བརྟག་པ་རྩ་ཆུའི་མདོ་བཞུགས་སོ། །

དེ་ནས་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས། །རེག་མཐོང་གཉིས་ཀྱིས་ནད་ཀྱི་
ངོས་འཛིན་པ། །རེག་པ་རྩ་ལ་ཇི་ལྟར་བརྟག་པར་བགྱི། །མཐོང་བ་ཆུ་ལ་ཇི་ལྟར་བརྟག་པར་བགྱི། །གལ་འགག་བཞི་ཡི་འཁྲུལ་སོ་ཇི་ལྟར་བསལ། །
འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཡིད་ལས་སྐྱེས། དང་པོ་རེག་པ་
རྩ་ལ་བརྟག་པ་ནི། །ནད་དང་སྨན་པ་བརྡ་སྦྱོར་འཕྲིན་པ་རྩ། །སྔོན་འགྲོ་ཟས་སྤྱོད་བསླབ་དང་བལྟ་དུས་བསྟན། །བལྟ་གནས་མནན་ཚད་བལྟ་ཚུལ་
ཤེས་པ་ཡིས། །ཐ་མལ་རྩ་ལ་རྩ་རྒྱུད་གསུམ་དུ་བརྟག །དུས་བཞིའི་རྩ་ལ་ཁམས་ལྔ་འབྱུང་བ་རྩི། །ངོ་མཚར་རྩ་བདུན་ནད་མེད་མི་ལ་བལྟ། །ནད་
དང་ནད་མེད་འཕར་བའི་གྲངས་ལས་དཔགས། །སྤྱི་དང་བྱེ་བྲག་རྩ་ཡིས་ནད་ངོས་བཟུང་། །འཆི་རྩ་གསུམ་གྱིས་འཚོ་འཆི་ཁ་དམར་གདགས། །
གདོན་རྩ་གློ་བུར་ཡེ་འདྲོག་རིམ་འགྲོ་འབོགས། །ཚེ་རྟགས་བླ་ཡི་རྩ་ལ་བརྟག་པ་སྟེ། །སྤྱི་དོན་བཅུ་གསུམ་རེག་པའི་མདོར་བསྟན་ཡིན། །དང་པོ་
སྔོན་འགྲོ་ཟས་སྤྱོད་བསླབ་པ་ནི། །ཤ་ཆང་ལ་སོགས་དྲོད་བཅུ་དྲག་པོ་དང་། །འཇུ་དཀའ་བསིལ་ཆེས་ནད་གཞི་འཁྲུག་པ་སྤང་། །འགྲངས་ཆེས་
ལྟོགས་ཆེས་ཉལ་པོ་གཉིད་ཆག་དང་། །སྨྲ་བརྗོད་སེམས་ལས་འགྲོ་འདུག་སྤངས་ཏེ་བརྟག །དེ་ཡིས་འདུ་བ་རྣམ་གསུམ་མི་འཁྲུག་གསལ། །གློ་
བུར་དུ་ཡང་དབུགས་མལ་ཚུད་པ་དང་། །རྩ་དཔངས་རྐྱེན་གྱིས་མ་བཏེག་གཅེས་པ་ཡིན། །བལྟ་དུས་མཁའ་ལ་ཉི་ཤར་ཀླུངས་མ་ཕེབས། །ནང་
དབུགས་དྲོན་མོ་ཕྱིར་མ་རྒྱུས་པ་དང་། །ཕྱི་དབུགས་གྲང་མོ་ནང་དུ་མ་ཤོར་བ། །མལ་ནས་མ་མགུལ་ཁ་ཟས་མ་ཟོས་པའི། །གདགས་སྲིབས་
དབུགས་སྙོམས་རྩ་མལ་གནས་དུས་བལྟ། །བལྟ་གནས་མཁྲིག་མའི་གཉེར་མ་དང་པོ་ནས། །མཚོན་གང་མར་བཅལ་རུས་པ་འབུར་པོའི་ལྡེབས། །
ཚོན་ཀན་ཆག་གསུམ་མ་འདྲུས་སྙོམས་པར་བཞག །ཅི་ཕྱིར་འཕར་རྩ་ཀུན་ལ་ཡོད་མོད་ཀྱང་། །དོན་དང་ཉེ་ན་ཕུ་ཆུ་འབྲུབ་དང་མཚུངས། །རིང་བ་
ཐག་རིང་འགྲོན་པོའི་གཏམ་དང་འདྲ། །འཚམ་པས་རྒྱང་གྲགས་དབྱར་སྐད་བཞིན་དུ་གསལ། །ཐམས་ཅད་རྒྱུ་བས་ཚོང་དུས་རྒྱ་སྲང་བཞིན། །དོན་
སྣོད་དེར་མི་རྒྱུ་བས་འགལ་ཞེ་ན། །རླུང་ཁྲག་ཀུན་ཏུ་རྒྱུ་བས་ཚོང་དཔོན་བཞིན། །བཅུ་གཉིས་མ་འདྲེས་ཕ་ཙེའི་རེ་སོ་འདྲ། །བླ་རྩ་མར་ཟུར་ཆུ་རྒྱུས་
གསེབ་ཏུ་བརྟག །མཐའ་ནས་སྡུད་ཕྱིར་འཆི་རྩ་བོལ་ལ་བརྟག །མནན་ཚད་ཚོན་གྱིས་པགས་པ་ཀན་གྱིས་ཤ །ཆག་གིས་རུས་པ་ནོན་ཙམ་གསལ་
བར་མནན། །ཅི་ཕྱིར་ཞེ་ན་རྩ་དབྱིབས་ལ་ཕུག་འདྲ། །ཤ་རྔམས་ཟབ་མི་ཟབ་ལས་བྱུང་བ་ཡིན། །བལྟ་ཚུལ་ལག་པའི་སོར་མོ་མ་གྲང་བའི། །འཇམ་
ཞིང་མཉེན་ལ་དྲོད་དང་མཐུན་པ་ཡིས། །ཕོ་རྩ་གཡོན་དང་མོ་རྩ་གཡས་སུ་བརྟག །དང་པོ་ནད་པའི་ལག་གཡོན་སྨན་པའི་གཡས། །ཚོན་གྱི་འོག་ཏུ་
སྙིང་དང་རྒྱུ་མའི་རྩ། །ཀན་གྱི་འོག་ཏུ་མཆེར་པ་ཕོ་བའི་རྩ། །ཆག་གི་འོག་ཏུ་མཁལ་གཡོན་བསམ་སེ་བརྟག །ནད་པའི་ལག་གཡས་སྨན་པའི་གཡོན་
པས་བལྟ། །ཚོན་འོག་གློ་ལོང་ཀན་འོག་མཆིན་མཁྲིས་རྩ། །ཆག་འོག་མཁལ་མ་གཡས་དང་ལྒང་པ་བརྟག །མོ་ལ་ཚོན་རྩ་གཉིས་པོ་གཡས་གཡོན་
ལྡོག །ཅི་ཕྱིར་གློ་སྙིང་གཡས་གཡོན་ཕྱོགས་མེད་ཀྱང་། །སྙིང་གི་རྩེ་མོ་དེ་ལྟར་བསྟན་པའི་ཕྱིར། །གཞན་རྣམས་གནས་ཀྱིས་བསྐལ་ཕྱིར་གོང་ལྟར་
