ཚེས་25ཉིན། གསར་འགོད་པར་སྤྱི་བདེ་པུའུ་ནས་ཤེས་རྟོགས་བྱུང་བར། སྤྱི་བདེ་པུས་གསར་དུ་བཟོ་བཅོས་བརྒྱབ་པའི《འཕྲུལ་སྒུལ་འཁོར་རིགས་ཀྱི་ཁ་ལོ་བའི་ལག་ཁྱེར་རེ་ཞུ་དང་བེད་སྤྱོད་ཀྱི་གཏན་འབེབས》2022ལོའི་ཟླ་4ཚེས་1ཉིན་ནས་བཟུང་ལག་ལེན་བསྟར་རྒྱུ་ཡིན་པ་རེད། གསར་དུ་བཟོ་བཅོས་བརྒྱབ་པའི་སྒྲིག་སྲོལ་ནང་། མང་ཚོགས་ཀྱི་རེ་བ་དང་རེ་སྒུག་གསར་པར་ལན་བརྒྱབ་སྟེ། དམངས་ལ་སྟབས་བདེ་དང་ཁེ་ལས་ལ་ཕན་པའི་བྱ་ཐབས་གསར་པ་ཁག་6སླར་ཡང་བཏོན་པ་རེད།
ཁ་ལོ་བའི་ཡིག་རྒྱུགས་གཏོང་བ་དང་ལག་ཁྱེར་ལེན་པར་སྟབས་བདེ་ཡོང་བའི་བྱ་ཐབས་གསར་པ་ཁག་4
གཅིག འགྲུལ་སྐྱེལ་རླངས་འཁོར་དང་ཟོག་འདྲེན་རླངས་འཁོར་ཆེ་འབྲིང་གི་ཁ་ལོ་བའི་ལག་ཁྱེར་ལེན་དུས། རྒྱལ་ཡོངས་སུ“ལག་ཁྱེར་གཅིག་གིས་རྒྱུགས་གཏོང་ཆོག་པ”ཁྱབ་གདལ་གཏོང་རྒྱུ་ཡིན་ཞིང་། ཐེམ་ཐོ་ཡོད་སའི་ས་ཆ་ཕུད། ས་ཆ་གཞན་ནས་འགྲུལ་སྐྱེལ་རླངས་འཁོར་དང་ཟོག་འདྲེན་རླངས་འཁོར་གྱི་ཁ་ལོ་བའི་ལག་ཁྱེར་ལེན་པ་ཡིན་ན། རེ་ཞུ་བྱེད་མཁན་ཚོས་ཐོབ་ཐང་ལག་ཁྱེར་ཁྱེར་ཏེ་རྒྱུགས་གཏོང་བར་འགྲོ་ཆོག་གི་ཡོད་པ་དང་། གནས་སྡོད་ལག་ཁྱེར་དགོས་ཀྱི་མེད།
གཉིས། ཁ་ལོ་བའི་ལག་ཁྱེར“ཞིང་ཆེན་གཞན་ནས་གཉེར་ཆོག་པ”སླར་གསོ་བྱ་རྒྱུ་ཡིན་ཞིང་། ཁ་ལོ་བའི་ལག་ཁྱེར་གྱི་གོ་ཆོད་དུས་ཚོད་ཡོལ་ཡང་ལག་ཁྱེར་བརྗེ་པོ་མ་བརྒྱབ་པས་ལག་ཁྱེར་མེད་པར་བཟོས་པ་གང་ཞིག་ལོ་གཉིས་སོང་མེད་ཚེ། རེ་ཞུ་བྱེད་མཁན་གྱིས་རྒྱལ་ཡོངས་ཀྱི་ས་ཆ་གང་རུང་ཞིག་ནས་ཁ་ལོ་བའི་ཡིག་རྒྱུགས་དང་པོར་ཞུགས་རྒྱུའི་རེ་ཞུ་བྱས་ནས་ཁ་ལོ་བའི་ལག་ཁྱེར་ཡང་བསྐྱར་བཟོས་ན་འགྲིག
