གོམ་བརྒྱའི་བརྙན་ཕབ་ཁྲོམ་ལམ།

ཞོགས་པ་སྔ་པོར་ལྷ་སའི་ཁྲོམ་ལམ་མང་ཆེ་བ་འཇམ་ཐིང་ངེར་གནས་པ་དང་ཁྲོམ་ལམ་དེའི་ཐོག་གི་སྒོ་གཞན་དག་ཀྱང་ད་དུང་དམ་པོར་གཏན་ཡོད་མོད།   ཇ་ཁང་གི་ཇ་མ་ཚོ་ལངས་ཚར་ནས་སྒོ་ཕྱེ་ཟིན་པས་གློག་འོད་རིང་པོ་ཁ་ཤས་ཁྲོམ་ལམ་གྱི་རྡོ་གཅལ་སྟེང་དུ་འཕྲེད་ཉལ་བརྒྱབ་ཡོད་པ་དང་ཇ་མ་ཕར་ཚུར་འགུལ་བའི་གྲིབ་ནག་རིང་པོ་རེ་རྡོ་གཅལ་སྟེང་འཆར་འོངས།   ཁོ་ཆོ་སྔ་ས་ནས་ལངས་ཏེ་མེ་ཁ་གསོ་བ་དང་།  གད་དར་དང་འཁྲུད་བཤལ་བྱེད་པ།  ཁ་སའི་ཟ་ལྷག་མ་ཚ་པོ་བཟོ་བ་དང་གསར་བ་བཟོ་བ་དང་སྦྲགས་བརྙན་ཕབ་ཀྱང་སྔ་ཙམ་བསླངས་ཏེ་ཞོགས་པའི་སྐུ་མགྲོན་ཁག་དང་པོ་ཡོང་རྒྱུར་སྟ་གོན་བྱེད།   ཞོགས་པའི་མགྲོན་པོ་ཁག་དང་པོ་ནི་འཁོར་གསུམ་རྐང་འཁོར་གཏོང་མཁན་ཚོ་ཡིན་ཞིང་།  ཁོ་ཚོ་ཐོ་རངས་ཚུ་ཚོད་ལྔ་པ་དྲུག་པར་ལངས་ཏེ་མི་ཐེངས་གསུམ་བཞི་རེ་བསྐྱལ་ཚར་རྗེས་ཉུང་མཐར་རྡལ་གླ་སྒོར་བཅུ་བཅོ་ལྔ་བྱུང་ཟིན་པས་གཞོགས་ཇ་འཐུང་བ་དང་ཞོགས་ཟས་ཐུག་པ་དཀར་ཡོལ་གང་འཐུང་ཞོར་དུ་བརྙན་ཕབ་ལ་ཡུད་ཙམ་བལྟས་ཏེ་དབུགས་ངལ་གསོས་ཐོག་ལས་ཁུངས་ཚུགས་པའི་དུས་ཚོད་ཀྱི་མཐོ་རླངས་ལངས་རྒྱུར་གྲ་སྒྲིག་ཨང་གསར་བྱེད།