ངེས། །ཐ་མལ་རྟེན་གྱི་རྩ་རྒྱུད་རྣམ་གསུམ་ནི། །ཕོ་རྩ་མོ་རྩ་བྱང་ཆུབ་སེམས་རྩ་གསུམ། །ཕོ་ཡི་རྩ་ནི་སྦོམ་ལ་རགས་པར་འཕར། །མོ་ཡི་རྩ་ནི་ཕྲ་ལ་
མྱུར་བར་འཕར། །བྱང་ཆུབ་སེམས་རྩ་རྒྱུད་རིང་འཇམ་ལ་མཉེན། །ཕོ་ལ་མོ་རྩ་ཆགས་ན་ཚེ་རིང་ཞིང་། །མོ་ལ་ཕོ་རྩ་ཆགས་ན་བུ་དཔལ་ཆེ། །
གཉིས་ཀར་བྱུང་ཆུབ་སེམས་དཔའི་རྩ་བྱུང་ན། །ཚེ་རིང་ནད་དཀོན་ཡས་བྱམས་མས་སྡང་སྟེ། །དྲུང་གསུམ་དགྲར་ལྡང་མཐའ་ཕུགས་རབས་ཀྱང་
ཆད། །ཕོ་རྩ་ནང་ཕྲད་ཕལ་ཆེར་བུ་མང་སྟེ། །མོ་རྩ་ནང་ཕྲད་བུ་མོ་ཕལ་ཆེར་མང་། །བྱང་ཆུབ་སེམས་རྩ་ཕོ་མོ་གང་ཕྲད་པ། །དེ་ཡི་དབང་གིས་
གཅིག་འབྱུང་དེ་ནས་མིན། །དུས་བཞི་ཁམས་ལྔའི་འབྱུང་བ་བརྩི་བ་ནི། །དང་པོ་དུས་དོན་ཁམས་དང་རྩ་རུ་སྦྱར། །མ་བུ་དགྲ་གྲོགས་བཞི་ཡིས་སྐོར་
འགོ་བརྩི། །དཔྱིད་དང་དབྱར་སྟོན་དགུན་བཞི་དུས་མཚམས་ལྔ། །དཔྱིད་ཟླ་གསུམ་ནི་ཤིང་རྩི་ཁ་འབུས་དུས། །རྟ་པ་དབོ་དང་ནག་པས་ནམ་ཚོད་
འཛིན། །བྱེ་འུ་ཅོ་ག་རང་སྐད་འབྱིན་པའི་དུས། །བདུན་ཅུ་རྩ་གཉིས་ཤིང་ཁམས་མཆིན་རྩ་རྒྱུ། །ཅོ་གའི་སྐད་ལྟར་ཕྲ་ལ་གྲིམས་པར་འཕར། །ལྷག་
མ་བཅོ་བརྒྱད་ས་ཁམས་མཆེར་རྩ་རྒྱུ། །དབྱར་ཟླ་གསུམ་ནི་འདབ་རྒྱས་ཆར་གྱི་དུས། །ས་ག་སྣྲོན་དང་ཆུ་སྟོད་ནམ་ཚོད་འཛིན། །བྱ་ཡི་རྒྱལ་པོ་ཁུ་
བྱུག་སྐད་འབྱིན་དུས། །བདུན་ཅུ་རྩ་གཉིས་མེ་ཁམས་སྙིང་རྩ་རྒྱུ། །ཁུ་བྱུག་སྐད་ལྟར་སྦོམ་ལ་རིང་བར་འཕར། །ལྷག་མ་བཅོ་བརྒྱད་ས་ཁམས་
མཆེར་རྩ་རྒྱུ། །སྟོན་ཟླ་གསུམ་ནི་རྩི་ཐོག་སྨིན་པའི་དུས། །གྲོ་ཞུན་ཁྲུམས་སྟོད་དབྱུག་པས་ནམ་ཚོད་འཛིན། །བྱེ་འུ་འུར་པ་གཤོག་སྒྲ་འབྱིན་པའི་
དུས། །བདུན་ཅུ་རྩ་གཉིས་ལྕགས་ཁམས་གློ་རྩ་རྒྱུ། །བྱིད་པོའི་སྐད་ལྟར་ཐུང་ལ་རྩུབ་པར་འཕར། །ལྷག་མ་བཅོ་བརྒྱད་ས་ཁམས་མཆེར་རྩ་རྒྱུ། །
དགུན་ཟླ་གསུམ་ནི་ས་ཆུ་འཁྱགས་སྒང་དུས། །སྨིན་དྲུག་མགོ་རྒྱལ་གསུམ་གྱིས་ནམ་ཚོད་འཛིན། །ཤ་བ་ནག་པོ་ངུ་སྐད་འདོན་པའི་དུས། །བདུན་
ཅུ་རྩ་གཉིས་ཆུ་ཁམས་མཁལ་རྩ་རྒྱུ། །མཐིང་རིལ་སྐད་ལྟར་འཇམ་ལ་དལ་བར་འཕར། །ལྷག་མ་བཅོ་བརྒྱད་ས་ཁམས་མཆེར་རྩ་རྒྱུ། །ཉི་མ་གང་
ལྡོག་དབྱར་དགུན་འབྲིང་པོར་བརྩི། །དུས་མཚམས་བཅོ་བརྒྱད་ཕྲག་བཞི་བདུན་ཅུ་གཉིས། ས་ཁམས་མཆེར་རྩ་དར་ཞིང་རྒྱུ་དུས་དེར། །ནས་ཟན་
སྐད་ལྟར་ཐུང་ལ་འཇམ་པར་འཕར། །དེ་ལྟར་དུས་བཞི་ཁམས་ལྔར་ཕྱེས་ནས་ནི། །ད་ནི་མ་བུ་དགྲ་གྲོགས་སྐོར་འགོ་བརྩི། །ཤིང་མེ་ས་ལྕགས་ཆུ་
ལྔ་མ་བུ་བསྐོར། །མེ་ཆུ་ས་ཤིང་ལྕགས་ལྔ་དགྲ་གྲོགས་བསྐོར། །མ་བུ་དགྲ་གྲོགས་འབྱུང་བ་བརྟགས་ལ་བརྩི། །མ་དང་རང་རྩ་དར་ན་རབ་ཏུ་
བཟང་། །གྲོགས་རྩ་གྲོགས་འབྱུང་བུ་རྩ་དབང་ཐང་ཆེ། །དགྲ་རྩ་དགྲ་འོང་ཡང་ན་གསོ་དཀའ་འཆི། །ངོ་མཚར་རྩ་བདུན་ཁྱིམ་ཕྱྭ་འགྲོན་ཕྱྭ་དང་། །
དགྲ་ཕྱྭ་གྲོགས་ཕྱྭ་གདོན་ཕྱྭ་བསྟན་པ་དང་། །མེ་ཆུ་གོ་ལྡོག་བུ་རྩ་བརྟག་པ་འོ། །དང་པོ་བྱིང་ཞིང་འཐིབས་ན་མི་གཙང་རྩ། །རྨུགས་ཤིང་འཐིབས་ན་
མྱ་ངན་འོང་བའི་རྩ། །འབྲུབ་ཅིང་བརྒྱལ་ན་བྲེད་དངངས་འོང་བའི་རྩ། །སྐྱེར་ཚེར་འདྲ་ན་སྡུག་བསྔལ་ཐར་མེད་རྩ། །ཆུ་ཚན་ཁོལ་འདྲ་མི་ཁ་འོང་
བའི་རྩ། །མེ་ལྕེ་ཆད་འདྲ་ནོར་གོད་འོང་བའི་རྩ། །དེ་དག་གང་ཡང་རང་རྩ་དར་དུས་སུ། །རང་གི་རྩ་ལ་གང་བྱུང་རང་ལ་འོང་། །མ་རྩ་མ་ཞང་བུ་རྩ་