གསུམ། ཁ་ལོ་བའི་ལག་ཁྱེར་གྱི་ཡིག་རྒྱུགས་ཀྱི་ནང་དོན་དང་རྣམ་གྲངས་ལེགས་སུ་གཏོང་རྒྱུ་ཡིན་ཞིང་། རང་འགུལ་གདང་གི་འཁོར་རིགས་ཆུང་གྲས་ཀྱི་ཁ་ལོ་བའི་ལག་ཁྱེར་ཡོད་པས་རླངས་འཁོར་ཆུང་གྲས་གཞན་དག་གཏོང་ཆོག་པའི་ལག་ཁྱེར་ལེན་པའམ། ཡང་ན་སྦག་སྦག་གཏོང་ཆོག་པའི་ལག་ཁྱེར་ཡོད་པས་སྦག་སྦག་རིགས་གཞན་དག་གཏོང་ཆོག་པའི་ལག་ཁྱེར་ལེན་དགོས་ཚེ། ཁ་ལོ་བའི་ཡིག་རྒྱུགས་གཉིས་པ་དང་གསུམ་པ་བཏང་ན་འགྲིག་གི་ཡོད།
བཞི། འདྲུད་འཐེན་རླངས་འཁོར་ཡང་གྲས་ཀྱི་ཁ་ལོ་བས་གཏོང་ཆོག་པའི་འཁོར་རིགས་མང་དུ་གཏོང་རྒྱུ་ཡིན་ཞིང་། “འདྲུད་འཐེན་རླངས་འཁོར་ཡང་གྲས”ཀྱི་ལག་ཁྱེར་ཡོད་པའི་ཁ་ལོ་བས་འཁོར་སྒྲོམ་རླངས་འཁོར་ཆུང་གྲས་གཏོང་ཆོག་པས། མང་ཚོགས་ཀྱིས་ཁང་འཁོར་བཏང་ནས་ཡུལ་སྐོར་དུ་སྐྱོད་པའི་དགོས་མཁོ་སྔར་བས་སྐོང་ཐུབ་པ་དང་། ཁང་འཁོར་ཡུལ་སྐོར་གྱི་ལས་རྣམ་གསར་པ་འཕེལ་རྒྱས་འགྲོ་རྒྱུར་སྐུལ་འདེད་ཐེབས་རྒྱུ་རེད།
ལག་ཁྱེར་ཉུང་གཏོང་གི་དམངས་ཕན་ཞབས་ཞུའི་བྱ་ཐབས་གསར་པ་2
གཅིག རེ་ཞུའི་དཔྱད་ཡིག་དང་ཡིག་ཚགས་གློག་རྡུལ་ཅན་ལ་སྐུལ་འདེད་གཏོང་རྒྱུ་ཡིན་ཞིང་། རེ་ཞུའི་དཔྱད་ཡིག་གློག་རྡུལ་ཅན་ལ་བསྒྱུར་བ་དང་ཡིག་ཚགས་ལ་གློག་རྡུལ་ཅན་གྱི་དོ་དམ་བྱས་ཏེ། ཁ་ལོ་བའི་ཡིག་རྒྱུགས་ཀྱི་ཆ་འཕྲིན་དྲ་ཐོག་ནས་བསྐུར་ཏེ། འགྲིམ་འགྲུལ་དོ་དམ་གྱི་ལས་སྒོ་སྒྲུབ་སྐབས“ལྷུ་ཚིགས་ཉུང་གཏོང་དང་། དཔྱད་ཡིག་ཉུང་གཏོང་། དུས་བཀག་ཐུང་དུ་གཏོང་བ”བཅས་ཐུབ་པ་བྱ་རྒྱུ་རེད།
གཉིས། སྡེ་ཚན་ཁག་གི་ཆ་འཕྲིན་དྲ་ཐོག་ནས་མཉམ་སྤྱོད་དང་ཞིབ་དཔྱད་བྱེད་པར་སྐུལ་འདེད་གཏོང་རྒྱུ་ཡིན་ཞིང་། སྨན་བཅོས་སྒྲིག་གཞི་སོགས་ཀྱི་སྡེ་ཚན་དང་ཆ་འཕྲིན་སྦྲེལ་མཐུད་བྱས་ནས། གཟུགས་པོ་བརྟག་དཔྱད་སོགས་ཀྱི་ཆ་འཕྲིན་མཉམ་སྤྱོད་བྱས་ཏེ། མང་ཚོགས་ཀྱིས་ལས་སྒོ་གཉེར་སྐབས་འབྲེལ་ཡོད་ཀྱི་དཔང་ཡིག་འདོན་དགོས་མེད།
