ཉེ་ཆར། དྲ་གྲོགས་ཤིག་གིས་ལྷོ་ཁོ་རེ་ཡ་ནས་ནང་འདྲེན་བྱས་པའི་ཁ་ཚའི་ཐུག་པའི（火鸡面）སྤུས་ཚད་འགན་ལེན་དུས་ཡུན་མི་གཅིག་པའི་གནད་དོན་འདུག་ཅེས་བརྗོད་དེ། ཀྲུང་གོར་ཕྱིར་འཚོང་བྱས་པའི་ཐོན་རྫས་ཀྱི་སྤུས་ཚད་འགན་ལེན་དུས་ཡུན་ལོ་གཅིག་ཡིན་ཀྱང་རིགས་གཅིག་པའི་ཚོང་རྫས་ཀྱི་ལྷོ་ཁོ་རེ་ཡ་རང་ས་ནས་ཕྱིར་འཚོང་བྱས་པའི་སྤུས་ཚད་འགན་ལེན་དུས་ཡུན་ནི་ལོ་ཕྱེད་ཡིན་པ་རེད།
ཁ་ཚའི་ཐུག་པ་འདི་ནི་སྟབས་བདེའི་ཐུག་པ་ཞིག་ཡིན་པ་དང་། ལྷོ་ཁོ་རེ་ཡའི་ཕྱོགས་བསྡུས་སྒྱུ་རྩལ་དང་པོད་བདག་ཁ་ཤས་ཀྱིས“ཟས་རིགས་ཐད་གཏོང”བྱས་སྟབས། “ཧ་ཅང་ཁ་ཚ་བ”བྲིན་ཁ་རྒྱུག་རྐྱེན་གཙོ་བོར་གྱུར་པའི་སྟབས་བདེའི་ཐུག་པ་དེ“དྲ་ཐོག་ཏུ་སྐད་གྲགས་ཆོད་པའི”བཟའ་བཅའ་ཞིག་ཏུ་གྱུར་ནས་ན་གཞོན་འཛད་སྤྱོད་པ་རྣམས་ཀྱི་ཁྲོད་དུ་ཉོ་མཁན་ཧ་ཅང་མང་། ཉེ་ཆར་དེའི་སྤུས་ཚད་འགན་ལེན་དུས་ཡུན་མི་གཅིག་བའི་གནད་དོན་དེར་དྲ་གྲོགས་ཚོས་གཏམ་གླེང་སྣ་ཚོགས་སྤེལ་ཏེ་དོ་སྣང་ཆེན་པོ་བྱེད་བཞིན་ཡོད།
པེ་ཅིང་ན་གཞོན་ཚགས་པར་གྱི་གསར་འགོད་པས་ཤེས་རྟོགས་བྱུང་བར་གཞིགས་ན། སན་དབྱང་བཟའ་བཅའ་ཞེས་པའི་ལྷོ་ཁོ་རེ་ཡའི་གཞུང་ཕྱོགས་དྲ་ཚིགས་སྟེང་དུ་ཁ་ཚའི་ཐུག་པའི་ཐོན་རྫས་དེ་མཚམས་སྦྱོར་བྱེད་སྐབས། ལྷོ་ཁོ་རེ་ཡའི་ཡིག་རིགས་ཀྱིས་ཐོན་རྫས་ཀྱི་སྤུས་ཚད་འགན་ལེན་དུས་ཡུན་ཟླ6ཡིན་ཞེས་བྲིས་འདུག ཡིན་ནའང་དྲ་ཚིགས་དེ་རྒྱ་ཡིག་དང་དབྱིན་ཡིག་གི་པར་གཞིར་བརྗེས་རྗེས། ཐོན་རྫས་དེ་མཚམས་སྦྱོར་བྱས་པའི་ནང་དོན་ལ་འགྱུར་ལྡོག་ཕྱིན་པ་མ་ཟད། ཐོན་རྫས་རིགས་གཅིག་པའི་སྤུས་ཚད་འགན་ལེན་དུས་ཡུན་ཟླ12ཡིན་པ་རེད།
གཞུང་ཕྱོགས་དྲ་ཚིགས་སྟེང་ཐོན་རྫས་ཀྱི་སྤུས་ཚད་འགན་ལེན་དུས་ཡུན་མི་གཅིག་པ་མ་ཟད། པེ་ཅིང་ན་གཞོན་ཚགས་པར་གྱི་གསར་འགོད་པས་ཤེས་རྟོགས་བྱུང་བར་གཞིགས་ན། སན་དབྱང་བཟའ་བཅའ་དེ་ལྷོ་ཁོ་རེ་ཡའི་གཞུང་ཕྱོགས་ཀྱི་ཕྱིར་ཚོང་དྲ་ཐོག་ཏུ་སྣོད་ནང་བླུགས་པའི་ཁ་ཚའི་ཐུག་པའི་ཐོན་རྫས་དེའི་སྐོར་གྱི་དྲི་བ་དྲིས་ལན་ཁྲོད། ཕྱིར་ཚོང་ཕྱོགས་ཀྱིས་ཁ་ཚའི་ཐུག་པ་དེའི་སྤུས་ཚད་འགན་ལེན་དུས་ཡུན་ནི་ཐོན་སྐྱེད་བྱས་ཉིན་ནས་ཟླ6བར་ཡིན་ཞེས་ལན་གསལ་པོར་བརྒྱབ་ཡོད།