བུ་ཚ་ལ། །གྲོགས་རྩ་ནོར་ལ་དགྲ་རྩ་དགྲ་ལ་འོང་། །འགྲོན་ཕྱྭ་གཞི་བ་གང་བརྩེ་གཅིག་ལ་བརྟག །མཆིན་རྩ་གློ་སྙིང་མཆེར་མཁལ་གང་དྲག་པ། །གཞི་
ལ་ཡོད་དང་ལམ་དུ་ཞུགས་པ་དང་། །ཉེ་བར་སླེབ་དང་ཕྱིན་ལ་ཁད་པ་དང་། །འགྲོན་དགྲ་འོང་བ་རིམ་པས་བརྟག་པར་བྱ། །ཡང་ན་མ་དང་རང་
རྩ་གཞི་ལ་གནས། །བུ་རྩ་ལམ་ཞུགས་དགྲ་རྩ་ད་ལྟ་སླེབ། །དོན་གཉེར་འགྲུབ་བམ་མི་འགྲུབ་བརྟག་པ་ནི། །སྙིང་མཆིན་མཁལ་རྩ་དྲག་པར་འཕར་བ་
གསུམ། །དགྲ་འོང་དོན་འགྲུབ་སྟོང་ལོག་བྱེད་པ་ཡིན། །དགྲ་རྩ་མི་འགྲུབ་གྲོགས་རྩ་བྱུང་ན་འགྲུབ། །དགྲ་ཕྱྭ་ཕར་རྒོལ་གློ་རྩ་དྲག་ན་ཐུབ། །མཆེར་
རྩ་དྲག་ན་མི་ཐུབ་དགྲ་གཡུལ་མཐོ། །དགྲ་ཡི་རྩ་ལ་དགྲ་རྩ་བྱུང་ན་ཐུབ། །རང་ལ་དགྲ་རྩ་བྱུང་ན་ཐུབ་མི་འགྱུར། །ཚུལ་རྒོལ་དེ་དང་འདྲ་ན་དགྲ་
ཡིས་ཚུགས། །རང་དང་མ་རྩ་དར་ན་ཚུགས་མི་འགྱུར། །གྲོགས་ཕྱྭ་ནོར་བདག་རྩ་ལ་བལྟས་པ་ཡིས། །མཆིན་རྩ་དྲག་ན་ནོར་འཕེལ་གོད་མི་འོང་། །
སྙིང་རྩ་མཆེར་རྩ་ཞན་ན་གོད་ཀ་འོང་། །གྲོགས་ཀྱི་རྩ་ལ་གྲོགས་རྩ་བྱུང་ན་རབ། །མ་རྩ་འབྲིང་ཡིན་རང་རྩ་ཐ་མ་ཡིན། །བུ་རྩ་གྲོགས་མེད་དགྲ་རྩ་
གྲོགས་དགྲས་ཁྱེར། །གདོན་ཕྱྭ་ཤིང་རྩ་གཉན་དང་རྒྱལ་པོར་བཟུང་། །མེ་རྩ་བཙན་བདུད་ལྕགས་རྩ་རྒྱལ་པོ་དཀོར། །ས་ཡི་རྩ་ལ་ས་བདག་མ་མོར་
བཟུང་། །ཆུ་རྩ་ཀླུ་དང་ཀླུ་སྲིན་དམ་སྲིར་བཟུང་། །མ་ཡི་རྩ་ལ་ཕ་མའི་ཆགས་འདྲེར་བཟུང་། །བུ་ཡི་རྩ་ལ་བུ་ཚའི་ཞང་འདྲེར་བཟུང་། །དགྲ་ཡི་རྩ་ལ་
དགྲ་བོས་རྦད་འདྲེར་བཟུང་། །གྲོགས་ཀྱི་རྩ་ལ་ནོར་གྱི་ཕྱི་འདེར་བཟུང་། །རང་གི་རྩ་ལ་གྲོགས་ཀྱི་འགོས་འདྲེར་བཟུང་། །མེ་ཆུ་གོ་ལྡོག་ཕ་ན་བུ་ལ་
བལྟ། །མཆིན་རྩ་ཚང་ན་མི་འཆི་མ་ཚང་འཆི། །མ་རྩ་དར་ན་མི་འཆི་གུད་ན་འཆི། །བུ་ན་ཕ་ཡི་རྩ་ལ་བལྟས་པ་ཡི། །སྙིང་རྩ་ཚང་ན་མི་འཆི་མ་ཚང་
འཆི། །བུ་རྩ་དར་ན་མི་འཆི་གུད་ན་འཆི། །མ་དང་བུ་མོའི་རྩ་ཡང་དེ་ལྟར་བལྟ། །ཁྱོ་ན་ཆུང་མའི་རྩ་ལ་བལྟས་པ་ཡིས། །མཆིན་རྩ་མ་ཚང་འཆི་ལ་
ཚང་ན་འཚོ། །ཆུང་མ་ན་བ་ཁྱོ་ལ་རྩ་བལྟས་པས། །མཁལ་རྩ་མ་ཚང་འཆི་ལ་ཚང་ན་འཚོ། །ཡང་ན་ཁྱོ་གྲོགས་ཆུང་མ་དགྲ་རུ་བརྩི། །དགྲ་གྲོགས་
རྩ་དར་མི་འཆི་གུད་ན་འཆི། །སྦྲུམ་པའི་རྩ་ནི་འབུར་ལ་འདྲིལ་བར་འཕར། །མཁལ་རྩ་གཡས་པ་དྲག་ན་བུ་ཕོ་སྐྱེ། །གཡོན་པ་དྲག་ན་བུ་མོ་སྐྱེ་བར་
འགྱུར། །བུ་ཡི་རྩ་ལ་མ་རྩ་བུ་རྩ་བྱུང་། །བཙས་ནས་གསོ་སླ་དགྲ་རྩ་བྱུང་ན་དཀའ། །ནད་དང་ནད་མེད་འཕར་བའི་གྲངས་བསྟན་པ། །ནད་མེད་
ཐ་མལ་རྒྱུན་རྩ་སྨན་པ་ཡི། །ཕྱི་ནང་དབུགས་ལ་ལན་ལྔ་འཕར་བར་འདོད། །དེ་ཡང་ལན་གྲངས་བརྒྱ་ཡི་བར་དག་ཏུ། །ཆེ་ཆུང་སྟོད་སྨད་དྲག་དལ་
བྱིང་རྒྱས་དང་། །སྡོད་འཐེན་ཐང་ལྷོད་མེད་པར་འཕར་བར་འདོད། །དེ་ལས་ལྡོག་པ་ནད་ཅན་རྩ་ཡིན་ཏེ། །མང་འཕར་ཚ་བ་ཉུང་འཕར་གྲང་བ་
ཡིན། །འོན་ཀྱང་ནད་མེད་རྩ་རྒྱུད་མུ་ཏིག་འཕྲེང་། །གོང་རྒལ་མ་ཚང་སྡོད་འཐེན་ལ་སོགས་པ། །ངེས་མེད་སྲིད་ཕྱིར་གོང་དུ་གཏན་ལ་དབབ། །གཞི་
རྩ་མ་རྟོགས་ཁ་དམར་ལོག་པར་འགྲོ། །ཕོ་མོ་བུ་རྩ་མ་ཤེས་ཚ་བར་འཁྲུལ། །བྱང་ཆུབ་སེམས་རྩ་གྲང་བར་འཁྲུལ་པ་དང་། །མ་ཚང་གཅོད་སྡོད་འཆི་
རྩར་འཁྲུལ་པ་ཡོད། །རྒྱུས་མེད་རྣམས་ལ་ཐོག་མར་དྲི་བ་གཅེས། །ནད་ངོས་བཟུང་བ་སྤྱི་དང་བྱེ་བྲག་གཉིས། །སྤྱི་རྩ་དྲུག་གིས་ཚ་གྲང་ལ་ཤན་
དབྱེ། །དྲག་རྒྱས་འདྲིལ་མགྱོགས་གྲིམས་མཁྲང་ཚ་བའི་རྩ། །དེ་ཡང་དཔངས་ཚ་གྲངས་་ཚ་སྙུགས་ཚ་གསུམ།།དཔངས་དང་གྲངས་ཀྱི་ཚ་བ་འཁྲུགས་
