ཀྲུང་གོའི་བོད་ལྗོངས་དྲ་བ། > ཁྲིམས་ལུགས། > གསར་ཤོས།

སྤྱི་བདེ་པུའུ་ཡིས་རྒན་གསོའི་ཁ་བསླུས་ལ་རྡུང་རྡེག་དང་བཅོས་སྒྲིག་བྱེད་པའི་ཆེད་དོན་བྱ་སྤྱོད་སྤེལ་རྒྱུའི་བཀོད་སྒྲིག་བྱས་པ།

སྤེལ་དུས 2022-04-21 ཡོང་ཁུངས། མི་དམངས་ཉིན་རེའི་ཚགས་པར། རྩོམ་པ་པོ།
  གསར་འགོད་པར་སྤྱི་བདེ་པུའུ་ནས་ཤེས་རྟོགས་བྱུང་བར། ཚེས་19ཉིན་རྒྱལ་ཡོངས་ཀྱི་སྤྱི་བདེ་ལས་ཁུངས་ཀྱིས་རྒན་གསོའི་ཁ་བསླུས་ལ་རྡུང་རྡེག་དང་བཅོས་སྒྲིག་བྱེད་པའི་ཆེད་དོན་བྱ་སྤྱོད་ཀྱི་བཀོད་སྒྲིག་ཚོགས་འདུ་འཚོགས་ཤིང་། ཚོགས་འདུའི་ཐོག་རིམ་ཁག་སྤྱི་བདེ་ལས་ཁུངས་ཀྱིས་རྒན་གསོའི་ཁ་བསླུས་ཀྱི་ཁྲིམས་འགལ་ཉེས་གསོག་ལ་ཁྲིམས་ལྟར་རྡུང་རྡེག་ཚ་ནན་དང་བཅོས་སྒྲིག་བྱས་ནས་རྒན་རྒོན་གྱི་ཁྲིམས་མཐུན་ཁེ་དབང་སྲུང་སྐྱོང་ཏན་ཏིག་བྱེད་དགོས་པའི་བཀོད་སྒྲིག་བྱས་པ་རེད།
  སྤྱི་བདེ་པུས་བླང་བྱ་བཏོན་དོན། རྡུང་རྡེག་བཏང་ནས་ལམ་བུ་གཤོང་བ་དང་བྱེད་ཐབས་སྣ་མང་སྤྱད་དེ་རྡུང་རྡེག་དང་བཅོས་སྒྲིག་ལས་དོན་གྱི་ཚ་རླབས་གང་མགྱོགས་འཕྱུར་བར་བྱེད་དགོས། ཁུངས་སྣེ་གྲལ་བཤེར་བྱེད་ཤུགས་ཆེ་རུ་བཏང་ནས་མང་ཚོགས་རྒྱ་ཁྱབ་ངང་སྐུལ་སློང་བྱེད་པ་དང་སྡེ་ཚན་དབར་མཐུན་སྦྱོར་བྱེད་ཤུགས་ཆེ་རུ་བཏང་སྟེ་རྒན་གསོའི་ཁ་བསླུས་ཀྱི་ཁྲིམས་འགལ་ཉེས་གསོག་གི་ཁུངས་སྣེ་དུས་ཐོག་ཏུ་ཤེས་རྟོགས་དང་། ཞིབ་དཔྱད། ཐག་གཅོད་བཅས་བྱེད་དགོས། “རྒན་གསོའི་ཞབས་ཞུ”མཁོ་འདོན་དང་། “རྒན་གསོའི་རྣམ་གྲངས”ལ་མ་འཇོག “རྒན་གསོའི་ཐོན་རྫས”ཕྱིར་ཚོང་། “ཁང་བརྟེན་རྒན་གསོ”ཟེར་བ། “རྒན་གསོའི་འགན་བཅོལ”ཚབ་གཉེར། “རྒན་གསོའི་རོཌ་སྐྱོར”སོགས་ལ་ཁ་གཡར་ནས་ཁ་བསླུས་རྒྱག་པ་དང་། མ་རྩ་བསྡུ་རུབ་ཀྱིས་ཁ་བསླུས་རྒྱག་པ། སྤྱི་དམངས་ཀྱི་བཅོལ་དངུལ་ཁྲིམས་འགལ་ངང་བསྡུ་ལེན་བྱེད་པ། བརྒྱུད་འཚོང་བྱེད་སྒོ་སྒྲིག་འཛུགས་དང་འགོ་ཁྲིད་བྱེད་པ། གན་རྒྱ་བཞག་ནས་ཁ་བསླུས་རྒྱག་པ། ཚོང་ཟོག་རྫུན་ལྷད་ཅན་བཟོ་ཚོང་བྱེད་པ། སྨན་རྫུན་མ་དང་སྤུས་ཞན་ཐོན་སྐྱེད་དང་། ཕྱིར་ཚོང་། མཁོ་འདོན་སོགས་བྱས་ནས་རྒན་རྒོན་གྱི་རྒྱུ་ནོར་དང་ཁེ་དབང་ལ་གནོད་འཚེ་གཏོང་བའི་ཁྲིམས་འགལ་ཉེས་གསོག་གི་བྱེད་སྤྱོད་སྣ་ཚོགས་གཙོ་གནད་དུ་བྱས་ནས་གྱོད་གཞི་རྩད་གཅོད་ཀྱི་འགག་སྒྲོལ་གཏིང་ཟབ་བྱས་ཏེ་ནུས་ཤུགས་ཡོད་རྒུས་ད་ཡོད་ཀྱི་གྱོད་གཞི་གང་མགྱོགས་རྩད་གཅོད་དང་། ཕུང་གསོག་ཐེབས་པའི་གྱོད་གཞི་འགག་སྒྲོལ། བྲོས་བྱོལ་དུ་སོང་བའི་ཉེས་གསོག་དོགས་ཅན་འཛིན་བཟུང་བཅས་བྱེད་དགོས། གྱོད་གཞིའི་གནས་ཚུལ་ཚབས་ཆེ་བ་དང་ཤུགས་རྐྱེན་ངན་པའི་གྱོད་གཞི་གཙོ་བོ་ཁག་གཅིག་མིང་སྦྱར་ལྟ་སྐུལ་བྱས་ཏེ་འགན་འཁྲི་དམ་ནན་དུ་གཏོང་བ་དང་གྱོད་གཞི་རྩད་གཅོད་དང་འགག་སྒྲོལ་ལ་སྐུལ་འདེད་གཏོང་བར་ཕན་འབྲས་དངོས་ཐོན་པ་བྱེད་དགོས། རྒན་གསོའི་ཁ་བསླུས་ཀྱི་ཉེས་གསོག་ཚོགས་པའི་ཁྲོད་གནས་སྲིད་པའི་ནག་གཤེད་ཕྱོགས་གཏོགས་ཤེས་རྟོགས་དང་དབྱེ་འབྱེད་བྱ་རྒྱུར་དོ་སྣང་བྱས་ཏེ་རྒྱུན་རྣམ་ཅན་གྱི་ནག་སེལ་གཤེད་བཅོམ་འཐབ་རྩོད་དང་ཟུང་འབྲེལ་བྱས་ནས་ཁྲིམས་ལྟར་ཆད་པ་ནན་པོ་གཅོད་དགོས། ཁྲིམས་འཛིན་ནན་པོ་དང་ཚད་ལྡན་བཟོས་ནས་ཉེན་ཁ་འགོག་ཟོན་དང་བསལ་ཏེ་བཅའ་ཁྲིམས་ཀྱི་ཕན་འབྲས་དང་། ཆབ་སྲིད་ཀྱི་ཕན་འབྲས། སྤྱི་ཚོགས་ཀྱི་ཕན་འབྲས་བཅས་གཅིག་གྱུར་ཡོང་བའི་འགན་ལེན་བྱེད་དགོས། དྲིལ་བསྒྲགས་འགོག་ཟོན་ལ་ཤུགས་སྣོན་བརྒྱབ་སྟེ་རྒན་གསོའི་ཁ་བསླུས་ཀྱི་ཁྲིམས་འགལ་ཉེས་གསོག་གི་དཔེ་མཚོན་གྱོད་དཔེ་དྲིལ་བསྒྲགས་རྒྱ་ཁྱབ་བྱས་ནས་ཉེས་གསོག་གི་གཡོ་ཇུས་གཤོམ་སྟངས་དམར་འདོན་བྱས་ཏེ་རྒན་རྒོན་གྱི་ཁ་བསླུས་དབྱེ་འབྱེད་དང་འགོག་ཟོན་གྱི་ནུས་པ་ཆེ་རུ་གཏོང་དགོས། ཉེས་གསོག་དོགས་ཅན་གྱི་མ་དངུལ་འཁོར་རྒྱུག་ཐད་ཞིབ་བཤེར་མཐར་ཕྱིན་བྱས་ནས་བཙོག་དངུལ་འདེད་ལེན་བྱས་ཏེ་གནོད་འཚེ་ཕོག་མཁན་མང་ཚོགས་ཀྱི་གྱོང་གུན་ཆུང་དུ་གཏོང་གང་ཐུབ་བྱེད་དགོས། རྩ་འཛུགས་ཀྱི་བཀོད་སྒྲིག་དང་། ཕན་ཚུན་གཞོགས་འདེགས། ལྟ་སྐུལ་མཛུབ་ཁྲིད་དང་ཞིབ་དཔྱད་བཅས་བྱེད་ཤུགས་ཆེ་རུ་བཏང་སྟེ་བཀོད་སྒྲིག་དང་ལས་དོན་གྱི་བྱེད་ཐབས་ཁག་ལ་དམ་འཛིན་ཏན་ཏིག་དང་ཞིབ་ཕྲ་བྱེད་པ་དང་ཕུགས་ཕན་ལམ་སྲོལ་འཐུས་སྒོ་ཚང་དུ་བཏང་ནས་ཆེད་དོན་བྱ་སྤྱོད་ལ་ཕན་འབྲས་དངོས་ཐོན་པའི་འགན་ལེན་བྱེད་དགོས།
  ཤེས་རྟོགས་བྱུང་བར་གཞིགས་ན། 2017ལོ་ནས་བཟུང་རྒྱལ་ཡོངས་ཀྱི་སྤྱི་བདེ་ལས་ཁུངས་ཀྱིས་རྒན་གསོའི་ཁ་བསླུས་གྱོད་གཞི་4500ལྷག་ཙམ་རྩད་བཅད་པ་དང་ཉེས་གསོག་དོགས་ཅན་ཁྲི་1.1ལྷག་ཙམ་འཛིན་བཟུང་བྱས་པ་རེད།