འོན་ཀྱང་རྒྱལ་ནང་གི་གློག་རྡུལ་ཚོང་དོན་སྟེགས་བུའི་སན་དབྱང་བཟའ་བཅའི་ཚོང་རྟགས་ཚོང་ཁང་ནང་ཚོང་ཟོག་དེར་མཚམས་སྦྱོར་གསལ་པོར་བྱས་དོན། ཁ་ཚའི་ཐུག་པའི་ཐོན་རྫས་དེའི་སྤུས་ཚད་འགན་ལེན་དུས་ཡུན་ནི་ཟླ12ཡིན། ཚོང་ཁང་དེའི་ཚོང་འགྲུལ་ཞབས་ཞུ་བས་ཀྱང་ཐོན་རྫས་དེ་ལྷོ་ཁོ་རེ་ཡ་ནས་ཐོན་སྐྱེད་བྱེད་ཀྱིན་ཡོད་པ་དང་། བཟོ་གྲྭས་ཀྲུང་གོའི་ཁྲིམས་སྲོལ་གྱི་བླང་བྱ་གཞིར་བཟུང་སྟེ། ཐད་ཀར་རྒྱ་ཡིག་གི་ཐུམ་སྒྲིལ་པར་འདེབས་བྱ་རྒྱུར་ཇུས་འགོད་བྱེད་ཀྱིན་ཡོད་ཅེས་བཤད། པེ་ཅིང་ན་གཞོན་ཚགས་པར་གྱི་གསར་འགོད་པས་དེའི་ཞིབ་ཕྲའི་སྤུས་ཚད་འགན་ལེན་དུས་ཡུན་གྱི་འབྲེལ་ཡོད་གནད་དོན་འདྲི་རྩད་བྱེད་སྐབས། ཚོང་འགྲུལ་ཞབས་ཞུ་བས“ཚོང་ཟོག་གི་ཞིབ་ཕྲའི་གནས་ཚུལ་ཐུམ་སྒྲིལ་ལ་ལྟ་དགོས”ཞེས་བཤད།
སྟབས་བདེ་ཐུག་པའི་སྤྱིར་བཏང་གི་སྤུས་ཚད་འགན་ལེན་དུས་ཡུན་ག་ཚོད་ཡིན་ནམ། ལས་རིགས་གཅིག་པའི་མི་སྣས་སྟབས་བདེ་ཐུག་པ་མང་ཆེ་བ་སྣུམ་བཙོས་རིགས་ཀྱི་བཟའ་བཅའི་ཁོངས་སུ་གཏོགས་པ་ཡིན་ཟེར། སྣུམ་བཙོས་བྱེད་པའི་བརྒྱུད་རིམ་ཁྲོད་སྣུམ་ཚིལ་དྲོད་ཚད་མཐོན་པོས་ཚ་སྣོན་བྱས་པ་བརྒྱུད་ཆུ་འབྱེད་འགྱུར་འབྱུང་དང་། དེ་རྗེས་འདྲེས་འགྱུར་རྫས་ལ་སྦྱར་ཏེ་ཁ་གྱེས་ནས་ཚིལ་སྐྱུར་འཕར་སྣོན་བྱུང་བ་དང་འབྲེལ་རྫས་འགྱུར་དམིགས་ཚད་ཇེ་མཐོར་སོང་ཞིང་། ཐོན་རྫས་འཁོར་རྒྱུག་གསོག་འཇོག་བྱེད་པའི་བརྒྱུད་རིམ་ཁྲོད་སྟབས་བདེའི་ཐུག་པའི་ནང་འདུས་པའི་ཚིལ་རིམ་བཞིན་དབྱང་འགྱུར་བྱས་ནས་དེའི་གྲངས་ཐང་གི་དམིགས་ཚད་ཟམ་མི་ཆད་པར་འཕར་སྣོན་བྱུང་བཞིན་ཡོད། ལྷག་པར་དུ་དབྱར་ཁར་དྲོད་ཚད་ཇི་ལྟར་མཐོ་ན་དབྱང་འགྱུར་དེ་ལྟར་མགྱོགས་པོ་ཡོད། དེར་བརྟེན་སྟབས་བདེའི་ཐུག་པའི་བཟོ་གྲྭ་མང་ཆེ་བས་སྤུས་ཚད་འགན་ལེན་དུས་ཡུན་ཟླ6ཙམ་ཡིན་པར་གཏན་འཁེལ་བྱས་པ་དང་། ཡུན་རིང་ཉར་ཚགས་བྱས་པས་རྫས་འགྱུར་དམིགས་ཚད་ཚད་ལས་བརྒལ་བར་སྔོན་འགོག་བྱེད་བཞིན་ཡོད་པ་རེད། རྒྱུས་ལོན་བྱུང་བ་ལྟར་ན། མིག་སྔར་ཁང་ཧྲི་ཧྥུ།(康师傅)དང་། ཐུང་དབྱི།(统一) རི་ཆིང་།(日清) ནུང་ཞིན།(农心) ཅིན་མའེ་ལང་།(今麦郎) པའེ་ཞང(白象)སོགས་ཚོང་རྟགས་མང་པོའི་སྟབས་བདེའི་ཐུག་པའི་སྤུས་ཚད་འགན་ལེན་དུས་ཡུན་ཚང་མ་ཟླ6ཡིན།
གསར་འགོད་པས་རྩོམ་ཡིག་སྤེལ་བ་ནས་ད་བར་དུ་སན་དབྱང་བཟའ་བཅའི་ཕྱོགས་ནས་ཁ་ཚའི་ཐུག་པའི་སྤུས་ཚད་འགན་ལེན་དུས་ཡུན་མི་གཅིག་པའི་གནད་དོན་དེར་གནས་སྐབས་སུ་ལན་བརྒྱབ་མེད་པ་རེད།