རིམས་གསར། །སྙུགས་ཀྱི་ཚ་བ་རྙིངས་པའི་ཚ་བ་ཡིན། །གྲང་རྩ་ཞན་བྱིང་གུད་བུལ་ལྷོད་སྟོང་དྲུག །སྙུགས་གྲང་གསར་ལ་གྲངས་དཔངས་རྙིང་
པར་འདོད། །བྱེ་བྲག་བརྟག་པ་རྣམ་པ་གཉིས་ཡིན་ཏེ། །རྩ་རྒྱུད་སོ་སོས་ནད་རིགས་དབྱེ་བ་དང་། །ཚོན་ཀན་ཆག་གསུམ་རྒྱུ་བ་བཅུ་གཉིས་ཀྱིས། །
སྟོད་སྨད་དོན་སྣོད་བྱེ་བྲག་གང་བབས་བརྟག །དང་པོ་རྩ་རྒྱུད་སོ་སོར་བརྟག་པ་ནི། །རླུང་གི་རྩ་ནི་རྐྱལ་སྟོང་སྐབས་སུ་སྡོད། །མཁྲིས་པའི་རྩ་ནི་ཕྲ་
ལ་གྲིམས་པར་འཕར། །བད་ཀན་སྐྱ་བོའི་རྩ་ནི་བྱིང་ལ་རྒུད། །རླུང་ཚད་ལྡན་པའི་རྩ་ནི་སྟོང་ལ་རྒྱུག །བད་མཁྲིས་ལྡན་པ་ཁ་བྱིང་གཏིང་ན་གྲིམས། །
བད་རླུང་ལྡན་པའི་རྩ་ནི་སྟོང་ལ་དལ། །བད་ཀན་སྨུག་པོ་སྦོམ་ཁེངས་ཀན་རྩ་ཞར། །ཁྲག་གི་རྩ་ནི་འབུར་ལ་འདྲིལ་བར་འཕར། །ཆུ་སེར་རྩ་ནི་
འདར་ལ་རྒྱུ་བ་དཀའ། །སྲིན་རྩ་འཁྱིག་ཅིང་ཞེང་དུ་ལེབ་མོར་འཕར། །ཞར་ཅིང་འདར་ལ་འཕྲིག་པ་མཛེ་ཡི་རྩ། །འཁྲུགས་ཚད་རྩ་ནི་སྦོམ་རྒྱས་
འབུར་ལ་འདྲིལ། །འགྲམས་ཚད་རྩ་ནི་ཕྲ་མཁྲང་གྲིམས་པར་འཕར། །རིམས་ཚད་རྩ་ནི་ཕྲ་ལ་མགྱོགས་ཕར་འཕར། །གཉན་གྱི་རྩ་ནི་འཁྱིག་ཅིང་
ལྕམ་དྲལ་བྱེད། །གཟེར་ཐུང་རྩ་ནི་ཐུང་ཐུང་སྦུད་སྦུད་འཕར། །སྦྱར་དུག་རྩུབ་སྤུན་འཆོལ་བ་མངོན་མི་བཏབ། །ཤ་དུག་རྩ་ནི་ཕྲ་མགྱོགས་ཞར་བྱིང་
རྒྱུ། །མ་སྨིན་ཚ་བ་ཕྲ་མགྱོགས་རླུང་ལྟར་གཡོ། །རྒྱས་ཚད་རྩ་ནི་དྲག་ལ་གྲིམས་པར་འཕར། །སྟོངས་ཚད་རྩ་ནི་སྟོང་ལ་རྒྱག་པ་སྟེ། །གབ་པའི་ཚད་
རྩ་དཔངས་དམའ་ལ་གྲིམས། །ཚད་པ་རྙིང་པ་ཕྲ་ལ་གྲིམས་པར་འཕར། །རྙོགས་ཚད་རྩ་ནི་ཕྲ་མོ་གཏིང་ན་རྒྱུག །རྨ་ཚད་རྩ་ནི་སྦོམ་མཁྲང་མགྱོགས་
པར་འཕར། །ཟུག་རྔུའི་རྩ་ནི་ཞར་ཞིང་ལྕམ་དྲལ་བྱེད། །མགོ་ཆག་ཤ་རུས་ཀླད་པ་རྣམ་པ་གསུམ། །གང་ལ་སྐྱོན་ཡོད་ཚོན་ཀན་ཆག་གི་རྩ། །རིམ་
བཞིན་དྲག་ཅིང་གྲིམས་ལ་མགྱོགས་པའོ། །རྣག་རྩ་འདར་རམ་ཡང་ན་ཚ་ལ་སྤུན། །གྲང་རྩ་མ་ཞུ་གསར་པ་སྦོམ་ལ་མཁྲང་། །མ་ཞུ་རྙིང་པ་ཤེད་ཆུང་
རྩ་རྒྱུད་ཕྲ། །སྐྲན་གྱི་རྩ་ནི་ཞན་ཅིང་ཞར་བར་འཕར། །དམུ་འོར་སྐྱ་རྦབ་ཕྲ་བྱིང་གཏིང་ན་དམ། །སྐྱུག་ན་སྟོད་ཞན་འཁྲུག་ནད་རྩ་སྨད་ཞན། །འོན་
ཀྱང་རྩ་ལ་ནོར་བའི་འཕྲང་དྲུག་སྟེ། །ཁྲག་རྩ་རླུང་རྩ་རྐྱལ་བྱེད་ནོར་ར་རེ། །རྒྱས་ཚད་སྟོངས་ཚད་རྒྱུག་བྱེད་ནོར་ར་རེ། །བད་ཀན་ཁྲག་རྒན་བྱིང་
བྱེད་ནོར་ར་རེ། །དེ་དག་སྟོད་སྨད་དོན་སྣོད་གར་བབས་ནད། །ཚོན་རྩ་གཉིས་ཀྱིས་གློ་སྙིང་སྟོད་ནད་བརྟག །ཀན་རྩ་གཉིས་ཀྱིས་ཕོ་མཆིན་བར་
ནད་བརྟག །ཆག་རྩ་གཉིས་ཀྱིས་མཁལ་རྐེད་སྨད་ནད་བརྟག །གདགས་སྲིབས་རྩ་ཡིས་དོན་ལྔ་སྣོད་དྲུག་བརྟག །ཡར་ཟུར་དོན་ལྔ་ཕྱིར་རྒྱུ་གདགས་
ཀྱི་རྩ། །མར་ཟུར་སྣོད་དྲུག་ནང་རྒྱུ་སྲིབས་ཀྱི་རྩ། །དོན་སྣོད་ཕལ་ཆེར་ཆོ་རོལ་མི་འབྱུང་ཞིང་། །དོན་ཚ་སྣོད་ལ་གྲང་བ་འབྱུང་སྲིད་ཀྱི། །སྣོད་ཚ་དོན་
ལ་གྲང་བ་འབྱུང་མི་སྲིད། །སྟོད་སྨད་གཉིས་ཀྱང་དེ་བཞིན་ཤེས་པར་བགྱི། །དེ་དེ་དག་མ་འདྲེས་ཕྲ་ཞིབ་ཕྱེད་པར་རྟོགས། །འཆི་རྩ་རྒྱུད་འགྱུར་མ་
ཚང་སྡོད་པའོ། །རྩ་རྒྱུད་འགྱུར་བ་དར་ལྕེ་རླུང་བསྐྱོད་འདྲ། །ཁྲ་ཡི་མཇུག་རྩེ་ཐིགས་ཟགས་ཆུ་གཞུག་འདྲ། །ཉ་མོ་རྔམ་འདྲ་མཆིལ་པ་སྒུམ་འཐུ་
