ཁྲིམས་ཆད་འཁུར་བཞིན་པའི་ཉེས་ཅན་23593དམིགས་བསལ་བཙོན་གྲོལ་བཏང་བ།
སྤེལ་དུས 2020-05-27
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས།
རྩོམ་པ་པོ།
ཟླ་5ཚེས་25ཉིན་རྒྱལ་ཡོངས་མི་དམངས་འཐུས་ཚོགས་སྐབས་བཅུ་གསུམ་པའི་ཚོགས་འདུ་ཐེངས་གསུམ་པས་ཚང་འཛོམས་གྲོས་ཚོགས་ཐེངས་གཉིས་པ་འཚོགས་ནས་རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་ལི་ཀྲན་ཧྲུའུ་ཡིས་གནང་བའི་རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ལས་དོན་སྙན་སྒྲོན་གསན་པ་རེད།
སྙན་ཞུའི་ནང་བསྟན་དོན། ཀྲུང་གོ་གསར་པ་དབུ་བརྙེས་ནས་ལོ་ངོ་70འཁོར་བའི་སྐབས་སུ། ཏང་ཀྲུང་དབྱང་གི་འགོ་ཁྲིད་འོག་རྩ་ཁྲིམས་ཀྱི་གཏན་འབེབས་བཟུང་ནས། རྒྱུན་ལས་ཨུ་ཡོན་ལྷན་ཁང་གིས་རྒྱལ་ཁབ་ཀྱི་བྱས་རྗེས་གཟེངས་རྟགས་དང་རྒྱལ་ཁབ་ཀྱི་གཟི་བརྗིད་མཚན་སྙན་སྤྲོད་རྒྱུའི་སྐོར་གྱི་ཆོད་དོན་བཞག་པ་དང་། ཀྲུའུ་ཞི་ཞི་ཅིན་ཕིང་གིས་ཀྲུའུ་ཞིའི་བཀའ་རྒྱར་མཚན་རྟགས་བཀོད་ནས། རྒྱལ་ཁབ་ཀྱི་གཟི་བརྗིད་མཚན་སྙན་ཆེ་ཤོས་དེ་ཀྲུང་གོ་གསར་པ་འཛུགས་སྐྲུན་དང་འཕེལ་རྒྱས་ཆེད་བྱས་རྗེས་གཟེངས་སུ་ཐོན་པ་འཇོག་མཁན་ཕུལ་བྱུང་མི་སྣ་36དང་ཀྲུང་ཕྱིའི་སྤེལ་རེས་མཉམ་ལས་ལ་སྐུལ་འདེད་གཏོང་ཆེད་ལེགས་སྐྱེས་གཟེངས་སུ་ཐོན་པ་འབུལ་མཁན་རྒྱལ་སྤྱིའི་མཛའ་གྲོགས་མི་སྣ་6ལ་སྤྲད་པ་རེད། དེ་ནི་ད་ལྟ་ལག་བསྟར་བྱེད་བཞིན་པའི་རྩ་ཁྲིམས་ལག་བསྟར་བྱས་ཚུན་རྒྱལ་ཁབ་ཀྱི་བྱས་རྗེས་གཟེངས་རྟགས་གཅིག་སྡུད་ཐོག་སྤྲོད་ཐེངས་དང་པོ་དེ་ཡིན་པ་རེད།
ཁྲིམས་ཆད་འཁུར་བཞིན་པའི་ཉེས་ཅན་ཁག་ཅིག་དམིགས་བསལ་བཙོན་གྲོལ་གཏོང་རྒྱུའི་སྐོར་གྱི་ཆོད་དོན་བཞག་པ་དང་། ཀྲུའུ་ཞི་ཞི་ཅིན་ཕིང་གིས་དམིགས་བསལ་བཙོན་གྲོལ་གཏོང་བའི་བཀའ་རྒྱར་མཚན་རྟགས་བཀོད་དེ་ཁྱབ་བསྒྲགས་གནང་བ་རེད། ཁྲིམས་བཀོད་གོ་རིམ་ནན་པོ་བརྒྱུད་དེ། ཁྲིམས་ཆད་འཁུར་བཞིན་པའི་ཉེས་ཅན་རིགས་དགུ་ཡི་བཙོན་པ་23593དམིགས་བསལ་བཙོན་གྲོལ་བཏང་བ་དང་། དེ་ནི་རྩ་ཁྲིམས་ནང་གཏན་འབེབས་བྱས་པའི་དམིགས་བསལ་བཙོན་གྲོལ་ལམ་ལུགས་ལ་ཡང་བསྐྱར་ལག་ལེན་གལ་ཆེན་བྱས་པ་ཞིག་རེད།