དམིགས་བརྩེ་མའི་འགྲེལ་བ་ཉུང་ཙམ་འགོད་པ།

 དམིགས་མེད་བརྩེ་བའི་གཏེར་ཆེན་སྤྱན་རས་གཟིགས། །

 དྲི་མེད་མཁྱེན་པའི་དབང་བོ་འཇམ་པའི་དབྱངས། །

  བདུད་དཔུང་མ་ལུས་འཇོམས་མཛད་གསང་བའི་བདག །

      གངས་ཅན་མཁས་པའི་གཙུག་རྒྱན་ཙོང་ཁ་བ། །

    བློ་བཟང་གྲགས་པའི་ཞབས་ལ་གསོལ་བ་འདེབས། །

          ཞེས་གསུངས་པ་འདི་ནི་རྗེ་རེད་མདའ་བས་རང་གི་སློབ་བུ་ཁམས་གསུམ་བླ་མ་རྗེ་བློ་བཟང་གྲགས་པ་ལ་བསྟོད་པའི་སྒོ་ནས་གསུངས་པ་ཡིན། གསུངས་པའི་ཡུལ་ནི་རྭ་སྒྲེང་དགོན་ཞེས་པ་དེ་ཡིན། སྐབས་སུ་བབས་པའི་བཤད་བྱ་ནི། དམིགས་བརྩེ་མའི་འགྲེལ་བ་ཡིན། ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་ཀྱི་མཁྱེན་བརྩེ་ནུས་གསུམ་གྱི་ཡོན་ཏན་དེ་རིགས་གསུམ་དུ་འདུ་ལ། རིགས་དང་པོ་ནི་དམིགས་པ་མེད་པའི་བརྩེ་བ་སྙིང་རྗེ་ཆེན་པོ་ཡིན་ལ། དེའི་དོན་ནི་སེམས་ཅན་ཡོད་དོ་ཅོག་དང་དབུགས་ཐོག་ཐམས་ཅད་རིས་སུ་མ་ཆད་པར་དམིགས་ནས་འགྲོ་བ་རིགས་དྲུག་གི་སྡུག་བསྔལ་དེ་དག་ཐུགས་ལ་ཤར་ནས་བཟོད་མི་ཐུབ་པའི་བརྩེ་བའམ་སྙིང་རྗེ་ཆེན་པོ་རྒྱུད་ལྡན་གྱི་གང་ཟག་དེ་དག་ནི་རྒྱལ་བ་སྲས་དང་བཅས་པ་ཡིན་ལ། མཁྱེན་བརྩེ་ནུས་གསུམ་གྱི་ནང་གི་བརྩེ་བའོ། ། དེས་ན་བརྩེ་བ་སྙིང་རྗེ་ཆེན་པོ་ཡོད་ན་སེམས་ཅན་གྱི་དོན་བྱེད་ཐུབ་བམ་ཞེ་ན། མིན་ཏེ། སེམས་ཅན་གྱི་དོན་བྱེད་ན་བྱེད་ཚུལ་དེ་ཤེས་དགོས་པ་རེད།དེའི་ཕྱིར། བྱེད་ཚུལ་ཇི་ལྟར་ཤེས་ཤེ་ན། རིགས་གཉིས་པ་ནི་དྲི་མ་མེད་པའི་མཁྱེན་པ་དེ་ཡོད་དགོས། མཁྱེན་པ་ཞེས་པ་རྣམ་དཔྱོད་ཀྱི་མིང་ངོ་། ། རང་ཉིད་རྣམ་མཁྱེན་རྒྱུད་ལྡན་གྱི་གང་ཟག་ཡིན་ཕྱིར། སེམས་ཅན་དེ་དག་ལེགས་པའི་ལམ་དུ་ཁྲིད་པ་དང་ཐར་ལམ་ཡང་དག་པར་བསྟན་ནས། བླང་དོར་གྱི་རྣམ་དབྱེ་དེ་གསལ་བར་བསྟན་དགོས་སོ། ། དྲི་མ་མེད་པ་ཞེས་པའི་དོན་ནི། རང་ཉིད་ཀྱི་གང་ཞིག་མཁྱེན་པ་དེ་དྲི་མས་མ་གོས་པ།གཙང་མ་ཡིན་པའི་དོན་ནོ། །དེ་ནི་མཁྱེན་བརྩེ་ནུས་གསུམ་གྱི་ནང་གི་མཁྱེན་པའོ། ། དེ་བདེན་རུ་ཆུག་ཀྱང་། འོ་ན་དམིགས་པ་མེད་པའི་བརྩེ་བ་སྙིང་རྗེ་ཆེན་པོ་ཡང་ཡོད། དྲི་མ་མེད་པའི་མཁྱེན་པའམ་ཤེས་རབ་དེ་གཉིས་ཡོད་ན་ད་བཟོད་སེམས་ཅན་གྱི་དོན་བྱེད་ཐུབ་བམ་ཞེ་ན། ཡང་མིན་ཏེ། རང་ཉིད་ཀྱིས་བྱ་བ་རླབས་ཆེན་བསྒྲུབ་པ་སོགས་ལ་བར་ཆད་ཀྱི་གེགས་ཡོང་པ་རེད། བར་ཆད་དེ་དག་བཟློག་པ་ལ་རང་གི་ནུས་པའམ་སྟོབས་ཤུགས་ཀྱིས་བཟློག་འགྲོ་བ་ཡིན་པས།མཁྱེན་བརྩེ་ནུས་གསུམ་ནང་གི་ནུས་པ་དེ་ཡོད་དགོས་པ་རེད། བདུད་དཔུང་མ་ལུས་འཇོམས་མཛད་ཅེས་གསུངས། འཇོམས་མཛད་ཅེས་པ་ནུས་པའི་དོན་ནོ། ། འདི་ནི་རིགས་གསུམ་པའོ། ། དེས་ན་དམིགས་པ་མེད་པའི་བརྩེ་བ་སྙིང་རྗེ་ཆེན་པོ་དང་དྲི་མ་མེད་པའི་མཁྱེན་པ་བདུད་ཐམས་ཅད་མི་མཐུན་པའི་གཡུལ་ལས་རྒྱལ་བར་བྱེད་པའི་ནུས་པ་ཡོད་པ་ཅན་དེ་སུ་རེད་དམ་ཞེས་འདྲི་ན། གངས་ཅན་མཁས་པ་ཐམས་ཅད་ཀྱི་གཙུག་གི་རྒྱན་དུ་གྱུར་བ། རྗེ་བླ་མ་བློ་བཟང་གྲགས་པ་ཡིན་པའི་དེའི་ཞབས་ལ་ཕྱག་འཚལ་བའམ་དེ་ལ་གསོལ་བ་འདེབས་པའོ། ། རྒྱལ་བ་སྲས་དང་བཅས་པ་ཐམས་ཅད་ཀྱི་སྐུ་གསུང་ཐུགས་གསུམ་གྱི་ཡོན་ཏན་དེ་དག་བློ་བཟང་གྲགས་པ་ལ་འདུའོ། ། དམིགས་པ་མེད་པའི་རྩེ་བ་སྙིང་རྗེ་ཅན་དེ་གང་རེད་ཅེས་ན། འཕགས་པ་སྤྱན་རས་གཟིགས་སོ། ། ཞེས་རྐང་པ་དང་པོ་བྱུང་། དྲི་མ་མེད་པའི་མཁྱེན་པའམ་ཤེས་རབ་ཅན་དེ་གང་ཡིན་ཞེ་ན། རྗེ་བཙུན་འཇམ་པའི་དབྱངས་སོ། ། ཞེས་རྐང་པ་གཉིས་པ་བྱུང་། བདུད་ཐམས་ཅད་ཕམ་པར་བྱེད་པའམ་འཛོམས་པར་བྱེད་མཁན་དེ་གང་ཡིན་ཞེ་ན། ཕྱག་ན་རྡོ་རྗེ་རེད། ཅེས་རྐང་པ་གསུམ་པ་བྱུང་།གང་ཟག་དེ་དག་ནི་ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་ཀྱི་མཁྱེན་བརྩེ་ནུས་གསུམ་གྱི་རང་གཟུགས་ཤར་བའི་བདག་ཉིད་ཅན་ནོ། ། འོ་ན་དེ་གསུམ་གྱི་མཁྱེན་བརྩེ་ནུས་གསུམ་གྱི་རང་གཟུགས་ཤར་བའི་བདག་ཉིད་ཅན་དེ་དགེ་སློང་དམར་སེར་ཅན་རྗེ་བླ་མ་བློ་བཟང་གྲགས་པ་རེད་དོ། ། གོང་གི་དེ་དག་ཡོན་ཏན་ཤར་བའི་སྒོ་ནས་རང་གིས་དམིགས་བརྩེ་མ་ཁ་འདོན་བྱེད་ན་ཕན་པ་ཆེན་པོ་ཡོད་དོ། ། ད་དུང་སྤྱན་རས་གཟིགས་ཀྱི་སྐུའི་ཁ་དོག་དཀར་པོ་ཡིན་པ་དང་།འཇམ་དབྱངས་ཀྱི་སྐུའི་ཁ་དོག་དམར་སེར་ཡིན་པ། ཕྱག་ན་རྡོ་རྗེ་ཡི་སྐུའི་ཁ་དོག་ནག་པོ་ཡིན་པ་མཚོན་བྱེད་མང་པོ་ཡོད་དོ། །བདག་ལ་ཁོམ་ལོང་ཅུང་མེད་པས་མ་བྲིས་སོ། །