ཚེས་16ཉིན་གྱི་གསར་འགོད་པའི་འཆར་ཅན་ཚོགས་འདུའི་ཐོག་ཕྱི་འབྲེལ་པུའི་མགྲིན་ཚབ་པ་ཀེང་ཧྲོང་གིས་ཀྲུང་གོས་དབྱི་ཐ་ལིར་མངགས་པའི་རིམས་འགོག་སྨན་བཅོས་རིགས་གཅིག་མཁས་ཅན་ཚོགས་ཆུང་ལ་དབྱི་ཐ་ལི་ཕྱོགས་ཀྱི་དགའ་བསུ་ཚད་མེད་དང་ཚད་མཐོའི་ཁས་ལེན་ཐོབ་ཡོད། རིགས་གཅིག་མཁས་ཅན་ཚོགས་ཆུང་མུ་མཐུད་དབྱི་ཐ་ལིའི་བྱང་རྒྱུད་ཀྱི་རིམས་ནད་ཚབས་ཆེ་ཤོས་ཐོན་པའི་ས་ཁུལ་དུ་བསྐྱོད་རྒྱུ་རེད་ཅེས་བརྗོད་པ་རེད།
གསར་འགོད་པ་ཞིག་གིས། གནས་ཚུལ་སྤེལ་བར་གཞིགས་ན། ཚེས་13ཉིན་དབྱི་ཐ་ལིའི་ཕྱི་འབྲེལ་པུའུ་ཀྲང་ཏི་མ་གཡོད་དང་། རྒྱ་གྲམ་དམར་རྟགས་ཚོགས་པ་དང་ཟླ་གསར་དམར་པོའི་རྒྱལ་སྤྱིའི་མཉམ་འབྲེལ་ཚོགས་པའི་ཀྲུའུ་ཞི་ལོ་ཁ་ཡིས་རོ་མའི་རྒྱ་གྲམ་དམར་རྟགས་ཚོགས་པའི་སྤྱི་ཁྱབ་པུའུ་རུ་གསར་འགྱུར་ཡོངས་བསྒྲགས་ཚོགས་འདུ་འཚོགས་ནས་དབྱི་ཐ་ལིར་རོགས་རམ་བྱེད་མཁན་ཀྲུང་གོའི་རིགས་གཅིག་མཁས་ཅན་ཚོགས་པར་དགའ་བསུ་ཞུས་ཡོད་ པས། ཁྱེད་ཀྱིས་དབྱི་ཐ་ལིར་རོགས་རམ་བྱེད་མཁན་ཀྲུང་གོའི་རིགས་གཅིག་མཁས་ཅན་ཚོགས་པས་དབྱི་ཐ་ལིར་ལས་དོན་སྤེལ་ཚུལ་ངོ་སྤྲོད་གནང་རོགས་ཞེས་དྲིས་པར།
ཀེང་ཧྲོང་གིས་དབྱི་ཐ་ལིས་ཏོག་གསར་གློ་ཚད་རིམས་ནད་ལ་ཁ་གཏད་གཅོག་རྒྱུར་རོགས་རམ་བྱེད་ཆེད། ཀྲུང་གོ་སྲིད་གཞུང་གིས་དབྱི་ཐ་ལིར་རིམས་འགོག་སྨན་བཅོས་རིགས་གཅིག་མཁས་ཅན་ཚོགས་ཆུང་མངག་རྒྱུའི་གཏན་འབེབས་བྱས་ཡོད་པ་རེད། རིགས་གཅིག་མཁས་ཅན་ཚོགས་ཆུང་དང་བཅས་པ་མི་9ཡིས་སྨན་བཅོས་རིམས་འགོག་དངོས་ཟོག་དང་སྒྲིག་ཆས་ཁྱེར་ནས་ཟླ་3ཚེས་12ཉིན་ཧྲང་ཧའེ་ནས་རོ་མར་བསྐྱོད་པ་རེད། ཤེས་རྟོགས་བྱུང་བར་གཞིགས་ན། རིགས་གཅིག་མཁས་ཅན་ཚོགས་ཆུང་དབྱི་ཐ་ལིར་འབྱོར་རྗེས་འཕྲལ་མ་ཉིད་དུ་ལས་དོན་སྤེལ་འགོ་ཚུགས་པ་དང་། དབྱི་