རྟ་ནག་སྒྲོག་འགྲོས། (སྨད་ཆ)

དེར་ཨ་མས་ལན་ཅི་ཡང་མ་བཏབ། དེ་ནས་ཡང་བཀྲ་ཤིས་མཚོས་སྨྲས་པ།
    “ངས་སྔོན་ཆད་རྟ་མགྲིན་རྡོ་རྗེར་ཁ་ཏ་བྱས་མྱོང༌། དེ་ནི་ཕྱུག་པོ་སྟོབས་ཅན་གྱི་བུ་ཡིན་པས་ང་ཚོས་དེའི་དོ་ཟླར་མི་ཡོང༌། ང་ཚོར་དཔའ་ཡོད་ཀྱང་རྒྱུ་མེད། རྒྱུ་མེད་ན་རྟ་ཕོ་ཤ་མེད་གོང་ཆུང༌། རྒྱུ་མེད་བུ་བྱིས་ངོ་ཆུང་ཞེས་པའི་དཔེ་ལྟར་ཡིན། དེ་ལས་ང་ཚོ་ས་ཆ་གཞན་ཞིག་ཏུ་སོང་ན་ཨེ་མི་དགའ་ཞེས་དྲིས་ཀྱང༌། ཁོས་ས་ཆ་གཞན་པ་གང་ལ་སོང་ནའང་འདི་དང་འདྲ་མཚུངས་རེད། བྲོས་ནས་ཐར་ས་ མེད། འབྲོ་དགོས་པའི་རྒྱུ་མཚན་ཡང་མེད། ང་ཚོར་རྒྱུ་མེད་ན་དཔའ་ཡང་མེད་དགོས་པ་ཅི་ཡོད། ང་ཚོའང་མི་ཡིན་པས་གཞན་གྱིས་གང་བསམ་ཅི་འདོད་ལྟར་ཐུབ་ཚོད་བྱེད་པ་འཁུར་དགོས་དོན་མེད། གཉེན་ཟས་ནོར་གྱིས་སྐྱོང་བ་དང་དགྲ་དཔའ་རྩལ་གྱིས་འདུལ་བ་ནི་ང་ཚོ་བོད་ཀྱི་ལུགས་རེད་ཟེར་ནས་དཔའ་སྐད་འདོན་པ་ལས་ངས་བཤད་པའི་སྐད་ཆར་མ་ཉན།”
    དེར་རྒན་མོས་སྨྲས་པ།
   “ཁྱོད་ཁ་མ་མང་བར་བསྡད་ན། ད་སྐབས་ང་ཚོའི་མགོར་སྡུག་འདི་ཡོང་དགོས་དོན་མེད། རྟ་མགྲིན་རྡོ་རྗེའི་མཛད་པ་ཤེས་བཞིན་དུ་དགོས་མི་དགོས་བཤད་མི་ཉན་པ་ལོས་ཤེས།”
   དེ་ནས་བཀྲ་ཤིས་མཚོའི་སེམས་ལ། སྔོན་ཆད་གནས་ཚུལ་ཚང་མ་གསལ་བོར་མ་བཤད་པ་ནི་དེ་ཙམ་མ་ལེགས། ད་ནི་སྐབས་འདི་དང་བསྟུན་ནས་གལ་ཆེ་བ་རྣམས་ཞིབ་ཏུ་བཤད་ན། མོའི་སེམས་ལའང་འབབ་རྒྱུ་ཞིག་ཡོད་ལ། ལས་ཕྱི་འདེད་ཀྱང་མེད་སྙམ་ནས་སྨྲས་པ།
   “ང་ཁ་མང་བ་མིན། བཀྲ་མ་ཤིས་པ་དེས་ཐེངས་གཅིག་མིན་གཉིས་མིན། གར་སོང་གར་ཐུགས་ནས་འགྲོ་དབང་འདུག་དབང་མི་སྟེར། དང་བོར་ཁ་ཡག་ངོ་བསྟོད་ཀྱི་གཡོ་ཟོལ་གྱིས་བློ་ཁ་བསྒྱུར་ཐབས་ཅི་ནུས་བྱས་མོད། དེ་ཐམས་ཅད་ངལ་བ་འབྲས་མེད་དུ་གྱུར་རྗེས།? ཉ་བ་གཡོ་སྒྱུ་ཅན་གྱིས་ཐོག་མར་ཉ་ལ་ཟས་ཅི་དང་ཅི་འདོད་པ་བྱིན་ནས་ཁ་བྲིད་པ་བཞིན་རྒྱུ་འབྱོར་བ་དང་གཡུ་བྱུ་རུ་སོགས་ཀྱིས་བསླུ་བྲིད་གང་ཐུབ་ཐུབ་བྱས།