མགྲོན་པོ་ཁག་གཉིས་པ་ནི་ལྷ་སའི་ཉེ་འདབས་ནས་འོངས་པའི་ཞོ་འོ་མ་ཚོང་མཁན་དག་ཡིན་པ་དང་།  ཁོ་ཚོ་ཡང་ཞོགས་པ་སྔ་མོ་ནས་གྲོང་ཁྱེར་ནང་འབྱོར་བ་བྱས་ཏེ་ཞོ་འོ་མ་བཙོང་ཐོག་ཆུ་ཚོད་བཅུ་པའི་གཡས་གཡོན་དུ་མཉམ་དུ་འཛོམས་ཏེ་ཞོགས་ཇ་དང་ཞོགས་ཟས་ཇ་ཁང་ནང་དུ་སྤྱོད་ཀྱི་ཡོད།   ཇ་ཁང་གཞན་དག་དང་མི་འདྲ་བར་དེ་གར་འཁྲུག་ཆ་དོན་ཤོས་ནི་ཕྱི་དྲོའི་དུས་སུ་ཡིན་ཞིང་།  དེ་རྒྱུད་ཀྱི་ཇ་ཁང་དུ་འགྲོ་མཁན་མི་མང་ཆེ་བ་ཉེ་འཁོར་གྱི་གྲོང་མི་དང་ས་ཕྱོགས་གཞན་ནས་འོངས་པའི་འགྲུལ་བ་ཡིན་པས་མི་མང་པོ་ཞིག་ལ་མེད་ཡིན་ལ།   ལས་ཀ་ཡོད་ནའང་སྔ་དྲོ་བསྒྲུབས་ཟིན་པ་ཕྱི་དྲོ་ཇ་ཁང་ནང་འཛུལ་ཏེ་ཇ་མངར་མོ་དང་བུལ་ཐུག་འཐུང་ཞོར་ལ་ལྟད་མོ་བློ་ཡིད་ཚིམས་པ་ལྟ་རྒྱུ་ཡོད་པས།   ཇ་ཁང་དེ་དག་དབར་གྱི་བར་ཐག་ཧ་ཅང་ཉེ་བ་དང་ཐ་ན་ཁ་ཤས་ཀྱ་འབྲེལ་ཡིན་ནའང་ཇ་ཁང་རེ་རེ་བཞིན་མིས་རྡག་རྡག་གང་བ་དང་དགོང་མོ་འཕྱི་པོ་བར་མཚམས་ཆད་ཀྱི་མེད།   ཇ་ཁང་གི་སྒོ་ཁར་ཡང་མི་ཚོགས་རེ་འཁྱིལ་གྱི་ཡོད་པ་དེ་དག་གི་ཁྲོད་དུ་སྐྲ་ལོ་རིང་པོ་དང་མགོ་རིལ།     སྐྲ་གཞུག་ཚོན་མདངས་བཀྲ་བ་དང་སྐྲ་ལོ་དྲེག་པས་འཚོས་པ།   མགོ་སྐྲ་དམ་པོར་དཀྲིས་པ་དང་ཟང་ཟིང་དུ་གློད་པ་སོགས་ཡོད་པ་ཚང་མའི་མགོ་བོ་རུབ་རུབ་ཀྱིས་རྟིང་ཀ་གཟེངས་ཏེ་ལྟད་མོ་མཐོང་ཨེ་ཐུབ་ལྟ་བར་བྱེད།    འོན་ཀྱང་དེ་སྔོན་བརྙན་འཕྲིན་འཕྲུལ་འཁོར་སྒོ་ཁ་ནས་མཐོང་ཐུབ་སར་འཇོག་གི་ཡོད་ནའང་དེས་ཚོང་ལ་གནོད་ཀྱི་ཡོད་པས་ཇ་ཁང་ཚང་མས་མ་གྲོས་གཅིག་མཐུན་གྱིས་སྐད་སྒམ་ཕྱི་ལ་སྦྲགས་ཏེ་མི་ལ་ལྟ་འདོད་སློང་བ་ལས་བརྙན་འཕྲིན་ནང་དུ་སྦས་ཏེ་ཇ་ཁང་ནང་འཛུལ་ན་མ་གཏོགས་མཐོང་མི་ཐུབ་པ་བཟོས་ཏེ་རང་གི་ཚོང་ལ་སྲུང་སྐྱོབ་བྱེད།

