བོད་ལྗོངས་ཀྱིས་མཉམ་འབྲེལ་དྲ་རྒྱ་དང་སྲིད་དོན་ཞབས་ཞུ་ཟུང་འབྲེལ་ངང་དམངས་ཕན་བྱ་བའི་ཆུ་ཚད་ཇེ་མཐོར་གཏོང་རྒྱུ་རེད།
སྤེལ་དུས 2020-06-12
ཡོང་ཁུངས། བོད་ལྗོངས་འཕྲིན་དྲ།
རྩོམ་པ་པོ།
གློད་སྡོམ་ཞབས་གསུམ་གྱི་བསྒྱུར་བཅོས་གཏིང་ཟབ་བྱེད་རྒྱུའི་སྐོར་གྱི་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་མཛད་ཇུས་བཀོད་སྒྲིག་དོན་འཁྱོལ་གཏིང་ཟབ་བྱས་ནས། རང་ལྗོངས་སུ་མཉམ་འབྲེལ་དྲ་རྒྱ་དང་སྲིད་དོན་ཞབས་ཞུ་ཟུང་འབྲེལ་གྱི་ལས་དོན་གཏིང་ཟབ་སྤེལ་རྒྱུར་སྐུལ་འདེད་གཏོང་ཆེད། སྤྱི་ཚེས9ཉིན། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ། རང་སྐྱོང་ལྗོངས་ཀྱི་ཀྲུའུ་ཞི་ཆེ་དགྲ་ལྷས་ལྷ་སའི་རིམ་གསུམ་སྲིད་དོན་ཞབས་ཞུའི་ཚོམས་ཆེན་དུ་བརྟག་ཞིབ་གནང་བར་ཕེབས་པ་མ་ཟད་ཚོགས་འདུ་གཙོ་སྐྱོང་ཡང་གནང་བ་རེད། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ། རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཀྲོང་ཡན་དང་། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་དབང་ཧའེ་ཀྲའུ་དང་ཀྲང་ཧུང་པོའོ་བཅས་ཚོགས་འདུར་ཕེབས་ཡོད།
ཚོགས་འདུའི་ཐོག ཆེ་དགྲ་ལྷས་ལྗོངས་ཡོངས་སུ་མཉམ་འབྲེལ་དྲ་རྒྱ་དང་སྲིད་དོན་ཞབས་ཞུ་ཟུང་འབྲེལ་གྱི་ལས་ཀར་གདེང་འཇོག་གང་ལེགས་གནང་བ་དང་སྦྲགས། རིམ་ཁག་ཚན་པ་ཁག་གིས་སྔོན་ཐོན་ལ་ལྟ་བསྡུར་བྱེད་པ་དང་དམིགས་ཚད་དང་བསྟུན་ནས་ད་ཡོད་མ་ལག་སྦྲེལ་མཐུད་གཏིང་ཟབ་བྱེད་མགྱོགས་སུ་བཏང་སྟེ། ལྗོངས་ཡོངས་སུ་དྲ་བ་གཅིག་འགྱུར་ཆགས་རྒྱུར་སྐུལ་འདེད་གཏོང་དགོས་པ་དང་། ཁེ་ལས་ཀྱི་གྲངས་གཞི་མཉམ་སྤྱོད་གཏིང་ཟབ་ཐུབ་རྒྱུར་སྐུལ་འདེད་གཏོང་དགོས་པ། དུས་ཚོད་དང་ལྷུ་ཚིགས། རྒྱུ་ཆ་སོགས་ལས་རིམ་སྟབས་བདེར་བཏང་སྟེ་ཚན་པ་ཁུ་བསྡུ་དང་དབང་ཆ་གཤམ་སྤྲོད་དོན་འཁྱོལ་ཡག་པོ་ཐུབ་རྒྱུར་སྐུལ་འདེད་གཏོང་དགོས་པ། སྲིད་དོན་ཞབས་ཞུའི་ཚོམས་ཆེན་འཁོར་རྒྱུག་ཚད་ལྡན་བཟོས་ཏེ་དྲ་ཐོག་ལས་སྒྲུབ་ཞིབ་ཚགས་ཅན་གྱི་ཆུ་ཚད་མཐོ་རུ་གཏོང་དགོས་པ། བོད་རྒྱ་སྐད་གཉིས་ཀྱི་རིག་ནུས་ཡིག་བསྒྱུར་མ་ལག་བེད་སྤྱོད་ཁྱབ་གདལ་གཏོང་མགྱོགས་སུ་བཏང་ནས་གཞི་རིམ་དུ་ཁྱབ་པ་བྱས་ནས་ཞིང་འབྲོག་མང་ཚོགས་ལ་སྟབས་བདེ་སྐྲུན་དགོས་པ། མཉམ་འབྲེལ་དྲ་རྒྱ་དང་སྲིད་དོན་ཞབས་ཞུ་ཟུང་འབྲེལ་ཡག་པོ་བྱས་ནས་རང་ལྗོངས་ཀྱི་ཐོན་ལས་གོང་འཕེལ་མཐོར་གཏོང་དང་རིག་ནུས་སྨན་བཅོས། རིག་ནུས་སློབ་གསོ་བཅས་ལ་རོགས་འདེགས་བྱས་ནས་སྲིད་གཞུང་ཁོངས་གཏོགས་ཀྱི་ཏང་སྲོལ་སྲིད་གཙང་འཛུགས་སྐྱོང་ལ་རྒྱུན་མཐུད་སྐུལ་འདེད་གཏོང་དགོས་པ་བཅས་བྱེད་དགོས་པའི་ནན་གསུངས་གནང་བ་རེད།
ཆེ་དགྲ་ལྷས་རྩ་འཛུགས་ནས་འགོ་ཁྲིད་རྒྱུར་ཤུགས་སྣོན་རྒྱག་པ་དང་ལས་འགན་ཁ་གསལ་བཟོ་བ། ལྟ་སྐུལ་ཞིབ་བཤེར་དང་འགན་འཁྲི་བདའ་འདེད་ལ་ཤུགས་སྣོན་རྒྱག་པ་བཅས་བྱེད་དགོས་པ་དང་། ལྷག་པར་དུ་སྣང་ཆེན་བཞི་དང་དགའ་ཞེན་བཞིའི་མང་ཚོགས་ཀྱི་སློབ་གསོ་ལག་ལེན་བྱེད་སྒོ་སོགས་གཞི་རྟེན་དུ་བྱས་ཏེ་དྲིལ་བསྒྲགས་བྱེད་སྟངས་གསར་གཏོད་བྱེད་པ་དང་སློབ་གསོ་ཁྲིད་སྟོན་ལ་ཤུགས་སྣོན་རྒྱག་པ། སྤྱི་ཚོགས་ཀྱི་ཤེས་ཚད་དང་མང་ཚོགས་ཀྱི་མོས་སེམས་དང་ཐེ་ཞུགས་བྱེད་ཚད་མཐོ་རུ་གཏོང་བ་བཅས་བྱེད་དགོས་པ་མ་ཟད། སྟབས་བདེ་ཞིང་ཕན་འབྲས་ཆེ་བའི་ཞབས་ཞུའི་ཐོག་ནས་མི་རིགས་ཁག་གི་མང་ཚོགས་དང་ཁེ་ལས་ཀྱི་ཐོབ་སྣང་དང་སྐྱིད་སྣང་སྔར་བས་ཆེ་རུ་གཏོང་དགོས་པའི་བླང་བྱ་བཏོན་གནང་བ་རེད། །