ཉེན་རྟོག་པ་ལགས།
ངས་བུ་ཁྲིད་ནས་བྱས་ཉེས་རང་ཞུ་བྱེད་པར་ཡོང་བ་ཡིན་ཞེས་ཏེ།
ཨ་མ་ཞིག་གིས།
སློབ་ཆུང་འགྲིམ་བཞིན་པའི་བུ་ཁྲིད་ནས་མངགས་གཏོང་ཁང་དུ་སླེབས།
མ་བུ་འདི་གཉིས་དང་འཕྲད་དུས།
ཉེན་རྟོག་པས་ཅི་འདྲ་བྱས་ཡོད་དམ་ཞེ་ན།
ཉེན་རྟོག་པའི་བྱེད་སྟངས་འདི་ནི་བསྟོད་པའི་གནས་སོ། །
ཟླ་3ཚེས་25ཉིན། ཨ་མ་ཞིག་གིས་རང་གི་བུ་ཁྲིད་ནས། ཀྲེ་ཅང་ཞིང་ཆེན་དབྱི་ཝུའུ་གྲོང་ཁྱེར་སྤྱི་བདེ་ཅུས་ཕུའུ་ཐན་མངགས་གཏོང་ཁང་གི་ཉེན་རྟོག་སྣེ་ལེན་ཚོམས་ཆེན་དུ་ཡོང་སྟེ་གནས་ཚུལ་རྣམས་ཞུས།
དེ་ཡང་། ཚེས་24ཉིན་གྱི་ཕྱི་དྲོ། སློབ་གྲྭ་གྲོལ་རྗེས་བུ་དེས་སློབ་གྲོགས་གཞན་དང་ལྷན་དུ་ཚོང་ཁང་ཞིག་ཏུ་སོང་ཞིང་། བུ་དེས་རོལ་རྩེད་ཤོག་བྱང་གཅིག་བརྐུས་པ་དེ་སྦྱིན་བདག་གིས་བཟུང་བ་རེད།
ཉེན་རྟོག་པས་ལམ་སེང་ཧ་གོ་སྟེ་ཨ་མ་དེ་ལ་གཞོགས་འདེགས་བྱེད་འགོ་བརྩམས།
ཉེན་རྟོག་པས་ཇི་ལྟར་ཐག་གཅོད་བྱེད་དགོས་སམ་ཞེས་དྲིས་པས་ན།
ཨ་མས། ཇི་ལྟར་ཐག་གཅོད་བྱེད་མིན་ཁྱོད་ཚོ་ལ་ཐུག་ཡོད་ཅེས་བཤད།
ཉེན་རྟོག་པས་བཙོན་ཁང་དུ་འཇུག་དགོས་སམ་ཞེས་འདྲི་དུས།
ཨ་མས། འགྲིག་གི་རེད་ཅེས་བཤད།
བུ་དེས་ཉེན་རྟོག་པ་དང་ཨ་མ་གཉིས་ཀྱི་ཁ་བརྡ་དེ་ཐོས་དུས། མྱུར་དུ་ནོར་འཁྲུལ་ངོས་ལེན་བྱས་པ་སྟེ། སླད་ཕྱིན་ངས་དེ་ལྟར་བྱེད་ཀྱི་མིན། ངའི་བྱེད་སྟངས་དེ་ནོར་འཁྲུལ་ཞིག་ཡིན། ངས་ཡོ་བསྲང་བྱ་རྒྱུ་ཡིན་ཞེས་བཤད་པ་རེད།
ཉེན་རྟོག་པས་བྱིས་པ་དེས་ནོར་འཁྲུལ་ངོས་འཛིན་བྱུང་བ་མཐོང་བས་ན། མུ་མཐུད་དུ། ཡོ་བསྲང་ཞེས་ཁ་ནས་བཤད་པས་ཅི་ལ་ཕན། འགན་ལེན་ཡི་གེ་འབྲི་དགོས་ཅེས་བཤད། ཨ་མས་ཀྱང་མྱུར་དུ་འོ་ཡ། ངེས་པར་དུ་འབྲི་དགོས་ཞེས་བཤད།
ཉེན་རྟོག་པས་ཤོག་བུ་ཞིག་ཁྱེར་ཡོང་ནས་བྱིས་པ་དེར་སྤྲད། སྐབས་དེར་ཉེན་རྟོག་པའི་ལས་རོགས་གཞན་ཞིག་ཀྱང་ཡོང་ནས། ཡིག་འབྲུ་100ལས་ཉུང་མི་རུང་། གསལ་པོ་འབྲི་དགོས། དེ་འདྲ་མ་བྱས་ན་ཁྱེད་རང་ནང་ལ་ལོག་ཏུ་འཇུག་རྒྱུ་མིན་ཞེས་བཤད།
བུ་དེས་འགན་ལེན་ཡི་གེ་བྲིས་ཚར་རྗེས།
ཉེན་རྟོག་པས་བུ་དེ་ཁོང་ཚོས་གྱོད་གཞི་ཐག་གཅོད་བྱེད་ཡུལ་ལ་ལྟ་སྐོར་དུ་ཁྲིད།
མཐར། ཨ་མས་ཡང་བསྐྱར་བུ་ལ་སློབ་གསོ་བཏང་བ་དང་།
བུ་ཆུང་གིས་ཀྱང་སླད་ཕྱིན་དེ་འདྲ་མི་བྱེད་པའི་ཁས་བླངས།
ཉེན་རྟོག་པ་དང་ཨ་མ་གཉིས་ཀྱི་མ་གྲོས་གཅིག་མཐུན་གྱི་སློབ་གསོ་གཏོང་སྟངས་འདི་ལ། དྲ་གྲོགས་རྣམས་ཀྱིས་གཅིག་རྗེས་གཉིས་མཐུད་ངང་བྱེད་སྟངས་འདི་རྩེ་གྲ་རེད་ཅེས་དང་། གནས་ལུགས་ལ་མཁས་པའི་ཁྱིམ་བདག་ཅེས་པ་སོགས་བརྗོད་དེ་བསྟོད་པའི་མཐེ་བོང་བསྒྲེངས།
ཨ་མ་དང་ཉེན་རྟོག་པའི་སློབ་གསོ་འདི་བུ་ཆུང་འདིའི་འཚར་ལོངས་ལམ་བུའི་ཐོག་གི་སློབ་ཚན་རྩ་ཆེན་ཞིག་ཏུ་འགྱུར་བར་སྨོན།
རྩོམ་སྒྲིག་པ། བདེ་སྒྲོན།
