ཚོགས་པ་སྒྲིག་པ་དང་ཤོག་ཁག་བསྒྲིགས་ནས་རང་ཉིད་ཀྱི་སྟོབས་ཤུགས་ཇེ་ཆེར་གཏོང་བ། ཀྲུང་དབྱང་གི་གཏན་འབེབས་བརྒྱད་ཀྱི་དགོངས་དོན་དང་འགལ་ཏེ་དྲང་གཞག་ངང་གཞུང་དོན་སྒྲུབ་པ་ལ་གནོད་སྲིད་པའི་གསོལ་སྟོན་དང་ལུས་སྦྱོང་བྱེད་སྒོ་སོགས་ཡུན་རིང་དང་ལེན་བྱས་པ། སྒྲིག་འགལ་ངང་སྐྱེས་དངུལ་བླངས་པ། རྩ་འཛུགས་ཀྱིས་ཁ་བརྡ་དང་ཡིག་སྐུར་འདྲི་རྩད་བྱེད་སྐབས་གནད་དོན་ཇི་བཞིན་དུ་དྲང་པོ་མི་བཤད་པ། སྒྲིག་འགལ་ངང་ལས་བྱེད་པའི་ལས་གནས་མཐོར་འདེགས་དང་བསྐོ་སྤྱོད་བྱེད་པ། སྒྲིག་འགལ་ངང་ཚོང་གཉེར་བྱས་ནས་ཁྲིམས་འགལ་ཁེ་ཕོགས་འབོར་ཆེན་བླངས་པ། གཞུང་གི་ལས་ཀར་གཏན་ནས་འགན་མི་འཁུར་བ་དང་། ཁེ་ལས་དོ་དམ་རྙོག་འཛིང་ཆེ་ཞིང་བདེ་འཇགས་དོན་རྐྱེན་ཡང་དང་བསྐྱར་དུ་བྱུང་པས་རྒྱལ་ཁབ་ཁེ་ལས་ཀྱི་ཁེ་ཕན་ལ་གནོད་པ་ཚབས་ཆེན་བཟོས་པ། ཁྱིམ་ཚང་གི་མི་ཆོས་ཀུན་སྤྱོད་དང་སྤྱི་ཚོགས་ཀུན་སྤྱོད་ལ་རྒྱབ་འགལ་ཚབས་ཆེན་བྱས་ཏེ་གཉེན་སྒྲིག་མ་བྱས་པའི་བྱིས་པ་ཡོད་པས་སྤྱི་ཚོགས་ལ་ཤུགས་རྐྱེན་ངན་པ་བཟོས། དབང་ཆར་བརྟེན་ནས་སྒེར་དོན་སྒྲུབ་པ་དང་། ཁེ་ལས་ལ་བརྟེན་ནས་ཁེ་སྤོགས་བཟའ་བ་དང་རྒྱལ་ཁབ་ཀྱི་བཅའ་ཁྲིམས་དང་ཁྲིམས་སྲོལ་ལ་རྒྱབ་འགལ་ཚབས་ཆེན་བྱས། ལས་གནས་སྟེང་གི་སྟབས་བདེ་བེད་སྤྱད་ནས་མི་གཞན་ལ་ཁེ་ཕན་སྐྲུན་པ་མ་ཟད་ཁྲིམས་འགལ་ངང་རྒྱུ་ནོར་འབོར་ཆེན་བླངས་པ།
ཤེ་ཁང་མིན་གྱིས་ཏང་གི་ཆབ་སྲིད་སྒྲིག་ཁྲིམས་དང་། རྩ་འཛུགས་སྒྲིག་ཁྲིམས། སྤྱོད་གཙང་སྒྲིག་ཁྲིམས། བྱ་བའི་སྒྲིག་ཁྲིམས། འཚོ་བའི་སྒྲིག་ཁྲིམས་བཅས་ལ་རྒྱབ་འགལ་ཚབས་ཆེན་བྱས་ནས་གོ་གནས་ཁྲིམས་འགལ་ཡིན་པ་མ་ཟད་ལྐོག་རྔན་ཟས་པའི་ཉེས་གསོག་དོགས་གཞི་ཡོད་པ། ཏང་གི་ཚོགས་ཆེན་ཐེངས་བཅོ་བརྒྱད་པའི་རྗེས་སུ་ད་དུང་རང་ཚོད་མ་བཟུང་པ་བཅས་ནི་ཁྲིམས་འགལ་ངོ་བོ་ཚབས་ཆེ་ཞིང་ཤུགས་རྐྱེན་ངན་པས་ཐག་གཅོད་ནན་མོ་གཏོང་དགོས། ཀྲུང་གོ་གུང་ཁྲན་ཏང་གི་སྒྲིག་ཁྲིམས་ཆད་གཅོད་སྲོལ་ཡིག་དང་། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ལྟ་ཞིབ་བཅའ་ཁྲིམས། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་གཞུང་ལས་པའི་སྲིད་དོན་ཆད་གཅོད་བཅའ་ཁྲིམས་སོགས་འབྲེལ་ཡོད་གཏན་འབེབས་གཞིར་བཟུང་ནས། ཀྲུང་གུང་མཚོ་སྔོན་ཞིང་ཆེན་སྒྲིག་ཨུད་རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་ཐོག་ཞིབ་འཇུག་བྱས་པ་དང་ཀྲུང་གུང་མཚོ་སྔོན་ཞིང་ཆེན་ཏང་ཨུའི་ཆོག་མཆན་ཐོབ་པ་བརྒྱུད་དེ་ཤེ་ཁང་མིན་ཏང་ལས་ཕྱིར་འབུད་གཏོང་རྒྱུའི་ཆད་པ་གཅོད་རྒྱུ་གཏན་འབེབས་བྱས་པ་དང་། ཞིང་ཆེན་ཞིབ་བཤེར་ཨུ་ཡོན་ལྷན་ཁང་གིས་ཁོའི་གཞུང་གི་ལས་གནས་མེད་པ་བཟོ་བའི་ཆད་པ་གཅོད་རྒྱུ་དང་། ཁོའི་ཁྲིམས་འགལ་ཐོབ་བྱ་རྩིས་ལེན་བྱེད་པ། ཉེས་བསགས་གནད་དོན་དག་ཞིབ་དཔྱོད་ལས་ཁུངས་ལ་ཁྲིམས་ལྟར་ཞིབ་བཤེར་དང་ཁྲིམས་སྦྱོར་བྱ་རྒྱུར་ཡར་སྤྲོད་བྱས་ཤིང་དེར་འབྲེལ་གྱི་རྒྱུ་ནོར་ཚང་མ་མཉམ་དུ་སྐྱེལ་སྤྲོད་བྱས་པ་རེད།
རྩོམ་སྒྲིག་པ། བདེ་སྒྲོན།
