ཧྥ་རན་སེའི་ཙུང་ཐུང་མཱ་ཁེ་ལུང་གིས་དེ་རིང་ནས་བཟུང་རང་རྒྱལ་ལ་རྒྱལ་དོན་འཚམས་འདྲི་བྱེད་པ། ཚོགས་ཆེན་བཅུ་དགུ་པའི་དགོངས་དོན་བགྲོ་གླེང་འཛིན་གྲྭ་སློབ་འགོ་ཚུགས་པ། བོད་སྐྱོད་འབུམ་རམས་པའི་ཞབས་ཞུ་ཚོགས་པས་མུ་མཐུད་རིག་སྟོབས་རོགས་སྐྱོར་བྱས་པ། བོད་ལྗོངས་ཀྱི་གཞོན་ནུ་ལོ་ཆུང་གི་ཚན་རིག་ལས་དོན་ཁང་ཐོག་མ་ལྷ་སར་བཙུགས་པ། བོད་ཀྱིས་རང་སྐྱོང་ལྗོངས་རིམ་པའི་མངོན་མིན་རིག་གནས་ཤུལ་བཞག་རྣམ་གྲངས་བརྒྱ་ལྷག་ཙམ་གསར་དུ་བསྣན་པ། ཞིང་ལས་དངུལ་ཁང་བོད་ལྗོངས་ཡན་ལག་དངུལ་ཁང་གིས“ངོ་རིས་བཤེར་ནས་དངུལ་ལེན་པའི”བྱེད་ནུས་བཏོན་པ། ཀྲུང་དབྱང་གི་ཁོར་ཡུག་སྲུང་སྐྱོབ་སྐོར་ཞིབ་རུ་ཁག་ཨང་དྲུག་པས་བོད་ལྗོངས་ལ་གྱོད་དོན་༡༧བརྒྱུད་སྤྱོད་བྱས། བོད་ལྗོངས་ཀྱི་གྲོང་གསེབ་ཀྱི་མི་སྡོད་ཁོར་ཡུག་བཅོས་སྒྲིག་ལ་གྲུབ་འབྲས་མངོན་གསལ་དོད་པོ་ཐོབ་པ། བོད་ཡིག་དཔེ་མཛོད་ཀྱི་གཞི་གྲངས་ལྟེ་གནས་དབུ་བརྙེས་པའི་མཛད་སྒོ་ཀྲུང་གོའི་བོད་རིག་པ་ཞིབ་འཇུག་ལྟེ་གནས་སུ་སྤེལ།
ཀྲུང་གོའི་བོད་ལྗོངས་དྲ་བ། > གསོ་རིག > ཚ་ཤོས།

མཆིན་པའི་ནད་ཀྱི་བཅོས་ཐབས།

སྤེལ་དུས 2009-08-27 ཡོང་ཁུངས། ཡོང་ཁུངས་མཚོ་སྔོན་པོ་དྲ་བ། རྩོམ་པ་པོ། ཚུལ་ཁྲིམས་རྒྱ་མཚོ།

   མཆིན་ནད་ཚ་བའི་བཅོས་ཐབས། ཨ་རུ་བརྒྱད་ཐང་དང་། བྲག་ཞུན་སུམ་ཐང་སོགས་ཐོག་མར་བཏང་།མཆིན་ཚད་ཆུང་ངུའི་རིགས་ལ། ཕྱི་རྒྱུད་མཆིན་ནད་སེལ་བའི་གུར་ཀུམ་བདུན་པ་དང་།མཆིན་ཚད་འབྲིང་བོ་ལ། དེའི་སྟེང་ཙན་དན་བསྣན་པའི་ཙན་དན་བརྒྱད་པ་དང་།མཆིན་ཚད་ཆེན་པོ་ལ་དེའི་སྟེང་ག་བུར་བསྣན་པའི་ག་བུར་དགུ་བ་སོགས་བསྟེན།མཆིན་པར་གཉན་ཚན་ཡིན་ན་གི་ཁྱུང་བསྟེན་པ་དང་།གཙོ་བོ་བརྒྱད་པ་སོགས་བབ་དང་བསྟུན་ནས་བཏང་། གཞན་ཡང་མཆིན་ཚད་སེལ་བ་ལ་ཐང་བཏང་རྗེས་སུ།གི་ཝང་དགུ་བ་དང་། གི་ཏིག་དང་། གུར་ཀུམ་བདུན་པ་དང་། གུར་ཀུམ་མཆོག་བདུན་དང་།མན་ངག་བསིལ་སྦྱོར་སོགས་མཆིན་སྨན་གང་འོས་གཏོང་།ཁྲག་ཤས་ཆེ་བ་ལ་གི་ཝང་དགུ་བ་དང་གུར་ཀུམ་བདུན་པའི་སྟེང་བ་ལེ་ཀ་བརྒྱད་པ་སྦྱར་བ་བསྐོལ་གྲང་གིས་དབུལ།ཚ་བ་བཞག་ཀྱང་ཟས་ཀྱི་དང་ག་ཞན་པ་དང་།མཆིན་པའི་ན་ཟུག་མ་ཆོག་པ་ལ་ཟླ་ཤེལ་བདུད་རྩི་མ་དང་། གུར་ཀུམ་བཅུ་གསུམ་བཏང་ན་བཟང་།ཐུར་དུ་བཤལ་ན་བྲག་ཞུན་དགུ་བ་སོགས་འབྲེལ་ཡོད་སྨན་སྦྱོར་རྣམས་གང་འཚམས་བསྟེན།དཔྱད་ལ་རུ་ཐུང་དང་མཆིན་མཁྲིས་འདོམ་རྩ་གཏར།གཏར་ག་དང་ཁྱད་པར་མེད་པའི་སྨན་གྱིས་བཅོས་ན་སྐྱུ་རུ་ཉེར་ལྔ་ཡང་ཡང་བཏང་བས་གཏར་གྱི་ཚབ་རུང་བར་གསུངས་སོ།།ཁ་ཟས་མར་རྙིང་དང་ཤ་ཚིལ་རྙིང་བ་དང་སྒོག་པ་དང་ཆང་སོགས་ཚ་སྐྱུར་གྱི་རིགས་རྣམས་སྤང་།སྤྱོད་ལམ་ཡང་མེ་དང་ཉི་མ་དང་དྲག་ཤུལ་གྱི་ལས་སོགས་སྤང་བར་བྱའོ། །

