བྱ་མགྲིན་སྔོན་ཟླ་བའི་རྟོགས་བརྗོད།

《བྱ་མགྲིན་སྔོན་ཟླ་བའི་རྟོགས་བརྗོད》ཀྱི་རྩོམ་པ་པོ་ནི། སྟག་ཕུ་བློ་བཟང་བསྟན་པའི་རྒྱལ་མཚན་ཡིན། ཁོང་ནི་རབ་བྱུང་བཅུ་གཉིས་པའི་ཤིང་རྟ་（སྤྱི་ལོ་1747）ལོར་ཀོང་སྟོད་ཉང་པོ་རྒྱ་ནང་དུ་གནུབས་ཀྱི་རིགས་སུ་འཁྲུངས། རབ་བྱུང་བཅུ་གསུམ་པའི་ཆུ་རྟ་（སྤྱི་ལོ་1762）ལོར་གཤེགས། ཁོང་དགུང་ལོ་ཆུང་བའི་དུས་ནས་དོ་བོ་མགོའི་བླ་ཟུར་ཆུ་མཁར་སྤྲུལ་སྐུའི་དྲུང་དུ་དབུ་སྐྲའི་གཙུག་ཕུད་ཕུལ། མཚན་ལ་ངག་དབང་ཡེ་ཤེས་ཞེས་གསོལ། དགུང་ལོ་ལྔ་པར་མཁས་པ་རྡོ་རྗེ་རྒྱལ་མཚན་ལས་ཡི་གེའི་སྦྱོར་ཀློག་བསླབས། དགུང་ལོ་བརྒྱད་པར་ཡབ་བཀོན་མཆོག་སྙན་གྲགས་སྐུ་གཤེགས་པར་དགོངས་རྗོགས་ལེགས་པར་བསྒྲུབས། དགུང་ལོ་བཅུ་གཉིས་པར་བསང་ངོ་དགོན་གྱི་བླ་མ་མཛད། དགུང་ལོ་བཅུ་གསུམ་པར་སྟག་ཕུ་ངག་དབང་ཆོས་གྲགས་ཀྱི་ཡང་སྲིད་དུ་ངོས་འཛིན་ཞུས། དགུང་ལོ་བཅོ་ལྔ་པར་ཉང་པོ་བྲག་དཀར་ལྷ་ཆུའི་དགོན་པར་ཟབ་མོའི་ཏིང་ངེ་འཛིན་ལ་སྒྲུབ་པ་རྩེ་གཅིག་མཛད། དགུང་ལོ་བཅུ་དྲུག་པར་རྒྱུད་སྨད་མཁན་པོ་ངག་དབང་མཆོག་ལྡན་ལས་རབ་བྱུང་བསྒྲུབས་ཤིང་མཚན་ལ་ངག་དབང་བློ་གྲོས་རྒྱ་མཚོ་ཞེས་གསོལ། ལོ་དེར་ནགས་ཤོད་སྟག་ཕུ་བན་དཀར་དགོན་དུ་གདན་དྲངས་ཏེ་ཆོས་རྗེ་ཡོན་ཏན་དར་རྒྱས་བསྟེན་ནས་མདོ་སྔགས་ཀྱི་ཆོས་མང་དུ་གསན། དགུང་ལོ་བཅུ་དགུ་པར་དབུས་སུ་ཕེབས་ཏེ་འབྲས་སྤུངས་བློ་གསལ་གླིང་དུ་ཆོས་ཞུགས་མཛད།   དགེ་བཤེས་འཇམ་དབྱངས་ཕུན་ཚོགས་སོགས་བསྟེན་ཏེ་གཞུང་བཀའ་པོད་ལྔ་གསན་བཞེས་མཛད། དགུང་ལོ་ཉེར་བདུན་པར་ལྷ་ལྡན་སྨོན་ལམ་ཆེན་མོའི་གྲྭ་སྐོར་མཛད།   དགུང་ལོ་སུམ་ཅུ་པར་རྒྱལ་བ་བསྐལ་བཟང་རྒྱ་མཚོ་ལས་བསྙེན་རྫོགས་ཀྱི་སྡོམ་པ་བཞེས། དེ་ནས་ནགས་ཤོད་དུ་ཆིབས་བསྒྱུར་མཛད་ནས་རབ་བརྟན་སོགས་ལ་གཞི་གསུམ་གྱི་ཕྱག་ལེན་དང་། མདོ་སྔགས་ཀྱི་ཆོས་འཁོར་བསྐོར་ཞིང་སྐུ་གསུང་ཐུགས་རྟེན་མང་དུ་བཞེངས། དགུང་ལོ་ཞེ་དགུ་པར་དགོངས་པ་ཆོས་དབྱིངས་སུ་ཐིམས། ཁོང་གི་གསུང་རྩོམ་ནི་སྟག་གདོང་རི་བོ་དཔལ་འབར་གྱི་བཅའ་ཡིག་དང་། 《འཇམ་དབྱངས་ཀྱི་བསྟོད་པ་གདུང་ཤུགས་ང་རོ》སོགས་ཆོས་ཚན་དྲུག་ཅུར་ལོངས་པའི་པོ་ཏི་གཉིས་བཞུགས་སོ། 

《བྱ་མགྲིན་སྔོན་ཟླ་བའི་རྟོགས་བརྗོད》ཀྱི་བརྗོད་བྱ་རགས་པ་ནི། དེ་ཡང་སྟོན་པ་མྱ་ངན་ལས་འདས་ཏེ་རིང་པོ་མ་ལོན་པའི་སྐབས་ཤིག་ཏུ། རྒྱ་གར་གྱི་ཡུལ་ཝ་ར་ཎ་སི་བྱ་བ་ན་རྒྱལ་པོ་ལྷ་སྣང་སྟོབས་ལྡན་དང་། དེ་ལ་རྗེ་བཙུན་སྒྲོལ་མའི་སྤྲུལ་བ་མ་ཏི་མ་ཧཱ་ནི་བྱ་བའི་བཙུན་མོ་མཛངས་མའི་ཡོན་ཏན་རྫོགས་པ་ཞིག་ཡོད་དེ།   རྒྱལ་པོ་ཡབ་ཡུམ་དེ་གཉིས་ཀྱིས་རྒྱལ་སྲིད་ཆོས་བཞིན་སྐྱོང་ཞིང་ཡར་དཀོན་མཆོག་ལ་མཆོད་པའི་མཐུས་སྤྲུལ་བའི་བུ་ཆོས་ཀྱི་དགའ་བ་བྱ་བ་ཞིག་འཁྲུངས་པས་ཡབ་ཡུམ་སྲས་བཅས་དགའ་བདེའི་དཔལ་ལོངས་སྤྱད་དེ་ཅུང་རིང་མོ་ཞིག་འདས་པ་ན།   རྒྱལ་པོ་དེ་ལ་བློན་ཆེན་སྟོང་དཔོན་ཡམ་ཤེ་ཞེས་བྱ་བ་དབང་ཐང་ཆེ་བ་རྒྱལ་པོ་གཉིས་པ་ལྟ་བུ་ཞིག་ཡོད་དེ།   དེ་ནི་རྒྱལ་སྲས་ཆོས་ཀྱི་དགའ་བའི་རྩེད་གྲོགས་ཡེ་ཤེས་འཛིན་ཞེས་བྱ་བའི་གཞོན་ནུ་ལོ་བརྒྱད་ལོན་པ་ཞིག་ཡོད་པ་དེ་ལ་སྙིང་ནས་མ་དགའ་ཞིང་། ངེས་པར་རང་གི་བུ་ལ་གཱ་ཨཱ་ན་བ་སྲས་ཀྱི་རྩེད་གྲོགས་ནས་མཐའ་མར་བློན་གྲལ་དུ་ཚུད་པར་བྱ་ཕྱིར་གཡོ་སྒྱུ་དང་ཕྲ་མ་སོགས་ཀྱི་ཐབས་བརྒྱུད་མཐར་ཡེ་ཤེས་འཛིན་དང་དྷརྨ་སོགས་རྒྱལ་པོ་ཡབ་སྲས་ལ་སྙིང་ཉེ་བའི་བློན་པོ་གསུམ་རྒྱང་འབུད་བཏང་། ཆོས་བློན་དེ་གསུམ་དཀའ་བ་དུ་མ་སྤྱད་དེ་ཡུམ་མ་ཏི་མ་ཧཱ་ནིའི་ཕ་ཡུལ་ཛ་ལནྡྷ་རའི་རྒྱལ་ཁབ་ཏུ་འབྱོར་ཞིང་། དེར་བླ་མ་དྲི་མེད་དཔལ་ལྡན་གྱིས་རྗེས་སུ་བཟུང་། དེ་ལྟར་བློན་པོ་ཡམ་ཤེའི་འདོད་དོན་གྲུབ་སྟེ་མཐར་རྒྱལ་སྲས་དང་ལ་གཱ་ཨཱ་ན་གཉིས་ཤིན་ཏུ་མཛའ་བར་བྱས་ཏེ་ལུས་དང་གྲིབ་མ་བཞིན་འགྲོགས་ཤིང་རྣལ་འབྱོར་བ་ཞིག་ལས་འཕོ་བ་གྲོང་འཇུག་གི་གདམས་པའང་གསན་ཏེ་ལང་ཚོ་དང་རིག་པ་གང་ནས་ཁྱད་མེད་དུ་སྐུ་ནར་སོན་ནས་རེ་ཞིག་འདས་པ་ན། ལ་གཱ་ཨཱ་ན་ནི་བཙུན་མོ་སཱ་ར་ཏི་ནིའི་ཁའི་དབང་དུ་གྱུར་ཏེ་ཉིན་ཞིག་གཡོ་སྒྱུའི་ཐབས་ལ་བརྟེན་ནས་རྒྱལ་སྲས་དང་ཁོ་གཉིས་ཁུ་བྱུག་གི་རོ་རྨ་མེད་པ་ཟུང་ལ་གྲོང་འཇུག་གིས་གཙང་པོའི་ཕ་རོལ་གྱི་སྐྱེད་ཚལ་ལ་ལྟད་མོར་གཡེང་དུ་ཕྱིན་པའི་ཚེ།   