འདྲ། །སྦལ་པ་མཆོངས་དང་གླང་རྒན་ཁ་ཆུ་འདྲ། །སྟོབས་ཆེན་གློ་བུར་ནད་ལ་རྩ་སྟོབས་ཕྲ། །ཡུན་རིངས་ཟུངས་ཟད་ནད་ལ་རྩ་རྒྱས་འཁྲུགས། །
གྲང་ལ་ཚ་བ་ཚ་ལ་གྲང་རྩ་བྱུང་། །གློ་ཚད་ཤ་དུག་བད་མཁྲིས་ཕོ་ཁར་འབྲི་ལུང་། །འདི་ཞི་ནད་མེད་རྩ་བྱུང་འཆི་བ་ཡིན། །མ་ཚང་འབྲེལ་འབྱོར་ཕྱི་
ཡི་རྟགས་ལ་དཔག །སྙིང་རྩ་མ་ཚང་ལྕེ་ནག་འབུར་ཚུགས་བལྟ། །གློ་རྩ་མ་ཚང་སྣ་ཞོམ་ནང་སྤུ་ལོག །མཆིན་རྩ་མ་ཚང་མིག་ཟློག་སྨིན་མ་འཚོམ། །
མཚེར་རྩ་མ་ཚང་མཆུ་འཕྱངས་ལྷེན་སྣ་རྡིབ། །མཁལ་རྩ་མ་ཚང་སྒྲ་ཆད་རྣ་བ་འབྱར། །ཞག་གཅིག་གཉིས་གསུམ་ལྔ་དང་བརྒྱད་ན་འཆི། །སྡོད་ལ་
ན་སྡོད་འཆི་སྡོད་འདྲེ་སྡོད་གསུམ། །ན་དུས་གང་ནའི་རྩ་སྡོད་ན་སྡོད་ཡིན། །འདྲེ་སྡོད་ངེས་མེད་དྲག་དལ་བྱེད་པ་སྟེ། །གྲངས་དུས་ངེས་པར་སྡོད་
པ་འཆི་སྡོད་ཡིན། །འདྲེ་ལ་ཡས་བྱིན་ནད་ལ་སྨན་གྱིས་བཅོས། །དེ་བྱས་སྐྱེད་མེད་ཅིས་ཀྱང་འཆི་བར་འགྱུར། །ནད་བྱིང་རྐྱེན་གྱིས་གབ་དང་གདོན་
གྱིས་སྦས། །རྩ་མེད་གྱུར་ཀྱང་ངེས་མེད་ཕལ་ཆེར་འཚོ། གདོན་རྩ་རྩ་རྒྱུད་མི་སྙོམས་འགྱུར་ལྡོག་མང་། །ངེས་མེད་སྡོད་འཐེན་ལྕམ་དྲལ་བྱེད་པ་སྟེ།།
སྙིང་གི་རྩ་ལ་ལྷ་སྲུང་རྒྱལ་པོ་བརྟག །གློ་བའི་རྩ་ལ་ཀླུ་བདུད་ཀླུ་བཙན་བརྟག །མཆིན་པར་ས་བདག་དམ་སྲི་གྲེ་མོ་བརྟག །མཆེར་པར་གྲེ་ཕོ་གཉན་
དང་ས་བདག་བརྟག །མཁལ་མ་གཡས་ལ་ཀླུ་དང་གཉན་དུ་བརྟག །མཁལ་མ་གཡོན་པ་མཚོ་སྨད་ཀླུ་བསེན་བརྟག །ཆེ་རིང་མི་འགྲུང་གཡས་ལ་
ཕོ་གདོན་བཟུང་། །ཆུང་ཐུང་མི་གྲུང་གཡོན་ལ་མོ་གདོན་བཟུང་། །རླུང་གི་ནད་ལ་དཀོར་བདག་རྒྱལ་པོ་གནོད། །གློ་ཚད་གཟེར་ལ་བཙན་བདུད་ཀླུ་
བཙན་གནོད། །རིམས་དང་མཁྲིས་ནད་མ་མོ་བྱང་སྨན་གནོད། །དམུ་སྐྲན་འབྲས་ལྷོག་ཀླུ་གཉན་ས་བདག་གནོད། །ངོས་ཟིན་བོན་དང་མདོས་དང་
བསྐྲད་པ་དང་། །བྱིན་རླབས་བཀའ་བསྒྲག་བསོད་ནམས་བསག་ལ་སོགས། །ཡུལ་ལུགས་སྦྱར་ཏེ་གང་ལ་འཚམ་པས་བཅོས། །ཚེའི་རྟགས་བླ་ཡི་
རྩ་ལ་བརྟག་པ་ནི། །སེམས་ལ་རང་དབང་མ་ཐོབ་ཕྱིར་བལྟས་པས། །མ་རིག་སྲིད་པའི་ལུས་ངན་བླངས་པ་ཡིས། །ཚེ་སྲོག་རྟེན་དུ་བླ་རྩ་འཁྱམས་པོ་
བྱུང་། །བླ་རྩ་གནས་ན་བླ་ཚེ་མལ་དུ་གནས། །བླ་རྩ་འགྱུར་ལྡོག་བྱེད་ན་ཚེ་མི་བརྟན། །བླ་རྩ་བྲོས་ན་བླ་ཚེ་ཡར་ཏེ་འཆི། །ཚེ་ཆོག་འཆི་བསླུས་ཁུགས་
པ་སྲིད་པ་ཙམ། །ཡར་མར་ཆུ་རྒྱུས་འོག་ནས་མི་རྒྱུ་ན། །བན་བོན་ཡིན་ན་བསྲུངས་མ་བདུད་དུ་བབས། །སྐྱེ་བོ་ཡིན་ན་ཟོར་ཁ་ཀླུ་གཉན་འགྲས། །
ཕོ་ལ་གཡས་པ་འཁྱིལ་སྡོད་ཕ་སྤུན་འཆི། །གཡོན་པ་འཁྱིག་ཅིང་སྡོད་ན་བུ་སྨད་འཆི། །གཉིས་ཀ་འཁྱིག་སྡོད་རང་ཉིད་གྲི་རུ་འཆི། །ཐེངས་གཅིག་
སྡོད་ན་གོད་ཀ་ཁ་ཡོགས་འོང་། །བུད་མེད་གཡས་པ་འཁྱིག་སྡོད་ཁྱོ་ཕྱོགས་འཆི། །གཡོན་པ་འཁྱིག་ཅིང་སྡོད་ན་ཕ་མིང་འཆི། །གཉིས་ཀ་འཁྱིག་
ཅིང་སྡོད་ན་བུ་ཁྱོ་འཆི། །སྟོང་བརྒྱལ་གོད་འོང་ཐང་འཁྱིག་ཁ་སྨྲས་འོང་། །མལ་མེ་ཐུབ་ན་གདོན་གྱི་རྩ་ཡིན་ཏེ། །སྦོམ་འཁྲུག་ཕོ་གདོན་ཐུང་རྩ་མོ་
གདོན་བཟུང་། །བླ་རྩ་སྙོམས་པར་ལན་བརྒྱ་འཕར་བ་ནི། །ལོ་བརྒྱ་ཐུབ་སྟེ་ལྔ་བཅུས་ལྔ་བཅུ་ཐུབ། །དེ་བཞིན་འཕར་རེས་ལོ་རེ་ཐུབ་པར་བཤད། །
དེ་ལྟར་རྟོག་པའི་སྨན་པ་ཉན་པ་འདྲ། །ཤེས་པ་མ་ཡེངས་གཅིག་ཏུ་བསྡུས་ལ་སྤྲོ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་
བ་མན་ངག་གི་རྒྱུད་ལས་རེག་པ་རྩ་ལ་ནད་ངོས་བཟུང་བའི་ལེའུ་སྟེ་དང་པོའོ། །

