བོད་སྨན་སྨན་ཐུམ་སྟོན་བཞིན་ཡོད། ཅང་ཧྲུའུ་ཡིས་པར་བླངས།
ཟླ༩པའི་ཚེས༦ཉིན། ལྷ་ས་གྲོང་ཁྱེར་མལ་གྲོ་གུང་དཀར་རྫོང་སློབ་འབྲིང་དུ་མི་གཉིས་ལ་H1N1ཆམ་རིམས་ཀ་པའི་འགོ་ནད་ཕོག་ཡོད་པ་ཐག་ཆོད་པས། ལྷ་སའི་ཁྲོམ་རར་བོད་སྨན་སྨན་ཐུམ་ཉོ་མཁན་ཤིན་ཏུ་མང་པོ་བྱུང་ཞིང་། ཤེས་རྟོགས་བྱུང་བ་ལྟར་ན། སྨན་ཐུམ་འདིས་རྒྱུག་ཆེ་བའི་འགོས་ནད་ལ་སྔོན་འགོག་གི་ནུས་པ་ཆེན་པོ་ཐོན་ཐུབ་ཟེར། སྨན་ཐུམ་རིལ་བུ་འདིས་རྒྱུག་ཆེ་བའི་འགོས་ནད་H1N1ཆམ་རིམས་ཀ་པར་སྔོན་འགོག་གི་ནུས་པ་ཐོན་ཐུབ་མིན་ཐད། ཚེས༩ཉིན་གྱི་ཕྱི་དྲོར་གསར་འགོད་པས་བོད་སྨན་སྨན་ཐུམ་འདི་ཐོན་སྐྱེད་བྱེད་མཁན་གྱི་བཟོ་གྲྭ་སྟེ། བོད་རང་སྐྱོང་ལྗོངས་བོད་སྨན་བཟོ་གྲྭའི་འགོ་གཙོ་གཞོན་པ་དབང་རྡོར་ལགས་ལ་བཅར་འདྲི་གནང་བ་རེད།
དབང་རྡོར་གྱིས་འདི་སྐད། བོད་སྨན་སྨན་ཐུམ་འདི་ནི་《རྒྱུད་བཞི》ཡི་རྨང་གཞི་སྟེང་དུ། བོད་རང་སྐྱོང་ལྗོངས་བོད་སྨན་བཟོ་གྲྭ་དང་བོད་སྨན་ཁང་གི་ཆེད་ལས་མཁས་པས་ཐུན་མོང་དུ་ཞིབ་འཇུག་གསར་སྤེལ་གནང་ཞིང་། ནད་རིགས་མི་གཅིག་པ་དང་བསྟུན་ནས་སྨན་སྦྱོར་བྱས་པ་ཡིན། ༢༠༠༣ལོར་རྒྱལ་ནང་དུ་SARSའགོས་ནད་བྱུང་བའི་སྐབས་སུ། བོད་སྨན་སྨན་ཐུམ་འདི་ཐོན་སྐྱེད་བྱས་མྱོང་མོད། འོན་ཀྱང་SARSའགོས་ནད་ལས་གྲོལ་རྗེས་ཐོན་སྐྱེད་བྱེད་མཚམས་ཀྱང་བཞག་པ་ཡིན། ད་ལོར་མོ་ཞི་ཁོ་ནས་མཆེད་འགོ་བརྩམས་པའི་H1N1ཆམ་རིམས་ཀ་པའི་འགོས་ནད་ལ་དམིགས་ནས། ཆེད་ལས་མཁས་པ་རྣམས་ཀྱིས་སྨན་རྫས་ལ་ཞིབ་འཇུག་དང་བཅོས་སྒྲིག་གང་ལེགས་གནང་མཐར། ཟླ༥པའི་ནང་དུ་ཐོན་སྐྱེད་བྱས་ནས་སླར་གསོ་གནང་ཡོད་པ་རེད། བོད་སྨན་སྨན་ཐུམ་གྱི་གྲུབ་ཆ་གཙོ་བོ་ནི་ཨ་རུ་ར་དང་བོང་ང་། ཤུ་དག གླ་རྩི། གི་ཝང་སོགས་ཡིན་ཞིང་། ནད་འབུ་སེལ་བ་དང་ནད་ཡམས་སྔོན་འགོག ནད་འབུ་སྔོན་འགོག་བཅས་ཀྱི་ནུས་པ་ཆེན་པོ་ལྡན་པས། སྤྱི་ཚོགས་སྟེང་དུ་རྒྱུག་ཆེ་བའི་འགོ་ནད་རིགས་སོ་སོ་སྔོན་འགོག་བྱེད་པར་འཚམ་པ་ཡིན་ཞེས་གསུངས་པ་རེད།
དབང་རྡོར་གྱིས་ངོ་སྤྲོད་གནང་སྐབས་འདི་སྐད། ད་ལོའི་ཟླ༥པའི་ཚུན་ལ་བོད་སྨན་སྨན་ཐུམ་འདི་སྐོར་ཁག་ལྔར་ཐོན་སྐྱེད་བྱས་ཤིང་། ཕལ་ཆེར་ཁྲི༢༠ལ་སླེབས་ཡོད་པ་རེད། ལྷ་ས་གྲོང་ཁྱེར་ནང་དུ་བོད་རང་སྐྱོང་ལྗོངས་བོད་སྨན་བཟོ་གྲྭའི་ཐད་འཚོང་ཚོང་ཁང་ལྔ་དང་བོད་སྨན་ཁང་ནས་ཉོ་ཐུབ་པ་ཡིན། གཞིས་ཀ་རྩེ་དང་ལྷོ་ཁ། ཉིང་ཁྲི། ནག་ཆུ། ད་དུང་རྒྱལ་ནང་གི་ཞིང་ཆེན་དང་གྲོང་ཁྱེར་སོ་སོ་ནས་ཀྱང་ཉོ་ཐུབ་ཅིང་། གཅིག་གྱུར་བྱས་པའི་རིན་གོང་ནི་སྨན་ཐུམ་གཅིག་ལ་སྒོར་བཅུ་རེ་ཡིན་ཞེས་གསུངས་པ་རེད།
དབང་རྡོར་གྱིས་ད་དུང་འཛད་སྤྱོད་པ་རྣམས་ལ་ཆེད་དུ་དྲན་སྐུལ་གཏོང་རྒྱུར། བོད་སྨན་སྨན་ཐུམ་འདི་རིགས་ཀྱི་ནུས་པ་ཅུང་དྲག་པས། ལུས་ལ་སྨན་ལོག་རྒྱག་པ་དང་སྦྲུམ་མ། ལོ་ན་རྒན་པ། བྱིས་པ་བཅས་ཀྱིས་གཟབ་ནན་བྱས་ནས་བཀོལ་དགོས་ཤིང་། གཟུགས་གཞི་བདེ་ཐང་ཅན་རྣམས་ཀྱིས་སྨན་ཐུམ་ལུས་ལ་འདོགས་སྐབས་ཉིན་རེར་ཞོགས་པ་སྔ་མོ་དང་དགོང་མོར་ཐེངས་གཅིག་ལ་སྣོམ་པས་ཆོག་ཅིང་། སྣོམ་རྒྱུ་མང་ན་དེ་ལས་ལྡོག་སྟེ་མགོ་བོ་ན་བ་དང་སྐྱུག་བྲོ་བ་སོགས་ཀྱི་ཚོར་སྣང་འབྱུང་ངེས་ཞེས་ནན་གྱིས་བསྟན་པ་རེད།