བགྲེས་སོང་རྒན་པོར་སྙོར་སྐྱོང་མ་ཐོབ་ན་ཇི་ལྟར་བྱ།
སྤེལ་དུས 2018-04-12
ཡོང་ཁུངས། ཀྲུང་གོ་བོད་ཀྱི་དྲ་བ།
རྩོམ་པ་པོ། རམས་ཚེ་བྷོ།
གྱོད་དཔེ།
ཨ་ཁུ་དགེ་ལེགས་ནི་ཞིང་སྡེ་ན་འཚོ་བ་རོལ་བཞིན་པའི་ལོ་བརྒྱད་ཅུར་སོན་པའི་རྒན་པོ་ཞིག་ཡིན་ལ། ལོ་འགའི་ཡར་སྔོན་དུ་ཁོའི་བཟའ་ཟླ་དང་བྱིས་པ་རྣམས་གཅིག་རྗེས་གཉིས་མཐུད་ཀྱིས་བཞུར་ཚར་བས་ལོ་འདི་འགའི་རིང་ལ་སྡུག་གི་ཁུར་བོ་རི་རབ་འདྲ་བ་ཞིག་འཁུར་བཞིན་ཉིན་མཚན་རེ་རེ་ཕར་བསྐྱལ། ད་ལྟ་ཁོའི་ལུས་སྟོབས་ཧ་ཅང་ཞན་པའི་ཁར་འཚོ་བའི་ཕྱོགས་ལའང་དཀའ་ཁག་ཆེན་པོ་འདུག ཕྱིས་སུ། སྡེ་བའི་སློབ་ཆུང་གི་དགེ་རྒན་ཞིག་གིས་གསོ་སྐྱོར་འོག་རྒན་པོས་སྙོར་སྐྱོང་གྲོས་མཐུན་གན་རྒྱ་ཞིག་བཞག་ལ། གན་རྒྱའི་ཡི་གེ་ནང་དུ། ཁོ་ཤི་རྗེས་ཁོའི་ཁང་བ་གྱན་ལྔ་ཡོད་པ་དེ་འཚོ་བ་དང་དཔལ་འབྱོར་ཐད་རང་ལ་རོགས་སྐྱོར་བྱེད་མཁན་དེར་སྟེར་རྒྱུ་ཡིན་ཞེས་བྲིས་ཡོད། གནས་ཚུལ་དེ་ཐོས་རྗེས་དགེ་ལེགས་ཀྱི་ཚ་བོ་ཚ་མོ་དང་དེ་ཚོའི་བུ་བུ་མོ་སོགས་འཚང་ཁ་ཤིག་ཤིག་གིས་ཁོ་ཚང་ལ་ཡོང་སྟེ་སྙོར་སྐྱོང་བྱེད་རྒྱུའི་རེ་བ་བཏོན། དེ་བས། ཁོ་ཚོ་ཚང་མ་རྒན་པོ་དགེ་ལེགས་ཀྱི་སྙོར་སྐྱོང་མཁན་བྱས་ཆོག་གམ།
ཁྲིམས་བཤད།
《གཉེན་སྒྲིག་བཅའ་ཁྲིམས》ཀྱི་དོན་ཚན་བརྒྱད་པའི་གཏན་ཁེལ་ལྟར་ན། གསོ་སྐྱོང་གི་ནུས་པ་ཡོད་པའི་སྤོ་བོ་དང་རྨོ་མོ། ཕ་མ་ཚེ་ལས་འདས་ཟིན་པའམ་ཡང་ན་ཕ་མ་མེད་པའི་བྱིས་པ་གསོ་སྐྱོང་བྱེད་པའི་འོས་འགན་ཡོད་ལ། སྙོར་སྐྱོང་གི་ནུས་པ་ཡོད་པའི་ཚ་བ་ཚ་མོ་ལ་བྱིས་པ་འདས་ཟིན་པའམ་ཡང་ན་བྱིས་པར་སྙོར་སྐྱོང་གི་ནུས་པ་མེད་པའི་སྤོ་བོ་དང་རྨོ་མོ་སྙོར་སྐྱོང་བྱེད་པའི་འོས་འགན་ཡོད་ཅེས་གསལ་བོར་བསྟན་ཡོད། ཚ་བོ་ཚ་མོ་སོགས་ཀྱིས་རང་གི་ལོ་ན་བགྲེས་པའི་སྤོ་བོའི་བྱིས་པ་རྣམས་ཚེ་ལས་འདས་ཟིན་པའི་གནས་ཚུལ་འོག དུས་རྒྱུན་ཁོའི་འཚོ་བ་དང་དཔལ་འབྱོར་སོགས་ཕྱོགས་གང་ཐད་ནས་བདག་སྐྱོང་དང་ལྟ་རྟོག་ཅི་ཡང་མ་བྱས་པ་ནི་ཁྲིམས་འགལ་གྱི་བྱ་སྤྱོད་ཅིག་རེད། དེ་བས། རྒན་པོ་དགེ་ལེགས་ཀྱིས་རང་ཉིད་ཀྱི་ཁང་བ་གྱན་ལྔ་བོ་དེ་མ་བྱིན་ན་ཡང་ཚ་བོ་ཚ་མོ་རྣམས་རྒན་པོ་སྙོར་སྐྱོང་བྱེད་མཁན་ཡིན་པ་ནི་གཡོལ་ཐབས་མེད་པ་ཞིག་ཡིན་ནོ།
གོང་གི་གྱོད་དོན་འདིར་གཞིགས་ཚེ། ཨ་ཁུ་དགེ་ལེགས་ཀྱི་ཚ་བོ་ཚ་མོ་རྣམས་ལ་མཚོན་ན་ཁོའི་ཁྲིམས་མཐུན་གྱི་ཤུལ་འཛིན་པ་དང་ལྟ་སྐྱོང་པ་ཡིན་པས་ཁོ་ཚོ་ཚང་མར་གསོ་སྐྱོང་བྱེད་པའི་འགན་འཁྲི་ཡོད། རྒན་པོ་རང་ལ་དབང་བའི་ཁང་བ་གྱན་ལྔ་བོ་ནི་རྒན་པོ་རང་ཉིད་ཀྱི་རྒྱུ་ནོར་ཡིན་པས། མི་སུ་ཞིག་ལ་སྟེར་རྒྱུའི་དབང་ཆ་རྒན་པོ་རང་ཉིད་ལ་ཡོད་དོ། །