དེའང་འབྲས་མེད་དུ་གྱུར་རྗེས།མཐར། ཁྱོད་ཀྱིས་གལ་ཏེ་ངའི་རེ་བ་མི་སྐོང་ན། ངས་དྲག་པོའི་ལས་ལ་བརྟེན་ནས་ཁྲ་ཤུལ་རྟ་མགྲིན་རྡོ་རྗེ་ཚང་ཟེར་བའི་ཐབ་ཤུལ་ཙམ་ཡང་མི་བསྐྱུར་བར་མིང་མེད་དུ་གཏོང་ ངེས་ཡིན། དེ་དུས་འགྱོད་ཀྱང་བྱ་ཐབས་མེད་ཟེར་ནས་འཇིགས་སྣང་ཡང་བསྐུལ། དེའི་ཕྱིར་ཁ་རོག་པར་འདུག་ཐབས་བྲལ་ནས་གོང་གི་གནས་ལུགས་ཚང་མ་དྲང་བོར་བཤད་པ་ཡིན།”
   འདིར་བཀྲ་ཤིས་མཚོའི་སེམས་ལ། མིའི་རྒྱུད་ཀྱི་བག་ཡོད་དང་ངོ་ཚ་བའི་འདུ་ཤེས་སོགས་དོར་ནས་འདོད་གཏམ་རྣ་བས་ཐོས་ན་ཤ་ཡང་འདར་བ་མང་བོ་བཤད་པའི་སྐོར་དང༌།  རི་མགོ་དང་ཆུ་འགྲམ་སོགས་ནས་ཉི་མ་དཀར་ལ་ཁྱི་ཕག་བཞིན་འབྱར་ཚུལ་གྱི་ལོ་རྒྱུས་སོགས་ཞིབ་ཏུ་བཤད་ན་ལེགས་བསམས་མོད་ཀྱང༌། མ་སྨད་གཉིས་ཀྱི་བར་ཡིན་རུང་ངོ་ཚ་བའི་དབང་གིས་ཚང་མ་ཁ་ནས་མ་ཐོན།
   དེར་རྒན་མོས”དེ་ཡིན་རུང་སེམས་རྒྱ་བསྐྱེད་ནས་བཟོད་པ་བསྒོམ་དགོས། ང་ཚོས་བཟོད་པ་བསྒོམ་པ་ལས་འགྲོ་ལམ་གཞན་གང་དུའང་མེད།གང་ནས་ཀྱང་མི་རྙེད”ཟེར།
   རྒན་མོས་དེ་ལྟར་བཤད་པས་བཀྲ་ཤིས་མཚོའི་སེམས་ལ། ཐུབ་ཚོད་བྱས་ན་གཉོམ་ཁུར། བརྙས་བཅོས་བྱས་ནས་བཟོད་པ་བསྒོམས། དེ་འདྲ་བྱས་ནས་ཉི་མ་མི་འཁྱོལ་བ་མིག་ཐོག་ཏུ་ཤར་འདུག་པ་འདི་རེད་སྙམ་ནས་སྨྲས་པ།
   “ཨ་མ་ལགས། ཁྱོད་ཀྱིས་ནམ་ཡིན་རུང་བཟོད་པ་སྒོམས། བཟོད་པ་སྒོམས་ཟེར་མོད། འོན་ཀྱང་མཟོད་པ་བསྒོམས་ནས་ཡོང་རྒྱུ་ཅི་ཡོད། ལྷག་པར་ཅི་བྱེད་ལ་གནས་ལུགས་མེད་པའི་མི་ཐ་ཤལ་བར་བཟོད་པ་མསྒོམས་ན་འཕར་སྤྱང་ལ་སྙིང་རྗེ་བསྒོམས་པ་ལྟར་ཇེ་ཐུ་ཇེ་སྡུག་ལས་མེད། མཐར་ཁྱོད་ཀྱིས་མ་བསད་ཁྱོད་ཉིད་གསོད་ངེས་པས། བྱོལ་སོང་བཞིན་གཞན་གྱིས་སྲོག་ལེན་ས་ལ་ལག་ཡ་ཙམ་ཡང་མི་བྱེད་པ་སུ་ཡོད། གལ་ཏེ་མི་ངན་དེ་ཚར་མ་བཅད་ན་ང་ཚོ་ནམ་ཡིན་རུང་བདེ་བར་ འདུག་པའི་གོ་སྐབས་ཡོད་མི་སྲིད། འདི་བྱས་པས་དེང་ཕྱིན་ཆད་གཞན་གྱིས་ཀྱང་ ཐུབ་ཚོད་བྱེད་མི་ཕོད། བུ་རང་སྐྱེས་ཀྱིས་རང་མདོག་སྟོན་མ་ཐུབ་ན་སྐྱིད་གཞན་ན་རེ་ས་མེད།”
  རོང་ཚ་བཀྲ་ཤིས་མཚོས་དེ་ལྟར་བཤད་སྐབས་འཕང་མི་མཐོ་མོད་ཀྱང༌། མོའི་མིག་གི་ནང་ན་འོད་ཁྱད་པར་ཅན་ཏེ་ནམ་རྒྱུན་མཐོང་དཀའ་བ་ཞིག་འཕྲོ་བཞིན་འདུག
   རྒན་མོས་དེ་ལྟར་བཤད་པ་ཐོས་པས་དབུགས་སྟོད་དུ་འཚང་བཞིན་སྨྲས་པ།”ངས་ཁྱོད་གཉིས་ལ་རྒྱུན་པར་འགྲོ་ཤེས་ཀྱི་ཝ་མོ་ལྟ་བུ། འདུག་ཤེས་ཀྱི་རི་བོང་ལྟ་བུ་བྱེད་དགོས་ཞེས་ཡང་ཡང་བཤད་ཀྱང་ངའི་ཁ་ནི་མི་ལེན། ནམ་ཡིན་རུང་དཔའ་སྐད་མཐོ། ལུགས་སྲོལ་བཤད་རྒྱུར་དགའ། ད་ཁྱོད་ཀྱང་ཁྲིམས་སྒོར་ཤོག་ཟེར་ན་སོང༌། རྒྱུ་མཚན་མཐའ་དག་པོ་མགོ་མཇུག་བར་གསུམ་དང་བཅས་ཏེ་བཤད་ཡག་གྱིས། ངའི་ཕྱོགས་ལ་སེམས་མ་འཁོར། ང་མཚེར་དུ་ལུས་ན་ལུས། སྤྱང་ཁུས་ཟོས་ན་ཟོས། ཅི་བྱས་རུང་ལ་རྩེའི་ཉི་མ་ལྟ་བུ་རེད། ཚེ་ཕྱི་མའི་ཡུལ་ལ་སྐེ་སོ་བྱས་ཡོད་པ་འདི་རེད། ཤུལ་དུ་འདུག་མཁན་ཁྱོད་གཉིས་ཡིན་པས། བདེན་གང་ཐོབ་ཐོབ། རྒྱལ་ཁ་ཅི་ལོན་ལོན་ལ་ལྟོས།”
   “ཨ་མ་ལགས། ཁྱོད་ཀྱི་ཁ་མ་བླངས་པ་ག་ལ་ཡིན། ཁ་བླངས་ཀྱང་མ་ཕན་པ་རེད།ཝ་མོ་འདུག་ཤེས་རུང་རིག་རིག་ཚང་མས་ཨེ་སོད་སོད་བལྟ་བ་མ་ཡིན་ནམ།”
   དེར་ཨ་མས་ལན་མ་བཏབ་པས་ན་ཡང་སྨྲས་པ།
   “དེའི་སྐོར་ཞིབ་པར་བཤད་ན། རྟ་མགྲིན་རྡོ་རྗེ་ཕར་ཞོག