དེ་རྒྱུད་དུ་ལྟད་མོ་ལྟ་མཁན་བརྒྱ་ཆ་དགུ་ཅུ་གོ་ལྔ་བོད་པ་ཡིན་པ་དང་ཁོ་ཚོའི་ཀླད་པའི་ནང་ལྷ་སྒྲུང་གི་བག་ཆགས་རྒས་རྒྱུ་མེད་པས་ལྷ་སྒྲུང་གི་བརྙན་འཕྲིན་འཁྲབ་ཚན《ནུབ་ཕྱོགས་སུ་བསྐྱོད་པའི་རྣམ་ཐར》དང་།   《ལྷ་བསྐོས་རྡོ་རིང》《ཅི་ཀུང》《སྣང་ས་འོད་འབུམ》(གོང་གསལ་ལྟད་མོ་དེ་དག་གི་མིང་དེ་དམངས་ཁྲོད་དུ་རིམ་པ་བཞིན《སྤྲེའུ》དང་།《ཅང་ཚེ་ཡཱ》《སྣང་ས》སོགས་འབོད་བདེ་ལ་འཇགས་སླ་བའི་མིང་བཏགས་པ་ལས་དེབ་ཐོག་གི་མིང་ནས་འབོད་མཁན་མེད)ལྟ་བུ་ཐེངས་བརྒྱ་ཕྲག་ལ་བལྟས་ཀྱང་ཞེན་པ་མི་ལོག་པའི་ཁར། ད་ཆ་བརྙན་འཕྲིན་དང་གློག་བརྙན་པར་གཞི་མང་པོ་ཞིག་བོད་སྐད་དུ་བསྒྱུར་ཡོད་ལ།    དེ་བས་ཀྱང་དགའ་པོ་བྱེད་ཀྱི་ཡོད་ཕས་ལས་ལམ་དེར་བརྙན་ཕབ་པར་གཞི་བོགས་གཏོང་ཁང་ཞིག་ཡོད་པ་དེའི་ནང་དུ་གཞན་ན་མེད་པའི་བོད་སྐད་ཀྱི་པར་གཞི་ཧ་ཅང་ཕུན་སུམ་ཚོགས་པོ་ཡོད་པ་དང་ལམ་དེ་ཡང་དམིགས་བསལ་གྱི་བོད་སྐད་པར་གཞི་འགྲེམ་སྟོན་བྱ་ཡུལ་ལྟ་བུར་གྱུར།

རྡོ་གཅལ་བཏིངས་པའི་ཁྲོམ་ལམ་དེའི་ཐོག་དངོས་གནས་བྱས་ན་རླངས་འཁོར་གསུམ་གཤིབ་ཀྱང་གཏོང་ཐུབ་པའི་རྒྱ་ཆེན་པོ་ཡོད་མོད།    རྣམ་ཀུན་གཡས་གཡོན་གྱི་ཟ་ཁང་ནས་གྲགས་ཡོང་བའི་བརྙན་ཕབ་པར་གཞིའི་སྐད་སྒྲ་དང་དེ་དག་ལས་འཐུལ་འོངས་པའི་དྲི་ཡིས་ཁྲོམ་ལམ་དོག་པོར་བྱེད་ཅིང་།    ཁྱེད་རང་ཁྲོམ་ལམ་དེ་བརྒྱུད་དེ་སོང་ན་སྤྲེའུ(སུན་ཝུའུ་ཁུང)ཡི་ངར་སྐད་དང་།  ཕག་པའི(ཀྲུའུ་པཱ་ཅེ)འུད་ཤོབ་དང་བསྟན་བཤིག  ཅང་ཙེ་ཡཱ་ཡི་ཐབས་བཀོད།

སྙན་ཞིང་འཇེབས་པའི་སྣང་སའི་རྣམ་ཐར།   དྲག་འཛིང་ཕོ་རྒོད་ཀྱི་འཐབ་སྐད་ཉེན་རྟོགས་རླངས་འཁོར་གྱི་ངུར་སྒྲ།   མེ་མདའ་འབར་གས་གྱི་ལྡིར་སྒྲ།   འཛིང་མོའི་འུར་སྒྲ།   བུད་མེད་དང་བྱིས་པའི་ངུ་འབོད་སོགས་རྣ་བར་ཐོས་པས།  ཁྱོད་ཀྱིས་ལྟད་མོ་དེ་ཚོ་མཐོང་མྱོང་བའི་དབང་དུ་བཏང་ནའང་སྐད་ཅོར་དེ་དག་ལ་རྡོ་ཁབ་ལེན་ལྟར་གྱི་འཐེན་ཤུགས་ཆེན་པོ་ཡོད་དང་།  ཁྱེད་ཀྱི་རྐང་པར་འཁོར་ལོ་ཐོགས་པ་བཞིན་རང་དབང་མེད་པར་ཇ་ཁང་གི་སྒོ་ཕྱོགས་སུ་ཐལ་ནས་མ་མཐར་ཡང་སྒོ་འགྲམ་ནས་ལྟ་ཙམ་བྱ་རྒྱུའི་བློ་ཞིག་ངམ་གྱིས་སྐྱེ་སྲིད་ལ།  ཇ་ཁང་ནང་འཛུལ་ཚར་རྗེས་ལྟད་མོ་ལེའུ་རེ་མ་རྫོགས་བར་ཁ་འབྲལ་མི་ཕོད་པར་ལུས་ཀྱི་ཡོད།