གལ་ཏེ་ཁྱེད་ལ“ཁྲི་བརྒྱའི་སྨན་བཅོས་འགན་བཅོལ”ཞེས་པའི་ལས་སྒོའི་དུས་བཀག་ཟིན་ནས་མུ་མཐུད་དངུལ་སྐྱེལ་དགོས་པའམ་ཡང་ན་ལས་སྒོ་མཚམས་འཇོག་དགོས་པའི་ཁ་པར་རམ་ཆ་འཕྲིན་འབྱོར་ཚེ། ཡིན་གཅིག་ཡིད་གཟབ་བྱེད་དགོས་འདུག
གང་ཡིན་ཟེར་ན། འདི་ནི་ཁྲིམས་འགལ་བས་ལས་དོན་མི་སྣ་ཡིན་ཁུལ་གྱིས“ཁྲི་བརྒྱའི་སྨན་བཅོས་འགན་བཅོལ”ཞེས་པར་ཁ་གཡར་ཏེ་ཁ་བསླུས་རྒྱག་རྩིས་བྱེད་ཀྱི་ཡོད་པའི་རྟགས་རེད།
གྱོད་དོན་མདོར་བསྡུས།2024ལོའི་ཟླ་8ཚེས་11ཉིན། ཆབ་མདོའི་ཁྲེན་ཆེ་གེ་མོར་ཆ་རྒྱུས་མེད་པའི་ཁ་པར་ཞིག་འབྱོར་ཞིང་། ཕ་རོལ་པོས་ཁྲེན་ཆེ་གེ་མོར་ང་རང་འགན་བཅོལ་ཀུང་སིའི་ལས་མི་ཡིན། ཁྱེད་ཀྱི“ཁྲི་བརྒྱའི་སྨན་བཅོས་འགན་བཅོལ”གྱི་འགན་འཛིན་གྱི་དུས་ཚོད་ཡོལ་འདུག གལ་ཏེ་དུས་ཐོག་ཏུ་དེ་མ་བཀག་ཚེ་ཟླ་རེར་སྒོར་སྟོང་ཕྲག་གཅིག་ཡན་འཐེན་པ་དང་། མུ་མཐུད་འགན་བཅོལ་གྱི་དངུལ་མ་བསྐྱལ་ན་ཁྱེད་ཀྱི་ཡིད་རྟོན་ལ་སྐྱོན་རྒྱག་སྲིད་ཅེས་བརྗོད། ཁྲེན་ཆེ་གེ་མོས་དེ་ནི་རང་ཉིད་དུས་རྒྱུན་ཁ་པར་རྩེད་སྐབས་གཟབ་གཟབ་མ་བྱས་པར་ལས་སྒོ་འདི་བསྣན་པ་རེད་སྙམ་ནས། མི་དེར“ཁྲི་བརྒྱའི་སྨན་བཅོས་འགན་བཅོལ”ཞེས་པའི་ལས་སྒོ་འདི་ཁ་བཀག་རོགས་ཞེས་བརྗོད། དེ་ལྟར་ཕ་རོལ་པོས་ཁྲེང་ཆེ་གེ་མོའི་ཡིད་ཆེས་ཐོབ་རྗེས། ཁྲེན་ཆེ་གེ་མོ་ཁོ་པའི་སྐད་འཕྲིན་གྱི་གྲོགས་པོར་བསྣན་ཏེ་མགོ་སྐོར་བཏང་ནས་APPཞིག་ཕབ་ཏུ་བཅུག་པ་དང་། ཕན་ཚུན་གླེང་མོལ་བྱེད་སྐབས་ཁྲེན་ཆེ་གེ་མོས་ཕ་རོལ་གྱིས་བཤད་པ་ལྟར་རྒྱང་རིང་གི་ཚོད་འཛིན་བྱེད་སྟངས་ལ་བརྟེན་ནས་རང་གི་ཁ་པར་མཉམ་སྤྱོད་བྱེད་དུ་བཅུག དེ་ནས་ཕ་རོལ་པོས་ཁྲེན་ཆེ་གེ་མོའི་ཁ་པར་ཚོད་འཛིན་བྱས་པ་དང་། ཕ་རོལ་པོའི“མཛུབ་སྟོན”འོག་ཁྲེན་ཆེ་གེ་མོའི་དངུལ་ཁང་གཱ་ནས་སྒོར་89980ཁ་བསླུས་བརྒྱབ་པ་རེད།ཉིན་དེའི་ཆུ་ཚོད་13ཙམ་ལ། ཁྲེན་ཆེ་གེ་མོས་ཆབ་མདོ་གྲོང་ཁྱེར་ཁ་རུབ་ཆུས་སྤྱི་བདེ་ཅུས་ཉེས་དོན་མྱུལ་ཞིབ་རུ་ཆེན་ལ་གྱོད་དོན་སྙན་སེང་ཞུས། སྙན་སེང་འབྱོར་རྗེས། ཉེས་དོན་མྱུལ་ཞིབ་རུ་ཆེན་གྱིས་ལམ་སེང་གྱོད་སྒྲུབ་ཉེན་རྟོག་པ་སྒྲིག་འཛུགས་བྱས་ཏེ་གྱོད་དོན་ཐོ་འགོད་དང་དབྱེ་ཞིབ་བརྡར་གཅོད་བྱས་པ་བརྒྱུད། ཕན་ཆེ་གེ་མོར་ཉེས་གསོག་གི་དོགས་པ་ཆེན་པོ་ཡོད་པ་ཤེས་རྟོགས་བྱུང་ནས། ཁོའི་འགྲོ་སྡོད་སྤྱོད་གསུམ་གཏན་འཁེལ་བྱས་རྗེས་གྱོད་སྒྲུབ་ཉེན་རྟོག་པ་ཁོ་པའི་སྡོད་གནས་ཡུན་ནན་ཞིང་ཆེན་ཏ་ལི་གྲོང་ཁྱེར་དུ་འཛིན་པར་མངགས་པ་རེད། 2024ལོའི་ཟླ་10ཚེས་11ཉིན། ས་གནས་དེ་གའི་སྤྱི་བདེ་ལས་ཁུངས་ཀྱི་གཞོགས་འདེགས་གང་ལེགས་འོག ཉེས་གསོག་དོགས་ཅན་ཕན་ཆེ་གེ་མོ་བཟུང་ནས་ཁྲིམས་ལ་སྦྱར་བ་རེད།མིག་སྔར། གྱོད་གཞི་འདིའི་བརྐུས་དངུལ་ད་དུང་བདའ་འདེད་བཏང་ནས་གྱོང་གུན་ཉུང་གཏོང་དང་ཞིབ་བཤེར་ཐག་གཅོད་བྱེད་བཞིན་ཡོད་པ་རེད།