ལྷ་ས་གྲོང་ཁྱེར་གྱིས་འཕྲལ་སྡོམ་རོགས་སྐྱོབ་མཉམ་འགུལ་ཚན་པའི་མཉམ་འབྲེལ་ཚོགས་འདུ་འཚོགས་པ།
སྤེལ་དུས 2022-04-22
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ།
རྩོམ་པ་པོ།
ཉེ་ཆར། ལྷ་ས་གྲོང་ཁྱེར་གྱིས་འཕྲལ་སྡོམ་རོགས་སྐྱོབ་མཉམ་འགུལ་ཚན་པའི་མཉམ་འབྲེལ་ཚོགས་འདུ་འཚོགས་ཤིང་། དེའི་དམིགས་ཡུལ་ནི་འཕྲལ་སྡོམ་རོགས་སྐྱོབ་མཉམ་འགུལ་ཚན་པ་ཁག་དབར་སྤེལ་རེས་བྱེད་ཤུགས་ཆེ་རུ་གཏོང་བ་དང་། གྲོང་ཁྱེར་ཡོངས་ཀྱིས་ཐོལ་བྱུང་དོན་རྐྱེན་ལ་ཁ་གཏད་གཅོག་པའི་ནུས་པ་ཆེ་རུ་བཏང་སྟེ། མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་འགན་ལེན་ཏན་ཏིག་བྱེད་རྒྱུ་དེ་རེད།
ཚོགས་འདུའི་ཐོག་ལྷ་ས་གྲོང་ཁྱེར་འཕྲལ་སྡོམ་དོ་དམ་ཅུས་ཀྱི་འགན་འཁུར་བས་2021ལོའི་འཕྲལ་སྡོམ་ལས་དོན་སྤེལ་ཚུལ་ངོ་སྤྲོད་བྱས་པ་དང་སྦྲགས། གོམ་སྟབས་རྗེས་མའི་ལས་དོན་བཀོད་སྒྲིག་བྱས་ཤིང་། ལྷ་ས་ཉེན་ཟོན་བདེ་སྲུང་དམག་ཁུལ་ཁང་དང་། དྲག་ཆས་ཉེན་རྟོག་ལྷ་ས་ཉིང་ལག་རུ་ཁག ལྷ་ས་གྲོང་ཁྱེར་ནགས་ཚལ་མེ་ཟོན་རུ་ཆེན་སོགས་འབྲེལ་ཡོད་ཚན་པའི་འགན་འཁུར་བས་དོན་དངོས་དང་ཟུང་འབྲེལ་བྱས་ཏེ། འཕྲལ་སྡོམ་ལས་དོན་ཇི་ལྟར་བྱས་ནས་ཡག་པོ་སྒྲུབ་དགོས་པའི་སྐོར་ལ་སྤེལ་རེས་གཏིང་ཟབ་བྱས་པ་རེད།
ཚོགས་འདུའི་ཐོག་མཉམ་འགུལ་ཚན་པ་ཁག་ལ་དམག་དཔུང་དང་རྒྱལ་ཁབ་ཀྱི་ཕྱོགས་བསྡུས་རོགས་སྐྱོབ་སྟོབས་ཤུགས་འཕྲལ་སྒྲུབ་རུ་ཁག་དང་གཙོ་ཤུགས་དམག་གི་ནུས་པ་འདོན་སྤེལ་གང་ལེགས་བྱེད་པ་དང་། ཐོལ་བྱུང་དོན་རྐྱེན་འཕྲལ་སྡོམ་དཀའ་སེལ་གྱི་ལས་འགན་ལྕི་པོའི་ནང་ཞུགས་པ་དང་ལེགས་སྒྲུབ་བྱེད་པ། ཐོལ་བྱུང་དོན་རྐྱེན་ལ་ཁ་གཏད་གཅོག་པའི་རོགས་སྐྱོབ་ཐག་གཅོད་ལས་ཀའི་བྱེད་པོའི་འགན་འཁྲི་ཏན་ཏིག་སྒྲུབ་པ་བཅས་བྱེད་དགོས་པ་དང་། རོགས་སྐྱོབ་སྟོབས་ཤུགས་ཁག་གིས་རྒྱུན་གཏན་གྱི་འཕྲལ་སྡོམ་ནང་སྦྱོང་དང་སྦྱོང་བརྡར་བྱེད་ཤུགས་ཆེ་རུ་གཏོང་བ་དང་འབྲེལ། རང་ངོས་ཀྱི་ལེགས་ཆ་དང་ཟུང་འབྲེལ་གྱིས་ཁེ་ལས་དང་གཞི་རིམ་གྱི་ཆེད་ལས་མིན་པའི་འཕྲལ་སྡོམ་རོགས་སྐྱོབ་དཔུང་ཁག་གི་སྦྱོང་བརྡར་ལས་དོན་ལ་ཤུགས་སྣོན་བརྒྱབ་ནས། གྲོང་ཁྱེར་ཡོངས་ཀྱི་འཕྲལ་སྡོམ་རོགས་སྐྱོབ་ཐག་གཅོད་བྱེད་ནུས་ཕྱོགས་ཡོངས་ནས་ཆེ་རུ་གཏོང་དགོས་པ། འབྲེལ་གཏུག་མཐུན་སྦྱོར་ལ་ཤུགས་སྣོན་རྒྱག་པ་དང་། གཞོགས་འདེགས་ཧུར་ཐག་བྱེད་པ། ཕན་ཚུན་སྐུལ་འདེད་གཏོང་བ། འཕྲལ་སྡོམ་རོགས་སྐྱོབ་མཉམ་འགུལ་གྱི་ལས་ཕྱོད་ཆེ་རུ་གཏོང་བ་བཅས་བྱས་ཏེ། གྲོང་ཁྱེར་ཡོངས་ཀྱི་འཕྲལ་སྡོམ་རོགས་སྐྱོབ་ལས་དོན་གྱི་རྣམ་པ་གསར་པ་གཏོད་དགོས་པའི་བླང་བྱ་བཏོན་པ་རེད།