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཡིད་ལས་སྐྱེས། །མཐོང་བ་མེ་ལོང་ཆུ་ལ་ངོས་
བཟུང་བ། །སྔོན་འགྲོ་བལྟ་དུས་སྣོད་དང་གྱུར་ཚུལ་དང་། །ཐ་མལ་ནད་ཆུ་འཆི་ཆུ་གདོན་ཆུ་སྟེ། །ས་བཅད་རྣམ་བརྒྱད་ཆུ་བརྟག་མདོར་བསྟན་
ཡིན། །དང་པོ་སྔོན་འགྲོ་བལྟ་བའི་ནུབ་མོ་ནས། །ཇ་དང་དར་བ་ཆང་དང་སིངས་པོ་སོགས། །ཆུ་མདོག་འགྱུར་ཕྱིར་ཧ་ཅང་མང་བ་སྤང་། །སྐོམ་
པར་མི་སྡོད་ཉལ་པོ་གཉིད་ཆག་དང་། །འགྲོ་འདུག་སེམས་ལས་ཆུ་འཁྲུགས་སྤང་བར་བྱ། །ནམ་ཕྱེད་ཕན་ཆད་ཟས་ཀྱི་ཆུ་ཕོ་ལ། །ནམ་སྨད་ནད་
ཆུ་བསགས་ཏེ་བལྟ་བར་བྱ། །བལྟ་དུས་མདོག་རླངས་ཀུ་ཡ་བརྟག་པའི་ཕྱིར། །ཞོགས་པ་སྣོད་ལ་ཉི་མདངས་བྱུང་དུས་བརྟག །སྣོད་ཀྱི་ཁྱད་པར་
ཆུ་མདོག་མི་འགྱུར་བའི། །དཀར་ཡོལ་འཁར་གཞོང་ལྕགས་དཀར་སྣོད་དུ་བརྟག །རྫ་ཟངས་ར་གན་དམར་ཡོལ་མདོག་འགྱུར་སྤང་། །འོན་ཀྱང་
འཇག་སོག་དཀར་པོས་བརྟག་ཏུ་རུང་། །གྱུར་ཚུལ་ཟས་སྐོམ་ཕོ་བར་དྭངས་སྙིགས་ཕྱེ། །སྙིགས་མ་རྒྱུ་མའི་ནང་ཚུད་སྐ་སླ་ཕྱེ། །སླ་བ་རྒྱུ་གྲོག་རྩ་
ནས་ལྒང་པར་འདྲིལ། །དྭངས་མ་མཆིན་པའི་གནས་བརྒྱུད་ཁྲག་ཏུ་འགྱུར། །ཁྲག་གི་སྙིགས་མ་མཁྲིས་པའི་གནས་སུ་གསོག །མཁྲིས་པའི་དྭངས་
མ་ལུས་ཀྱི་ཆུ་སེར་འགྱུར། །མཁྲིས་པའི་སྙིགས་མ་ཆུ་ཡི་ཀུ་ཡར་འགྱུར། །རྩ་མིག་འགྲིམས་ནས་ལྒང་པའི་ནང་དུ་གསོག །དེ་ཕྱིར་ཆུ་ཡི་ཁ་དོག་
ཟས་ཀྱིས་སྒྱུར། །ཀུ་ཡ་ཁྲག་མཁྲིས་གནས་ནས་འབྱུང་བའི་ཕྱིར། །ལུས་ལ་ཚ་གྲང་གང་ཡིན་ཆུ་ལ་གསལ། །དཔེར་ན་ཚོང་པས་ཚོང་དུས་གཏམ་
བརྗོད་བཞིན། །ཐ་མལ་ནད་མེད་གནས་པའི་ཆུ་བསྟན་པ། །ཁ་དོག་འབྲི་མར་བཞུས་འདྲ་སྦྲེ་དྲི་མནམ། །རླངས་པ་ཆེ་ཆུང་ཡུན་རན་མེ་ཏོག་
སྙོམས། །ཀུ་ཡ་སྙོམས་ཁྱབ་སྤྲིས་མ་ཀོ་ཆུ་ཙམ། །རླངས་ཡལ་དུས་ན་མཐའ་ནས་སྒོར་མོར་ལྡོག །ལོག་རྗེས་དཀར་སེར་དྭངས་པ་ནད་མེད་ཡིན། །
དེ་བཟློག་ནད་ཆུ་སྤྱི་དང་བྱེ་བྲག་གཉིས། །སྤྱི་ལ་བརྟག་པའི་དུས་གསུམ་བརྟག་ཚུལ་དགུ། །དུས་གསུམ་ཚན་དེ་ངད་ཡལ་གྲང་བ་གསུམ། །ཚན་
དེའི་དུས་སུ་མདོག་རླངས་དྲི་མེ་ཏོག །ངད་ཡལ་དུས་སུ་ཀུ་ཡ་སྤྲིས་མ་བརྟག །གྲང་ནས་ལྡོག་དུས་ལྡོག་ཚུལ་ལོག་རྗེས་བརྟག །དང་པོ་ཚ་བ་དུས་
ཀྱི་ཁ་དོག་ནི། །ལུ་མའི་ཆུ་ལྟར་སྔོ་ལ་སླ་བ་རླུང་། །སེར་ན་མཁྲིས་པ་དཀར་ན་བད་ཀན་ནད། །དམར་ན་ཁྲག་ནད་རྒྱ་ཤལ་ཆུ་སེར་ཡིན། །སྨུག་ལ་
དུགས་ན་བད་ཀན་སྨུག་པོར་བརྟག །ཆུ་མདོག་འདྲེས་ན་ལྡན་དང་འདུས་པའི་ནད། །མར་ནག་འདྲ་ན་རིམས་དང་མཁྲིས་པ་རྒྱས། །དམར་སེར་
སྐ་དུགས་འགྲམས་སམ་འཁྲུགས་ཆུ་ཡིན། །ཆུ་མདོག་ནག་གམ་འཇའ་ཚོན་འདྲ་བ་དུག །རླངས་པ་ཆེ་ན་ཚ་བ་རྒྱས་པའི་ཆུ། །ཆུང་ལ་ཡུན་རིང་
ཚ་བ་གབ་བམ་རྙིངས། །རླངས་ཆུང་ཡུན་ཐུང་བད་རླུང་རེས་ཆེ་རེས་ཆུང་ཚ་གྲང་འདྲེས་པར་བརྟག །དྲི་མ་དུགས་ལ་དཀུ་ན་ཚ་བ་ཆེ། །དྲི་མ་
མེད་དམ་ཆུང་ན་གྲང་བ་ཡིན། །ཟས་ཀྱི་དྲི་མནམ་གང་མནམ་དེ་མ་ཞུ། །ལྦུ་བ་སྔོ་ལ་ཆེ་བ་རླུང་ཡིན་ཏེ། །ཕྲེ་སེར་སངས་པ་སྐྱེན་ན་མཁྲིས་པ་
ཡིན། །ལྦུ་བ་མཆིལ་མ་འདྲ་ན་བད་ཀན་ནད། །དམར་ན་ཁྲག་ནད་འཇའ་ཚོན་འདྲ་ན་དུག །ཕུག་རོན་ཁྲ་ཡིས་གཏོར་འདྲ་བྱེར་བའི་ནད། །ཀུ་ཡ་
སྤུ་དང་འདྲ་ན་རླུང་གི་ནད། །བལ་འདབ་ཆུ་སྐྱུར་འདྲ་བ་ཁྲག་མཁྲིས་ཡིན། །སྤུ་རྩེ་འདྲ་བ་བད་ཀན་གྲང་བའི་ནད། །སྤྲིན་འདྲ་གློ་ནད་རྣག་འདྲ་