ཁྱེད་ཀྱིས་ཀྱང་བཟོད་དཀའ། ད་ལོ་དྲུག་པའི་ལབ་རྩེ་བསྟོད་སྐབས། མི་མང་བརྒྱ་ཚོགས་སྟོང་འདུས་དེའི་ནང་ནས་ཕྱུག་པོའི་རྟ་ཤེད་དང་ཡོད་པོའི་ནོམ་ཤེད་ཀྱིས་བརྙས་བཅོས་གང་མང་བྱས་པར་མ་ཟད། དེ་རིང་རང་སྡེ་མཚོ་མོ་འཚོགས་པའི་ཁྲོམ་ཆེན་འདིའི་མདུན་ནས་ངེད་གཉིས་ཀྱིས་ཀྱང་འགག་བཟའི་ཇོ་རུ་ལྟར་རྟ་འདོ་བའི་བང་ཁ་འགྲན་ནས། རྒྱལ་ཁ་སུ་ཐོབ་ལ་རོང་ཚ་བཀྲ་ཤིས་མཚོ་དབང་བའི་རྟ་རྒྱུག་རྒྱལ་འཇོག་ཅིག་བྱེད་རྒྱུ་བྱས་ན། ཁྱོད་ལ་དེའི་སྤོབས་པ་ཨེ་ཡོད། ཡོད་ན་ཤོག་དང་ད་ལྟ་རྟིང་ཐག་གཅོད།གལ་ཏེ་མེད་ན་ཁྱོད་ཀྱི་སྙིང་སྡུག་དེ་ཞག་གསུམ་ལ་ངའི་ཉལ་རོགས་བྱེད་པར་མངག་དགོས་ཟེར་ནས་མི་མང་དེའི་ནང་ནས་ཁྱད་གསོད་ཀྱི་སྐད་ཆ་མང་བོ་གྱ་ཚོམ་དུ་སྨྲས་རབས་མང༌། དེར་རྟ་མགྲིན་རྡོ་རྗེ་ཚིག་པ་ཟོས་ཏེ། རྟའི་བཟང་ངན་ལ་ཁྱད་པར་ཅི་འདྲ་ཡོད་མི་ཤེས། བང་རྩལ་ཧ་ལམ་འདྲ་ཡང༌། དེ་ལྟ་བུའི་ལེགས་ཉེས་བསྡུར་དགོས་པའི་རྒྱུ་མཚན་ཅིའང་མ་མཆིས་བསམས་ནས། རྟའི་བང་ཁ་འགྲན་ནས་ཅི་བྱ། དེ་ནི་དོན་མེད་འཆོལ་བོ་དང་སྙིང་མེད་སྡར་མ་རྣམས་ཀྱི་ལས་ཀ་ཡིན་པས་ཡ་མཚར་བ་ཅི་ཡང་མེད། ཁྱོད་ཀྱི་རྟ་བཟང་ན་དེ་ནི་ཕྱུག་པོའི་ནོམ་སྟོབས་ལས་བྱུང་བ་ཡིན་པ་ལས་ཁྱོད་རང་ལ་མཐུ་དང་ནུས་པའམ་དཔའ་རྩལ་གཞན་དང་མི་མཐུན་པ་ཞིག་ཡོད་པ་ག་ལ་ཡིན་ཞེས་པ་ལ། ཨོ—ཁྱོད་དེ་འདྲའི་དཔའ་བོ་སྙིང་སྟོབས་ཅན་ཞིག་ཡིན་ན། ངེད་གཉིས་དཔའ་བོའི་དཔུང་ཁ་དང་རྣོན་པོའི་མཚོན་ཁ་འགྲན་ནས་སུ་དཔའ་གང་ངར་ལ་བལྟས་ནའང་ཆོག་ཟེར་ནས་རལ་གྲི་བཏོན་ནས་མཆོངས་བྱུང་བ་ཉེར་འཁོད་པ་རྣམས་ཀྱིས་བཟུང་ནས་བར་བཤོལ། དེ་ནས་ལོ་ལོན་དང་བསམ་ཤེས་ཚང་མས་ཀྱང་དེ་རིང་ཡུལ་ལྷ་གཞི་བདག་ལ་བསང་མཆོད་བྱས་ནས་རྟེན་འབྲེལ་གྱི་འགོ་སྒྲིག་སྐབས་འདིར་གྱོད་སྣ་ཁ་མཆུ་ལ་གཏུགས་ན་ཁྱོད་གཉིས་ཕར་ཞོག སྲིད་སྡེ་ཡོངས་ཀྱི་བྱ་བ་ལམ་དུ་མི་འགྲོ་བའི་ཉེན་ཁ་ཡོད་ཟེར་ནས་ཁ་ཏ་སློབ་གསོ་ཡང་ཡང་བྱས་ཀྱང༌། དེ་བཟུང་ནས་མ་ཐུབ་པར་དཀའ་རབས་མང་བོ་བཤད་རྒྱུ་ཡོད།”