ཕྱི་ནས་ལོག་ཡོང་བའི་གནས་ཚུལ་སྙན་སེང་མ་ཞུས་པས་ཁྲིམས་ཆད་ཕོག་འདུག
སྤེལ་དུས 2022-04-19
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
རྩོམ་པ་པོ།
ཉེ་ཆར། མཚོ་སྔོན་ཞིང་ཆེན་དཔའ་ལུང་རྫོང་སྤྱི་བདེ་ཅུས་བདེ་སྐྱོང་རུ་ཆེན་གྱིས་མི་དམངས་སྲིད་གཞུང་ནས་ཛ་དྲག་གནས་བབ་འོག་ཡོངས་བསྒྲགས་བྱས་པའི་གཏན་འབེབས་དང་བཀའ་རྒྱ་ལག་བསྟར་མ་བྱས་པའི་ཁྲིམས་འགལ་བྱ་སྤྱོད་སྤེལ་མཁན་གྱི་གྱོད་དོན་ཞིག་རྩད་གཅོད་བྱས་ཏེ། ཁྲིམས་འགལ་བྱ་སྤྱོད་སྤེལ་མཁན་མཱ་དབྱི་ཆེ་གེ་མོ་ཁྲིམས་ལྟར་སྲིད་འཛིན་བཀག་ཉར་བྱས་འདུག
ཞིབ་བཤེར་བྱས་པ་བརྒྱུད། དཔའ་ལུང་རྫོང་ཡར་རྐ་གྲོང་རྡལ་གྱི་གྲོང་ཚོ་ག་གེ་མོའི་གྲོང་མི་མཱ་དབྱི་ཆེ་གེ་མོ་སྤྱི་ཟླ་4པའི་ཚེས་9ཉིན་ཀོང་ཏུང་ཞིང་ཆེན་ཀོང་ཀྲོའུ་གྲོང་ཁྱེར་ནས་མེ་འཁོར་ལ་བསྡད་དེ་མཚོ་སྔོན་དུ་ཕྱིར་ལོག་པ་དང་། ཕྱི་ཉིན་ཟི་ལིང་དུ་འབྱོར་རྗེས་སྒེར་འཁོར་ལ་བསྡད་དེ་དཔའ་ལུང་དུ་ལོག་ཡོད། ཁོས་རིམས་ནད་ཀྱི་འགག་སྒོ་སྲུང་མིའི་ཞིབ་བཤེར་ལ་གཡོལ་ཆེད་མྱུར་བགྲོད་གཞུང་ལམ་གྱི་ལམ་མདོ་རུ་རླངས་འཁོར་ལས་བབས་ཏེ་སྒྲོམ་སྐྱོར་བརྒལ་ནས་ཡར་རྐ་གྲོང་རྡལ་ཁྲེང་ཁྲེ་གྲོང་ཚོར་ཡོད་པའི་རང་ཁྱིམ་དུ་ལོག་པ་མ་ཟད། དུས་ཐོག་ཏུ་དེ་གའི་གྲོང་ཚོ་ཨུ་ལྷན་དང་གྲོང་རྡལ་སྲིད་གཞུང་ལ་ཕྱིར་ལོག་པའི་གནས་ཚུལ་སྙན་སེང་ཞུས་མེད་པ་རེད། དེའི་རྗེས་དཔའ་ལུང་རྫོང་རིམས་ནད་སྔོན་འགོག་ཚོད་འཛིན་བཀོད་འདོམས་པུའུ་ནས་ཞིང་ཆེན་ཕྱིར་ཡོད་པའི་མི་སྣར་ཞིབ་བཤེར་བྱེད་སྐབས་མཱ་དབྱི་ཆེ་གེ་མོ་ཁྱིམ་དུ་ཡོད་པ་རྟོགས་པས། འཕྲལ་མར་གཅིག་བསྡུས་ལོགས་དབྱེ་ས་ཚིགས་སུ་བསྐྱལ་ནས་གཅིག་བསྡུས་ལོགས་དབྱེ་བྱས་པ་རེད།
མིག་སྔར། མཱ་དབྱི་ཆེ་གེ་མོས་མི་དམངས་སྲིད་གཞུང་ནས་ཛ་དྲག་གནས་བབ་འོག་ཡོངས་བསྒྲགས་བྱས་པའི་གཏན་འབེབས་དང་བཀའ་རྒྱ་ལག་བསྟར་མ་བྱས་པའི་རྐྱེན་གྱིས་དཔའ་ལུང་རྫོང་སྤྱི་བདེ་ཅུས་ཀྱིས་སྲིད་འཛིན་བཀག་ཉར་གྱི་ཆད་པ་བཅད་ཡོད།
སྤྱི་བདེའི་དྲན་སྐུལ།
ཞིང་ཆེན་ཕྱི་ནས་མཚོ་སྔོན་དུ་ལོག་མཁན་ནམ་མཚོ་སྔོན་དུ་ཡོང་མཁན་སུ་ཡིན་ཡང་ངེས་པར་དུ་མ་འབྱོར་གོང་ངམ་འབྱོར་མ་ཐག་སྡོད་གནས་ཀྱི་སྡེ་ཁུལ་དང་། ཡང་ན་རང་ཉིད་ཡོད་སའི་ལས་ཁུངས་སམ་སྡོད་སའི་མགྲོན་ཁང་བཅས་ལ་སྙན་སེང་ཞུས་ཏེ་བདེ་ཐང་དོ་དམ་བྱ་དགོས། རང་འགུལ་ངང་སྙན་སེང་མ་ཞུས་པའམ་རྐང་བཙུགས་ནས་གནས་ཚུལ་སྦ་གསང་བྱས་ཚེ། སྤྱི་བདེ་ལས་ཁུངས་ཀྱིས་གང་དེའི་བཅའ་ཁྲིམས་ཀྱི་འགན་འཁྲི་བདའ་འདེད་ནན་པོ་བྱ་རྒྱུ་རེད་འདུག