    མཆིན་ནད་ལྡེམ་བུའི་ནད་བཅོས་པ་ལ།མན་ངག་བསིལ་སྦྱོར་དང་ཨ་རུ་བཅུ་ཐང་བཏང་ཞིང་།བྲག་ཞུན་ལྔ་བ་དང་གཡུ་རྙིང་ཅུར་ནིས་གཉིས་ནངས་ནུབ་ལྟག་སྤྲད་བྱས་ནས་ཡུན་དུ་འཐུང་དགོས།མགོ་ཡུ་འཁོར་ཞིང་སེམས་མི་བདེ་བ་དང་ཁོག་སྦོས་པ་ལ།ཞི་བྱེད་དྲུག་པ་དང་ཨ་གར་བརྒྱད་པ་སོགས་བསྟེན།བཤལ་བ་དང་སྐྱུགས་པ་བྱུང་ན་བྲག་ཞུན་དགུ་བ་དང་། ཐང་ཆེན་ཉེར་ལྔ་སོགས་བཏང་དགོས་སོ།

    མཆིན་ནད་དུག་ཐབས་བཅོས་པ་ལ།གི་ཝང་དགུ་བ་དང་གུར་ཀུམ་བདུན་པ་བཏང་།གསེར་གྱི་ཕུད་བུ་བསྡུས་ཁུར་བུལ་ཏོག་བཏབ་པའི་སྐྱུགས་ཀྱིས་དྲངས།དེའི་རྗེས་སུ་གཡུ་རྙིང་བདུན་པ།སྙི་བའི་མེ་ཏོག་དང་སུམ་ཅུ་ཏིག་དང་སེང་ལྡང་དང་ཤིང་ཚ་བཅས་བསྡུས་པའི་ཐང་གིས་དབུལ།ཡང་ན་གི་ཝང་དགུ་བ་དང་། གི་ཁྱུང་། གུར་ཀུམ་བཅུ་གསུམ་དང་།མན་ངག་བསིལ་སྦྱོར་སོགས་ནད་རྟགས་ལ་ལྟས་ནས་བཏང་དགོས་པ་ཡིན་ནོ། །

    མཆིན་ནད་འོར་ལྷུངས་བཅོས་པ་ལ། ཨ་རུ་བཅུ་བ་དང་། ཨ་རུ་བཅུ་གསུམ།ཨ་རུ་བཅོ་བརྒྱད། དམར་བོ་སུམ་ཐང་སོགས་བཏང་།དཔྱད་ལ་ཚ་ཤས་ཆེ་ན་བྱིན་གཞུག་དང་ལོང་རྩ་གཏར་བ་དང་། གྲང་ཤས་ཆེ་ན་མེ་བཙའ་བྱའོ།།ཚ་བཞག་ན་ཁ་ཟས་གསར་བ་དང་བཅུད་ཅན་དྲོད་ཅན་བསྟེན་པ་དང་།སྤྱོད་ལམ་དྲག་ཤུལ་གྱི་ལས་སོགས་སྤང་དགོས་པ་ཡིན་ནོ། །

    མཆིན་ནད་གྲང་བའི་བཅོས་ཐབས་ལ།སེ་འབྲུ་བཞི་བའི་སྟེང་གུར་ཀུམ་དང་བྲག་ཞུན་དང་ད་ལིས་དང་པྲི་ཡང་ཀུ་བསྣན་པའི་བརྒྱད་པ་དང་།སེ་འབྲུ་བཅུ་བ་དང་། སེ་འབྲུ་བཅུ་གཉིས་པ་དང་། ཅུ་གང་བདེ་བྱེད་དང་།ཟླ་ཤེལ་བདུད་རྩི་མ་སོགས་རིག་པས་དཔྱད་ནས་བཏང་དགོས་སོ།།དཔྱད་པ་མཆིན་པའི་གསང་རྣམས་ལ་མེ་བཙའ་བྱ་བ་དང་། ཁ་ཟས་ཚ་བ་དང་སྐྱུར་བའི་རིགས།སྤྱོད་ལམ་རླུང་ལྡང་བའི་གནས་སུ་འདུག་པ་སོགས་སྤང་དགོས་པ་ཡིན་ནོ། །