རླུང་གི་ནད་བཤད་པ།

      རླུང་གི་ནད་ཅེས་བྱ་བ་ནི་ལུས་ལ་རང་བཞིན་དུ་གནས་པའི་རླུང་མཚན་ཉིད་དྲུག་ལྡན་པ་དེ་ཕྱི་ནང་གི་རྐྱེན་ཅི་རིགས་ཀྱི་དབང་གིས་ནད་ཀྱི་ངོ་བོར་རྣམ་པར་གྱུར་ཏེ་ལུས་ལ་གནོད་པར་བྱེད་པའི་ཕྱིར་དེ་ལ་རླུང་གི་ནད་ཅེས་རྒྱུའི་མིང་འབྲས་བུ་ལ་བཏགས་པའི་ཚུལ་གྱིས་བཤད་པ་ཡིན་ལ། དེ་ལ་དཔལ་ལྡན་མན་ངག་རྒྱུད་ལས། ནད་རྣམས་ཀུན་གྱི་སྣ་འདྲེན་མཇུག་སྡུད་རླུང་།། མཁྲིས་ཚད་འབུད་ཅིང་བད་ཀན་གྲང་བ་འཁྱག། དམུ་འོར་སྐྱ་རྦབ་གཡོ་ཞིང་སྐྲན་རྣམས་སྒོང་།། བསགས་སློང་བྱེར་འདྲེན་ཚད་མཇུག་རླུང་གིས་འབུད།། ཅེས་པ་ལྟར་ཐོག་མར་རླུང་འཇུག་ཅིང་དེ་ནས་གཞན་འཁྲུགས་པས་རླུང་དེ་ཉིད་ནི་ནད་རིགས་ཐམས་ཅད་ཀྱི་སྣ་འདྲེན་མ་ཟད་ནད་གཞན་རྣམས་སློང་བར་བྱེད་པ་དང་མཇུག་སྡུད་དེ་ཚད་གཞུག་འབུད་པ། ནད་བྱེར་ཞིང་འཐོར་བའི་ལསབྱེད་པ།ཚ་གྲང་ཀུན་ལ་ཁྱབ་ཅིང་གནོད་བྱ་ཀུན་ལ་རྒྱུ་བ། རང་རྒྱུད་གདུག་ཅིང་གཞན་ལ་གནོད་པའི་མཐུ་ཆེ་བ།ནད་གཞན་ལས་སྣ་མང་ཞིང་སྟོབས་ཆེ་བ།རང་བཞིན་རྩུབ་པ་བཅས་ཡིན་པའི་ཕྱིར་དང་ཐོག་རླུང་གི་ནད་དེ་ཉིད་བཤད་པ་ཡིན་ནོ།