དེ་ཉིད་ཡོད། །བྱེ་མ་འདྲ་ན་མཁལ་ནད་ཡོད་པ་ཡིན། །སྟེང་འོག་བར་གནས་ནད་ཀྱང་དེ་བཞིན་བརྟག །ཀུ་ཡ་ཞོ་ཤི་འདྲ་བས་ཆུ་སྟེང་ཁྱབ། །
རླུང་གིས་ལུས་ཟུངས་ཚ་གྲང་དཀྲུགས་པ་ཡིན། །མཐུག་དང་སྲབ་ལས་ཚ་གྲང་ཤེས་པར་བྱ། །ཁ་དོག་ཆུ་མདོག་གང་བྱུང་དེ་ལྟར་རོ། །སྤྲིས་མ་
སྲབ་ན་གྲང་བ་མཐུག་ན་ཚ། །བླངས་བཞག་བཏུབ་ན་ཞག་རྒོད་ཅེས་བྱ་སྟེ། །མེར་བསྲེགས་གསུར་དྲི་བྱུང་ན་བཅོས་མི་དགོས། །སྤྲིས་མ་དུམ་བུར་
ཆད་ན་སྐྲན་ནད་ཡིན། །སྤྲིས་མའི་གཟུགས་ལས་གདོན་ངོས་བཟུང་བར་བྱ། །ལྡོག་དུས་རླངས་མ་ཡལ་བར་ལྡོག་པ་ཚ། །ཡལ་རྗེས་གྲང་ནས་ལྡོག་
པ་གྲང་བ་ཡིན། །རླངས་ཡལ་ལྡོག་པ་དུས་མཚུངས་ཚ་གྲང་སྙོམས། །ལྡོག་ཚུལ་ཆུ་ལ་སྲབ་མཐུག་མེད་པ་ལ། །གང་སྲབ་མཐའ་ནས་ལྡོག་པ་གྲང་
བ་ཡིན། །གཏིང་ནས་ལོངས་པོར་ལྡོག་པ་ཚ་བ་གསར། །མཐའ་ནས་ཤར་ཤར་ལྡོག་པ་རྙིངས་ཚད་ཡིན། །སྣ་ལ་ཀུན་ཡ་ལྡོག་ན་ཚ་གྲང་འཐབ། །
ཚ་བ་བྱེར་དང་གྲང་བ་འབྱམས་པ་དང་། །གདོན་ཤས་ཆེ་བའི་ཆུ་གསུམ་ལྡོག་མི་འགྱུར། །ལོག་རྗེས་ཁ་དོག་ནད་གཞིའི་ཆུ་མདོག་བལྟ། །སྐ་ན་ཚ་
བ་སླ་ན་གྲང་བ་ཡིན། །བྱེ་བྲག་མདོར་བསྡུས་ཚ་ཆུ་གྲང་ཆུ་གཉིས། །ཚ་བའི་ཆུ་ནི་ཁ་དོག་དམར་རམ་སེར། །སྐ་ལ་དྲི་དུགས་རླངས་པ་ཆེ་ཡུན་
རིང་། །ལྦུ་བ་ཕྲ་སེར་སངས་སྐྱེན་སྤྲིས་མ་མཐུག །ཀུ་ཡ་ཆུ་ཡི་དཀྱིལ་དུ་ལིང་གིས་འདྲིལ། །དྲོད་རླངས་མ་ཡལ་བ་ལ་ཚ་ལོག་བྱེད། །ལོག་རྗེས་སྨུག་
ལ་གར་བ་ཚ་ཆུ་ཡིན། །གྲང་ཆུ་ཁ་དོག་དཀར་རམ་སྔོ་ལ་སླ། །རླངས་དང་དྲི་མ་ཆུང་ལ་ལྦུ་བ་ཆེ། །སྤྲིས་དང་ཀུ་ཡ་སྲབ་ཅིང་གྲང་རྗེས་ལྡོག །ལོག་
རྗེས་སྔོ་ལ་སླ་བ་གྲང་ཆུ་ཡིན། །ཁ་དོག་དཀར་སྔོ་ཀུ་ཡ་མཐུག་པའི་ཆུ། །ལྟར་སྣང་གྲང་ཡང་གཏིང་ན་ཚད་པ་ཡོད། །དམར་སེར་དྲི་ཆུང་ཀུ་ཡ་
མེད་པ་ནི། །ལྟར་སྣང་ཚ་ཡང་ངོ་བོ་གྲང་བ་ཡིན། །ཚ་ཆུ་ལྡོག་བུལ་གྲང་ཆུ་ལྡོག་པ་སྐྱེན། །ཚ་བ་གབ་པའི་ནད་དུ་ཤེས་པར་བྱ། །ཚ་ཆུ་མེ་ཏོག་
མེད་ན་ཁོང་ཤོར་བྱིང་། །གྲང་ཆུ་མེ་ཏོག་མེད་ན་གྲང་བ་འབྱམས། །ཚ་ཆུ་སྤྲིས་མ་མཐུག་ན་ལུས་ཟུངས་ཞུ། །དེ་བཞིན་གྲང་ཆུ་མར་མ་ཞུ་བར་
ངེས། །ལར་ན་སྟོངས་ཆད་ཁྲག་ཚད་དམར་པོར་འཁྲུལ། །བད་ཀན་སྨུག་པོ་ཆུ་སེར་སྨུག་པོར་འཁྲུལ། །མཁལ་མ་མཆིན་པ་མཆེར་གསུམ་དམར་
པོར་འཁྲུལ། །གབ་ཚད་བད་རླུང་གྲང་བ་སྔོན་པོར་འཁྲུལ། །དེ་དག་མ་འཁྲུལ་ནད་ངོས་སོ་སོར་བཟུང་། །འཆི་བའི་ཆུ་ནི་ཁྲག་འདྲ་ཀོ་རུལ་
མནམ། །བཅོས་ཀྱང་སྐྱེད་མེད་ཚ་བའི་འཆི་ཆུ་ཡིན། །དེ་བཞིན་ཀུ་ཡ་སངས་ནས་མི་ལྡོག་འཆི། །སྔོ་ཞིང་དྲི་རླངས་བྲོ་བ་མེད་པ་ལ། །བཅོས་ཀྱང་
མི་འགྱུར་གྲང་བའི་འཆི་ཆུ་ཡིན། །ཚོགས་པ་ཆད་འདྲ་རླུང་གི་ནད་ཀྱིས་འཆི། །ཆུ་རྩ་ཆད་འདྲ་མཁྲིས་པའི་ནད་ཀྱིས་འཆི། །མཚལ་ཆད་འདྲ་ན་
ཁྲག་གི་ནད་ཀྱིས་མཆི། །འོ་མ་ཤི་འདྲ་བད་ཀན་ནད་ཀྱིས་འཆི། །སྣག་ཚ་ཆད་པ་འདྲ་ན་དུག་གིས་འཆི། །མཁལ་ནད་མེད་པར་ཁོང་ནས་ཆུ་ལོག་
ན། །འདུ་བ་ཁོང་རུལ་ཞེས་བྱ་འཆི་བ་ཡིན། །གདོན་ཆུ་གང་བཏང་ངོས་དེ་ཤར་དུ་རྩི། །ཆུ་དེ་སྲིད་པའི་རུས་སྦལ་གན་རྐྱལ་གནས། །མགོ་བོ་ལྷོར་
བསྟན་ཐིག་བཞིས་ས་དགུར་བཅད། །གཡས་གསུམ་ལྷ་ས་མི་ས་གདོན་གྱི་ས། །གཡོན་གསུམ་དུར་ས་ཁང་ས་ཞིང་གི་ས། །དབུས་གསུམ་ཕ་མེས་
རང་དང་བུ་ཚའི་ས། །ལིང་ཚེ་དགུ་པོའི་ས་དེ་གཟུགས་བརྙན་ནམ། །ལྡོག་སྐྱེན་ལྡོག་སྣ་རིང་དང་མི་ལྡོག་དང་། །ཉ་མིག་སྲུབས་འདྲ་ལྦུ་བ་གང་
