ལྷ་ས་སློབ་གསོའི་གྲོང་གི་དམངས་ཕན་ཉེན་རྟོག་ཞབས་ཞུའི་ས་ཚིགས་ཀྱི་མི་དམངས་ཉེན་རྟོག་པ་ཙའུ་དབྱང་ལ་རྗེས་དྲན་ཞུ།
2022ལོའི་ཟླ་3ཚེས་9ཉིན་གྱི་ཐོ་རེངས་ཆུ་ཚོད་4པ་ཡོལ་ཙམ་ལ་ཁོངས་གཏོགས་ཁུལ་དུ་སྐོར་གཡེང་བྱེད་མཇུག་འགྲིལ་རྗེས་1989ལོར་སྐྱེས་པའི་ཙའུ་དབྱང་ལ་གློ་བུར་དུ་ནད་གཞི་ཕོག་ནས་ལས་གནས་སུ་གྲོངས་པ་རེད།
2011ལོར་ལས་ཀར་ཞུགས་ཚུན། ཙའུ་དབྱང་གིས་ལྕགས་རོང་དམངས་ཕན་ཉེན་རྟོག་ཞབས་ཞུའི་ས་ཚིགས་སུ་ལས་ཀ་བྱས། 2014ལོར་ལྷ་ས་སློབ་གསོའི་གྲོང་གི་དམངས་ཕན་ཉེན་རྟོག་ཞབས་ཞུའི་ས་ཚིགས་བཙུགས་ནས་ཙའུ་དབྱང་གསར་དུ་བཙུགས་པའི་དམངས་ཕན་ཉེན་རྟོག་ཞབས་ཞུའི་ས་ཚིགས་སུ་ལས་ཀ་བྱེད་པར་བསྐྱོད། གཟུགས་སྟོབས་ཆེ་ལ་ཤ་རྩི་ཅུང་ནག་པའི་ཁོང་གཤིས་འཇམ་གཞུང་དྲང་ཞིག་ཡོད་པས་ལས་རོགས་དང་ཁོངས་གཏོགས་ཁུལ་གྱི་མང་ཚོགས་ཚོས་མཛའ་བརྩེའི་ངང་ཁོང་ལ“སྟོབས་ཆེན”ཞེས་འབོད་ཀྱི་ཡོད།
དམངས་ཕན་ཉེན་རྟོག་ཞབས་ཞུའི་ས་ཚིགས་ནི་ཁོངས་གཏོགས་ཁུལ་གྱི་བདེ་འཇགས་སྲུང་མཁན་ཞིག་རེད། ཁོངས་གཏོགས་ཁུལ་དུ་མི་རྣམས་ཀྱིས་རྟག་ཏུ“སྟོབས་ཆེན”གྱིས་སྐོར་ཞིབ་བྱེད་པ་དང་ལས་ཀའི་ཆ་འཕྲིན་ཐོ་འགོད་ཞིབ་ཚགས་བྱེད་པའམ་ཡང་ན་མང་ཚོགས་དང་ཅི་འཕྲོས་མོལ་འཕྲོས་བྱེད་པ་མཐོང་རྒྱུ་ཡོད། ཉིན་ལྟར་སྤྱིར་བཏང་གི་ལས་ཀ་ཙག་ཙིག་བྱས་ནས་སྡོད་ཀྱི་ཡོད་མོད། འོན་ཀྱང་སྤྱིར་བཏང་གི་ལས་ཀ་ཙག་ཙིག་ཁྲོད་ནས་སྤྱི་བདེའི་མི་དམངས་ཉེན་རྟོག་པ་ཞིག་གི་ལས་འགན་དང་འགན་སྒྲུབ་ཀྱི་ཉམས་འགྱུར་མངོན་གྱི་ཡོད།
2012ལོར་ལོ་19ལ་སླེབས་པའི་ཀྲང་ཅིང་ལིན་གྱིས་རྣམ་སྲས་ཁུལ་བཅུ་གཅིག་གི་དམངས་ཕན་ཉེན་རྟོག་ཞབས་ཞུའི་ས་ཚིགས་ཀྱི་ཁོངས་གཏོགས་ཁུལ་དུ་སྐྲ་བཞར་ཁང་ཞིག་བཙུགས་ནས་འཚོ་ཐབས་བྱེད་ཀྱི་ཡོད། ལོ་11རིང་ཙའུ་དབྱང་གིས་ཁོང་གི་སར་སྐྲ་བཞར་བར་འགྲོ་གི་ཡོད། སྐོར་གཡེང་བྱེད་མཇུག་འགྲིལ་རྗེས་ཙའུ་དབྱང་གིས་ཀྱང་ཁོང་དང་སྐད་ཆ་བཤད་ནས་ཏོག་ཙམ་སྡོད་ཀྱི་ཡོད་པས་ཀྲང་ཅིང་ལིན་དང་ཙའུ་དབྱང་གཉིས་ངོ་ཤེས་སུ་གྱུར། ཀྲང་ཅིང་ལིན་གྱིས་བལྟས་ཚེ་ཙའུ་དབྱང་ལ་ཉིན་ལྟར་ཚར་རྒྱུ་མེད་པའི་ལས་ཀ་ཡོད་པས་ཁོང