ལ་གཱ་ཨཱ་ན་ནི་ལྐོག་ནས་རིངས་སྟབས་ཀྱིས་ཕྱིར་འཕུར་འོངས་ཏེ་རྒྱལ་སྲས་ཀྱི་སྐུ་ལ་གྲོང་འཇུག་བྱས། རང་གི་བེམ་པོ་ཆུར་བསྐྱུར་ཏེ་ཡུལ་ལ་ལོག དེ་ནས་རྒྱལ་སྲས་ཁུ་བྱུག་གི་རྣམ་པ་ཅན་དུ་ཡོད་པ་དེས་ལ་གཱ་ཨཱ་ན་ནི་བཙལ་བས་མ་རྙེད། སྔོན་གནས་སུ་ལོག་པར་རང་གི་བེམ་པོའང་མ་རྙེད་པར་ལུས་པས་མཐར་བླ་མ་དྲི་མེད་དཔལ་ལྡན་ལས་གདམས་པ་ཐོབ་ཅིང་གདུལ་བྱ་བྱ་དང་རི་དྭགས་ལ་ཡོད་པས་བྱ་མགྲིན་སྔོན་ཟླ་བ་བྱ་བའི་སྐལ་བ་མངོན་དུ་གྱུར་ཏེ་ཚེ་མཐའ་འཁྱོལ་བར་མཛད་ནས་མཇུག་བསྡུས་ཡོད་དོ།

 རྩོམ་པ་པོས་རྒྱལ་པོ་ལྷ་སྣང་སྟོབས་ལྡན་དང་སྲས་ཆོས་ཀྱི་དགའ་བ་མི་རབས་སྔ་གཞུག་གཉིས་ཀྱི་བདེ་སྡུག་གི་འགྱུར་བ་དེ་བརྗོད་བྱར་བཟུང་ནས་ལས་འབྲས་ཀྱི་གནད་གང་མང་ཞིག་བསྟན་པ་དང་ཆབས་ཅིག རྩོམ་པ་པོས་ཡབ་རྒྱལ་པོ་དང་སྟོང་དཔོན་ཡམ་ཤེའི་འབྲེལ་བ།   བློན་བཟང་ཡེ་ཤེས་འཛིན་སོགས་རྒྱང་འབུད་དུ་བཏང་བ།   ལ་གཱ་ཨཱ་ན་རྒྱལ་སྲས་ཀྱི་བེམ་པོར་གྲོང་འཇུག་གིས་ཕོ་བྲང་ནས་རྒྱལ་སྲིད་བསྐྱངས་ཚུལ་སོགས་ཀྱི་གཏམ་སྤེལ་ཏེ་དུས་སྐབས་ཤིག་གི་མུན་ནག་སྤྱི་ཚོགས་ལ་ཟུར་ཟ་བྱས་ཡོད་པ་མ་ཟད། མཐོ་རིམ་དབང་སྒྱུར་པ་སྐོར་ཞིག་གིས་ཁྱོད་ཤི་ང་གསོན་གྱིས་སྲིད་དབང་འཕྲོག་རྩོད་བྱེད་ཅིང་ཉམས་རྒུད་དུ་འགྲོ་བཞིན་པའི་ཕོ་བྲང་ཞིག་གི་ཕྱི་ནང་གི་གནས་ཚུལ་དང་བཅས་པ་ཞིབ་འབྲི་བྱས་ཡོད། རྟོགས་བརྗོད་འདི་ལ་བསྡོམས་པས་ལེའུ་བདུན་ཡོད་ཅིང་། སྤྱིའི་ལུས་ཀྱི་རྣམ་པ་ནི་བཅད་ལྷུག་སྤེལ་མ་ཡིན།   ཚིག་སྦྱོར་ལེགས་ཤིང་གོ་སླ་བ་སོགས་རྩོམ་རྩལ་ལ་ཐུན་མོང་མིན་པའི་ཁྱད་ཆོས་ཡོད་པ་མ་ཟད།   སྐྱོ་གར་གྱི་རྣམ་པ་ཅན་གྱི་སྒྲུང་འབྲིང་དུ་གཏོགས་པས་བོད་ཀྱི་རྩོམ་རིག་གི་ལོ་རྒྱུས་སྟེང་གོ་ས་འོས་འཚམ་ཐོབ་ཡོད་པ་དང་། དམངས་ཁྲོད་དུའང་བརྗོད་བྱ་རྗོད་བྱེད་གང་གི་ཆ་ནས་ཀྱང་དར་ཁྱབ་ཆེན་པོ་ཡོད་པ་ཞིག་ཡིན།