བྱུང་བ། །ལྷ་སར་བྱུང་ན་བསྟེན་པའི་ལྷ་སྲུང་བཅོས། །མི་སར་བྱུང་ན་གྲེ་ཕོ་གྲེ་མོ་གནོད། །གདོན་སར་བྱུང་ན་སྲིད་པའི་སྤྱི་འདྲེ་གནོད། །ཕ་མེས་
སར་བྱུང་ཆགས་འདྲེ་རྦད་འདྲེ་གནོད། །རང་སར་བྱུང་ན་གྲོགས་ཀྱི་འགོས་འདྲེ་གནོད། །བུ་ཚའི་སར་བྱུང་ཞང་ཉེ་མ་སྲུའི་འདྲེ། །ཁང་དུར་ཞིང་
སར་བྱུང་ན་དེ་ནས་གནོད། །གཞན་ཡང་ཤར་དུ་བྱུང་ན་རྒྱལ་པོ་གཉེན། །ལྷོ་རུ་བྱུང་ན་བཙན་དང་མ་མོ་གནོད། །ནུབ་དུ་བྱུང་ན་ཀླུ་བདུད་ཀླུ་
བཙན་ཏེ། །བྱུང་དུ་བྱུང་ན་མཚོ་སྨན་ཀླུ་སྲིན་གནོད། །ཤར་ལྷོར་བྱུང་ན་རྒྱལ་པོ་བཙན་གྲེ་མོ།།ལྷོ་ནུབ་མཚམས་སུ་བཙན་བདུད་ནག་སྨུག་གནོད།།
ནུབ་བྱང་མཚམས་སུ་ཀླུ་བདུད་ཀླུ་སྲིན་གནོན། །བྱང་ཤར་ས་བདག་རིག་འཛིན་བཅོས་པར་བྱ། །འོན་ཀྱང་ལོག་རྗེས་ཉི་མའི་མདངས་ཤར་ཚེ། །
འདྲ་བའི་གཟུགས་ལ་གདོན་གྱི་ངོས་བཟུང་བ། །རྨ་བྱའི་མདོངས་འདྲ་ནག་སྨུག་གནོད། །བ་དན་འཕྱར་འདྲ་མགོན་པོ་གནོད། །ལྕགས་སྒྲོག་འདྲ་
ན་ལྷ་མོ་གནོད། །མདུང་རྩེ་འདྲ་ན་ཕོ་ལྷ་གནོད། །ར་སྐྱེས་འདྲ་ན་དགྲ་ལྷ་གནོད། །ཤུག་པ་འདྲ་ན་ཡུལ་ལྷ་གནོད། །པདྨ་འདྲ་ན་མ་ལྷ་གནོད། །
འོད་ཀོར་འདྲ་ན་རྒྱལ་པོ་གནོད། །ཙིག་ཁུང་ཉི་ཤར་འདྲ་ན་བཙན། །དར་ལྕེ་འདྲ་ན་ཀླུ་བཙན་གནོད། །སྡིག་པ་འདྲ་ན་ཀླུ་བདུད་གནོད། །ཤ་རུ་
འདྲ་ན་ཡམ་ཤུད་གནོད། །གལ་ཏེ་འདྲ་ན་ཐེ་བྲང་གནོད། །མེ་ལོང་འདྲ་ན་མཚོ་སྨན་གནོད། །ཏམ་བུ་ར་འདྲ་བདུད་མོ་གནོད། །ཉ་དང་དུང་
འདྲ་ས་བདག་གནོད། །ཆུ་སྲིན་སྦྲུལ་འདྲ་ཀླུ་གདོན་གནོད། །ན་བུན་སྤྲིན་འདྲ་མི་གཙང་ལངས། མདའ་འཕང་འདྲ་ན་གྲེ་ཕོ་མོ། །མིག་མངས་འདྲ་
ན་ཞིང་འདྲེ་གནོད། །ཕུར་པ་ཡུངས་ཀར་ཕུར་ཁ་གནོད། །ཐོད་པ་འདྲ་ན་ཀླུ་གཏད་གནོད། །མ་ཧེ་འདྲ་ན་དམ་སྲི་གནོད། །དེ་རྣམས་གནོད་པ་
དགུའི་ཕྱོགས་ལས་དཔག །ལྷ་སར་འདྲེ་ངོ་བྱུང་ན་འདྲེ་ལྷར་རྫུ། །འདྲེ་སར་ལྷ་ངོ་ལྷ་ཁྲོས་འདྲེ་རུ་གནོད། །ལྡོག་ཏུ་མི་འདོད་བསྐོར་ཕྱྭ་བཏབ་སྟེ་
བལྟ། །དེས་མ་གསལ་ན་གདོན་ངོ་ཡིབ་ཅེས་བྱ། །སྦྱིར་ན་དོན་ནད་རྩ་གསལ་སྣོད་ནད་ཆུ། །འཚོ་འཆིའི་ལ་ཤན་རྩ་ཡིས་འབྱེད་ན་ཡང་། །ཚ་གྲང་
ལ་ཤན་ཆུ་ལ་མཐོང་བས་གསལ། །དེ་ཕྱིར་མཁས་པས་ཆུ་ལ་བརྟག་པར་བྱའོ། །གལ་འགག་བཞི་ཡིས་འཁྲུལ་སོ་བསལ་བ་ནི། །མན་ངག་རྒྱུད་ཀྱི་
ཚ་གྲང་གལ་མདོར་ལྟོས། །ཞེས་གསུངས་སོ། །དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་རིག་པའི་
ཡེ་ཤེས་ལགས། །ནད་དང་གཉེན་པོ་སྤྲོད་ཕྱིར་གསོ་ཚུལ་དགུ། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་ལ་ལན་
གསུངས་པ། །ཀྱེ་དྲང་སྲོང་ཆེན་པོ་ཡིད་ལས་སྐྱེས། ནད་དང་གཉེན་པོར་སྤྲོད་ཕྱིར་གསོ་ཚུལ་གཅེས། །གཅེས་པའི་དོན་ལ་ཞུས་པ་ལགས་ན་ཡང་།།
བཤད་པའི་རྒྱུད་དུ་ལེགས་པར་བསྟན་ནས་ཡོད། །དྲང་སྲོང་ཆེན་པོ་ལྟ་རྟོག་འཐེམས་པར་གྱིས། །དེ་མ་ཡིན་ན་མུན་ཁུང་རྫས་སྟོར་འདྲ། །དཔེ་
ལ་ལུས་པས་དགོས་དུས་སླེབ་མི་འགྱུར། །རྒྱུད་བཞིའི་ལྟ་རྟོག་འཐེམས་ནས་དོན་ལོངས་ན། །མུན་ཁུང་མཛོད་དུ་ཉི་ཤར་ཇི་བཞིན་གསལ། །གསེར་
གཡུའི་སྒྲོམ་བུར་ལག་པ་བཅུག་པ་བཞིན། །རང་ལ་ནམ་དགོས་དུས་ན་སྤྱད་པས་ཆོག །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་
གསང་བ་མན་ངག་གི་རྒྱུད་ལས་མཐོང་བ་མེ་ལོང་ཆུ་ལ་ངོས་བཟུང་བའི་ལེའུ་སྟེ་གཉིས་པའོ། །