ཐ་ལིའི་རིམས་ནད་ཀྱི་དུས་བབ་གཞིར་བཟུང་། དབྱི་ཐ་ལིའི་འཕྲོད་བསྟེན་པུའུ་དང་། རྒྱ་གྲམ་དམར་རྟགས་ཚོགས་པ། མཐོ་རིམ་འཕྲོད་བསྟེན་ཞིབ་འཇུག་ཁང་བཅས་དང་དེ་བཞིན་རོ་མའི་རྒྱལ་ཁབ་འགོས་ནད་སྨན་ཁང་སོགས་དབར་ནད་པ་སྐྱོབ་བཅོས་དང་། སྨན་རྫས་བེད་སྤྱོད། སྨན་ཁང་ནས་འགོ་ནད་འགོས་རྒྱུ་ཚོད་འཛིན་བཅས་ཀྱི་ཐད་ཉམས་མྱོང་མཉམ་སྤྱོད་བྱས་པ་མ་ཟད། དབྱི་ཐ་ལིའི་ལས་དོན་མི་སྣ་དང་མཉམ་དུ་སྤྱི་དམངས་དང་སྨན་དོན་མི་སྣའི་འགོག་སྲུང་འདུ་ཤེས་ཟབ་ཏུ་གཏོང་བ་དང་སྨན་བཅོས་སྒྲིག་གཞིའི་འགོག་སྲུང་རིམ་པ་ཁ་གསལ་བཟོ་བའི་ཐད་བསམ་འཆར་བརྗེ་རེས་བྱས་ཡོད་ཅེས་བརྗོད་པ་རེད།
ཀེང་ཧྲོང་གིས“རིགས་གཅིག་མཁས་ཅན་ཚོགས་ཆུང་གིས་ལས་དོན་སྤེལ་ནས་ཉིན་ཤས་ལས་ཕྱིན་མེད་ཀྱང་། དབྱི་ཐ་ལི་ཕྱོགས་ཀྱི་དགའ་བསུ་ཚད་མེད་དང་ཚད་མཐོའི་ཁས་ལེན་ཐོབ་ཡོད”ཅེས་བརྗོད་པ་རེད།
ཀེང་ཧྲོང་གིས་རིགས་གཅིག་མཁས་ཅན་གྱིས་ད་ཐེངས་ཀྲུང་གོ་སྲིད་གཞུང་གིས་དབྱི་ཐ་ལིར་བྱེས་སྡོད་ཀྲུང་གོའི་སྤྱི་དམངས་ལ་དྲོ་སྐྱིད་ཚོར་བའི་རོགས་སྐྱོར་བྱེད་ལུགས་མཚོན་པར་བྱས་ཡོད། དབྱི་ཐ་ལི་དང་བྲེལ་འཚུབ་ཆེ་བའི་སྤེལ་རེས་བྱེད་རིང་། རིགས་གཅིག་མཁས་ཅན་གྱིས་དབྱི་ཐ་ལིར་ཡོད་པའི་བྱེས་སྡོད་སྤུན་ཟླ་དང་ཕྱི་སྦྱོང་སློབ་མར་ཕྱོགས་པའི་བརྙན་ལམ་ཐོག་གི་སྔོན་འགོག་ཚོད་འཛིན་བྱ་ཐབས་ཟུར་ཁྲིད་བཀོད་སྒྲིག་བྱས་ཏེ། ཁོང་ཚོར་ཏོག་གསར་གློ་ཚད་ཀྱི་ནད་རྟགས་ཁྱད་ཆོས་དང་། སྔོན་འགོག་ཐད་ཀྱི་རྒྱུན་ཤེས་དང་སྨན་བཅོས་བྱེད་སྟངས་ངོ་སྤྲོད་བྱས་པས། ཐད་གཏོང་ལྟ་མཁན་མི་ཐེངས་ཁྲི་70ཙམ་ཟིན་པ་དང་། ས་ཁོངས་ཕྱི་ནང་གི་དྲ་ཚིགས་གཙོ་བོ་མང་པོ་བརྒྱུད་འབྲེལ་ཡོད་བརྙན་ལམ་བརྒྱུད་བསྐུར་བྱས་ཡོད་ཅེས་བརྗོད་པ་རེད།
རྩོམ་སྒྲིག་པ། བདེ་སྒྲོལ།