་ལ་ངལ་གསོ་རྒྱག་དགོས་པའི་ཁ་ཏ་བསླབ་བྱ་བྱེད་རིམ་བཞིན་ཁོང་གིས་རྟག་ཏུ་སྤྱི་བདེའི་ལས་ཀ་རྙོག་འཛིང་ཆེ་བས་ངེས་པར་དུ་ཞིབ་ཚགས་སྒྲུབ་དགོས་ཞེས་བརྗོད་པ་མ་ཟད། ད་དུང་ཀྲང་ཅིང་ལིན་ལ་གལ་ཏེ་ཉེ་འགྲམ་དུ་བདེ་འཇགས་ལ་གནོད་པའི་རྒྱུ་རྐྱེན་ཡོད་པ་ཤེས་ཚེ་འཕྲལ་མར་རང་ཉིད་ལ་ཤོད་དགོས་པའི་དྲན་སྐུལ་ཡང་ཡང་བྱེད་ཀྱི་ཡོད།
2021ལོའི་ཟླ་4ཚེས་4ཉིན་གྱི་ཐོ་རེངས་ཆུ་ཚོད་དང་པོ་ཙམ་ལ་ཚལ་གུང་ཐང་མངགས་གཏོང་ཁང་ལ་ལྷ་ས་གྲོང་ཁྱེར་སྤྱི་བདེ་ཅུས་བཀོད་འདོམས་ལྟེ་གནས་ཀྱི་ཉེན་བརྡ་འབྱོར་ནས“སློབ་གསོའི་གྲོང་དང་པོའི་གྲོང་མི་སྐལ་བཟང་དཔལ་སྐྱིད་ལ་གློ་བུར་དུ་སྙིང་ནད་ཕོག་སྟེ་མི་དམངས་ཉེན་རྟོག་པར་རོགས་པ་གནང་རོགས་ཞུ་གི་འདུག”ཅེས་བཤད། ཙའུ་དབྱང་དང་ལས་རོགས་གཞན་ཞིག་མགྱོགས་མྱུར་ས་གནས་ས་ཐོག་ཏུ་བསྐྱོད་དེ་དུས་ཐུང་སྐར་མ་ཁ་ཤས་ནང་སྐལ་བཟང་དཔལ་སྐྱིད་ཀྱི་གམ་དུ་འབྱོར། ཉེན་རྟོག་པའི་རླངས་འཁོར་བཏང་ནས་སྐལ་བཟང་དཔལ་སྐྱིད་སྨན་ཁང་དུ་སྐྱེལ་བའི་ལམ་བར་དུ་ཙའུ་དབྱང་གིས་སྐལ་བཟང་དཔལ་སྐྱིད་ལ་སེམས་གསོ་གཏོང་བ་དང་ལྕག་སྐུལ་ཡང་ཡང་བྱས། སྨན་པའི་ས་ནས་སྐལ་བཟང་དཔལ་སྐྱིད་སྲོག་ཉེན་ལས་ཐར་བ་ཤེས་རྗེས་གཞི་ནས་སྨན་ཁང་ནས་ཁ་བྲལ། སྐལ་བཟང་དཔལ་སྐྱིད་ཀྱིས་ཙའུ་དབྱང་ལས་གནས་སུ་གྲོངས་པ་ཤེས་རྗེས་མགོ་བོ་དུད་ནས“ངོ་མ་ཕངས་དགོས་པ་ཞིག་རེད”ཅེས་ཡང་ཡང་བཤད།
བུ་གྲོངས་སྐབས་ལོ་60ལ་སླེབས་མ་ཐག་པའི་ཕ་ཙའུ་ཅི་ཧུའེ་ཡིས“ང་ཚོའི་ཁྱིམ་ཚང་གི་མི་རབས་གསུམ་གྱིས་བོད་དུ་མི་ཚེའི་ཆེས་རྩ་ཆེ་ཤོས་ཀྱི་ལོ་ཟླ་དེ་བསྐྱལ་ཡོད། ད་ཆ་བུ་གྲོངས་པས་ང་ཚོར་སེམས་སྡུག་ཚད་མེད་ཡོད་པ་ནི་བརྗོད་མི་དགོས་པ་ཞིག་རེད། འོན་ཀྱང་ངས་ཙའུ་དབྱང་གསོ་སྐྱོང་བྱས་པར་སེམས་གཏིང་ནས་སྤོབས་པ་སྐྱེ་གི་འདུག”ཅེས་བཤད།
ཁོང་གིས་རང་ཉིད་ཀྱི་སྤྱིར་བཏང་གི་མི་ཚེའི་ནང“མི་དམངས་སྤྱི་བདེས་མི་དམངས་ལ་ཞབས་འདེགས་ཞུ་བའི”བློ་སྟོབས་རབ་འཕེལ་གྱི་རོལ་དབྱངས་དཀྲོལ་ཡོད། ཁོང་གིས་རང་ཉིད་ཀྱི་ཆེས་རྩ་ཆེའི་ཚེ་སྲོག་ལ་བརྟེན་ནས་དུས་བདེ་བཏོད་པའི་ལམ་བུའི་ཐོག་འོད་སྟོང་འཕྲོ་བར་བྱས་ཡོད།
